Khawvela ruo hmanga siem Pen lien le sei tak ding a siem
CCPUR: Zogam Bamboo Works chun khawvela ruo (bamboo) hmanga siem Pen lientak le sei tak  nina record hau tuma a siem Bamboo pen chu zani 12:00Noon khan BCD Hall, Zenhang Lamka­ah Display & Measurement program hmang a nih. Hi huna hin  Langkhanpau Guite, Chairman, ADC/CCpur, B. Donzalian Simte, Chairman, Zomi Council, Lianzapau, President, SSPP/GHQ le KS. Tawmbing, DFO/Southern Division Forest hai khawm an thang.



Bamboo Works neitu Ginkhanpau chun, khawvela Bamboo Pen lien tak Guiness World Record, Asian Record le Limca Book of records hau tumna neia ruol­le­pai hai thangpuinaa Bamboo Pen hi siem a ni thu hrilin, June 5, 2015 khan Guiness World Record hmu theina dingin application peklut a nita thu; khawvela Bamboo Pen lien tak siemna ding hin October, 2015 khan khuo le veng tum tum ah ruo zawng tan niin, hi pen siem zona ding hin ni 80 sung hun an hmang niin a hril.

Bamboo Pen an siem hi Feet. 22.1 a sei a nih. Hi huna thang Langkhanpau Guite, Chairman, ADC/CCPur chun, khawvel record siem tumna neia hmalatu Ginkhanpau chu a lawmpui thu hrilin ruo hmanga thil thar dang dang siem ding ngaituo suok pei dinga a ditsak thu a hril.

DC/CCPur aiawa thang Alfred Khaute, MCS chun, Bamboo Pen intanna CCPur district a ni mi han an hung hriet theina dingin GI Tags (Geographical Identification Tags) a hmu theina dinga hma a lakpui ding thu a hril.

Tuithapuia tlahlum mi 2 hai ruong hmu tah
CCPUR: June 10, 2016, 10AM vela Tuithapui vadunga tla, T. Khamchinkhup (26) s/o T. Laltuakmoi of Khominthang ruong HYA le tlawmngai pawl tum tum han an zawng hnungin zani zantieng 2:30PM khan Saikawt Brickfield zawn lai Tui­thapui vadung­ah hmu a nih. A ruong hmutu hi Saikawt HYA member Pu Zarzosang s/o B. Keithieng of Saikawt a nih.

Chun, June 9, 2016, 1:30PM vela Khuga Tampak, Zenhang Lamka  lai Tuithapui vadunga tla hlum   Leishom Tomba Singh (23) s/o Yaima Singh of Zenhang Lamka ruong khawm tlawmngai pawl tum tum han nasa taka an zawng hnungin zanikhan hmu a nitah.

L. Tomba Singh ruong hi zani zingkar tieng­a Saiton Khullen zawn laia hmu a nih.

Lok Adalat nei
CCPUR: Zani 11AM a inthawk khan  Churachandpur District Legal  Services Authority chun National Legal Services Authority, New Delhi le Manipur State Legal Services Authority thusuok angin Tuibuong­a CJM Court Complex­ah ‘One Day Lok Adalat’ an buotsai. Hi huna hin Bank le inzawm, MACT, Insurance claim le family matter haia thubuoi rel fel ding lut hai rel a nih.

SSAC in award an sem
CCPUR: Songtal Siamsin Award Committee chun zani 11:00AM khan New Lamka Dorcas Mini­Auditorium­ah 1st Songtal Siamsin Award distribution prog. an buotsai a, special invitees in Thiankholian, Chief of Songtal;Langkhanpau Guite,Chairman ADC/CCPur; C.Hangsing, (retd) MCS; CT. Lian Guite, MDC 16­New Lamka(W) le  K.Paukhansuan, Director Trinity Centre hai an thang. Rev. H. Chinthiansong, Coordinator (Ministries) PCI (R) in student hai infuina thucha hrilin tawngtaipekna a nei. Class X topper award chu Langmuanmung Tonsing s/o T. Nanggoulian a ni a, Class XII topper chu H. Joshua Kamsuan s/o H. Thianzagin kuoma inhlan a nih. Class X exam dingin mi 26 in form an peklut a, hi lai hin mi 14 1st division­ah an passed a, mi 12 second division in an passed. Class XII ah mi 15 exam hai laia 10 1st division le 4 second division­ah an passed a nih. Hlawtlingna chang hai popo hi Memento le lawmpuinain pawisa pek an nih.


