Dept. in Canal chotanin tui an inthe
CCPUR: June 19, 2016 nia Muolbem khawsak­a Khuga Right Side Canal chimin Canal bula um Ngakul­a inthawk tui luongsuokna a hruk leia Pu Hranglienkhum S/o Pu Phaihluothang of Muolbem Nga dila tui intling,a luongsuokna ding umnaw leia kawidar el thei dinga a um leiin zanikhan concerned Department han JCB hmanga Canal chotanin Nga dila tui intling hi an inthesuok.



Hi Ngadil­a tui a luongsuok theinaw leia intling/indil hin Dil bula um Pu Hranglienkhum chengna in bakah, Ar le ran in hai khawm tui hin a chim pil vawng a nih. (input: Felte)

A nuhmei sawisaktu Jail­ah
CCPUR: June 20, 2016 zana New Bazar Bus parking area laia a nuhmei Mrs Hatneihthieng @Thiengnu sister of Lalsiemlien of Lhangvem village sawisaktu Md. Najir Hussain (34) s/o (L) Md. Salimuddin of Keibul Mayai Leikai, Thoubal district chu zanikhan Police han CJM/CCPur hmah an inlangtir a, Court  in a rel angin Police han Jail­ah an thun tah. Police chun hi thil tlung le inzawm hin FIR No.2 (6) 2016 WPS­CCP U/S 354/338/325 IPC an registered a nih.

Airport fe ding hai Escort pek an nih
CCPUR: JAC Against the Announcement of Wanted JCILPS leader Kh. Ratan and on Implementation of ILPS Singjamei Wangma Imphal in June 22, 2016 a inthawk darkar 48 sung Manipur pumpui huopa bandh an thaw leiin CCPur­a inthawk Imphal fe ding le Airport a mi thak ding motor han harsatna nasa tak an tuok a. Hi le inzawm hin LM Khaute, IPS, DGP, Manipur hmalaknain zanikhan Airport­a mi thak ding motor thahnemtawk tak chu Police hai  Escort nain Airport panpui le Airport­a inthawk CCPur hung thuoitlung an nih. Zani khawm khan Imphal fe ding, Airport­a mi thak ding hai chu 7:00AM in CCPur Police Station a inthawk  Police han escort in Bus 1, Winter 1 le Car pahni hai Imphal panpui an nih. CCPur Police han Kangvai chen escort an pek a, Kangvai­a inthawk Moirang Police le Bishnupur Police han escort an pek a nih.

Anti­ Tribal Bills movement ni 300 tlingna ursun taka hmang tum
CCPUR:  June 26, 2016 (Pathienni) khin Anti­Tribal Bills movement chu ni 300 a tling ta ding a nih.  Tribal movement ni 300 tlingna ding le inzawm hin bandh /strike le total shutdown thaw ni naw ni a, tawngtairuolna, Mass Mourning­cum­Prayer program­a hmang ning a tih tiin JAC Against Anti­Tribal Bills chun zanikhan thusuok a siem.

Epicenter, CCPur a chun mipuiin YPA GHQ Hall, Hiangtam Lamka ah Mass Prayer­cum­Mourning program hmang an ta, hi huna hin LZ Fanai, Member, JAC inrawinain Tribal Martyrs hai sunna um a ta, All Manipur Tribal Women Union inrawinain Mass prayer nei ning a tih tiin JAC thusuok chun a hril.

Hi prog. hmangnaa hin Pu Joseph Lalrothang, President, Hmar Inpui; Lalrinliana, President, MPC; James YT Thatou, Thadou Inpui; B. Dongzalian Simte, Chairman, ZC le Gaidon Kamei, President, UNC han thuhrilna hun hmang an ta, Rev. Dr S Lalpi Vaiphei, President, Tribal Churches Leaders Forum, Manipur, Chariman, Evangelical Organisation Church, ECCI in exhortation speech nei a ta, H. Mangchinkhup, Chief Convenor, JAC in keynote address hril a tih.

Manipur­a tribal Kohran le khawvel pumpuia fellowships tin hai chu hi ni hi ursun taka tawngtairuolna huna hmang dingin JAC chun a ngen a. Movement ni 300 tlingna le inzawma Tribal Chief le tribal martyrs sungkuo hai Delhi­a tir dinga ti chu hun remchang danga tir dinga la thul hri a nih tiin JAC thusuok chun a hril bawk.

