Responsive Ad Slot

Hmasawnna Thar | 29 June, 2016

Wednesday, June 29, 2016

/ Published by VIRTHLI
Tuibuong ni lovin Tuibong
CCPUR: Manipur Gazette Notification No.20/39/69­D dated 12­11­1969 dungzuiin Tuibuong village hming indik tak chu TUIBONG village ti a nih. Hi lei hin tuta inthawk chu records/Correspondence thawna hai hrim hrimah TUIBONG ti hmang ta hlak ding a nih tiin DC, CCPur chun June 27, 2016 khan Notification an suo.

Assessment visit an nei
CCPUR: June 24­25, 2016 inkar sung khan  Health Dept. le NHM, Manipur­a Additional Dirctor Health Services (Planning & Finance) Dr H. Ranjit Singh inrawinain Dr P. Shyamsunder Singh, Addl. (Manpower & Development); Dr L.Tomcha Khuman, Joint Director,(HR) NHM; I.Rajeev Singh,State Program Manager, NHM; A.Narendra Sharma, State Engineering Consultant, NHM ;M.Shitajit Singh, Technician,NHM  le Arun Meitram, RMNCH + A Consultant han CHC Parbung le PHC Thanlon haiah ‘Assessment Visit’ an nei. CHC Parbung­a Operation theatre um theina ding thil tul le pawimaw hai enfelin hmangruo tul tum tum hai CHC Parbung MO i/c Dr Mary Joy kuomah an inhlan bawk.


Vangai le Sangang ti lo haiah sem zo
CCPUR: Malaria department chun Malaria natna hri paitu  thokang dona dinga Long Lasting Insecticide Net/Insecticide­treated Net semna an fepui zing a, Vangai Range le Sangang PHC hnuoia khuo hai ti lo hmun dang haia chun 90 percent sem zo a nitah tiin Dr Liankhawjam, DMO, CCPur chun a hril. Tentative program/Schedule dungzuiin  tukum fur hun (monsoon season) bo hma ngeia LLIN/ITN semna hi zo tuma hma lak a nih tiin DMO/CCPur chun a hril.

Sit-­in-­protest sunzawm pei
CCPUR: Zanikhan Hiangtam Lamka­a pasaltha hai inzana bak­ah Rev.B.L. Sandam inrawinain Pearsonmun, Khominthang N. Lamka, Gangpimual le Apollo Veng han sit­in­protest an sunzawm. Vawisun June 29, 2016 hin Rev. Zathangsing Zate inrawinain Zion Veng le V. Munhoih mipui hai inthung an ta, JAC tienga inthawk K. Paukhansuan le Zam Khua Chin hai thang bawk an tih.

HWC membership fee peka thang thei
CCPUR: Hmar Writers’ Club (HWC) member ni nuom hai ta dingin Passport thlalak copy 3 le membership fee Rs. 100/­ pein HWC member dinga inzieklut thei zing a nih tiin Secretary, HWC chun inhriettirna a siem.

Chun, HWC in Pu Lalsangzuala, Associate Professor, Zoram khawvel politics hlimthla pholang le sawihning thei khawpa comic character Sudden Muanga a siem suoka tawng nasa takin a suk hausaka contribution ropui tak a nei leia June 30, 2016 nia chawimawina pek dinga program a lo siem ta chu  ama a um tasinaw leiin hun remchang danga dingin a hun sawn a nih tiin Secy., HWC thusuok chun a hril.

Saikawt HYA Hall­ah Financial Literacy Awareness
CCPUR: June 29, 2016 (vawisun) 2:00PM hin State Bank of India (SBI) huoihawtnain HYA Hall, Saikawt­ah Financial Literacy Awareness Programme um a tih. Hi huna hin inhnikna nei hai, a bikin PMEGP Loan le Agriculture Loan laa, thung zo lo hai ta dingin Bank in 30% discount a thaw pek thei ding a nih. A umzie chu, Loan thung zolo hai laia 30% ngaidam a sukfel dan lampui a ngaituo pui ding a nih. PMEGP annawleh Agriculture Loan bank­a inthawka la, fielna lekha hmu le hmu lo hai ta dingin thang ngei na chi ning a tih

