HNU GHQ in Manipur CM an inhmupui
IMPHAL/CCPUR, June 18, 2016 (HT): June 16, 2016 zantieng 5:00PM khan Hmar National Union (HNU) GHQ thuoitu han Manipur CM O.Ibobi Singh chu a chengna in­ah an inhmupui a, darkar khat  sung zet an inbiekpui niin Alfred Lalremthang Pudaite, Secy. Info. & Publicity, HNU GHQ chun ei chanchinbu palai a hril.

CM O.Ibobi Singh an inhmupui huna hin ram le hnam le biel mipui hai ta dinga thil tul le pawimaw tum tum hriltlang a ni a. December 12, 2014­a Manipur CM O.Ibobi Singh in a hawng ADC Pherzawl tuchena la function thei lova um chungthu hriltlang a ni huna Manipur CM chun, ADC Pherzawl tha taka a function theina dinga hma a lak ding thu, thawktu ding khawm buoipui nghal a ni ding thu HNU thuoitu hai a lo hril.



Chun, National Highway­ 150 (tuta NH 2) Tipaimukh Road construction 186 km. Point a inthawk chawlsana um (a bikin Hmar ram intan ding china chawlsan) a ni chungthua chun, CM O.Ibobi chun,  Pherzawl chen tlungna ding khawm sanction a um zing ta a, central tienga inthawkin pioner­hai hi an ringzo tanaw deu bawk leiin sin tan el thei lova la um a ni thu, hi thil hi in MLA khawmin a kan zing  a ni leiin hre vawng a ta, state funding a ninaw leiin nuom angin a hrat theinaw a nih tiin a hril. Hi thua hin MLA Pu Chaltonlien Amo khawmin ama fund­a mi hmanga nawr ding le PWD a inthawka sanction dinga ngenna a remti niin ei report dawngna chun a hril.

Pherzawl ADC hawng tuma Parbunga HSLC Exam centre thu le Higher Secondary dinga declared chu kum nawk session thara inthawk tan hman ngei dinga hma lak a ni thu, teacher ding khawm tuolsung/local mihai a tam thei ang sie ni dingin CM chun a hril.

33/11KV Power Sub Station chu in MLA nekin kan vawi lem hiel ka ring a, Department mihai ka vau zing a ni a, a var vat beisei phawt ei tiu. Vangai mipui ta dinga lifeline Jiri­Tipaimukh Road  hi ka bawzui zing a, zani khawmkhan Tuiruong leilak bawlna ding Rs. 1 crore le a chanve  ka lo sanction nawk char a nih tiin CM chun HNU thuoituhai a lo hril.

Hmar Returnee Assn. meeting ko
CCPUR:  June 19, 2016 (Pathienni) 12:00Noon khin Pu Lalsiemkung In, Saikawt, CCPur­ah Hmar Returnees’ Association inkhawm (meeting) ko a nih. Hi huna hin khuo tina member hai a kim thei ang taka thang seng dingin Hmar Returnees Association thuoitu han inhriettirna an siem.

Leisen suok Class X&XII pass hai award inhlanna
CCPUR: Leisen, CCPur khawsuok, tukum Class X le XII exam­a hlawtlingna chang hai award inhlanna June 19, 2016, 1:00PM khin H.L. Daka Memorial Hall, HSA Campus, Rengkai­ah nei ning a tih. Hi huna hin Leisen mi taphawt le mitin a nuom taphawt thang dingin Leisen Football Club chun fielna a siem. Award semna hi Pu Lalvullien, Social Worker hmalaknaa nei ding a nih.

Solar street lamp a nei vat ta ding
CCPUR: HYA GHQ President Pu Laldawnlien Varte le Pu Samson, President, HYA Rengkai Branch han nasa taka hma an lakna zarin Police Station a inthawk Rengkai leilak chen tuta inthawk sawtnawte hnungah Solar street Lamp inbuk vat a ni ta ding a nih. Zanikhan AE Electric Dept. hnuoia a fit tu ding hai, General Electrical Company Chandigarh, Upa Laldawnlien Varte, Prez. HYA GHQ, Tv. Lalthanzau, Prez. HSA Tuithaphai JHQ le Pu Samson han a hmuna enfelna an nei. Tuta inthawk ni 12 hnunga Solar lamp hi fit hman beisei a nih tiin company officials hai chun an hril.

