Hmar hnam thuoitu han Assam CM an inhmupui
GUWAHATI:  June 10, 2016 (zani zingkar) dar 11:30 khan Hmar hnam thuoitu han Assam Chief Minister Pu Sarbananda Sonowal chu Guwahati­a a chengna inah an inhmupui. Hmar hnam thuoitu hai chun Chief Minister thar an lawmpui malamin kum 2012 a inthawk Assam­a Hmar political process fe lai mek fumfe taka hma lapui dinga ngenna an siem bakah Hmar hai ngirhmun le Political demand sukpuitling vat dingin an ngen  bawk.

January 24, 2012 khan HPC(D) Assam Region chun Government of India le Government of Assam hrietpuiin ralthuom intungin Tripartite Talks vawi iemanizat an lo nei ta a nih. HPC (D) chun NC Hills le Barak Valleya Hmar hai bubitna keikhawmin Assam­ah Hmar Autonomous District Council indin hi an ngen le a fepui a nih.

Tuta tuma Hmar thuoitu Assam Chief Minister inhmupuitu­hai chu Dr. John Pulamte, David Buhril, Lalthlamuana Hmar, David L. Hmar, le Elvis L. Hmar hai an nih. Hmar thuoitu hai chun hnamin hmasawnna lam pawimaw tak ei hraw mek hi Pathien zara ei hlawtling ngei theina dingin tawngtainaa lo san seng dingin mipui hai an ngen.

Pakhat jail­a thun
CCPUR: Hengkot khuo bula Zeliangrong United Front (ZUF) overground ni dinga ringhla leia 7­Assam Rifles han bufai bag 50 le Rs. 1,52,000/­ le an man Soithianlal (35) s/o Lalkhogou of Khousabung le a nuhmei Kimneihthem (34) of Khousabung hai chu zanikhan CCPur Police han CJM Court hmaah an inlangtir a, Court rel angin Soithianlal chu Jail­a sie a ni a, a nuhmei Kimneihthem chu bail­in an suo. Police chun hi thua hin FIR No. 27 (5) 2016 CCP­PS U/S 400/34 IPC an registered a nih.

Tuithapui vadungah a tla hlum
CCPUR: Mr T. Khamchinkhup (26) s/o T. Laltuakmawi of Khominthang, New Lamka chu zani zingkar 10AM vel khan Saikawt leilak bula Tuithapui vadungah Nga a man naah changsuolin Tuithapui vadungah a tla a. Hi thil tlung an hriet le inruolin HYA bakah hnam tum tuma tlawmngai pawl han hmun tum tumah ruong zawngna sin an thaw nghal a, hi thu ei sut chena hin a ruong hmu a la ni nawh. A bag chu hmu a nita a, sienkhawm a ruong hi hmu a la ni nawh. Khuo an thim ta leiin a ruong zawngna sin hi sukchawl phawt a ni a, zing khawvar­a inthawk zawngna sin sunzawm nawk ni dingin ei thu dawngna chun a hril.

AMTWU in Awareness
CCPUR: All Manipur Tribal Women Union (AMTWU) chun tulai buoina le inzawmin tlangram tieng Zoutung, Bukpi, Thanlon le Sinzawl haiah Awareness thaw dingin June 11, 2016 hin Tui­thaphai suoksan an tih. Mipui hai tawngtainaa lo san dingin an ngen.

Gelatine bomb a chawipuok leiin a hliem
DAMDIEI:  Pu Lalruot Lungtau  b/o Pastor Lalsangthang, AG chu June 9, 2016 khan Nga manna dinga bomb deng a tum laiin a kut chungah a puok leiin a kut  changtieng kutbawr an dar vawng bakah a mitmu vawitiengpang a tawksa leiin na takin a hliem. Pu Lalruot Lungtau hi Parbung Hospital­a dressing thaw a ni zoin Tuithaphai tieng hung phur nghal a ni a, zanikhan District Hospital,CCPur hung phurtlung a ni a.Amiruokchu Doctor han RIMS, Imphal tieng an referred leiin Imphal tieng panpui nghal a nih tiin ei thu dawngna chun a hril.

