Hmar Inpui Executive meeting nei a nih
CCPUR: June 29, 2016, 11AM a inthawk khan HSA Campus, Rengkai, CCPur­ah Hmar Inpui Executive meeting nei a nih. Meeting­a hin Hmar hnam sunga affialiated pawl tum tuma thuoitu hai khawm an thang a, Manipur Tribal Movement fe mek le inzawma JAC chungthu le thu pawimaw tum tum hai chik taka ngaituo le hriltlang a ni hnungin resolution iemanizat an passed.

Hmar Inpui Executive meeting in resolution an siem hai chu­ 1.  Hmar Returnee Association (HRA) han May ni 16 Hmar Martyrs Day chu, Hmar hnam sunga Pawl/Kohran le mimal Calendar siem taphawt han ni pawimawa ngaia suksen (marked red) ni ta hlak sien. 2. NSCN (IM) Chairman Isak Chishi Swu thi chu Hmar Inpui in a sun takzet. 3. JAC Churachandpur chungthuah HSA CCPur Joint Headquarters hai lungawinawna thu ngun taka hriltlang a ni hnungin an lungawinawna a hrietthiempui a, an lungawinawna hai po po hi Hmar Inpui GHQ in JAC ah intlun pek a tih. JAC thuah HSA CCPur Jt. HQ in Press Release chen hiel an suo chu pawi a tipui hle. 4. Tribe Leaders han an induong angin Outer Manipur Tribal Forum a Hmar Inpui palai dingin Pu Robert  L. Hmar of Rengkai chu lungruol takin an ruot.

Pre­paid 9550 activate tah
CCPUR:Manipur State Power Distribution Company Ltd. (MSPDCL),Electricity Department, CCPur chun June 28, 2016 chen khan CCPur khawpui sung hmun hran hran haiah Pre­paid meter box 12550 an inbuk ta a, hi laia 9550 chu activate a nitah. Tulai hin Sielmat le Hmarveng haiah pre­paid meter box inbukna sin thaw mek a nih tiin ei thu dawngna chun a hril.

HSLC/SSC pasihai lawmpuina
CCPUR Angels’ Place, New Lane, Bungmual, CCPur chun July 1, 2016, 2­4PM inkar sung khin kum 2016 a HSLC/SSC pasihai lawmpuina Lydia’s Hall, Angels’Place, New Lane, Bungmual­ah neipui an tih.

Workshop on Peace building prog. an buotsai
CCPUR: Thadou­Kuki Students’ Union (TKSU), GHQ le Indo­Global Service Society (IGSS) hai thangruola huoihawtnain zani 11:00AM khan KKL Complex, CCPur­ah ‘One Day Workshop on Peace Building’ prog. hmang a nih. Hi huna hin Rev. Dr Kh. Khaizakham (retd) Principal, ECT in “Religious perspective on peace and reconcilation (Factors that Hinder Peace Building) ti thupui hmangin le Lalramsang Infimate, MCS/ADC Bishnupur chun “Peace without justice is only a mirage” ti thupui hmangin thu an hril.
 
Rev Dr Kh. Khaizakham chun, inremna le muongna a um theina dingin Pathien le mihriem inkarah inzawmna tha tak siem phawt a tul thu, ei rama inremna le muongna a um theina dingin Sunday School­ah naupang hai tha taka inchuktir nisien a tangkai ngei a beisei thu a hril.

Lalramsang Infimate chun, Iremna/muongna ti hi hmun danga inthawka hung intan ding a ninaw a, ei lungril le ngaituonaa inthawka hung intan ding a nih. Inremna le muongna tak tak a um theina dingin social­economic justice a pawimaw tiin a hril.