Malaria positive 2
CCPUR: District Malaria Department, CCPur chun June 1­15 inkar sung khan Damnaw mi 960 hai thisen lain an enfel a, Malaria positive 2 an hmusuok a, Malaria PF ve ve an nih. Malaria positive hmusuoka umhai hi Saikawt PHC huomsunga Leisang PHSC le Singngat PHC huomsunga Suangdoh PHSC haia inthawk pakhat ve ve an nih.

Cycling Trip­summer activity
CCPUR: Savior’s Public School, Mission veng chun June 17, 2016 hin an student hai ta dingin “Cycling Trip­Summer Activity for Environmental Awareness” buotsai an tih. A thang ding student hai chu school T­Shirt inbel a, mani fak ding hai chawia 9:30AM in school tlungkim seng dingin Principal chun an hriettir.

JAC in fimkhur dingin a ngen
CCPUR: JAC Against Anti­Tribal Bills chun zanikhan thusuok siemin, JAC le Outer Manipur Tribals’ Forum (OMTF) in Bills 3 hai dodalna le inzawma ni 10 sung aw ding National Highways haia Economic Blockade an thaw mek le inzawma phaimi han counter blockade hmun tina an thaw le inzawmin Manipur phairam biel­a inzin le fe tribal hai chu fimkhur dingin a ngen.

CDEEU in DCG mi 8 kuomah an inhlan
CCPUR: Churachandpur District Education Employees’ Union (CDEEU) chun zani 7:00AM khan ZEO Office­ah mi 8 hai kuomah Death­cum­Gratuity (DCG) inhlanna an nei. Hi huna hin Mr Lalthanlien Joute, Gen. Secy, in mi 8 hai introduction a nei zovin member han minute khat sung sunna hun totawkin hun an hmang a, CL John, Vice President, CDEEU in mi 8 sungkuo hai ta dinga tawngtaipekna a nei a; H. Pau Za Cin, President, CDEEU in condolence message a hril.



Zanita CDEEU in DCG an hlan hai chu (L) Onkhomang Haokip, Asst Headmaster of GM H/S; (L) Kaizakham, Teacher of Lhingsiphai Jr H/S; Fimtuothang, Teacher of Saikot H/S ; Laltlanmawi, Grade ­IV of Bijang Loubuk Jr H/S; Lienkhuol Gangte, Teacher of Vungzagen Hr Sec School; J.C Thangsiem, Teacher of Lanva H/S; Nemkhanniang, Teacher of  Phungkhothang govt H/S le Tualliankap, Teacher of Kangkap UPS  hai an nih. Mi pakhat peiah Rs. 30,000/­ seng inhlan an nih.

FAST in 18th Raising Day an hmang
CCPUR: June 17, 2016 1pm khan HL Daka Memorial Hall, HSA Campus, Rengkai, CCPur hmunah Frienship Athletic Sporting Team (FAST) chun 18th Raising Day ursun takin an hmang. Hi huna hin Chief Guest in Pu M. Gouzamang Guite EM, ADCC & MDC, New Lamka East, Guest of Honour in Pu Joufonlien Joute Chief of Rengkai le Functional President in Pu Richard Laltanpuia Asst. Gen. Secy., HSA GHQ hai an thang a.FAST chun anni tadinga mi thahnemngai Tv. LRS Puruolte, Pu Ruotsang le Pu James Thomas hai le tukum board exam a Class 10 le 12 an member sunga mi hlawtlingna changhai kuomah Chawimawina thu ziek an inhlan.