World Population Day 2016
CCPUR: June 27­July 10, 2016 inkar sung khin World Population Day­2016 chu “Zimmedari Nibhao, Plan Banao” ti thupuia hmangin Mobilization Fortnight a hmang ning a ta, July 11­24, 2016 inkar sung Service Delivery Fortnight (Family Health Mala Fortnight) a hmang ni bawk a tih. Hi le inzawm hin DFWO/CCPur chun CHC/PHCs/PHSCs/PPC &UFWC/CCPur a Medical officer i/c hai activity a um thei ang ang nei dingin an hriettir a, daily report pelut dingin an hriettir bawk.

Hindi tawng hmang hai lai Gospel camp
CCPUR:  June 22­24, 2016 inkar sung khan Gospel For India host­nain “New Creation” ti thupui hmangin Prayer Mount, Kawnpui, CCPur hmunah Gospel Camping (Vacation Children Development program) nei a nih. Gospel camping sunga thuhriltu chu Pastor Laltinsang Khawbung (Arunachal Pradesh) niin zani zantieng 4PM khan hun Camp kharna hun hmang a nih. Gospel camping­a hin naupang 30 zet an thang a, Pathien thu le hlaa inpawlkhawmna nei a ni a, naupang 18 zetin piengtharna an chang niin Rev.Khuala, Secretary a inthawk ei thu dawngna chun a hril.

Application form lak thei a nih
CCPUR: Manipur Technical University, Imphal­a B.Tech Courses (Civil Engineering, Computer Science & Engineering, Computer Science & Engineering, Electronics & Communication Engineering le  Mechanical Engineering) inchuk nuomhai ta dingin Rs. 200/­ (General/OBC) le Rs. 100/­ (SC/ST) pein DC Office, CCPur­ah application form lak thei a nih. Fill up zoin Application form hi July 2, 2016 chenin hi office­a bawk hin peklut thei ning a tih.

Pre­paid electric hrui an kei mek
CCPUR: Electricity Department, CCPur chun Zenhang Lamka area­a Electric Pre­paid thawna ding Electric hrui (cable) an kei tan mek. Zanikhan CCPur Police station­a Transformer­a inthawk cable an tlungzawm (fit) zo ta leiin Zenhang Lamka area­a chun pre­paid electric a pek thei tan ta ding a nih.

Manipur-ah Registered Co-Operative Societies 9258 a um
IMPHAL: Manipur state sungah Registered Cooperative Society 9258 a um a, hieng Co­operative Society­hai hi Manipur Co­operative Societies Act (MCS) Act hnuoia in registered an nih. Manipur state a hin Cooperative movement 1938 a lo intan ta a nih. State  Durbar of Sir Churachand Singh, His Royal Highness chun kum 1938 khan Central Cooperative Society Act, 1912 chu lalutin a lo hamng tan ta a, Manipur a Cooperative society registered hmasa tak chu “The Manipur Co­Operative Bank Limited (tuta um ta lo) a nih tiin official thusuok chun a hril.

Co­operative Department, Manipur chun hieng law­hai hi a hmang mek a nih. The Manipur Co­Operative Societies Act, 1976, The Manipur Co­operative Societies Rules, 1977; The Manipur Societies Registration Act, 1989; The Manipur Societies Registration Rule, 2004; The Bombay Money Lender Rules,1962 le MLR&LR Act, 1960 (some provisions).

NCDC thlawp le thangpuinain Integrated Development Project (ICDP) indin le hieng District haia hin thaw an ni tah. Bishnupur Rs. 201.93 lakh; Thoubal Rs. 412.71 lakh, CCPur Rs. 188.43 lakh, Imphal East Rs. 832.54 lakh; Imphal West Rs. 700.09 lakh le Ukhrul Rs. 558.60 lakh. Tuhin Primary Milk Co­operatives, Co­operative Union Limited­a affiliated han nitin bawngnene litres 4000 an thawsuok a nih. Hi Union hin sawrkar thlungpui in Financial Assistance a pekna hnuoiah Intensive Dairy Development project (IDDP), Phase­III &IV an indin a, tuhin chu hi Project hi National Dairy Development Project (NDDP) tia ko a ni ta a, nitin bawngnene litres 10,000 thawsuok an tum a nih. Chun, Central Dairy Farm, Porompat khawm July 1, 2010 khan state sawrkarin Co­operative Union Limited kuomah an hlansawng ta a nih.