Pu Lalruot Lungtau hi HYA Damdiei Unit­a sin pawimaw tak chel laizing, mi tlawmngai thei tak a nih. (with input form Lalnunthang Songate)/ Photo: ElàrEs

PLA/RPF cadre ni dinga ring 1 man
CCPUR: Zani (June 10,2016) zingkar dar 12:15 vel khan 2­J&K Light Infantry pawl chun Sangang area­a Saiton hmunah PLA/RPF cadre ni dinga ringhla Phairibem Anand @ Jiten Meitei @ Nanao (42) s/o Ph Manichao Meitei of Khuangmun village chu an man a, CCPur Police  station­ah an peklut niin zanita Police thusuok chun a hril. Police chun FIR No. 28 (6) 2016 CCP­PS U/S 20 UA (P) A.Act an registered bakah zanikhan CJM/CCPur hmaah an inlangtir a, Court chun June 16, 2016 chen Police Custody­a la um phawt dingin a rel.

HWA inrawinain bungheia tawngtairuolna
CCPUR: Hmar Women Association (HWA) General Headquarters hmalaknain June 10, 2016, 8AM a inthawk zantieng 1:00PM chen khan Rengkai Community Hall­ah bungheia tawng­tairuolna nei a nih. Hi huna hin CCPur area sunga HWA unit tina inthawk member tam tak an fekhawm a, thupui tum tum neiin tawngtairuolna hun hi hmang a nih.


Tawngtairuolna thupuia an nei hai chu­ Hmar hnam sunga Organisation tin le Kohran tina thuoituhai ta ding; Politics le Kohran, Civil Society le Tlangvalhai; Social thila nuhmeihan an mawphurna hai hre a, an hmang ngei theina ding; Hmar hnam sunga inpumkhatna le hmasawnna ding lampui le Ram le hnam siemthatna ding hin nuhmeihai hi ke pen suok ding ei nih ti hai a nih. Hun tawp tieng Pi Chawngtuozing, Gen. Secy. HWA GHQ in tawngtainain hun a khar.

Lenruol Duoilo FC in Pass hai lawmpuina an nei
CCPUR: Lenruol Duoilo Val F.C. football Club buotsainain zani zan khan Saidan khawsunga tukum HSLC le HSE exam­a hlawtlingna chang hai lawmpuina le thaw tha bik zuolhai kuoma award semna “The 4th Saikhawpui Inchuklai Award­cum­ Felicitation Programme” Saidan Comunity Hall­ah nei a nih. Hi huna hin Pu Isaac L. Pakhuongte, Principal, Sielmat Christian Hr. Sec. Khuollienin a thang a, Pi Lalrinmawi, Headmistress, Happy Heart School, Bethel khuol inzaum in a thang.



Khuollien chun, ei hnama inthawk class X le XII tha taka pass ei tam a, sienkhawm hlawtling taka muolsuo ei tam naw hi ei tumru tawknaw leia nih. Pathienin vai hai neka thiemnaw bik nawh tiin a hril. Tukum Sielmat school­a science stream admission thaw 100­ah 90 han Doctor ni an nuom a, Arts stream a mi 100­ah 90 han Civil  Services le Army Officer ni an nuom thu an hril a, hieng popo hi a taka an sukpuitling chun Civil officers le doctor hau hleng ei  tiin a hril a, student hai chu an tum sukru dingin an fui. Saidan khawsunga pawl 100 pass laia a thaw tha tak Ms Tracy Lawmnapar, Happy Heart School a inthawka zo chu Sielmat school­a a kai ding bawk leiin a kum khat fee an inawl ding thu hi huna hin a puong. Khuolinzaum Pi Lalrinmawi chun, inchuklaihai chu mani sin hre chienga, tumruna le nungchang tha taka inchuk chu hlawtlingna a nizie uor takin a hril.

HSLC a thaw tha tak (L) Upa V. Thanga Memorial Award Rs. 5000 + Memento le MIL (Hmar) a thaw tha tak nina LDV MIL­ Hmar topper Award (Memento+Rs. 500) chu Ms Tracy Lawmnapar (76%) kuoma inhlan a ni a.  Class XII Science/Commerce thaw tha tak (L) Hnawla Infimate Memorial Award (Memento + Rs.5000) chu Mr.Fimlunthang (74%) le Arts Stream a thaw thatak chu (L) Remruotmawi Award (Memento + Rs.5000) Mr.Martin Lalrosang (72%) kuomah inhl^n a nih. Hlawtlingna chang hai popo Certificate inhlan seng an ni bawk. LDV F.C club hi CDSA le NYK affiliated club a nih.