Chieg Guest chun, FAST hai chu state le national level a hai chen mi iemanizat an lo sersuok thei tah le football chau nilo a an ni member sung a mi sawrkar sin hmu iemanizat an lo um thei ta chu inpakum le lawmum a ti hle thu hai a hril a. Churachandpur­a tribal hnam tum tum hai chu hnambing ang zawnga hma la lo a, huopzau taka renga damtlangna ding ngaituoa hma laktlang a pawimaw thu hai a hril. FAST hai chu hmatieng ah a theina haia thangpui an tiem baka thilpek an hlan bawk.Guest of Honour le Functional President hai khawmin thilpek an inhlan ve. Sun huna hin an member fam lo changtah hai minute 1 sung totawk a sunna hun an hmang a, Nk. Grace Famhoite le Nk. Jenifer Nianglawmkim haiin hla’n mipui an inawi a. Zan hun a chun 5:30 pm ­ 9:00 pm chu Raising Day lawmnain Open Concert a hun hlimum tak hmang a ni bawk. (Photo: Muona Infimate).

June 20 chena result insuo dingin an phut
CCPUR/IMPHAL: All Manipur Written Test Successful Candidate of Police Constable Male­2013 chun, Manipur CM le Dy. CM hai thanga Addl. Chief Secretary hai le inbiekna an nei huna June 2nd week sunga result puong dinga an intiemna an sukpuitling nawna thuah June 20, 2016 chena puong dingin ultimatum an pek a. Hi hun chena result puong a ninaw chun dan angin nuorna le helna an tan ding thu zani hmasaa thusuok an siema chun an zieklang. Chun, result puong a ni hmaa recruitment a thara nei lo dinga an intiemna khawm an bawsiet leiin High Court­ah case siem khum dingin sawrkar an vau bawk.

Felicitation­ cum ­Career guidance
CCPUR: Kuki Students’ Organisation (KSO) Singngat chun zanikhan Haijang khuoa an head office­ah  14th Felicitation ­cum Career guidance, 2016 an buotsai. Hi huna hin Manipur board hnuoia Class X & XII a MIL (Thadou) topper hai, Manipur Board le CBSE hnuoia Class X&XII topper hai kuomah Meritorious Award inhlanna an nei a, ECA pastor Rev Kamkholun Singson in student hai tawngtaipekna a nei a, Career guidance huna RL Haokip resource person in a thang.

Zangnadawmna Rs. 5,50,000 seng
IMPHAL: Manipur a dan kala Security Forces (state Police & security forces)  han mi 28 an that sungkuohai kuomah zangnadawmna sum pek dingin Manipur  state sawrkar chun Rs. 1,54,00,000/­ a sanctioned. Hi sum hi thina tuok sunghai kuomah Rs. 5,50,000/­ senga pek ning an tih. Mi 28 hai hi May, 1979­ May, 2012 inkar sunga that anni a hril a nih. Hi hun sunga dan kala security Forces han mi an that hi 1528 an tlinga hril a nih.

Hmun hran hranah Counter blockade
IMPHAL: JAC Against Anti Tribal Bills pawlin National Highway haia economic blockade an thaw dodalnain Manipur phairam biela hmun hran hran haiah counter blockade thaw pei a la nih. Zani khawm khan NH­2 (Imphal­Dimapur Road) a Khonghampat Awang Leikai le Pheidinga Bazar haiah Counter blockade thaw tan a nih. Chun, ILPS le inzawma nuorna khawm phairam biel haiah la thaw zawm pei a nih.

Pasal pakhat inkhaihlum sain hmu
IMPHAL: Zani hmasa zantieng dar 4:30 vel khan Awangkhul Part­II a building pakhat sungah pasal pakhat inkhai hlum saa hmu a nih. Inkhai hlumsaa hmu hi a hnungah Jiban Singh (40), s/o (L) Ibomcha of Wangu Nongyai Khul, Thoubal district a nih ti hrietsuok a nih. Jiban hin Rongmei nunghak nuhmeia neiin hi lai hmuna a nuhmei ina cheng el nia hril a nih.

JNIMS­ ah MRI lak thei
IMPHAL: June 6, 2016 a inthawk khan JNIMS, Porompat, Imphal­ah MRI (Magnetic Resonance Imaging) khawl inthut tan a ni ta a, MRI la nuomhai ta dingin lak le pan thei zing a ni ta tiin  L. Deben Singh, Director, JNIMS chun inhriettirna a siem.