Hlawltingna chang hai lawmpuina annei
CCPUR: Munluo Phungpi Organisation (MLPO) HQ chun zani 10:30AM khan Chinkham Modern School, Zomi Colony­ah MPLO sunga hlawtlingna hran hran changtu hai lawmpuina hun an hmang a, tawngtairuolna hun an hmang bawk. Hi huna hin IRS hmu 1, Bank PO hmu 7, Class X pass 13, Class XII passed 8, LLB zo 2, Civil service a MPS hmu 1, Asst. Commissioner,Cabinet secy, Govt. of India hnuoia 1, SO 1st grade 1, MSC lecturer 2 le hlawltingna chang hai lawmpuina le tawngtaipekna nei a nih. Hi huna hin M. Thianzathang, President, MLPO; Upa Chinkham, Chief of Zomi Colony, Dr DK Mang le Michael Ginzsuan, DSO/CCPur han infuina thucha an hril tawl.


ZRO in an sunpui thu
CCPUR Zomi Re­Unification Organisation (ZRO) chun NSCN (IM) Chairman, Isak Chishi Swu thi an sunpui takzet thu an puong. Swu hi June 28, 2016 a New Delhi a thi a nih.

Workshop nei
CCPUR: Dist. Health Society/CCPur huoihawtnain zanikhan CMO Conference Hall­ah One Day Workshop on Mother and Child Tracking System & Health Management Program system nei a nih. Hi huna hin Ibomcha, State Data Manager, NHM resource person in a thang a, i/c Medical Officer hai, DPMU staff hai bakah private hospital a Managing Director hai an thang.


Bandh le stirke thaw lo dingin an ngen
CCPUR: YMA Lamka Branch chun July 7&8, 2016 hai khin Diamond Jubilee an hmang ding a ni a. Hi le inzawm hin Civil Society Organisation hran hran, Assn. , JAC le a dang dang hai chu an Diamond Jubilee sukbuoi thei dinga Bandh/strike thaw pek lo dingin Diamond Jubilee Inf. &

Publicity Sub ­Committee chun ngenna an siem.
PREPAK chairman hlui le a driver thattuhai man
IMPHAL: PREPAK Chairman hlui N. Nabachandra & Nongrenkhomba le a driver, L. Sanjit hai thattu mi 5 hai chu 7th MR Complex, Khabeisoi­ah man an ni tah. Anni hi KCP (KK NganbaGroup) a mi an nih tiin L.M. Khaute, DGP, Manipur chun zanita a office­a Chanchinbumihai an hmupui huna a hril. N. Nabachandra le L. Sanjit hai hi June 21, 2016 zana 7th MR Complex, Khabeisoi a kap hlum an nih. Mana um hai chu­ self­styled Major Th. Gauri (25) s/o Ibomcha of Wangoo; Ch Manglemjao (63) of Nagamapal Singjubam Leirak ; T Sanjit  (42) of Keirenphabi; A Kingson of Thangmeiband  le  L Naocha (24)  s/oBasanta hai an nih.

Darkar 24 sung power pek tum
IMPHAL: Zanikhan Dynasty Hall, Classic Grande Imphal­ah Joint Electricity Regulatory Commission (JERC) for Manipur & Mizoram, Manipur State Power Company Ltd. (MSPCL) le Manipur State Power Distribution Company Ltd. (MSPDCL) hai thangruolin one Day Conference on  Electricity and Related Issues Sensitization in Manipur nei a nih. Hi Conference a CM O.Ibobi Singh in thu a hrilnaa chun, State sawrkar chun kum 2019 chena khin nitin darkar 24 sung power pek a tum tiin a hril. Chun, prepaid metre hmang a nia inthawk electric fee a lut tha ta a, kum 2015­16 in Rs. 11 crore hmu a ni ta a, kum 2013­14 khan Rs. 4 crore chau hmu a nih tiin a hril.

Moirang Keithel­ah search operation
IMPHAL: Zani sun dar 11 vel khan Bishnupur District Police Commando han Moirang Keithel hmuna dappui an thaw a. Identity Card mumal nei lo mi 24 hai chu thu indawn chieng dingin Moirang Police station­ah an peklut.

Brig.  HS Cheema in Sainik School a kan
IMPHAL: Brigadier HS Cheema, Commander, Zakhama Brigade chun June 27, 2016 khan Sainik School, Imphal a kan a, ‘Life in Olive Greens’ ti thupui hmangin students le teachers hai hmaah thuhrilna a nei bakah Sainik School Imphal cadets hai chu NDA lut thei dan lampui tum tum hai hrilhrietna a nei.