Written­-cum-­Interview June 30 in
CCPUR: District e­Governance Society/CCPur hnuoia District Level Resource (District Manager) post 2 lakna dinga written­cum­interview chu June 30, 2016, 10:00AM in DC Office­ah nei ning a tih.  Post 2 lakna dinga hin mi 9 in Application form an pek a, eligibility criteria dungzuiin mi 5 chu written­cum­interview­a hin thang thei dinga ti an nih. Chuong mi 5 hai chu­ Sangsang Hauzel; Esther Nuamneiniang;Kamkholal Khongsai; Peter G.Bieklien le Michael Paul Hoakip hai an nih.

CCPur Dist. a Dist.e Governance hnuoiah Common Service Centre 91 a um a, tuhin 3/4 a function a, CSC function lo hai hi Dist. Manager 2 lak thar ding han an enkai dinga ti a nih.

Legal le Constitutional Experty hai dande
IMPHAL: Bill thar draft­na sin chu sawrkar le all Political party palaihai han Legal le Constitutional Expert­hai kutah dande dingin an rel. Hill Areas Committee thangsain hi bill a huopsa dinghai po po, tlangmi le phaimi hai leh hriltlang a ni zova induong ning a tih. Hi Bill thar hin tu hnam ta ding khawma pawitawk lo dinga siem ning a tih. 2013 batch Manipur Police Constable lakna dinga Viva Voce result chu sukfel vat ni tang a tih tiin zanita Chanchinbumihai an hmupui huna Dy. CM Gaikhangam chun a hril.

MR Rifleman a thisaa hmu
IMPHAL: Zani zing dar 10 vel khan Heingang Police station huop sunga Khabeisoi hmuna 7th Manipur Rifles campus sungah 8th IRB a Rifleman Silshi Lamka (28), s/o SS Angtil of Chandel Mantripantha Village, Chandel district chu a thisain Pukhri­ah inlang a hmu a nih. Heingang Police han mithiruong hi an va lak a, Postmortem thaw dingin JNIMS Morgue­ah an va sie. A thi nasan hriet a la ni nawh.

Works minister in a va en
IMPHAL: CM O.IbobiSingh thurawn angin zanikhan Works Ministers, Ksh.Biren Singh, PWD Engineers han Manipur University of Culture le Manipur State Film and Television Institute, Imphal office building ding bawlsa um mek chu a hmun ngeiah an va en. Hi institutions classes chu academic session 2016­17 sung ngeia tan hman dinga ti a nih. Manipur University of Culture Act, 2015 dungzuia Manipur University of Culture (MUC), Imphal building ding hi kum 2015 a inthawka bawl tan a nih. NE biela ding chun hiengang University um hmasa tak ding a la nih.

PET a la thang lohai tadinga PET hun ding
IMPHAL/CCPUR: Manipur Police Department hnuoia Constable (Male/Civil) direct recruitment 2016 le inzawma Physical Efficiency Test (PET) a la thang lo hai ta dinga PET nei hun ding puong a ni a. Hi dungzui hin Thoubal district a mi hai (including supplementary candidates) han July 1­3, 2016 inkar, 8AM a inthawk PET nei an ta, Imphal East District (including Supl candidate) han July 4, 2016;  Churachandpur, Chandel, Tamenglong, Ukhrul le Senapati District (including supplementary)  han July 5­6, 2016, 8AM; Imphal West, Jiribam thangin Imphal East, Bishnupur le Thoubal district a mi PET la thang lo hai ta dingin July 7­8, 2016, 8AM a inthawk PET nei ning a tih tiin IGP  (Adm), chun inhriettirna an suo.

Helpawl 3 man
IMPHAL: Zani zing dar 9:30 vel khan Police han Chingmeirong­ah Zeliangrong United Front (ZUF) cadre pakhat an man. Mana um pa hi ZUF ta dinga Imphal kahwpui sung hmun hran hrana sum khawntu a nih tiin Police thusuok chun a hril.

Chun zani hmasa khan Manipur Police le 6th Assam Rifles thangruol han Imphal East District sunga Takhok Palli hmunah PREPAK cadre 2 an man bawk. PREPAK cadre mana um hai kuta inthawk hin Pistol 1 le a mu 7 an man bawk.