Irang leilak siem that mek
IMPHAL: NH­37 (Imphal­Jiribam road) a Irang leilak chu a derthawng ta leiin siemthatna sin thaw mek a nih. Hi lei hin ni 2 sung chu nitin darkar 2 sung pei ( 10AM­12Noon) chu motor lienin a hraw sukchawl hlak a ni ding a nih tiin ei thu dawngna chun a hril.

Lethod le Grenade dapdawk
IMPHAL: June 17, 2016 zing dar 5:30 vela Lilong Police le 6­Assam Rifles hai thangruola Waithou hmuna dappui an thawnaah Lethod rounds 5 le Hand Grenades 3 an dapdawk. Hmun dang dang haia khawm dappui hi anla thaw sunzawm pei.

B.Sc. (Forestry) inchuk thei
IMPHAL: Manipur state quota a Academic session 2016­17 sunga B.Sc (Forestry) inchuk nuomhai ta dingin July 27, 2016 chen khin Principal Chief Conservator of Forest, Govt. of Manipur office­ah peklut thei ning a tih. Rs. 200/­ pein application form chu June 24, 2016 chen khin lak thei ning a tih. Hi thila dinga entrance test chu July 3, 2016 khin nei ning a ta, hi ni ma hin result puonglang nghal ning a tih. Admit Card June 20­30, 2016 chena lak ding a nih.

India le Thailand han kawng tum tuma thangruol an remtih
NEW DELHI:India rama ni 3 sung cham dingin Thailand Prime Minister Prayut Chan­o­ Cha chu zani hmasa khan New Delhi a hungtlung a. Prayut Chan­o­Cha hin zanikhan India PM Narendra Modi an hmupui. New Delhi khawpuia a cham sungin Vice President le Union minister tum tum hai inhmupui bawk a tih. India le Thailand PM­hai chun hmalaktlangn dan ding thil tum tum an hriltlang a, Defence le Maritime Cooperation tiengpanghai chu a hma neka sukhrat zuol an remti ve ve.

Modi le Prayut hai chun Cyber Security, Narcotics, Transnational economic offences, human trafficking, culture, education, terrorism, tourism, free trade, vuongna, tui le khawmuola infepawna tiengpang  haia thangruol an remti ve ve. Narendra Modi chun, Thailand mi tamlem India rama an hung inzin theina ding le  awlsam lema an hung inzin theina dingin double e­tourist visa an hmu theina ding lampuisiem pek vat ni tang a tih tiin Prayut le an inbiek huna hin a puong. Chun, Modi hin India, Myanmar le Thailand hai chun India­-Myanmar­-Thailand Trilateral Highway tan le zo fel vat a hung ni theina ding le motor Vehicles Agreement hai ziek vat a ni theina dinga hma lak a ni thu hai a hril bawk. Prayut chun, Make In India programme a hung hlawtling a ditsak thu le an ram mi, a bikin sumdawngtuhai chu hi programme hlawtlingna dinga hma la ve dinga an fui ding thu a hril.

Gulberg society case­ah mi 11 damsung lungin intang dingin
AHMEDABAD: Special SIT Court chun kum 2002 a Gulberg hmuna inthatna rapthlak takel, Gulberg society massacre case­a inrawlna neia intum 24 hai laia 11 hai chu damsung lungin intang dingin zanikhan an chungthu a rel a, midang 1 chu kum 10 sung jail intang ding le midang 12 hai chu kum 7 seng jail intang dingin an chungthu a rel bawk. Gulberg society massacre a khan Congress MP Eshan Jafri thangin mi 69 zet raw hlum an nih. Hi case­a inrawlna neia intum midang 36 hai ruok chu Court hin thiem an changtir a nih.

Gulberg Society massacre kha February 28, 2002 a Mr Narendra Modi (tuta India PM ni lai)  Gujarat Chief Minister a ni huna tlung a ni a,  mipui 400 ruol han Ahmedabad khawpui laili taka um Gulberg society hi va run a, meia an raw a nih.