Kum 10 lungin intang dingin
IMPHAL: A monu ngei suolluitu Mongjam Phulendro (60) of Mayang Imphal Thongkhong Awang Leikai chu zanikhan Session Court, Imphal West Judge Maibam Manoj chun kum 10 lungin intang ding le Rs. 50,000 inchawitira hremna pek dingin a chungthu a rel. March 28, 2012 a kha Phulendro hin a monu kum 33 mi a suolluia intum a nih.

KYKL cadre  man
IMPHAL: Thoubal District Police Commando le 2­Assam Rifles thangruol han zani zingkar 9AM khan KYKL cadre 2nd lieutenant Thoudam Bisheswor @Ricky @Ibungo (32) S/o (L) Th. Tomba of Thounaojam Mamang leikai of Khongjom chu Slope land high school bul lai an man. Thoudam Bishewor hin kum 2000 a kha Simon Umathel fethelnga KYKL zawm le Khongyon, Chandel district­ah army No. 385 of 11 batch hnuoia training la niin Police chun an hril.

Union Cabinet sawidanglamna
NEW DELHI: Union Cabient sawidanglamna chu July 6, 2016 khin nei a ni el thei tia hril rik nawk a nih. Hi huna hin Minister of state Piyush Goyal le Dharmendra Pradhan hai chu Cabinet minister­a hlangkai anni el theia hril le junior minister thar iemanizat laklut belsa anni el thei tiin ei thu dawngna chun a hril. Tuhin PM thangsain minister 70 an um a, a tam takah minister um thei zat hi 82 a pel naw ding ti a nih.

Asam­ah AIIMS indin ding
GUWAHATI: Sawrkar thlungpui chun Rs. 1000 crore sengin Assam state­a Kamrup district­ah khum 750 um theina ding All India Institute of Medical Sciences (AIIMS) indin a tum. Union Cabinet in a pawmpui hun hunah sin tan nghal ning a tih tiin Union Health & Family Welfare Additional Secretary Arun Kumar Panda chun a hril. Hi Hospital­a hin super­specialist department 18 um a dinga ti a ni a, a bawl na ding ram acres 571 a lien chu zani hmasa khan Assam CM Sarbananda Sonowal in Mr Panda kuomah an hlan tah.

Dy. CAG dingin Nand Kishore
NEW DELHI: Mr Nand Kishore chu Deputy Comptroller and Auditor General (CAG) dingin zanikhan ruot a nih. Mr Kishore hi 1981 batch Indian Audit and Account Service (IA&AS) officer niin tuta Additional Deputy Comptroller and Auditor General ni lai mek a nih. Hi dungzui hin September 1, 2016 a inthawk India Govt. hnuoia Secretary hai pay ang hmu tang a tih tiin Deprtment of  Personnel and Training thusuok chun a hril.

APSC (Prelims) a eini mi tling hai
GUWAHATI: Assam Public Service Commission (APSC) huoihawtna hnuoia Combined Competitive Examination­2016 Preliminary Result chu puong a nita a, ei ni mi tling ei hriet thei hai chu hieng a hnuoia hai hi an nih. Mains Exam le personal interview haia fethlenga hlawtlingna hung chang seng dingin HT chun a ditsak.(source:virthli)
 1. James A. Songate
2. Lalsiempui Songate
3. Jonathan Vaiphei
4. Mark Khawzawl
5. John Hranngul
6. Ralrunngam Hmar
7. Phyllis Hrangchal
8. Ruthi Sellate
9. Zokungpui Pakhumate
10. Peter Kungate.

CCPA in Parliament Monsoon Session July 18 a inthawk tan dingin 
NEW DELHI: Home Minister Rajnath Singh inrawinaa Cabinet Committee on  Parliamentary Affairs meeting chun Parliament Winter Session chu June 18, 2016 a inthawk August 12, 2016 inkar sunga nei dingin a recommend tiin Parliamentary Affairs Minsiter M. Venkaiah Naidu chun reporters hai kuoma a hril. Parliament Monsoon session um ding hi a tul dan izirin ni 2/ 3 chen suksei thei ni bawk dingin a hril.