HSLC Compartmental Examination, 2016
IMPHAL: Board of Secondary Education,Manipur hnuoia HSLC Compartmental Examination, 2016 chu July 8, 2016 ah tan ning a ta, Admit Card chu July 2, 2016 a inthawk lak thei ning a tih tiin Board chun inhriettirna a siem.

Tour­a fe hai an hungtlung
IMPHAL : DIPR huoihawtnaa Chennai, Tamil Nadu a Press Tour a fe Chanchinbumi 10 le DIPR staff 2 hai chu zani zingkar dar 8:30 khan dam  takin Imphal an hungtlung nawk tah. Chennai­a an cham sungin Tamil Nadu  Information & Publicity  minister; President IJU, President KSJU, PResident TUJ le midang danghai an inhmupui.

CCPA in vawisun Monsoon session nei hun ding
NEW DELHI: Home Minister Rajnath Singh inrawinaa Cabinet Committee on Parliamentary Affairs (CCPA) meeting chu vawisun hin New Delhi hmuna nei ning a tih. Hi huna hin Parliament Monsoon Session nei hun ding sukfel an tih. Parliament Monsoon Session hi July 18 a inthawk August 13, 2016 chena nei ni el thei a hril a  ni a, vawisuna CCPA meeting in an sukfel (final) ding a nih.

Rajya Sabha­ah pending bills 45 le Lok Sabha­ah pendign bills 5 a um mek. Rajya Sabha­a bill pending­a um hai lai hin Constitution (One Hundred and Twenty­second Amendment) Bill, 2014, Goods and Services Tax (GST) tia hrietlar a thang. GST hi Lok Sabha­ah nikum August thla khan passed a ni ta a, sienkhawm Rajya Sabha­ah BJP le thangruol hai chu minority an ni leia pass lova la um a nih. Tuta tum hin chu regional party thenkhatin an hung thlawp ta leiin pass a ni ngei sawrkar chun a beisei a nih. Bill pawimaw pendinga um dang hai lai Whistle Blowers Protection (Amendment) Bill, 2015; Consumer Protection Bill 2015 and the Benami Transactions (Prohibition) Amendment Bill, 2015 hai a thang.

NEDA hawngnaah  MNF an thang ding
AIZAWL: Mizoram Opposition Mizo National Front (MNF) chun zanikhan national executive meeting an nei a, July 13, 2016 nia Guwahati hmuna North East Democratic Alliance (NEDA) formal taka hawngna um hunah thang ve dingin an rel. Chun, kum 2018­a Mizoram Assembly election hung um dingah MNF in sawrkar siem thei khawpa hratna an chang chun Mizoram Liquor Prohibition and Control Act. banin Zu khapna dan khau lem zam dingin an rel bawk.

Remna Ni hmangpui dingin PM a fiel nawn nawk
AIZAWL: Mizoram Chief Minister Lal Thanhawla chun, June 30, 2016 nia Mizoram Peace Accord ziekni champha le inzawma Remna Ni hmangna huna khuolliena thang dingin a fiel nawn nawk. CM Lalthanhawla in tuta hma khan PM hi fielna vawikhat a lo pek ta a, sienkhawm PMO a inthawk dawnna iengkhawm hmu a ninaw leia fielna hi a siem nawn nawk a nih. Remna Ni hmang huna hin Mizoram Governor Lt. Gen. Nirbhay Sharma (Retd) le Mizoram CM Lalthanhawla hai chu guests of honour in an thang ding a nih.

NIA Official Tanzeel thinaa main accuse man
LUCKNOW: April 2 le 3, 2015 inkar zana Bijnor district sunga Sahaspur village­a National Investigation Agency (NIA) Officer Tanjil Ahmed (45) kap hlum a nina le inzawma mawphurtu taka intum Muneer chu zanikhan Uttar Pradesh Special Task Force (STF) han Noida hmuna an man.  Muneer hin NIA Officer Tanjil taksaah silaimu 24 zet a kaplut bakah Tanjil nuhmei Farzana Khatoon taksaah silaimu 4 zet a kap lut a, Tanjil chu a hmuna a thi nghal a, a nuhmei Farzana Khatoon chu hi thil tlunga inthawk ni 10 hungin a hliemna tuorzo lovin a thi ve nawk a nih.  Hi tuolthatna le inzawm hin tuta hma khan Police chun mi 4­ Rizvan, Tanzeem, Rehan le Zainul hai an lo man ta bawk a nih.

