Aizawl, 17 June, 2016 (Virthli): Sinlung Hills Development Council (SHDC) Cell office ding lungphûm chu vawisun khan Mizoram Chief Minister Pu Lal Thanhawla in New Secretariat Complex, Aizawl ah phûmna hunser a nei.(www.virthli.in)

SHDC Cell office lungphûm le inzawm hin function tawi buotsai a nia, sawrkar mi pawi tak tak hai Home Minister Pu R. Lalzirliana, Finance Minister Pu Lalsawta, Parliament Secretary le Serlui bieltu Pu K. Rinthanga le Tuivawl bieltu Pu RL Pianmawia hai bakah hnam țhuoitu le inchûklai pawl hieng HSA, MZP, SSPP le council member le staff hai le mi dang dang ṭhahnemtak an ṭhang. (www.virthli.in)

Hi huna thuhriltu Mizoram Chief Minister Pu Lal Thanhawla chun Pathienin inla hrang ding le inbei dingin a  mi siem tah nawh a tia, ramhuoi bieka ei umlai indo le inbei in ei um hlaka, sienkhom Krista'n a mi hung zawngsuok hnung a ruok hin chu inbei le indo ding ei ni ta nawh a tih. (www.virthli.in)

A hril peina ah Pu Lal Thanhawla chun zo nauhai hi hmun hrang hrang hieng Mizoram, Manipur, Assam le ram dang dang India, Myanmar le ram danga hai um inla khawm ei inunauna a bo chuong nawa chuleiin tukhawm in la hrang ding ei ni nawh a ti a, hnam anga inpumkhat tlat ding ei ni lem a nih a tih.

SHDC Cell office ding chu inlak hrangna nilo in development ruolkhai taka a fetheina ding a ni lem a nih a tia, Manipur tienga helpawl hai khawma Mizoram ralmuongna chu sukbuoi lova, Pathienin inrem taka um dinga a mi dit angin Mizoram lakah buoina siem ta lo dingin a nuom thu a hril bawk. (www.virthli.in)

SHDC Cell office hi Council chairman Pu Hmingchungnunga le council member hai hmalakna zarah tuhin sawrkar hmunpui New Secretariat Complex, Aizawl ah bawl dinga hmalak mek a nia, estimate cost hi Rs. 2.16 crore niin tuhin Mizoram Finance Department chun a bawl tanna dingin Rs 40 lakh lai a sanction a nih. Hi bak hin Mizoram sawrkar chun bolero inchawkna dingin Rs 16 lakh a pek bawk. (www.virthli.in)

Lungphûm inkhawm hi SHDC secretary Lalfela Sailo in keihruoiin hlasak thiem hieng Pu Lalrawngbawla Ralte, Nk Caroline Biakthansangi, Nk Mergy Lalremruati le Pi Mary Sungte ha’n an rawlmawiin mipui fekhawmhai an in awia, Rev Lalhmunsang P/S EFCI Aizawl Presbytery in Pathien kuomah tawngtaina hun hmangin ruoi kiltlang a ni bawk.

CM Lal Thanhawla hi a nuhmei Pi Lal Riliani le sawrkar mi pawimaw ha’n an ṭawiawma, SHDC in thilpek Hmar Thangsuopuon le Hmar puon hai inhlanna an nei bawk.

Post a Comment

Powered by Blogger.