PREPAK in an that a ni thu
IMPHAL: PREPAK Chairman hlui Ningombam Nabachandra alias Naba alias Nongdrenkhomba (57) s/o (L) N. Iboyaima of Thangmeiban Lourung Purel Leikai le Leishangthem Sanjit @ Chingkhei (41), s/o L. Lal Singh of Thangmeiban Hijam Dewan Leikai hai kha anni pawl that niin Captain Achouba, Publicity Officer, Department of Publicity & Propaganda, PREPAK chun thusuok a siem. Nabachandra hi an pawl kalzawnga a um lei le an pawl sum tam tak a sukchavai leia an that niin a hril. Sanjit hin Nabachandra a thangpui leia an that ve niin a hril bawk.

Police han tear gas an kap khum
IMPHAL: Kh. Ratan Wanter­a puong a nina hlip dinga daerkar 48 bandh thawa um thlawptu han zanikhan Uripok Kangchup Road, RIMS Road, Lamphel Sanakeithel, Lilasing Khongnangkhong, Chingmeirong, Dingku Road, Khurai Lairikyengbam Leikai, Salanthong le Lamlong Thong hmun haiah lampui an dang bakah human chain an thaw a, Police han mipui hnawtdarna dingin tear gas an kap a, mi iemanizat an hliem. Zani zanril khan bandh hi a tawp tah.

Heingang Police station­ah an inhlan
IMPHAL: Zani hmasa Pallel bazar, Chandel district­a tu ti hriet ngailo han an thuoihmang nia hril, Mayanglambam Indrajit @ Naoba Singh (23), s/o M. Amujao of Umathel Maning Leikai, Thoubal District chu zanikhan 30­Assam Rifle han Heingang Police station kutah an inhlan a, helpawl niin an intum.

JCILPS in an hniel
IMPHAL: Police han bomb expert le National Revolutionary Front, Manpur (NRFM) ta dinga bomb siemtu nia an intum leia bomb hmangruo le an man Nameirakpam Mangi chu an hriet ngainaw thu le JCILPS Sagolband Unit a Publicity in­charge nia SP, Imphal West in an tum chu JCILPS chun an hniel a. JCILPS Sagolband Unit a um naw thu JCILPS Convenor B.K. Moirangcha chun zanikhan a hril.

Brexit Referendum result puong, EU a inthawk Britain a suok ta ding; 
Britain PM in an ban ding thu a puong
LONDON:  Britain mipui chun zani hmasa khan  Britain ram chu European Union hnuoia la um zing ding le dingnaw thuah vote an thlak (Brexit Referendum) a, European Union­a inthawk suokdawk dinga dit pawl chun hratna changin UK Electoral Commission chun, Britain­in European Union a suoksan ding thu a puong ta a nih. Vote lak hunah tha ti zawnga vote pe  mi 52% le European Union­a la um zing tha ti zawnga vote pe 43% an um a nih.

Brexit lei hin pound hlutna chu nasa takin a tlahnuoi nghal a, kum 1985 a inthawk US dollar lakah Britain pound hlutna a tlakhnuoi nasa tak tum a ni a, result puong a ni le inruol khan pound hlutna hi 100­ah 3 in a kiem/tlahnuoi nghal a, Euro laka pound hlutna khawm 6.5 in a tlahnuoi dawr nghal a nih.


Referendum result puong a ni zo hin British Prime Minister David Cameron chun, Brexit Referendum­a a hlawsam leiin PM a ninaa inthawk an ban ding thu a puong a, October, 2016 khin PM thar dingin office a chel hman beisei a nih.

EU­a inthawk suokdawk dinga campaign thawtu tak chu UK Independence party leader Nigel Farage a ni a, kum 20 lai zet EU a inthawk suokdawk dinga campaign hi a lo nei ta a nih. Nigel Farage chun result puonga um chu mi naran hai ta dinga hratna a nih tiin a hril.