Parliament Monsoon session hi sitting vawi 20 um a ta, hi hun sung hin Goods and Services Tax (GST) Bill thangin Bills thar 25 vel pass dinga phar beisei a nih tiin Mr Naidu chun a hril. GST Bill hi tuta tum chu pass ngei a beisei ta thu hrilin hi bill pass a hung ni theina dingin Opposition parties hai chu thlawp seng dingin a ngen.

Sawrkar thlungpui chun GST bill hi India mipui tamlem hai ta dinga thil tha a ni leiin inlungruolna thatak hnuoia pass ngei tumin lampui a dap a, thlawptu khawm a hma nekin a hau ta a, state tin a huomsa leiin bill pass naa hin party tin an thang a nuom a, tuta tum hin inlungruolna (consensus) a um theinaw khawmin sawrkar chun pawmpui ngei a tum ta thu a hril.

Finance Minister Arun Jaitley chun, Congress in hi Bills­a thil thenkhat siemthat an ngenna leia an dodalna thuah reporter hai indawnna dawnin, Congress thangin political parties tin hai chu hriltlangpui dingin sawrkar an pei zing thu a hril. GST Bill hi Lok Sabha a chun pass a nita a, sienkhawm Rajya Sabha­ah BJP minority an ni leia Opposition Congress in an dodal tlat leia Rajya Sabha­a lan tang a nih.

Parliamentary Affairs Minsiter M. Venkaiah Naidu chun, pending Bills Lok Sabha­ah 11 le Rajya Sabha­ah 45, a rengin pending bills 56 a um a, hieng hai baka hin bills thar 25 vel tuta session sung hin phar beisei a ni thu a hril.

Kerala Dy. Speaker dingin V. Vasi
THIRUVANANTHAPURAM: Mr Vasi chu zanikhan Kerala Legislative Assembly Deputy Speaker dinga thlangtling a nih. Mr Vasi hi sawrkarna siemtu Left Democratic Front (LDF) member a ni a, an khingpui Opposition United Democratic candidate Mr I.C. Balakshnan a hneban a nih. Vasi hin votes 90 a hmu a, Mr Balakrishnan chun votes 45 a hmu a, vote pakhat  invalid vote a ni a, member 5 in vote laknaah an thangnaw bakah Speaker P. Sreeramakrishnan in vote a thlak nawh.

NH­44­ah Zu zawr khap
SHILLONG: Meghalaya­a East Jaintia Hills district  Administration chun Under Section 144 CrPC hnuoiah National Highway­ 44 a Restaurants le hotel haia chun licence nei Bars hai ti lovah Zu zawr khapna thupek an suo. Tulai hnai ela Sonapur hmuna Bus pakhat eksiden leia mi 25 lai zetin thina an tuokna le inzawma hi khapna thupek hi insuo a nih.

Drugs Rs. 3 crore manhu leh mi 3 man
SHILLONG: Zani hmasa khan Meghalaya state khawpui Shillong­a Khyndailad an ti hmuna Hotel pakhatah Narcotics Control Bureau (NCB) pawlin nuhmei pakhat le pasal pahni hai chu heroin kg. 1, amphetamine mum 20,000 le Pistol pakhat leh an man. Drugs mana um hi Meghalaya state a ding chun a tam tak tum a la nih. Drugs mana um hi market rate a chun Rs. 3 crore  vel ning a tih tiin Isaac Kharkonger, Deputy Commissioner of Custom Preventive, NE region chun a hril.

July 7 chen PS custody­a um dingin
MUMBAI: Wanted gangstar Kumar Pillai chu zanikhan Mumbai Special Court in July 7, 2016 chen Police custody­a la um phawt dingin a rel. Mr Pillai hi tukum February thlaa kha Singapore hmuna man le June 27, 2017­a kha Mumbai hung phurtlung le MCOCA Court hmaa inlangtir a nih. Mr Pillai (48) hi gang pawl pakhat thuoitu niin kum 2012­a Interpol in Red Corner Notice an suo khum a nih. Pillai hin kum 1997 a inthawka kha India ram suoksan a, ramdang­a inthawk gang pawl hi a hung control niin Police chun an hril. Tuolthatna le thawluina hmanga mi sum la pek hlaktua intum a ni a, Sri Lanka­a LTTE helpawl haia inthawk ralthuom khawm lo lalut hlak nia hril a nih.