Zangnadawmna Rs. 20 lakh seng pek dingin
LUCKNOW: Uttar Pradesh Chief Minister Akhilesh Yadav chun, June 25, 2016 nia Pampore district, Jammu and Kashmir­a CRPF convoy motor helpawl han an lambun huna CRPF personnel 8 thi hai laia Uttar Pradesh mi sipai 5 hai chu an sunghai kuomah zangnadawmna Rs. 20 lakh seng pek dingin zanikhan a puong. UP mi jawan thi 5 hai chu­ ­ Kailash Kumar Yadav (Unnao), Sanjay Kumar (Jaunpur), Veer Singh (Firozabad), Satish Chandra (Meerut), le Rajesh Kumar (Allahabad) hai an nih.

BSF han thilpuokthei tam tak an dapdawk
KORAPUT: Odisha a Koraput district sunga Boipariguda area­a chun Maoist helpawl hai thupruk ni dinga ring Culvert hnuoia thilpuokthei tam tak BSF han an dapdawk. Thilpuokthei dapdawka um hai lai hin Landmines kg 5 ve vea rik 2, Gelatine tluon 24, Electronic detonators 20, battery 1, meihrui (flexible wire) metre 35­a sei le bomb siemna hmangruo dang dang a thang.

BJP worker vengtu silai lakpek
SRINAGAR: Helpawl ni dinga ringhla hai chun zanikhan Central Kashmir­a Budgam district sunga Chadoora area­a BJP worker Ghulam Mohammad Chopan vengtu (personal security guard) constable Bashir Ahmad silai chawi lai an lakpek. Ei thu dawngnain a hril danin silai chawi pasal 4 hai chu Mr Ghulam Mohammad Chopan chengnaina hin an va lut a, a vengtu Chadoora chawi lai rifle chu lapekin an fe san nawk niin a hril. Police chun lak hmanga um silai hi lakkir nawk tumin nasa takin hma an lak mek.

VAWISUN THUPUI
Lalpain in a bawl naw chun, A bawltuhai chu an inrim thlawn el a nih. Lalpain khawpui a vawngtha naw chun, A vengtu chu a meng thlawn el a nih. ­ Sam 127:1

Editorial: A hun taka hmalak a pawimaw

Mihriem hriselna hlutzie chu hril tam ngai lova mitin hriet a nih. Ei hriselna a that lai chun damnaw thei ding le natna tibaium tak haia na thei ding dam, thi thei ding dam, bawrsawm thei ding dam, taksa chau ngawi ngawi thei ding damin ei inring ngai nawh. Amiruokchu, mihriem taksa a hung bawrsawm a, natna chi tum tum ei hung invawi a, mani le mani a chang thei ta lo ei hung ni huna zet chu hriselna hlutzie, mihriem hringna derdepzie ei hung hrietchieng thei chau hlak. Ei Bible chun mihriem hringna tawizie chu sum sawtnawte a hung inlanga, a bo nawk ang el dam, hlohna ang dam le par ang damin a mi lo tekhi pek a nih. Hiengang khawpa mihriem hringna hi derdepa tawi a ni leiin a hun taka hriselna dinga hmalak hi a pawimaw a nih. A hun taka Doctor pan le an khattawka medical checkup thaw dam hi thiltha a nih. Iengang natna hri le natna tibaium khawm nisienla a hun laia hrietsuoka inenkawl nghal chun dam thei a nih. Tulaia mihriem hringna suot rawn tak le natna tibaium takel Cancer natna khawm hi a hun taka hrietsuok le inenkawlna kawngah hmalak a ni chun sukdam thei a nih.