Britain sawrkar chun mipui ngaidan la lovin kum 1973 khan European Community, tuta European Union (EU) hung ni ta hi a zawm a. Kum 1975 khan EEC a thang zawm pei ding le dingnaw thuah vote lak a lo nita a, sienkhawm la thang zawm pei dit tu an tamlem leiin a la thang pei a, kum 1990 vela inthawk khan EU­a la thang zawm pei ding le dingnaw thua hin boruok thar nasa takin a hung um nawk a, chuonganga hun hung fe peiin zani hmasa khan vote hi lak nawka hung um a nih.

EU hnuoia hin rambung 28 an um a, chuong EU member rambung dang 27 hai chun Britain chu Europe a economy lientak pahni a ni lei le Europe rambung hai kara inlaichinna suksiein rambung dang hai a kangkai pei inlauna lientak an nei leiin Brexit Referendum hi an ngaiven hle a nih. European Union danpui ‘Treaty on European Union’Article 50­na dungzuiin EU member han an nuom chun EU an suoksan thei ti an ziek a, chu thangsana Brexit referendum hi nei/ mipui vote lak a nih.

EU­a inthawk suok tha ti lo tienga hotu tak chu British PM David Cameron a ni a, Britain in EU a  ensan zatin Europe in harsatna nasa tak a tuok hlak thu hrilin, Britain in EU a suoksan chun sum le pai thuah harsatna le buoina nasa tak tlung thei a ni thu hrilin EU a inthawk suok dinga Brexit thlawp lo dingin campaign nasa takin a lo nei a, sienkhawm a hlawsam ta leiin PM a ninaa inthawk an ban ding thu hi a puong ta a nih.

EU- a inthawk suokdawk nuom pawl hai ruok chun Britain in nitina pound maktaduoi 50 zet Europe­a a pek hlak chu BritishEconomy siemthatna dinga hmang thei a ni ding thu le, Europe­a raltlan tam tak lut mek hai chu EU a suoksan chun dan khau lem hmangin an rama raltlan lut ding hai a control thei ding thu; Hmatieng peiah EU a innghat lovin Britain chun amaa thutlukna a siem thei a pawimaw a, chuleiin EU hi a suoksan a tul a nih ti chu Brexit thlawptu hai campaign hla a nih.

President Francois Hollande chun, Britain­in EUa suoksan hin nghawng thalo tak a nei ding thu le United Kingdom chau ni loin European Union khawm nghawng a nei ding thu a hril.

Finance Minister Arun Jaitley chun, Britain in EU a suoksan leia ramin harsatna a tuok thei ding hai haiah inbuotsai tiin a hril. External Affairs Ministry chun, Britain mipui ditthlangna sukchieng a nit a a, India chun EU le Britain hai le inlaichinna thalem an nei theina dingin hma la pei a tih tiin a hril.

VAWISUN THUPUI
Lungphum rem tasa naw chu tukhawma lungphum ding an rem thei si naw a, chu lungphum chu Isu Krista chu a nih. ~ 1 Korinth 3:11

Editorial: Inthlang boruokah

Manipur Asssembly election hun nawk ding chu a hnai ta hle a. Assembly election hi kum thar, 2017, kum bul tan tir velah ei nei ring a um. Hi lei hin Manipur chu inthlang boruokah ei um mek a, Hotel titina haia khawm ei hril rawn pawl tak chu Assembly election hung um ding thu hi a nih. Hi election a ngir tum hai le an rawihai chu inthlang boruoka hin an um ta a, Assembly election hung um ding chungthu hrilpui chu an inhnik zawng tak a nih. Tawngbau tha hmangin an nun an nem tan a, mihai theida zawng hril aninlauin an tawngbau khawm an fimkhur ta hle. Vote dit anni leiin an thaw dan ding hrim a nih. Hi lei hin mipui tiengpangin politician­hai thu hril hai hi a pawm dan le a ngaithlak ei lo thiem ve a tul a nih. Election tawm hin chu an tawngbau a tha a, an nun khawm an nem a, ram le hnam invawina le hmangaina khawm an nei lien hlak hrim a nih. Mi thangpui khawm an pei a, sawr tangkai thei anni lai tak a nih. Amiruokchu, mipuihai an lakah infa awk pal ei tih ti hi inlau a um a, fimkhur hle ding a nih.