Brexit zoa EU meeting hmasa tak nei
BRUSSELS: Brexit Referrandum nei a European Union (EU) a inthawk suok dinga an in vote suok hnunga European Union (EU) rambung thuoitu hai meeting hmasatak chu zanikhan Britain thang lovin an nei. European Union­a hin rambung 28 an um a, tuhin rambung 27 an la um a nih.

EU ram thuoitu hai chun EU article 50­na dungzuia Britain chu EU a inthawk a suok fel hma chu Britain le EU inlaichinna chungthu hril an nuom naw a. Hieng laizing hinBritish Prime Minister David Cameron chun September thlaa ama thlaktu ding zawng a ni hma chu Britain in EU a inthawk a hrana umna ding thuah hma lak a tum hri naw thu a hril vethung.

Turkey­a terrorist hai chetna leiin  mi 41 an thi
ISTANBUL: Turkey rama Istanbul­a Ataturk airport­a zani hmasaa terrorist hai chetna leia mihriem thina tuok chu 41 an tling ta a, midang 90 velin hliemna an tuok bawk. Ataturk airport beitu hai hi mi 3 vel an ni ring a nih tiin Istanbul Governor chun a hril. Airport beitu hai hin airport terminal entrance vengtu silaiin an kap hmasa phawt a, chu zoin silai an kaphrut a, silai an kaphrut zo hin thichil bomb an sukpuok nawk nia hril a nih. Hi thil thawtu hai hi tu ham an nih ti chieng taka hrietna la um naw sienkhawm Islamic State group terrorist hai ni dinga ringhla an nih.

Court in Vijay Mallya July 29­a inlang dingin  
MUMBAI: Mumbai Special Court­a special Judge P.R. Bhavake chun defunct­a um tah Kingfisher Airlines neitu Vijay Mallya chu July 29, 2016, 11AM in Court hmaa inlang dingin an hriettir. Mr Vijay Mallya (60) hin Bank hran hran haiah Rs. 9,000 crores chuong loan a lak a, sienkhawm a thungkir tanaw leia case siemkhum a ni a. March 2, 2016 a kha diplomatic passport hmanga India suoksana UK a tlanhmang le cham mek a nih. Enforcement Directorate chun, India­United Kingdom Mutual Legal Assistance Treaty (MLAT) hnuoia India ram tienga thuoikir tumin hma a lak mek zing bawk a nih.

VAWISUN THUPUI
Lalpa le a hratna chu zawng unla, A hmel chu zawng rawp ro, A thilmak thawhai chu hrezing ro, A thilmakhai le a baua a rorel suokhai chu:­ Sam 105:4­5

Editorial: Thingtlanga um ei rin

Thingtlanga um hi ei rin  tawl hle. Thingtlang le phairama cheng hi an hawi dan an thlau hle leia  tlangrama um hi ei rin a nih. Hi lei hin tlangram ei inpem san a, phairam  ei pan sup sup tawl a nih. Khuo hran hrana Lal (village chief) ei tihai khawm tlangrama chun an um pei bik naw a, thingtlanga Lal tamlem hai chu mani khawsungah um ta loin phairamah an cheng ta a nih. Manipur phairama khawpui le town ei tihai chu an inthang em em a, thingtlang an thang ve si nawh. Saptawng takin facilities hran hranah phairam le thingtlang an thlau taluo a, hi leia hi thingtlangah um pei lova phairam hi ei pan tawl a nih. Ram changkang, khawte le khaw lien khawsak dan inang tlangna haia chun ei ni lai ang em em hin chu thingtlanga um hi rin a um naw nia hril a nih. Hi lei hin hmasawnna kawng hran hran haiin tlangram a tlung that a tul a nih. Phairam le tlangram hmasawn dan hi an thlau em leiin tlangram mi, phairama inpem hi ei la tam deu deu ding a nih.