Mihriem ei hung piengsuok a, naute hun, naupang hun, tleirawl hun, nunghak le tlangval hun dam a um a. Tleirawl hun lai hi mihriem nuna ding chun hmangthat le inthunun pawimaw lai hun le hmang that harsa ei ti tlangpui hlak. Tielrawl lai huna nun dan inhmang le suol thaw hi a awlsam em em a. Amiruokchu, lampui indika kir nawk hai chu an suol sawng naw a, a hun takah an harsuok a, an insiem tha phawt chun mifel, mi tha le mi hmangtlak an la hung ni tho tho hlak. a hun taka hmalak hi chu a tha a nih.

Ei rama bandh le economic blockade tamna san khawm hi a hun taka sawrkarin hma a lak ngainaw lei a nih. Sawrkar laka thil ngen le nawr neihai, sawrkar laka lungawinawna neihai chun a tlangpuiin bandh le economic blockade tihai hi an thaw phut ngai nawh. Hun tiemchin an nei a, hun tiemchin an pek sunga sawrkarin an thil ngen a ngaisak ngainaw leia hiengang thil hai hi ei ramah thaw a hung ni rawp el ta a nih. Ahun takah sawrkarin hma hang la hlak sienla chu ei ramah bandh, economic blockade, strike le a dang dang hai hi thaw lovin ei pumpel thei ngei beisei a um. A hun inkhel hnungah sawrkarin hma a hung lak nawk tho hlak a. Nisienlakhawm a ni ding ang ang thil a lo ni hman vawng ta hlak. Thina, hliemna le inhmangna a hung rasuok ta hlak a nih.

Thoubal District huop sunga Nungei Meitei village le Nungei Pangal Muslim village hai inkara buoina suok khawm hi April 11, 2016 daia kha intan a ni ta a. Hieng khuo pahnihai inkara buoina hi hnam le hnam thila fe thei le punlun thei a nih ti chu ei state sawrkar khawmin a hriet ngei ring a um. Amiruokchu, ei state sawrkarin a hun taka hma a lak naw leiin buoina lien lem a hung rasuok a, June 26, 2016 zana inthawk buoina hi a hung intan nawk a, a huntaka venghimtu tam lem le huntawk a tirlutnaw leiin buoina boruok a hung sosang nasa zuol a, mihriem thina le hliemna hai chen a tlung a, buoina suok thununa dingin mock bomb le tear gas shell hai kap a hung tul a; tu lem hin chu buoina boruok a sosang leiin Curfew chen zam a ni tah. A hun taka hmalak lo hi chu a pawi hle a nih.

Manipur mi han ei buoipui luoi luoi, ILPS le inzawma August 31, 2016 a Manipur Assembly in Bills 3 a lo passed khawm hi a hun takah ei state sawrkarin a tha lem ding zawngin hma lo la sienla chu tuta ang bek bek hin chu buoina le harsatna tuok pha nawng ei tih. State sawrkarin a hun taka hma a lak naw leia tuta ngirhmuna um hi ei nih. Tuhin Manipur mi, a bikin tlangmi le phaimihai po po pawm thei ding Bill thar siem tumin hma a hung lak nawk tho a, a hun lai tak khan hma lo la nisienla chu ILPS le Bills 3 hai lei hin bandh le economic blockade bakah harsatna chi tum tum ei tuokhai hi tuok der nawng ei tih. A hun taka state sawrkar hmalak naw rasuok hi dit a um naw hle.

Ei state sawrkarin Bill thar siem le pasi tumna hung neinaw sienla chu tlangmi le phaimihai inkara hin inremna hung um thei naw ni a, hnam thilah a fe el thei. Amiruokchu, a se tak chen ei tlung hmaa state sawrkar a hung har suok a, Bill thar siem le pasi tuma hma a hung lak tan hi a tha a, lawm khawm a um. Amiruokchu, hi thil khawm hi an chie sawt rem naw ni a, a hun taka state sawrkarin hma a lak vat vat hi thil tul makmaw niin anlang. A hun taka hmalak pawimawzie hi hrie a, political party tum tum hai khawma a hun laia an thiltum le rawtna siem hi sukpuitling vat dinga sawrkarna cheltuhai an nawr nuom a um. A hun lai taka hmalak naw hi ei tuorhla a nih.

Don't Miss
© all rights reserved
made with by Simon L Infimate