KZP GHQ in pass hai lawmpuina
CCPUR: Khangthah Zuun Pawl (KZP) GHQ chun zani zantieng 1:30PM khan Simveng a, Simte Inn –ah tukum­a Class X le XII passed hai lawmpuina an nei. Hi huna hin Chief Guest in Amstrong Panmei, IAS, Jt. Secy. TA & Hills a thang a, Chief Host in Th. Jamchinthang Simte, MDC, Guest of honour in T. Goukhomang, ZEO, CCPur le Special Guest in T. Lamminlal Simte, MCS a thang a, Rev. Dr L.Liankhanlal, Executive Secy. SBCA in student hai tawngtaipekna a nei.

HPC (D) le Mizoram sawrkar han inbiekna an sunzawm nawk MPCC in tha a tih
AIZAWL:Mizoram Chief Minister le Mizoram Pradesh Congress Committee (MPCC) President ni bawk Lalthanhawla inrawinain June 10, 2016 zantieng khan Congress Bhavan, Aizawla MPCC Office Bearer’s meeting nei a nih. Hi meeting­a hin Mizoram saktiengpang, Manipur le inrina bula helpawlhai chetna a umzing el chu Mizoram mipui le sawrkarna cheltu party hai ta dinga ngaimaw a um thu, hi biela hin muongna a um a pawimawzie, HPC(D) le Mizoram sawrkar han inbiekna sunzawm nawk hai sienla tha an ti thu le inbiekna sunzawm nawk dinga ngenna um chu an thlawp thu MPCC Office Bearer han an hriltlang. Tu kum sung ngei inbiekna sunzawm nawk le inremna tluontling hung um sienla tha an ti leiin MPCC chun an state sawrkar chu HPC(D) pawl chu inbiekpui nawk dingin an ngen.

MPCC Office bearers’ meeting a hin Mizo Peace Accord le Mizoram Liquor Prohibition and Control Act, 2014 chungthu hai khawm an hriltlang. Mizo Peace Accord zieka um chu June 30, 2016 khi kum 30 a tlingna ding a ni ta a. Peace Accord kum 30 a tlingna kum ngei hin HPC(D) leh inremna a hung um thei chu thain an hriet a nih. Mizorama political party um po po thangruolin June 30, 2016 khin Mizoram pumpui huopin “Remna Ni” hmang an tum a nih. Mizoram Peace Accord hi June 30, 1986 a kha sawrkar thlungpui le MNF han an lo ziek a nih.

Mizoram Liqouor Prohibition and Control Act, 2014 hmanga umin iem hung rasuok a neia ti hriet theina dingin Mizoram Excise & Narcotics Minister R. Lalzirliana in Review and Evaluation Committee indin raw seh tiin MPCC meeting chun a rel bawk.

KSA bandh thaw tum thul
IMPHAL: Zani 2:30PM khan Kangleipak Students Association (KSA) President Moirangthem Laxman inrawinain KSA thuoitu 6 han Dy.CM Gaikhangam an van hmupui a. Hi huna hin mana um KSA member 5 hai chu June 12, 2016 chenah insuo ni tang an tih tia thu a lo tiem leiin KSA chun  darkar 48 bandh tahw an tum chu an thul thu zanikhan an puong. Amiruokchu, Dy. CM in a thutiem a sukpuitling naw vai chun June 13, 2016 a inthawk darkar 48 bandh chu an thaw tan nghal ding niin KSA thusuok chun a hril.