Donation petu hai chunga lawmthu a hril
CCPUR: Manipur all party palai hai Anti­Tribal Bills President in suoi a thaw vat theina dinga nawr dinga Delhi­a an fe le inzawma MTF­D inrawinaa Delhi­a tribal um han Manipur Bhawan, New Delhi hmuna protest an va nei huna security hai chetna leia hliemna tuok hai thangpuina ding dawl a ni huna donation petu hai popo chungah AMTWU, ATML le Whatsapp group tum tum han lawmtu an hril. Sum dawl khawma um kha a rengin Rs. 1,03,250 a tling phak a nih.

JAC le tribal Chief han meeting an nei
CCPUR: Zanikhan JAC Against Anti­Tribal Bills chun  KKL Complex,IB Road, CCPur­ah tribal chiefs tum tum hai leh joint meting an nei a. Hi huna hin Hmar Chief Association inrawinain Kuki Chief Assn, Zomi Chief Assn. le United Chief Committee inrawinain Anti­Tribal Bills le inzawmin New Delhi­a inzin ding, chu thila dinga sum seng chu Chief (Lal) tinin anni an intum ding, All Tribal Chief Forum khawm thang ve dinga fiel ding ti le  JAC hmalaknaa hmang dingin khaw tina Village Authorities han Rs. 2,000/­ neka tlawm lo an thawlawm seng ding, sum hi khaw tina lal han an dawlkhawm ding tiin an resolution an passed.

Hi zo hin JAC chun a hranin Executive meeting an nei nawk a; mi thenhaktin JAC le tribe council tum tum han anti­Tribal bills thuah hmun hran hrana public awareness an thaw mek chu State Assembly election nawka in candidate nuom hai sponsored a nih tia  indiklo taka an hril  chungthu hriltlangin hiengang thudiklo hriltu hai chu JAC in a ngaizam naw ding thu le boycott­a um MLA han SDO/BDO Sangaikot  an hawng dinga prog. induong chungthuah thil ditum lo a tlung chun KSO Sangaikot Block in phur a tih tiin an hril.

Class X le XII passed hai lawmpuina an nei
CCPUR: Zani 11:30AM khan New Lamka Dorcas Veng­a Cemetry Hall (YPA thlanmuol) ah Thanlon ADCC, 6­ Parbung ADCC, 9­ Ngazam ADCC le 10­ Tuivai ADCC hnuoi haia class X & XII passed hai lawmpuina hun hmang a nih. Hi huna hin hlawtlingna chang hai  tawngtaipekna Rev. S. Ginmalsawm, Director of Social Development, EBC in a nei a; Valte Vungzamuan, IRS, Prof. Dr Ginlianlal Buhril, Mumbai le Ruoivel Pangamte, Vice Principal,CCpur han student hai infuina thu an hril. 5­Thanlon ADCC hnuoiah class X passed 35, class XII 43; 6­Parbung hnuoiah class X passed mi 49, class XII 25; 9­Ngazam hnuoiah class X passed 30, class XII 20 le  10­Tuivai hnuoiah class X passed 22 le class XII passed mi 26 hai kuoma MDC han lawmpuina thilpek an inhlan. Hi hun hi  HSA GHQ, KZP GHQ, Zillai GHQ, KSO GHQ le SSPP GHQ thuoituhai khawmin an uop ve a, zantieng ruoi an kiltlang.

Health minister in TN Haokip Meritorious Award a sem
CCPUR: TN Haokip Foundation (TNHF) Trustee Board hmalaknain zani 11:30AM khan   B.Vengnuom Community Hall ah 59­Saikot A/C sunga 12th Meritorious Award Distribution, 2016 nei a  ni a, Chief Guest in D. Korungthang, Minister (Health & FW, CADA & GAD) a thang a, Guest of Honour in James Doujapau Haokip, SDO/BDO Tuibuong le Special Guest in Vanlallien Haokip, Principal,Salt Brook School a thang. Rev. Hemkhomang, Principal, DTS in Meritorious Award dawngtuhai tawngtaipekna a nei.