Inthlang boruokah ei um mek a, ram keithuoina sin thaw dinga inpe han ram enkawl le keithuoi sin thaw an tum dan khawm an puongdar tan mek. Tu party khawm hung sawrkar sienla, an hril anga an thaw thei chun a tha tawl hle. Nisienlakhawm tu chena harsatna ei nei chu, tu party khawm sawrkar sienla, inthlang ding tawm le inthlang laia thaw dinga an hril hai an sukpuitling tha nawk ngai si naw hi a nih. Hi lei hin inthlang laia an thu hril le an thutiem sukpuitling thei tak tak ding mi le party hi bichieng a, ei thlang thiem a tul bek bek el a nih.

Mithiem le thil chinchang hrie, politician le party tum tum hai thil thaw dan lo suizui hlakhai chun, tuta Centre­a sawrkarna chel mektu BJP khawm hin election hun laia thutiem le an manifesto a an ziek 200 chuong zet hai laia 18 chau an la sukpuitling niin an hril. Mani thutiem sukpuitling zo vawng hi chu thil harsa ni ngei a tih. Lok Sabha Election nuhnung tak kha May, 2014 a ni a, tuhin kum 2 neka tam an sawrkar ta a, an thutiem an thaw le sukpuitling zata inthawk inkhi chun mipui beisei ang em em chu an ninaw a, thang an lak nasat zuol a tul hle. Mipui duthusam sukpuitling zo chu um naw nihai. Amiruokchu, an thutiem hi a awm tawk bek chu an sukpuitling hi India mipuihai chun ei beisei tlat a nih ti hi  an hriet nuom a um.

Inthlang boruok hin mipuihai hi a min sil (bathe) invet hne hle hlak a. Thu hril chi hran hran ei ngaithlak a, manifesto chi tum tum ei hriet hlak bawk a, hieng thil hai hi ngaidan siemnain ei hmang rawp hlak. Tukhawm hin inthlang boruokah ei um a, thu hril le manifesto haia inthawkin inkhina ei siem nawk ding a ni chun, a hril thiem thiemle manifesto nei tha tha an hung dingchang nawk ding tina hung ning a tih. Hi khela hin sum le pai, thilpek le thlemna chi tum tum hung um nawk ngei a ta, chuonghai chun ei lungril keipengin an chang kam haiah ei inawk tawl nawk el dim maw? Mipui tiengpang ei inveng fimkhur a, an chang kama awk ta lo dinga lungril thar le ngaituona thar ei nei a, ei put a tul bek bek a nih. Vote hlut lai a ni leiin candidates le party hran hran hai chun an vote hmu tam theina ding a ni phawt chun thaw rin an nei naw ding a nih ti chu a chieng sa a nih.

Inthlang boruok hin a min sil vet hne hle hlak a.Candidate tin le party tin chun vote inchawkna dingin pawisa chu the larin an hung hmang nawk ngei ding a ni a, pawisa thil thaw theina hi ei do zo a tul a, vote neihai chu do zo ngei ngei dinga tuta inthawka ei lo insingsat that nuom a um bek bek a nih. Hi thil thaw theina (power) hi ei do zonaw chun ei hmabak ding chu a pangngai a hung ni nawk tho tho ding a nih. Hieng hi inthlang zata ei lo tuok ta hlak a ni a, ei ngirhmun hi dit umlo takel a nih.

Inthlang boruokin a min chie mek a, tu hai am sawrkar thar siem ding ti nekin tu hai am sawrkar siem dinga tha ning an ta, tiah hin mipui han ei sie le tha hrietna thienghlim tak sengin lo ngaituo seng inla nuom a um a, hi thil hi ngaitha chi ni lo, thil pawimaw bek bek el a nih. Tu amanih hril thiem lei le sum tam tak ei hmu lei ni lovin, mani ngeiin suichiengin, ngaituo chet chet inla, chu taka ei thutlukna chu huoisen takin fepui annawleh hmang ngam ve ta inla nuom a um takzet el. Mi tha, mi indik le mi ringum bakah sawrkar tha hi ei ramin a mamaw ta a nih.


Post a Comment

Powered by Blogger.