By. Prof. Dr. Lal Dena.

Ei ram, Tipaimukh biela inzin taphawtin a thunawn ang ela ei inzawt rawp hlak chu, " mi ramah lamlien inhawi deu hin ei hraw a, ei ram ei tlung charin lam tha lo, lam inthir, lungkawhrawt, ei hang hraw tan el hi chu aw! a na thlawr thlawr ngei el." ti hi a ni vawng tah a. " Mi rama hai, khuo tin khawtang, lamlien blacktopin a sun zei zuoi: ei rama ruok chu blacktop hmu ding reng reng um lo el hi chu a na vong vong ie!" ti hai le, " ei pasietna hi a nasain, ei khawsakna hi chu a van hnuoi thlawr thlawr ta de aw," ti hai hi mi tin a chin a lienin tawng changlakna taka ei hmang el chu an ta ie. Ei ti ang hrimin, Tipaimukh Road, National Highway-150 inlar em em lo ni hlak, ei biel fe tlanga, Aizawl fe theina lamlien tha tak ni hlak kha, a hming NH-2 tiha thlengin a lo um tah a. Ei lampui National Highway pet sanin, State Highway mei mei, Sinzawl road tieng a mi lo inhemsan der tah. Ei lam pawimaw em em, ei lamlien nei ve sun hi a mi hum pek tu ding thuoitu ei nei ve hlawl naw'mani aw? Ei ti vawng vawng hlak. Ei ni haiin vel tam va hril a, Delhi-ah hai chen chen van tlun ve hlak inla khawm, bieltu MLA-hai hril a ni naw chun ngai pawimaw a hlaw phak si nawh. Ei khaw kar lamlienhai ve bawk hlak hi, an that tawk naw leiin, motor hraw theina dingin khaw thal nghak a tul hlak. Hospital pakhat Parbung khuoah, Community Health Centre ei nei ve a. Doctor pariet lai, specialist- hai le bu rip khuka um ding ni siin, Doctor pakhat chauhin a mi enkawl pek hlak. Ei damdawiin le Sawarkar sikulhai hlak an rem zo tah. Ei pasietna an sangin, ei khawsakna an hnuoi deuh deuh. Naupang sikul kai thei lo le a kai tasa khawm kaizawm theilo ei pung tuol tuol. Ei pasiet taluo leiin kutdaw lungril put ei tam. Sawrkarin retheihai ta dinga in bawl theina dinga thangpuina a buotsai, IAY, biel danga kumtina an sem huoi huoi hlak kha, ei ram a ruok chu election tawma chauh hmu phakin a um, chu khawm chu a neitu ding ha'n hmuphak loin thuom hnaw ang zie zangin vote le inthleng kuolna'n hmang a ni hlak an tih. Sinthawtuhai intodelna dinga sorkar remruot, bufai, chini le khawnvartui hai semna, PDS hlak chu ei bielah hmang thei ve loin ei um. Ei rama develop-na ding thil tha tak tak sawrkar mi pek, hieng, Tuiruong leilak, Sipuikawn guest house dam sukpuitling thei loa um el hi thil inzak thlak tak a nih. Ram hmangaitu indik tak, chawngpu nina changa mi bawlpektu ding dit an um ngei.

Tuta ei hotu suong um tak tak pahni hai hin, ram siem tuma thei tawp suo in kum sawm hni panga lai deu thaw an lo inlal sawk zak zak tah a. Ram hmangaina leia sorkar sin lien tak tak hai maksan dam an lo nih. Ei hmaha electiona khawm hin ' anni bawk la hei ensin nawk hram ei tiu' ti nuom khawm ei la um el thei. Amiruokchu, thang hni zen zawn ram siemna dinga theitawp suoa an ruolbawm hnung khawma hieng ringawt hi ei la hang ni el chu, a thlang tlingtu, voterhai ta dingin sim a um vawng vawng ta vieu naw maw? Ram hmangaitu tak tak hai chun, inngaituo veng veng a, " ei thlak danglam a hun tak zet ta ie" ei ti a hun el ta naw'm anih? Ei pansak Thanlon biel khawm, an hei inthlak danglama, mi tharin a hei chel zet chun, an indawk puot puota, khuo kar lam haiah blacktop luong zei zuoiin, hospital a thar nghen nghuon, community hall a thar sep sup el. Inchung ding rangva khawm an dit seng zo zai ta naw a hawi. Chuleiin, eini khawm, mi thar, tha tharin hma hei la sien chu, ei ramah hmasawnna ropui tak um ngei dingin ring a um. Mi thar ensin a hun ta hle. Inngaituo nawn ei tiu. Chuleiin, ei hmaha inthlangpui um dinga khawm hin, mani mimal ditsakna el en lovin, ei ram mi siemthapek thei ding tak zawngin, merit chauh enin, mithar zawng ei tiu, inthlak danglama, ei indinthar theina dingin.

Tulai huna ei hnamin a mamaw tak nia ka hriet chu, " ei ram enkawltu dinga Berempu tha" a lo ni tah.

In thahnemngaipui,
Prof. Dr. Lal Dena
Dated Imphal.
25 th May 2016. MU Campus,
Imphal.

Post a Comment

Powered by Blogger.