Khuollien chun, student hai chu zinga ram le hnam thuoitu la hung ni ding le ram lungphum an ni a, bandh le strike haiah inrawl ngai lo ding le teachers le nu le pa hai inza dingin student hai an fui. Tum fel tak nei dinga student hai infuiin, award dawng phak lo hai khawm inngaisie el lova nasa lema thang la dingin an fui. Pawl tum tum hai chu bandh huna student hai hmang ta ngailo dingin a ngen.

Manipur­ah Govt.School nekin Praivate school hai an hlawtling lem leiin mi tam takin education tieng Manipur sawrkar chu a hlawsam niin an ngai a, sienkhawm  Manipur­a  3rd division­a pass student hai le state danga first/second­a pass hai hrietna an thuhmun deuthaw a nih; hi lei hin sawrkar a hlawsam lawm lawm nawh ti an lang. Pi le pu han Lung (stone) khawm titak zeta ei hmet chun an nem (soft) a nih tia an lo hril angin student hai chu an inchuknaa an hlawtlingna dinga lungril le titakzeta thaw dingin an fui.

James Doujapao Haokip chun, pawisa seng lo khawma lekha thiem tak tak chun sin hmu thei a ni thu hrilin ama ngei khawmin sin dang dang 5 lai a lo thaw ta thu a hril. Special Guest chun, hlawtlingna dingin Pathien le nu le pa hai inza a, self discipline nei a pawimaw thu a hril.

Award semnaa hin T.N. Haokip, President MPCC khawm a hung thang.

Economic Blockade tan, lamlakah motor an intang
IMPHAL: JAC Against Anti­Tribal Bills chun June 9, 2016 zanrila inthawk khan Manipur tlangram pumpuiah ni 10 sung aw ding Economic Blockade an thaw tan. Manipur mamaw ding phurtu motor tam takel lamlakah an intang tan. Economic Blockade leia thautui hung vang ding inlau leiin Imphal kahwpui sunga Oil Pump haia chun petrol le diesel la dinga intlar an tam hle. Oil Pump thenkhat lem chu an inkhar tan ta niin ei thu dawngna chun a hril. Hieng laizing hin IOC Depot, Chingmeirong­ah petrol le Diesel ni 20 chuong dai ding sekkhawlsa a um nia hril a nih.

AR han Phungyar­ah Comminity Hall
IMPHAL: 17­Assam Rifles han Ukhrul District sunga Phungyar khawsunga‘Operation Sabhavana’ project, 2015­16 hnuoiah Community Hall an bawl chu an zo ta a, June 8, 2016 khan Phungyar khaw mipuihai hmang dingin Village Authority, Phungyar kutah an inhlan. Chairman, VA, Phungyar chun an khaw mipuihai aiawin Assam Rifles hai kuomah lawmthu a hril.

School Van in mi 5 a baw hliem
IMPHAL: Zani 2:30PM vel khan School Van (Maruti Van MN­1K0659) hrat taka tlan chun Kakwa Boroi Mekhong, Imphal West District, PS Singjamei ah ILPS le inzawma nuorna neihai a baw a, nupui 5 an hliem a, hliem hai laia pahni an hliem inrik nia hril a nih. Mipui lungsenin Van hi suksein an namtluk a, a thalin an let zovin meiin an raw. Van driver, Thokchom Thembi of Singjamei Thongam Leikai khawm mipui han an man a,Singjamei Police station­ah an peklut. Hliem inrik hai hi RIMS panpui an nih.

NH­37 ah Mimkei nasa tak
IMPHAL: NH­37 (Imphal­Jiribam Road) a Makru leilaka inthawk km. 5 vela hlaah mimkei nasa tak a tlung a, hi lei hin motor­hai fe thleng thei lovin dang. Mimkei hi inthiel mek a ni a, motor fe thleng thei hun ding hriet a ni nawh tiin ei thu dawngna chun a hril. Chun, All Jiribam Contract Teachers’Association in June 8, 2016 zanrila inthawka Economic Blockade an thaw tan chu June 13, 2016 zanril chenin la sunzawm an tum thu an hril.

