Responsive Ad Slot

Hmasawnna Thar | 16 June, 2016

Thursday, June 16, 2016

/ Published by VIRTHLI
Pu Lalsangzuala Varte (65) ei lo the tah
CCPUR: Sudden Muanga ti comics hmanga khawvela Zohnathlak hai lo sukhlimtu; Tuithaphai (CCPur), Manipur–a inthawk ‘Sudden Muanga’ comics fethlenga Mizoram politics inlumlet dan chieng taka lo tarlang hlaktu, Pu Lalsangzuala (Laisaizawks) chu June 15, 2016, 12:30PM khan Sky Hospital, Imphal­ah a nuhmei le nauhai maksanin chatuon ram a lo inlawi tah.

Pu Lalsangzuala Varte hi ei Chanchinbu Hmasawnna Thar in harsatna a tuok hun haia inphal taka lo  thangpuia a hmangruo hai chen lo inhmangtir hlaktu, Hmasawnna Thar Chanchinbu ngaina em em tu a nih. Hienganga muol a mi liemsan el hi ei chanchinbu chun an roin a sun takzet a, a sung le kuo hai Pathienin thlamuon­a umpui dingin a ditsakna an hlan.

Pu Lalsangzuala Varte hi zunthlum nei a ni el khelah  kar hmasa khan TB (chuop infection) a neisa  bawk a. June 12, 2016 khan heart attack leiin Shija Hospital, Imphal panpui a ni a, ICU­a enkawlin a um a, a ngirhmun thatnaw leiin a thi angin a lo inthang ta nghe nghe a nih. Amiruokchu, a ngirhmun hung changkang metin biek hai khawm a hung hriet a, sienkhawm Shija Hospital chun Heart tiengpang enkawlna an neinaw leiin zani hmasa khan Sky Hospital tieng sawn le enkawl a ni a. Sienkhawm damsuok zo ta lovin zani dar 12:30 khan chatuon ram a lo inlawi ta a nih.



Pu Varte hi January 13, 1951 khan Thakthing, Mizoram­ah a pieng a, December, 1951 khan Churachandpur tieng an hung inpem a; CCPur College­a inthawk BA distriction a zoin Jawaharlal Nehru University,  Imphal­ah MA (History) a zo a, Lamka College indintir laia Lecturer lo ni hmasa pawl hung niin, hi college­ah Associate professor le  Mizo Department (HoD) sin thaw lai mek a nih.

Kum 1977 khan Cyclostyle in Sudden Muanga comics hi an suo tan a, a comics insuo hmasa tak chu ‘Sudden Muanga leh Sawhthing Rukhmang’ ti a ni a, Sap novel (Western) Oliver Strange’s ‘SUDDEN’ tia inthawka a hung ngaituosuok a ni a, mi ngaihlut a hlaw hle leiin Zohnathlak hai lai chun tulai thangthar hai tinaw chu ama hrenaw hi an um meu ring a um nawh. Khawvel hungchangkang peiin computer print khawmin a comics kha an suo nawk hman a, sienkhawm a hriselna thatnaw leiin a lo chawlsan ta a nih.

A comics thangsan hin B. Rosangzuala, Champhai Kanan Director­cum­Producer nina hnuoiah a ziektu Pu Lalsangzuala phalna lain  thenkhat belsa in Sudden Muanga hi a film­a siemin March 28, 2016 khan Vanapa Hall­ah C. Laltanpuia, Mosia Agency neitu chun inchawk thei dingin a lo tlangzar ta a nih. A flim siemnaa hin Rs. 4 lakh vel deuthaw an seng niin Director chun a hril.

Pu Lalsangzuala hi Hmar Writers Club (HWC) founding member niin  HWC Treasurer ni lai mek a ni a, HWC chun society ta dinga a thawhlawkna leiin June 30, 2016 khin chawimawina pek an tum nghe nghe  a nih.

A ruong hi zani zan khan Salem Veng, CCPur­a a chengnainah a ruong khawvarpui a ni a, vawisun hin ropui takin vuiliem ning a tih.