VDF­hai hlawin thla khatah Rs. 6,07,50,000
IMPHAL: Manipur sawrkarin Manipur­a Village Defence Force (VDF) hai hlawin thla khatah Rs. 6,07,50,000 a hmang nia hril a nih. Union Ministry of Home Affairs sanctioned post siem zat chu 1500 le  thla khata mi pakhat hlaw dinga a hung pek chu Rs.1500 pei nia hril a nih. Sienkhawm VDF umzat hi 10,500 an tling phak a, thla khatah hlaw Rs. 5,000+ration money Rs. 1000/­ pei, a rengin Rs. 6,000/­ a hung  ni a. Union Home Ministry in thla khata a hung pek hi Rs. 22,50,000 chau a ni a, hi lei hin Manipur state sawrkarin a seng belsa chu thla khatah Rs. 6,07,50,000 a hung tling phak a hril a nih.

Nuhmei 2 rangkachak 2.5 kg leh man
IMPHAL: June 9, 2016 chawhnung dar 1 vel khan Tulihal Airport, Imphal a Central Industrial Security Force (CISF) duty han nuhmei pahni­ Anjali w/o Ojai le Shillu Malik, w/o Mandosh of Serou Part­I ve ve hai chu rangkachak 2.5kg leh an man. Rangkachak hi Kolkata tienga Air India flight­a chuonga phur an tum a nih.

Chairperson le member post 2 a ruok
IMPHAL: Manipur State Commission for Scheduled Tribe Chairperson post le member post 2 a ruok a, hieng posts ruokhai  inhni nuomhai chun June 25, 2016 chen khin plain paper a ziekin hnina lekha Director, Tribal Affairs & Hills, Govt. of Manipur kuomah  peklut thei a nih. Hnina lekha a hin Certificates le lekha pawimaw dang dang hai kilde sa ding a nih. Hi Commission terms hi kum 3 ding a nih. Hieng post ruok hluotu dinghai hi State sawrkarin a ruot or thlang ding a nih.

Koirengei BSF gate bul lai ruong rukhat hmu
IMPHAL: Zani zantieng khan Imphal East District­a Heingang Police station huop sung, Koirengei­a Border Security Force (BSF) Battalion gate No.1 bul hnai lai mithiruong, tu’m a nih ti hriet thei talo a ru khat chau um tah hmu a nih. Mithi hi tum a ni ti hriet thei ni tanaw sienkhawm pasal ni dingin an lang tiin ei thu dawngna chun a hril.

High Court in a hnawl pek
IMPHAL: JCILPS Convenor hlui Khomdram Ratan case sukbo dinga a nuhmei Khomdram Ongbi Hemolata Devi in High Court of Manipur­a ngenna a siem chu zanikhan hi High Court hin a hnawl pek.

Seat 27-a R S election-ah BJP in seat 11 an lak
NEW DELHI: Zanikhan India rama states 7 haia Rajya Sabha seats 27 haiah inthlangna nei a ni a, Centre­a sawrkarna siemtu BJP in seats 11­ah hratna an chang a, Samajwadi Party in seat 7 le Congress in seat 6 an lak a, BSP in seat 2 le Independent candidate 1 a tling.
 
Rajasthan­a Rajya Sabha seat 4 haia inthlangnaa chun BJP candidate ­Urban Devpt. Minister M. Venkaiah Naidu, Om Prakash Mathur, Harsh Vardhan Singh le Ramkumar Verma han hratna an changing an lak vawng.

Uttar Pradesh­a seat 7 haia inthlangnaa chun sawrkarna siemtu Samajwadi Party candidate vawng ­  Beni Prasad Verma, Reoti Raman Singh, Amar Singh, Sanjay Seth, Vishwambhar Prasad Nishad, Suresh Nagar le Sukhram Singh Yadav hai an tling. Inhnukdawk theina hun tawp ni June 3, 2016 khan Candidates 30 hai chu khingtu um lovin thlangtlinga puong an lo nitah.