LS le MLA Election a ruola nei dan ding
NEW DELHI: Sawrkar thlungpui chun India ramah Lok Sabha le MLA election a ruola nei dan ding a ngaituo a, hi thil buoipuitu ding hin Union Law Ministry hnuoiah Committee an din a, hi Committee hin July thla khin report zo a ta, chu report chu Cabinet­ah pelut a ta, Union Cabinet meeting in thutlukna a siem ding nia hril a nih. Hi thil hi a thei ding a ni chun Assembly thenkhat hun suksei a, thenkhat hun (term) suktawi a hung tul ding a nih. Chun, India ranpui (constitution) khawm siem that a hung tul bawk ding a nih. Election hi a ruola nei a ni chun Rs. 9,000 crores neka tam seng a tul ring a nih. Sawrkar chun hiengang election dan hi kum 2019­a hmang hman a lungril deu nia hril a nih.

Mi 2 electric in a man hlum
IMPHAL:  June 9, 2016, 10:30AM vel khan Ishok Chingphu Terapokpi hmuna electric in pasal pahni, Huidrom Tomba Singh (28), S/o H. Pishak Singh of Ishok Maning Leikai, VDF personnel le Oinam Ramkumar (33), s/o (L) O. Pobito Singh of Ningthoukhong hai chu a man hlum a, Oinam Mahesh Kumar Singh (30) of Ningthoukhong chun hliemna a tuok. Hieng pasal pathum hai hin electric bana MGNREGS campaign poster tar an tum laia Electric hrui an tawkfuk leia a man niin ei thu dawngna chun a hril. Hi thil tlung le inzawm hin Police han case an registered.

KSA in darkar 48 General Strike
IMPHAL: Kangleipak Students Association (KSA) President, Moirangthem Lakshman chun June 11, 2016 zantieng dar 5 a inthawk June 13, 2016 zantieng dar 5 chen, darkar 48 sung Manipur pumpui huopin General strike an thaw ding thu a puonglang.KSA General Secretary, Sukham Bidyananda thangsaa KSA members 5 Police in anman a, lungina an khum hai insuo dinga an ngenna state sawrkarin a sukpuitling naw leia general strike hi thaw an tum niin KSA president chun a hril. KSA member­hai hi May 27, 2016 a kha food adulteration le hme chi sahriek black marketing an dodalna le inzawma man an nih. An general strike thaw ding hin medical services, power, water supply, media, sakhuona thil, ILPS le June 18 Uprising Day le inzawmna nei thil hai chu huomsa naw nih tiin KSA thusuok chun a hril.

Lekha pawimawhai pelut dingin
IMPHAL: Directorate of Education (S) Manipur in Die­in­harness hni hai ta dingin lekha pawimaw chi tum tum, Original application for appointment under die­in­harness scheme; Certificate in support of date of birth of the applicant; Death Certificate of the deceased Govt. Employee le service termination Order of the deceased govt. employee hai chu June 25, 2016 chenah hi Directorate a peklut dingin Director of Education (s), Manipur chun inhrietirna a siem. Annexure chu hi Department Website:www.manipureducation.gov.in ah hmu thei a nih.

LDA lakna ding Viva Voce
IMPHAL: Manipur Legislative Assembly Secretariat a thawk ding LDA sin lakna dinga Speed test a hlawtlingha ta dingin June 14&15, 2016 khin Viva Voce nei ning a tih. Viva Voce hi  11:00AM ah tan ni hlak a tih. Chun, Compositor, Securityman le Security women lakna dinga Viva Voce a la thang lo hai ta ding khawmin June 16, 2016, 11:30AM a inthawk khin Viva Voce nei nawk ning a tih.

SIT in mi 5 an man tah, mi 2 zawng mek
PATNA: Bihar –a Intermediate result scam thuah Special Investigation Team (SIT) chun mi 5 an man ta a, sienkhawm mawphurtu taka intum Bihar School Examanition Board Chairman Lalkeshwar Prasad Singh le Vishul Roy College Principal Bachcha Roy hai chu an inbihmang leiin man an la ninaw a, zawng mek an nih. Merit scam le inzawm hin Police chun college khar in document tam tak an man ta bakah Police chun Roy le Singh hai call data records le bank transactions hai an enfel mek bawk.