(L) Liensangvung Award sem
CCPUR: Zani zantieng khan Hmar Literature Society (HLS) Manipur huoihawtnain (L) Liensangvung Award semna Liensangvung Villa, CCPur­ah nei a nih. Tukum 2016 a Liensangvung Award dawngtuhai chu­ BSEM hnuoia HSLC exam­a HSA member hai laia pasala mark hmu insangtak Mr Isak Lalrinmawia Joute s/o Dr George le Lalnunzir of Rengkai CCPur; nuhmeia mark hmu insangtak Nk. H. Lydia Lalnunzir d/o Vanlalhlun Hrangchal le Tuothangkim of Lamka, CCPur hai an nih. Isak hin marks 83.33% a hmu a Lydia hin marks 82.66% a hmuh. An pahni hin Young Learners School (YLS) a kai ve ve an nih. Pu Joseph Lalrothang, President, Hmar Inpui in Award sum Rs. 15,000/­ ve ve an hlan.



Kum nawk a inthawk chu Class XII a khawm nuhmei le pasala mark hmu insangtak hai kuoma award pek ni ta dingin ei thu dawngna chun a hril. (input: Joseph Joute)

Disaster Management training nei
CCPUR:  Zani 10:30AM khan Rayburn College Auditorium­ah Disaster Management Court in Comprehensive Landslide; Cyclone spin and effect of deforestation training nei a nih. Training hi Relief and Disaster Management, Govt. of Manipur sponsored­naa Forest Department le Civil Defence Manipur han an huoihawt a nih.

V. Pumsiam, Sr. Instructor, Civil Defence in thu a hril huna, Natural Calamity um huna mipui (civil) hai inveng le um dan ding sawrkarin a ngaipawimaw leiin Civil Defence in District tum tumah training a pek a nih tiin a hril. Natural Calamity, a bikin tuilien, mimkei, kangmei suok le a dang dang um huna doctor han an mi buoipui vawng sengnaw leiin khuo khatah mi 50 bekin training nei thei inla tha a ti thu a hril.

Hi huna hin KS Tawmbing, IFS, DFO/CCPur; Rayburn College lecturer Lawmpi, Gabriel Khupmintang le Paukhankhual Tonsing ha resource person in an thang.

Leisen khawsuok Class X& XII pass hai inhriettirna
CCPUR:  Leisen khawsuok , tukum Class X le XII Board Exam­a hlawtlingna chang hai chun mani chanchin kimchang tak, marksheet le thlalak hai June 17, 2016 chenin Pu Lalvulllien, Social Worker of Zote Veng, Rengkai, CCPur­a pelut dinga inhriettir an nih.

Bankers meet on SLBC on SHGs
CCPUR: Zani 11:00AM khan EBC Dorcas Jubilee Guest House­a Mini Auditorium­ah State Level Banker Committee (SLBC) hnuoia Sub Committee of SLBC on SHGs and Joint Liability Groups (JLGs) le NABARD/CCPur hai huoihawtnain Dist. Level Sensitisation Workshop on SHG and JLGs for Bankers and Select NGOs’ nei a nih. Workshop hi N. Hauzel, LDM/CCPur in a hawng a, Simon L. Hrangchal, Secretary, Relief and Dev., Deptt., EAC le Holkhomang Haokip, CF, RAS Tuibuong han thupui tum tum hmangin thu an hril bakah Credit Linkage le JLG chungthuah discussion nei a ni bawk.

YMA Chiengkon in blood donation camp
CCPUR: Young Mizo Association (YMA) kum 81 tlingna le inzawmin YMA Chiengkon Branch chun zani 12:00Noon khan District Hospital­a Blood Bank hmuna Blood donation camp buotsaiin thisen an pek. Blood donation Camp hi ST Solomon, Chief of Chiengkonpang in a hawng. Blood donation camp­a hin nuhmei 6 le pasal 24, an rengin mi 30 han thisen Unit 1 seng an pek. Zani zan 6:30PM khan Chiengkonpang Community Hall­ah 81st YMA Day prog. an hmang.