Rs. 350 crore road scam­ah Auditors 10 man
MUMBAI: Brihanmumbai Municipal Corporation (BMC) in Contractors hai lampui siem enfel dinga a ruot  private engineering companies pahni haia Auditors 10 hai chu indiklo taka Rs. 350 crore sukchingpenna le contractor hai thlawp zawnga indiklo taka report an peklut nia intumna leiin man an nih. Nikum khan Mumbai Mayor Snehal Ambedkar chun BMC Chief Ajoy Mehta kuomah lampui siema um hi quality a tha nawh tiin complain a peklut a, hi le inzawma Assistant Commissioner of Police, Colaba Division, Rajendra Chavan inrawinaa Special Investigating Team (SIT) in Auditors 10 hai hi an man a nih. Court chun June 21, 2016 chen Police custody­a la um phawt dingin an chungthu a rel.

India rama Courts haiah pending cases 3 crores
NEW DELHI: Union Law minister Sadananda Gowda chun tuchena hin Courts tum tum haiah pending cases 3 crores (vaibelsie 3) vel a um tiin a hril. Hienghai lai hin High Courts haiah pending cases 39 lakh le Supreme Court ah pending cases 40,000 hai a thang.

UALA cadres hai Rs. 2.5 lakh seng pek ding
SHILLONG: Tulai hnaia Meghalaya sawrkar kuta an silai hai le inpe UALA cadres hai chu one­time package Rs. 2.5 lakh seng pek ning an tih tiin senior government official thusuok chun a hril. Tuta hmaa ANVC­ANVC­B cadres hai surrender package kha Rs. 1.5 lakh a nih. Sawrkar thlungpuiin Rs. 1.5 lakh pei hung peng a ta, state sawrkarin Rs. 1 lakh a tum belsa ding  ti a ni a, hi dungzui hin UALA cadres inpe hai chun Rs. 2.5 lakh seng an dawng ding a nih. Tulai hnai el khan UALA cadres 68 hai chun Tura hmunah an ralthuom hai an intung a nih. ANVC­ANVC­B hai angin political level settlement a umnaw leiin UALA hai le surrender policy hi a danglam deu niin official thusuok chun a hril. Hi baka hin UALA cadres hai chu monthly stipend le hamthatna dang dang pek ning an tih.

Nigeria mi 2 drugs Rs. 2 crore manhu leh man
NEW DELHI: Anti­Narcotics officials hai chun zanikhan Nigeria mi 2 hai chu drugs (inruithei) Rs. 2 crore manhu leh an man. Mana um hai chu Martins Akurasi le Ude Okpani Ukegbu hai an ni a, an kuta inthawka inruithei an man hai lai Heroin grams 255; Amphetamine grams 166 le Methaquolone grams 560 a thang. Mana um hai hi Narcotic Drugs and Physchotropic Substances Act (NDPS) hnuoiah case siem khum an nih tiin Narcotic Bureau Zonal Director Rohit Sharma chun a hril.

VAWISUN THUPUI
Chuongchun, huoitakin; “Lalpa chu a mi thangpuitu a nih, Ti naw ning; Mihriemin ieng am mi law thei an ta?” ei ti hlak a nih.  ­ Hebrai 13:6

Editorial: Driver mawl
Motor khaltu (driver) hai hi an pawimaw em em a. An sin hi a pawimaw leiin an sinah hin an fimkhur le an titak a tul hrim a nih. Mihriem phurtu anni leiin an mawphurna khawm an sang hle a nih. Mihriem tam tak hringna chunga mawphurtu an ni leiin an sin hi ngaitha chi a ni der nawh. Driver fimkhur tak tak, bengvar le hawihawm em em el tam tak an um laiin ei rama hin Driver fimkhur lo, hawihawm lo le mawl tak tak anla um hi thil pawi takel, ei hnam hming chen suksetu anni leiin Driver mawl hai hin chu motor khal nawhai sienla nuom a um. Motor neihai khawmDriver lakna kawngah hin fimkhur hle hai sienla nuom a um. Khawvelin changkangna a pan pei ang bawkin driver­hai khawmin khawvel changkangna le inmila driver fel le fimkhur ni thei dinga hma anlak ve thil tul a nih. Tulai khawvela ding chun motor khal puma lekhaziel hawp, tuibur hmuom le inruithei thaw tihai hi chu a thing ta hle a nih. Driver mawl le hawihawm lo hlawna a nih.