Sungkhaw leiin Punjab­ah mi 6 an thi
PATIALA:  Punjab­a Patiala district sunga Samana region­a chun ni 5 liemta sung khan sungkhaw (diarrhoea) leiin mi 6 in thina an tuok ta bakah sungkhaw­a damnaw mi 118 an um mek. Hi le inzawm hin Punjab minister for Water Supply and sanitation Surjit Singh  Rakhra chun district authorities hai chu Sungkhaw natna inleng nasan zawngsuok ding le damnaw hai a thlawna enkawl dingin an hriettir. Health department chun rapid response team siemin Sungkhaw inlengna hmun haiah damdawi an sem mek.

Biometric machines inbuk vawng dingin
GUWAHATI: Assam Education minister Dr Himanta Bishwa Sarma chun, Assam state sunga government le government­recognised Colleges 301 hai po po chu teachers hai kai le kainaw sinsiena dingin Biometric attendance machines inbuk vawng dingin school thuneitu hai an hriettir. Zani hmasa colleges principals hai meeting a neipui huna hi thu hi Dr Himanta Bishwa in a hril le an hriettir a nih. Hi baka hin colleges hai chu digital library le wi­fi nei vawng dingin an hriettir bawk.

PM India ram a hungkir tah
NEW DELHI:  Khawvel rambung tum tum 5­ Afghanistan, Qatar, Switzerland, US le Mexico hai sir dinga  June 4, 2016 a inthawka inzinsuok PM Narendra Modi chu  India ram a hung kir nawk tah. An zin sungin PM hin Afghan PM leh Afghan­India friendship dam (Salma Dam) an hawng ruol bakah US President Barack Obama, Switzerland President Johan Schneider­Ammann Schneider le Mexcico President Enrique Pena Nieto hai chu NSG Membership chungthu PM hin a hrilpui India in Nuclear Suppliers Group (NSG) member/group ni a tumna chu hi pawla lusa pawl Switzerland le Mexico ram hai chun an thlawp thu PM Narendra Modi hi an lo hril.

UGC in Pay Revision Committee an din
NEW DELHI: University Grants Commission (UGC) chun University le College­a thawktu hai hlaw ennawntu ding member 5 umna Pay Revision Committee an din. Hi Committee hi Prof. V.Chauhan in inrawi a ta, thla 6 sungin report an peklut ding ti a nih. Hi Committee chun College teachers hai bakah Librarian, Physical education teacher le thawktu dang dang hai hlaw khawm a ennawn bawk ding a nih. Chun, mi thiem tamlem hip theina dingin Committee chun hamthatna dang dang um hai a ennawn bawk ding a nih. Member danghai chu­ Madras Institute of Development Studies­a National Fellow, Prof P. Duraisamy; Delhi School of Economics­a Prof. Ram Singh, IAS officer (retd)  R C Panda le HRD ministry­a Joint Secretary Praveen Kumar  hai an nih.

VAWISUN THUPUI
Nisienlakhawm, in lungrilah itthikna khatak le mani hmasielna in nei chun, thudik chu uong khum le kalin khel hril naw ro. ­ Jakob 3:14

Editorial: Bills pathumhai hi

August 31, 2015 khan Manipur Assembly chun Bills pathum, The Manipur Land Reforms and Land Revenue (Seventh Amendment) Bill, 2015, the Shops and Establishment (Second Amendment) Bill, 2015 le The Protection of Manipur People Bill, 2015 hai a passed a. Hieng Bills pathumhai hung intanna san le state Assembly in a hung passed­na san chu ei hriet seng. Inner Line Permit System (ILPS) lei a nih. Amiruokchu, hieng Bills pathumhai hin ILPS chungchang chau ni ta lovin thil dang dang tawksa a nei dingleia Bills buoipui um, buoina le harsatna chi hran hran hung intlun a ni ta a, ienganga buoina le harsatna am a la hung intlun pei ding ti chu hril thei le hriet thei a la ninaw a, chingfel vat a ninaw chun buoina le harsatna chu a la hung intlun pei ding niin anlang. Hieng Bills pathumhai hi a ram mipuihai ta dinga tha le ditum nisienla chu hieng lawm lawma buoipui luoi luoi hi chu a ni dim maw?