Dr Paulunmang Vaiphei, MO i/c Blood Bank chun, mi hringna sanhimna dinga thisen pek hi thiltha le lawmum a ni a, hmatieng peia khawm YMA chu thisen  pe nawk pei dingin an fui.

UPF le KNO in Separate state ngenna an peklut
NEW DELHI/CCPUR: India sawrkar, Manipur sawrkar palai hai le Kuki National Organisation (KNO) le United People’s Front (UPF) han zani 10:30AM to 1:30PM inkar sung khan New Delhi­ah  first political dialogue  an nei. Hi huna hin UPF le KNO chun hi huna hin Separate state (state hran) ngenna thu an peklut bakah KNO khawmin sawrkar thlungpui leh Suspension of Operation (SoO) kum 1 sunga dingin agreement an ziek nawk tiin ei thu dawngna chun a hril. Political Dialogue nei huna hin Sawrkar thlungpui chu an hawng hle niin ei thu dawngna chun a hril bawk. UPF le sawrkar chun tuta hma khan SoO hi kum khat dai dingin an lo extend tasa a nih.

Zanita political dialogue nei huna hin India sawrkar aiawin Satyendra Garg, IPS, Jt. Secretary (Home), NE; Manipur sawrkar aiawin Dr Suresh Babu, IAS, Principal Secretary (Home) le P. Doungel, ADGP (Intelligence) hai an thang.

Moreh­ah Dy. CM Gaikhangam in 3 Star Hotel a hawng 
IMPHAL: Zanikhan Deputy Chief Minister Gaikhangam in World Class 3 star Hotel Moreh Ward No. 9­ah a hawng. Hi Hotel hminga hin “Hotel Ellora” ti inbuk a nih. Hotel Elora hi UNACCO hnuoia Chingjao Hotel and Resource Private Limited Unit in an enkawl ding a nih. Hi huna hin Manipur Health & Family Welfare, GAD and CADA minister D. Korungthang; Bijoy Koijom, Ex­Minister le Lunkhosei Zou, Chairman, ADC, Chandel hai thangin thuhrilna hun an hmang tawl.



Khawvel khawlai hmuna khawm ramin hma a hung sawn theina dinga hin private company han mawphurna lien takel an nei. Private Company tum tum hai hmalakna leiin thalai lekhathiem sin nei lo tam takin sin an hung nei thei pha a nih tiin hi huna Gaikhangam in thu a hrilna huna a hril. UNACCO chau ni lovin Private Company dang dang hai khawmin thalai sin nei lo tam tak sin an pek ta bawk. Private Company dang hai khawm ei state­a hin hungin sumdawngna chi hran hran an la hung thaw le private company lo um ta sa hai ang bawkin ei ram sukhmasawnna ding kawngah tangkaina an la hung nei pei ka beisei. Hotel hawn ghtara um hin Moreh le a se vela cheng hai ta dingin tangkaina lien tak a hung nei bakah Manipur state mipuihai ta dinga uongpui theia a la hung vul suok ngei ka beisei tiin Gaikhangam chun a hril.(DIPR)

Police han tear gas an kap khum
IMPHAL:Zanikhan Keishampat,Tiddim Road­ah nupui ruolin lampui an dang a, JCILPS Convenor hlui, Khomdram Ratan Wanted­a puong a nina chu hlip dingin an ngen. An thil ngen hi sukpuitling pek anni hmakhat an nuorna an la sunzawm pei ding niin an hril. Nupui ruol hi fe hmang dinga an hril hnung khawma an an fehmang nuomnaw leiin a hnawtdarna dingin Police han thawk thum zet tear gas an kap khum. Nupui ruol palai han zanikhan CM O.Ibobi Singh an inhmupui a, Ratan Wanted­a puongna hlip dingin an ngen a, CM chun hi thua hin thaw thei a neinaw thu hrilin sawrkar thlungpui ngaituo le rel dingin sawrkar thlungpui kuoma thawn a nih tiin a lo hril tawl.