NCHC CEM dingin Debolal Garlosa
HAFLONG:  Mr Debolal Garlosa chu Dima Hasao­a BJP parliamentary leader dinga thlang a ni hnungin NC Hills Autonomous Council (NCHAC) Chief Executive Member (CEM) candidate dinga ruot a ni a. Hi le inzawm hinzanikhan NCHAC Pro­tem Chairman Sauthangjem Hrangkhol inrawinain NCHAC chun Debolal Garlosa chu lungruol takin CEM dingin an thlang. Debolal hi NCHAC CEM 22­na a nih.

Teacher han Jeans an bun a khap
CHANDIGARH: Haryana –a Director of Elementary Education chun, a state sunga Primary le middle school teachers han an sinthawna hmuna jeans kekawr an bun khapna thupek an suo. Hieng laizing hin Haryana Vidyalaya Adhyapak Sangh chun, teachers hai dress code thua sawrkarin order an suo chu demin an sawisel a, Teacher sin chu naupang inchuktir a ni a, Jeans a bun am dhoti a thaw khawmin an chuktir thei tiin hi pawla president Wazir Singh chun zanikhan a hril. Hi thua hin Education department­a senior officials hai an inhmupuiin protest an nei ding thu a hril bawk.

Bihar toppers scam­a man 5 hai jail­a thun
PATNA: Bihar Class XII exam topper scam le inzawma man mi 5­ Viseshwar Prasad Yadav,  principal­cum­centre superintendent,Government Boys High School Rajendra Nagar, Patna; Sanjiv Kumar Suman, mathematics teacher; Shambhu Nath Das, section officer le Ranjit Kumar Mishra, assistant, confidential wing, Inter Council le Shail Kumari, principal­cum­centre superintendent, G.A. Inter College, Hajipur hai chu Court in ni 14 sung judicial custody (jail)­a um phawt dinga rel angin Jail­a thun a ni tah. Bihar Board Examination Board Chairman Lalkheshwar Prasad Singh chu an bi hmang leiin man a la ninaw a, Bachcha Rai, Director­cum­principal, VR College, Vaishali district hai ruok chu zanikhan SIT kutah an pe. Bihar topper scam hi Special Investigation Team (SIT) in an suizui mek a nih.

MCI in faculty details pelut seng dingin
NEW DELHI: Medical Council of India (MCI) chun India rama Medical Colleges hai chu an institution­a faculty hai details MCI website­a thun (upload) dingin tuta inthawk ni 2 sung ngei MCI kuoma pelut dingin an hriettir. Medical Colleges thenkhat han thawktu indailo saa faculty mamaw le thatawk an nei nia an hril rawp hlak leia langtlang  tak le “Ghost”faculty sukbo  le dona dinga Supreme Court thupek dungzuia hi thil hi MCI in a thaw a nih.

Puducherry Speaker dingin Vaithialingam
PUDUCHERRY:  Congress leader le Chief Minister hlui V. Vaithialingam chu zanikhan Puducherry Legislative Assembly Speaker dingin khingtu um lova thlangtlinga puong a nih. Vaithialingam hi Puducherry Chief Minister term 2 zet lo chel ta a nih. Chun, pro­tem speaker  V.P Shivakozhuthu khawm khingtu um lovin Dy. Speaker dinga thlangtling a ni bawk.

NIA in Fake currency kingping an man
NEW DELHI: National Investigation Agency (NIA) chun India pawisa lem (Fake Indian Currency notes­ FICN)­a sumdawngna le inzawma mawphurtu/supply­tu taka intum Alamgir Sheikh @ Raju of Bihar an man. September 19, 2015 khan Bihar hmuna India pawisa Rs. 5,94,000 leh  pasal pakhat Afroz Ansari chu DRI han an man a, hi taka inthawk NIA in case hi lain an hung suizui a, Afroz Ansari inpuongnaa inthawk Alamgir Sheikh hi mana hung um a nih.