Manipur sawrkar hnuoia thawktuhai po po hin thingtlanga um (posting) hi an rin seng a, mani insunga inthawka thaw thei mi tlawmte chauin an rin naw a ni el awm ie. Chuleiin, sawrkar sin lakna kawngah khawm khawsung mihai ditsak nihai sienla nuom a um. Sawrkar sin chu ei dit seng a, sienkhawm khawpui puotienga posting hi ei rin seng a nih ti inla ei hril suol taluo ring a um nawh. Hi lei hin phairama posting hmu theina dingin sum seng le thamna pek khawm ei rin nawh. Sum seng tul zat zat ei seng ngam hlak.

Sawrkar thawktuhaichau an ni nawh. Kohran pawl tum tuma thawktuhai khawm tlangrama posting pek chu an rin hle hlak. Tlangrama posting pek pastor hlim le lawm em em an um ei la hriet ngai nawh. Lo thei lo a ni leiin an posting­na hmun hi an pan hlak niin anlang. Phairam le tlangramah sandamtu zui ka tih, ti hla hi sak hlak inlakhawm , ei lungril ruk tak chun a ti naw el thei. Ei Kohran le ei kristien sakhuo hla thahnemtawk takhai hi chu a bata ei sak niin anlang. An hawi le a rinumna haia khawm thaw dinga intiem Kohran thawktuhai  hman tlangrama posting ei rin a ni chun sawrkar thawktuhai lem chu an rin ding hrim a nih. Amiruokchu, hi chungchanga hin chu a tuelkhawm ni inla indem le insawisel thei ding ei um nawh.

Thingtlanga posting hi a rinum hle ti a hretu seng ei nih. Hi lei hin sawrkar le kohran pawl tum tum hai hin  thingtlanga posting­hai hi tuta neka tam hill allowance le hamthatna tam lem pe hai sienla an phu hlie hlie. Tlangrama posting ta hai hrim hrim chu ditsak le duot an phu a nih. Training or Higher study thaw theina chance a hung inhawng chang khawmin thingtlanga thawktuhai hi ditsak bik ni mawl raw hai seh.  Tu thik thei ding an ni nawh. Hi thil hin thawktuhai thathona le phur tharna a pek ngei ring a um. Hi thil hi sawrkar policy khawm a ni a,  India rama state hran hran haiah hi policy hi hmang mek a nih. Manipur state a khawm hi policy hi indik taka hmang ve ni ngei sienla nuom a um. Tlangrama thawktuhai duot le ditsakna pek hi chu an phu bik zuol a nih.

Tlangram biela inthawka mipui rawngbawltu ding le mipui palai dinga thlangtling hai khawm hin an biel fang hi harsa an ti em em el. Election hun lai chun thingtlanga khaw kilkhawr tak tak hai khawm an sir kim vawng hlak. Thlangtling an hung ni hnung ruok hin chu motor lampui tlungna chen khawm an sir pei ta ngai nawh. Hi kawngah hin chu a tu tu khawm inpak ding an um der nawh. Hi lei hin an biel mipuihai dem le sawisel an tuok chang khawmin an hrietthiem tulna chin a um. Thingtlang khawsakna hi a harsain a rinum hle a, a chang pova an chier hi chu a ni ding hrimah ngai el hlak hai sienla an ta dinga tha a ni lem ring a um.

Thingtlang ramah sawrkarin PHC, PHSC le sawrkar office a enkawl seng lo ding hiel khawp a hawng a, thawktu indai ding tawk a pek thei bawk si naw leiin mipui chier le lungawinawna suktamtu pakhat a hung ni hlak. Hieng a ni lei hin sawrkar khawma a enkawl zo ding bak hi chu hawng naw law law lem sienla a tha lem el thei. A san chu umzie bova sawrkar sum sengna a ni leiin. Thawktu um naw lei le kai ngainaw leia office tluse ta hi tam tak a um ta a nih. Tlangrama  thawk ding hin chu Missionary lungril indik tak put a tul a nih. Chuong a ninaw chun thingtlanga thawk chu a pei bik ei um naw a ni hi!

Post a Comment

Powered by Blogger.