DESAM in Hotel pakhat an khar
IMPHAL: Zani zantieng 2PM khan Democratic Students’ Alliance, Manipur (DESAM) chun Hotel Hind Jal Pal, Paona Keithel a mi chu an khar. Hi Hotel­a fak le dawn ding zawra um hai mihriem hriselna sukse thei ding a ni bakah an tui hmang a thienghlim naw leia Hotel hi a neitu thu le hla lova khar pek a nih tiin Sh. Devdutta, Secretary, Health & Environment, DESAM chun a hril.

Tata DI 207 pakhat meia raw siet a hmu
IMPHAL:  Zani ziangkar dar 9 vel khan Tamenglong district­a Noney Police station huop sung Namduanjang (Okfarm) village bul lai Tata DI 2017 truck meia rawsiet saa hmu a nih. Raw siet saa hmu DI Tata Registration number hi MNOC­5 C 2228 a ni a, Truck hi kuva hna phur nia hril a ni a, hi truck khaltu chu Wahengbam Nganthoiba (35) s/o W. Sharat of Wahengbam Leikai, Imphal a nih. Raw a nina san hriet a la ninaw a, Noney Police station chun case an registered.

Trucks 100 chuong Imphal an hungtlung
IMPHAL: Manipur mipui mamaw chi tum tum phurtu Trucks 100 chuong zet chu zanikhan Mao Gate a inthawk Security Escort in Imphal tieng hun thuoi an ni a, zani zan khan Imphal an hungtlung tawl niin ei thu dawngna chun a hril.

Meghalaya­ah Bus eksiden leiin mi 30 an thi
SHILLONG: Meghalaya­a East Jaintia hills­a Sonapur temple bula chun  zani hmasa zan sawt hnung khan  Bus pakhat changsuolin lamthlang rawlah an letthla a, a sunga chuong mi 32 an thi bakah midang 10 in hliemna an tuok. Sansuokna sin thaw zing a ni a, hi thu ei sut chena hin mi 11 ruong laksuok a ni ta a, hliem hai chu Civil Hospital, Jowai hmuna admit an nih. Bus hi Silchar le Guwahati inkara tlan a ni a, iengleia eksiden tuok am ti hriet a la ni nawh.

Fake Certificates Rs. 5 lakh a zawr
PATNA: Bihar state­a intermediate board exam topper scam suizuina fe mekah Special Investigation han zani hmasa khan Ganga Devi Mahila College an dap a, hi huna pasal pakhat hrentanga um chun fake certificate zawr hlaktu han Certificate pakhat peiah Rs. 5 lakh an lak hlak niin an puong. Hrentanga um pa inpuongna suizuina in Police team chu Aurangabad district­ah an um mek. Hi scam­a inrawlna neia intum Bihar School Examination Board (BSEB) chairman Lalkeshwar Prasad Singh le a nuhmei (JD­U) MLA hlui Usha Sinha hai ruok chu man an la ni nawh.

Nuhmei suolluia intumin  kum 70 mi man
HYDERABAD:  M Soni Reddy (70) chu a ina sinthawa um nuhmei kum 27 mi in a suollui nia Police­a complaint a peklut leiin Police han an man. Nuhmei hi M. Soni Reddy chengnain­a kum 5 lai zet sinthawa lo um ta a ni a, thawkhni lai zet a lo suollui ta bakah June 10, 2016 khan suollui nawk a tum a, sienkhawm himin a tlansuok thei hram niin Police kuoma a hril.

Jammu­ah Mobile internet that
JAMMU: Jammu and Kashmir­a chun Roop Nagar area­a temple pakhat suksiet a nina le inzawma protest nasa tak um leiin buoina lien lem suok ding laka invengnain Jammu biel sungah mobile internet  that (suspended) a nih. Law & Order ngirhmun a that hun huna mobile internet service hi sukhring nawk ning a tih tiin official thusuok chun a hril. Temple suksetu hi thluok tiengpang buoina nei nia hril a ni a, Police han an man ta bakah thil umdan an suizui mek.