Hieng Bills 3 hai chungchangah hin June 7, 2016 khan Manipur Chief Minister O.Ibobi Singh inrawinain Manipur­a inthawka all political party palaihai chun Union Home Minister, Rajnath Singh a office, New Delhi­ah an inhmupui a, Bills 3 hai chungthu hi darkar khat neka sawt an titipui a, iengangin am Bills 3 hai chungchangah hin an ngaidan le dit dan an hril ti ruok chu chipchier taka hrietna ei nei nawh. All party palaihai hi CM thangsain mi 18 an ni a, hienghai lai hin tlangmi pahni, Gaikhangam le T.N. Haokip an thang ve a, ei unau chalranghai thu hril le thil ngen hai chu anni pahni hin an hriet chieng ngei ring a um.

Hi huna hin Union Home Minister Rajnath Singh chun, Bills 3 hai laia “The Protection of  Manipur People Bills, 2015 chu President in remtipuina (assent) a thaw naw leia thawnkir niin a hril a, Bills dang pahni, “The Manipur Land Revenue and Land Reforms (Seventh) Amendment Bill, 2015” le “The Manipur Shops and Establishment (Second Amendment) Bill, 2015” hai ruok chu dan hrie mi (constitutional and legal expert)  hai enawn le enfel ding niin Union Home Minister chun all party palaihai a lo hril a, President in hieng Bills pahnihai hi remtipuina a pek ding am ti le a pek naw ding am ti ruok chu a hril chuong naw niin  Manipur All Party Delegation han June 7, 2016 a New Delhi hmuna Press Release an siema chun ziek a nih. CM thangsain all party palai mi 18 hai chun Press Release a hin suoi an thaw seng.

Union Home Minister chun Bills pahnihai chungthua hin meeting ko vat a ta, hi meeting a hin legal le constitutional experts hai thang an ta, hi Bills 2 hai an en tha (re­examine) ding thu le hi thu hi Manipur CM hung inhriettir a ni ding thu press release an siema hin zieklang a nih. Hi meeting hi nei a ni ta am, annawleh iengtika nei ding am ti ruok chu hriet a la ninaw a, hi meeting result hi nghak hri phawt chu niin an lang. Hieng Bills pahnihai hi President in a remtipui ring pawl an um a, nisienlakhawm thu chieng tak hril thei ruok chu mi tukhawm anla um naw niin an lang bawk.

Joint Committee on Inner Line Permit System (JCILPS) pawlin Inner Line Permit (ILP) system Manipur­a hmang sunzawm nawk dinga ngennaa hma an lakna hi a sawt ta a, Inner Line Permit System chau hmang ding chungthu nisienla chu Manipur­a tlangmi chenghai hin an hniel ring a um nawh. Amiruokchu, tlangmihai laia hotu le thuoitu hai Bills pathumhai pasina ding thua hin rawn hmasak um lova Bills siem le pasi a hung ni el ta a. Hieng Bills haia hin thuruk inthup inthuk tak a um niin anlang a, hi lei tak hin Manipur tlangmi hanhieng Bills pathumhai hi Anti­Tribal Bills tia an hung ko hiel ta a nih.

JCILPS dit dana Manipur Assembly in Bills pasi haia Manipur mi indik tak nina dinga kum 1951 bituk a ni khawm hi hrietthiem an tak a nih. Non­Local an ti hi Vai le hnam danghai an inkawktirna angin hrilfie tum hai sienkhawm tribal­hai ta ding chun pawm thei ding niin anlang nawh.Bill­hai hin thiltum dang, inthup takel a nei chu a nih.An tum tak chu tlangmihai le minority group hran hran hai ei nih tinaw thei a ni nawh. Assam rama hman Cut off year hi 1961 a siem a ni laia Manipur a dinga 1951 ni dinga siem tum hi chu thil ni thei ding niin an lang nawh. Tribal­hai chun ei dodal ding hrim a nih. Amiruokchu, Anti­Tribal Bills ei dona kawngah hin ei thangruol le inpumkhat a tul hle. Chuong naw chun ei thil ngen hi hlawsam pal ei tih ti hi inlau um takel a nih. Thangruol le inpumkhatna hi ei hmangruo hrat tak a ni ding a nih.

Post a Comment

Powered by Blogger.