Tuta hma deu, ei rama motor la tam naw lai khan chu motor­a chuong hai chun driver­hai hi an sawisel ngam ngai naw a, Zurui puma an khal khawmin sawisel le hal ngam lovin ti le inlau dawr dawrin an chuong hlak. Khang hunlai khan driver­hai an inluling hlak leiin passenger­hai an rimsi hle hlak. Amiruokchu, khawvel hmasawn ang peiin ei ram sawrkarin dan le dun chi tum tum a hung siem bakah mipui han ei rights ei hung hrietchieng ta pei leiin Driver­hai chu inluling thei ngirhmuna an um ta naw a, mipui ta dingin a hadam pha ta hle. Driver dan kala che hai hrim hrim chu passengers han ei sawisel le hal ngam el chau ni lovin thuneituhai kuomah ei report ngam ta a nih.

Khawvel hung changkang ang peiin tuhin chu driver fel, changkang le hawihawm tak takel ei hung nei thei ta leiin lawm a um hle. Driver fel le hawihawm hai chun passenger ding an tlasam ngai naw a, phur seng lo passenger an nei hlak. Passenger phura motor service hai lem hi chu driver danghai nek taka an fel le an hawihawm a ngai. Driver fel lo le fimkhur lo  hai chun passenger an hip ngai nawh. Motor hmanga sumdawng dinghai hrim hrim chun Driver fel le hawihawm zawng ngei ngei ding a nih. Driver fel le hawihawm hai chun an motor khal laiin dumkhu an hawp ngai naw a, an motor sunga dumkhu hawp le tuibur hmuom khawm an phal ngai nawh. Hi hi thiltha tak le thaw dan ding hrim a nih.

Motor hlakchu a ni telin a pung tuol tuol a, ei lamlien hai hlak chu a lien belsa si naw leiin ei rama motor tam chu ei harsatna pakhat a hung ni tah.  Ei town sunga motor khal hlakhai hi a thiem tasa, an chuklai mek, driving licence nei le nei lo anni tawl ring a um. Motor khaltuhai mawphurna an sang a, thaw suol keka eksidena thina thei le hliemna thei a ni leiin ei traffic police hai hin an khattawkin town sunga motor tlan vel hai hi enfel hlak hai sienla nuom a um. Motor khaltu thenkhat lem hi chu kum tling lo, naupangte anni  hlak. Hi thil hin ei town sunga traffic rule ei hmang mek hi a khau tawk nawh ti a suklang. Tuta hma deu khan inlirthei ke pahni nei khaltu han helmet an khum ding ti Order a um a, ei zawm tha hle. Tu ruok hin chu kha order kha hmang nawk a ni ta nawh. Inlirthei khaltuhai an zalen taluo deu ta niin an lang. Hi lei hin ei SP sap in hi kawngah hin hma hung la nawk ta sienla nuom a um.

Furpui a hungtlung a, ei lamlienpui le ei nullah hai a tha si naw leiin lamlienpui, hmun hran hranah tuihawk an tling dem dum a. Hi lei hin motor khaltuhai an fimkhur, an bengvar le an hawihawm hle a tul.Tuihawkin lamlienpui sira lo um le kea lawn hai ei motor khalin a chilper ding le ding naw ngaituo le en puma motor ei khal nuom a um. Hiengang ngaituona nei der lova motor khala mi chilperhai hin “Driver mawl” an hlaw hlak. Driver mawl hi ni lo hram hram tum ding a nih. Driver mawl hai hi mi theida le hmu peilo an nih.

Driver mawl han students, office fe ding le bazar fe ding mi tam takel an chilper hlak hang hmu hin theida an um em em. Driver mawlhai hi mana hrem nihai sienla nuom a um. An thil ching hi an bansan naw chun mipui lungsen kut khawm an la tuor el thei ding a nih. Driver mawl han mi an chilperhai lai hin sawrkar officer le ex­minister khawm an um nawk el ta a, a pawi em em el a nih. Hi thil hi ei mawlzie suklangna a ni leiin hienganga motor khal hlak hai hin thil inzakumah ngaiin bansan ta ngei hai sien nuom a um. Intitheina le inleknaa hmang chi a ni nawh. Thil suol a nih.

Post a Comment

Powered by Blogger.