VAWISUN THUPUI
Nisienlakhawm, thil inthiengnaw hrim hrim lut der naw nih a, thil tirdakum thawhai le khelinhlip khawm lut naw bawk a tih; Beramte Hringna Bua hming an ziekhai chau lut an tih. ­ Thupuongsuo 21:27

Editorial: Ram siemthatna dingin lungril puthmang thlakthleng a tul

Khawvel rambung tin le sawrkar tin hai chun kawng iengkima hmasawnna hnawtin, a sietna lai siemthat tumin hma ei lak seng a. Chuongang bawkin hnam tinreng hai khawmin hmasawnna hnawtin, ei ram le hnam siemthat le sukhrat dingin hma ei lak seng a; a thu chun tukhawm ram le hnam hmangailo ei um nawh. Amiruokchu, Politicians, kohran, hnam sunga thuoitu le mipui a tu el khawm hi lungril puthmang indik put ei um tanaw leiin ei ram le hnam hin harsatna tam tak tuokin hmatieng kal pen hlei thei lovin a um mek a nih.

Mimal, khawtlang, kohran le politics thila khawm nisien mipui lungril thlekdan (mind­set) hi an dik khur a um ta nawh. Mi thatna neka an sawiselna ding zawng char char hlak hnam ei ni a, khawtlang, kohran le ei ram politics­ah nghawng thalo tak neiin ei hnam thangmawbawk a ni mek a nih. Ei ram politics hin ei mizie, ei lungril puthmang, ei lungril thlekdan chu chieng takin an lang. Ram le hnam ta dinga thiltha ding nekin mani mimal hamthatna ding ei zawng lem fur. Politicians hai khawmin  ram le hnam ta dinga kal pensuok nia inhril si khan thlangtling ei hung ni pha meu chu ram le hnam  nekin mani laina hnai le party mi lesa  tlawmte ti loa chun ram le hnam ngirhmun siem­that tumna nekin mani ngirhmun insiemthatna tiengpang an ngaipawimaw hmasa lem rawp hlak.

A hril zawnga chu ei hril tha thei fu el, sienkhawm mi thaw thei chu thaw thei lova inngai, mi thaw dan tha hai hrea hmu zing si a, thaw nachang hre lo; mi chun chuongchun, khang khan an thaw tia  zer far vang khawpa hril a, infuina tha tak tak pe thei Officers le Politicians, hnam thuoitu ei pung pei a, mipui hai khawm hi kawnga hin ei fihlim bik nawh. Thu tha le hla tha, ringumna, indikna, taimakna, tumruna le thiltha tin reng hril thiem zur a, mani’n zawm le thaw tum si lo; Sura le Nahai tienami­a  ei pu Sura  in Pelte bul hnuoia ngira ‘ Nahai nisien chu lo a ta a fak el ding a na’ a ti ang deu in, mi chun chuong chun a thaw a, ei ti a, mania thaw tum si lo hai ei nih. Ei pu Sura khawm khan a kunga kai tum kher  lo khan  lo sien, fa el sien ni ding kha a ni a, Sura thla indik tak ei loni khawm ni ta nabang a tih.

Mi’n thiltha an nei a, ei inhnar a, chuongchun, khangkhan an thaw a, an inthuruol a, an thangruol a, hieng hi an hung ni thei a nih ti ei hriet zing. Sienkhawm thaw ve tumna ruok chu ei nei lem nawh.  Hiengang hi ei mizie, ei lungril thlek dan a ni leiin ei politicians, hnam thuoitu, kohran thuoitu hai chau ni lovin mipui mimir hin ei lungril thlekdan ei thlakdanglam hma lo chu ei ram hi siemthat ruol ding an ta nawh. Mi ringumna, indikna, taimakna, tumruna etc. ei hril ei hril a, mania thaw tum si lo. Mi huoisenna le thudik tan ngama ngir hai huoisenna ropui ti si khan mani a laklut tumna nei si lo hai ei ni hi a pawi takzet. Ei ram le hnam hi siemtha a, sukvul le suk hmasawn ei nuom ta takzet a ni chun ei lungril thlek dan thlakdanglam a, mi thilthaw dan hril hril loa mania thaw ve el ding a nih. Chu chu ei ram le hnam hmasawnna dinga pawimaw a nih.

Don't Miss
© all rights reserved
made with by Simon L Infimate