Naupang pahni Car sungah thuok insamin an thi
JAIPUR: Rajasthan­a Pugia village a chun kum 4 le kum 8 mi naupang pahni hai chu car sunga lutin anni le anni an inkalkhum a, an suok thei ta sinaw leiin boruok tlawm leia thuok insamin an thi ve ve. Thuok insama thi naupang hai chu Kiran Wawri le Vinod Bawri hai an ni a; Car hi an thenum hai ta a nih. Car neitu hin a va hmusuok a, inrang takin hospital panpui an ni a, sienkhawm doctor han an san thei ta chuong naw a nih.

Nuhmei fighter pilot pathum an sinah
HYDERABAD: Nuhmei fighter pilots 3 hai chun an training an zo ta leiin June  18, 2016 khin Indian Air Force (IAF) ah dan angin laklut anni ta ding a nih. India rama ding chun nuhmei fighter pilot hmasa tak ding a nih. Nuhmei fighter pilot training zo ta le IAF a laklut dinghai chu, Bhawna Kant, Avni Chaturvedi le Mohana Singh hai an nih. Combined Graduation Parade hi Air Force Academy, Dundigal­ah nei ning a ta, Union Defence Minister Manohar Parrikar chu khuolliena thangin nuhmei fighter pilot pathumhai hi dan pangngaiin an sinah laklutna nei a tih.

VAWISUN THUPUI
Dittakhai, mikhuol le khuolfe in ni leiin, thlarau do hlaktu tisa chaknahai bansan dingin ka ngen cheu. ­ 1 Peter 2:11

Editorial: Hun remchang thain hmang inla

Ei hriet seng angin June 9, 2016 zanrila inthawk Manipur a National Highway haiah ni 10 sung dai ding Economic Blockade tan a ni a. Manipur mipui mamaw thil chi tum tum phurtu Truck­hai chu an chawl thup bakah vairama inthawka hung Truck hai khawm dang anni leiin Manipur puotienga inthawka ei laklut hlak ei thil mamaw hai chu hung lut ta lovin a chawl thup ta a. Hi lei hin thil man chu a kaisang tan mek.Sawrkar le pawl tum tum han economic blockade suonlama hmanga thil man inkaisangtir lo dingin dawrkai le sumdawngtuhai ngen hai sienkhawm umzie a nei chuong nawh. Tuta hmaa economic blockade thaw hun haia khawm khan hiengang hi thil lo um ta hlak a ni a. Ngenna siem inlakhawm economic blockade suonlama siemin thil man chu a hung kaisang ta tho tho a nih. Thil man kaisang dan hi sungkhata nitin mamaw inchawtu han an hrietchieng hle ring a um. Entirna dingin Arsa (Broiler) siemsa (dressing) kg. 1 ah Rs. 200/­ a zawr hlak kha tuhin Rs. 230­250 a zawr a hung ni a, tu ruok hin chu dit zat zat inchawk ding khawm a um meu ta nawh.

Economic Blockade le bandh hai hi thenkhat ta ding chun harsatna nisienlakhawm thenkhat ta ding ruok chun malsawmna a nih ti inla ei hril suol taluo ring a um nawh. Economic Blockade sawr tangkaihai chun hausakna, inhmun inchawkna, pucca building bawlna le motor inchawknain an lo hmang ta hlak. Tuta tuma economic blockade sung khawm hin a hlawkpui le a lo sawr tangkai ei um nuol ngei ring a um. Hienganga hamthatna lo dawng hi thil tha takpa chu niin an lang nawh. Mani unau le mani hnam chanpui hai harsatna hamthatna le hlawk phanaa lo hmang hi suol chi khat a nih. A bul tir laiin hlawkna a lo ni el thei. Amiruokchu, hun sawt a seia chun hmuingilna ninaw ni a, a pap tuor inlau um takel a nih.

