Imphal, June 15, 2016, Virthli (OPN): Pu. Lalsangzuala Varte (Sudden Muanga) chu June 12 khan Heart attack neiin Shija Hospital, Imphal panpui niin, hun iemachen enkawl ania, ventilator a hai chen sie ani a, hma a sawn thei naw leiin Sky Hospital, imphal hmuna bawk sawn niin vawisun dar 12:15 PM vel khan ami lo boral san tah a nih. Pu Lalsangsuala hi zunthlum nei ania, karhmasa khan TB (chuop tieng infection) a nei nia hrietsa bawk a nih.
Pu Lalsangzuala hi January 13, 1951 khan Thakthing, Mizoram-ah a pieng a. Inchukna tieng chu B.A. a nia, Lamka College indin tan tir lai Lecturer dinga lak hmasa hai laia thang ve in, Lamka Colege-ah Associate Professror niin Department of Mizo ah Head sin chen a nih.
Zohnathlak hai lai chu ei hriet der fur ring a uma, milim (comics) character hming inlar em em el, 'Sudden Muanga' ti chu 1977-a inthawk khan alo ziek tan a. Sudden Muanga character hmang hin Zoram politics chungcahng, Tribal Superstar, Puokruk phawirang, Kungfu anthawka Fafu Style le dang dang, 'Sudden Muanga of the World' ti heila ko chun tiem a hlaw em em a, hi comics character Sudden Muanga hin hun sawtnawte hnunga Zoram khawvel chu a hung dapsuok a nih.
Sudden Muanga hi March 1977- kum khan cyclostyle a sut in, insuo tan a nia. Issue hmasatak, 'Sudden Muanga leh Sawhthing Rukhmang' tih chu 200 copies siem suok a nih. Miin tiem nuomum an lo ti em leiin copy khawm sukpung pei niin kum 2005 lai chen a khan copy 3000-4000 lai suksuok a ni hlak a nih. Tribal Comics hai lai chu inlar tak le tiemtu tam pawl tak ni dinga ring a nih.
Pu Lalsangzuala a ruong hi an chengna Salem Veng, Churachandpur, Manipur ah vuiliem ning a tih.
Virthli chun hieng anga talent nei tha ei hei chan el hi inpam um a ti tak zet a, a sun hle bawk a nih. A maksan a suonghai Lalpa in umpui in thlamuong mawl raw se!