Economic blockade hi ei nuom leia thaw ei ni nawh ti ei hriet seng a. Ei hnam thuoitu han thaw tul nia an hriet leia thaw a nih ti hi ei hriet le ei pawmtlang thei seng nuom a um. Indemna, insawiselna le chier inhruoinaah hmang naw inla nuom a um. Thil ei thaw ta si hin chu inthuruol takin thawtlang inla nuom a um. Ei hriet seng angin thangruol hi hratna a nih.  Hnam thangruol thiem thiem an ngirsuok hlak. Hi hi mitinin ei hriet ring a um. Nisienlakhawm, hi thil hi hriezing si a thangruol thei lo hnam an um a, an chan a se em em el a nih. Hnam thangruol thei lo hnam ni ve pal rawi ei tih ti hi inlau a um em em el a nih. Thangruol hi hratna le hlawtlingna a ni mieu leiin Manipur tlangmihai hi harsa hle sienkhawm thangruol ei tum tlat ding a nih. Ei thangruol phawt chun ieng huna mani chu ei thiltum le ngenah la hlawtling ei ta, ei ta dingin khuo a la var ding a nih.

Mihriemhai hi a hawna khawsa dinga Pathienin a mi siem ei ni a. Mi tukhawm mania um thei ei um nawh. Midang zara khawsa thei vawng ei ni a, midang mamaw der lo ei um nawh. Chuleiin midanghai le thangruol thiem a pawimaw a, midanghai le thangruol thiem thiem mi vangnei, mi hamtha anni hlak. Manipur a cheng, Manipur mi seng seng ei intheida a, ei inkaltuo a, tawngbau le lungrila ei indo tlat chun ei thil thawna haia hin hlawtling ngai nawng ei tih. Chu nek chun harsatna, buoina le inthedarna a hung rasuok ding a nih. Hi lei hin ei lungril ei suklien a, ei thil dit le ngen haia hin inbiekna nei a, tlang taka ei lungrilhai inhriltuo a, inbiekremna siem hi a pawimaw a nih.

Bills pathumhai hi siem that naw chun Manipur­a tlangmi le phaimi hai hi ei inrem thei ngainaw ding a nih ti chu a chiengsa a nih. Bills pathum hai hi India President in pawma suoi a la thaw thaw naw hi hun remchang thain la thei inla nuom a um. Hun remchang thaah ei lak a, ei inbiektuo a, ei harsatna, ei inrem theinawna hai le ei pawm thei nawna lai point­hai ei chingfel thei hlau chun ei renga ta dinga that tlangna hung ning a tih.  Tlangmi le phaimi han lungril lien tak ei put a, hieng bills pathum hai chungchanga hin inrem thei dan lampui chu ei dap a tul a nih. Ei Bible khawmin, hun remchang zawng le inchaw dingin a mi hril a, tuta ei hun tawng lai mek hi hun remchang thaah hmang inla nuom a um takzet el a nih.

A tu tieng tieng khawmin bandh, economic blockade, cease work strike, Public curfew, agitation, total shutdown le a dang danghai thaw thaw inlakhawm ei thil dit le ngen hmuna ding chu a ninaw ding a nih ti chu ei hriet seng. Hieng a ni lei hin ei thil dit le ngen hmuna ding chun lampui ei dap chu ei thaw ding mamkaw a nih. Titak ema chu Bills 3 hai chungthua hin Manipur tlangmi le phaimi hai hi inkhing le inkaltuo anga ei um hi pawi a ti tak tak dim maw? ti hi ngaituo ve a tulin an lang. Thina, hliemna, in le lo rawna hai chen a tlung ta a, tuchen khawm hin ei dit dan angin ei Bills pathumhai chungchanga hin a la che nawin a la muongchang hle a. Hi taka inthawk hin ei ni le ei ni inkarah buoina suoka hin ana a deng na nawh ti hriet theiin a um.

Post a Comment

Powered by Blogger.