HSA CCPur Jt. HQ in June 7­ah Felicitation prog.
CCPUR: Hmar Students’ Association (HSA), Churachandpur Joint Headquarters chun June 7, 2016 (Thawleni), 10:30AM khin H.L. Daka Memorial Hall, HSA Campus, Rengkai, CCPur­ah Felicitation Programme hmang an ta, Chief Guest in Pu Lunminthang Haokip, IAS, DC, CCPur thang a ta; Pu T. Goukhomang, ZEO, CCPur le Pu Lalhmasawn, DI, Tipaimukh, ZEO, CCPur hai chu Guest of Honour le Functional President in thang an tih.

Hi huna hin Chief Guest, guest of honour le functional president hai bakah Pu L. Ruoivel Pangamte, Vice Principal, CCPur College khawmin thuhrilna hun hmang a tih.

Award sem ding hai chu­ HSLC Subjects topper (Mathematics, Social Science, English, Science, Hmar MIL) le HSLC overall Topper; HSE Stream topper­ Commerce, Arts le Science bakah CBSE hnuoia overall topper Class X le XII ning a tih.

Sangaikot SDO/BDO functionalization le Felicitation prog June 11­ah
CCPUR: June 11, 2016, 11:00AM khin SDO/BDO Complex, Sangaikot hmunah KSO Sangaikot Block hmalaknain 13th Felicitation­cum­Functionalization of SDO/BDO Office um a tih. Hi huna hin Chief Guest in D. Korungthang, Minister (Health & Family Welfare, GAD & CADA) thang a ta, Guest of honour in T.N. Haokip, MLA & President, MPCC; Functional President in Ginsuanhau@ GS Haupu Zou, MLA thang a tih. Facilitator in Pu Lunminthang Haokip, IAS, DC/CCPur thang ata, Chief Host in Pu Pumtulthang Lianzo, MDC, Sangaikot thang a tih. Anni bakah hin special guest in mi 12 thang bawk an tih.

Hi huna hin Sangaikot Block hnuoia tukuma Class X le XII passed hai lawmpuina um a ta, Mangcha, Gen. Secy. KSO Sangaikot block inrawinain lawmpuina thilpek semna um a ta, Pastor Paominsei, Area pastor GTA (ECA) in student hai tawng­taipekna nei a tih.

Malaria Positive 5
CCPUR: District Malaria Department, CCPur chun May, 2016 thla sung khan damnaw mi 1463 hai thisen lain an enfel a, hienghai lai hin Malaria Positive 5 an hmu a, hilaia pakhat chu Malaria PF a nih.

Chun, January­May, 2016 inkar thla 5 liemta sung khan damnaw mi 6518 hai thisen lain an enfel a, hi hun sunga Malaria positive an hmsuok chu 7 le Malaria PF 1 a nih.

HSA Muolvaiphei in pass hai lawmpuina 
CCPUR: HSA Muolvaiphei Unit chun June 4, 2016 (INrinni) khan an tukuma an Unit sunga Class X le XII  pasi hai lawmpuina  hun an hmang. Hi huna hin hlawtlingna chang students 98 hai kuomah “lawmpuina Memento” inhlan a nih. Hi huna hin Chief Guest in Pu Zosanglur Joute,MCS a thang a, career guidance tiengpangah “Hlawtlingna dinga pawimaw hai’ ti thupui hmangin student hai hmaah thu a hril a, Pu Darsiemlien Ruolngul le Pu David L. Lungtau hai khawmin Career guidance huna thuhrilna hun an hmang bawk.


Applicant list tar
CCPUR: Manipur Police Department hnuoia Police Constable post 2052; Follower Post 564 le Manipur Rifles a Riflemen post 441 lakna hung um ding le inzawma Churachandpur district a inthawk Application form laa pelut hai (applicant list) chu en thei dingin Tuibuong­a SP/CCPur Office­ah tar a nih. Applicants han hi hmuna hin mani serial number en thei ning a tih.

Facilitation­cum­Career Guidance 
CCPUR:Mate Students Organisation (MSO), CCPur district chun zani 11:00AM khan Dr S. Radhakrishnan Foundation School, Tuibuong­ah “Falicitation­cum­Career Guidance, 2016“an nei. Hi huna hin tukuma Class X pass mi 10 le Class XII pass mi 20 hai kuomah lawmpuina thilpek inhlanna a nei a, Pr. Chungkhojam Mate in student hai tawngtaipekna a nei.


Thanlon­ah Public Awareness campaign nei
CCPUR: Manipur Assembly in a passed Anti­Tribal Bills 3 hai chungthuah June 3, 2016 khan JAC Against Anti­Tribal Bills hmalaknain Thanlon khuoah public awareness campaign nei a nih. Hi huna hin Thanlon Sub­Division huop sunga khuo tum tuma 35 haia inthawk mipui fekhawmin an thang. Hi huna hin JAC thuoitu hai le JAC member delegates Thangzamang; Rev. Dr Lalkhawlien Pulamte; James YT Thadou; KG Tungunung; Thangzamuan Tombing (ATSUM) le H. Mangchinkhup, Chief Convenor, JAC hai khawm thangin Bills chungthuah mipui hai hrilhrietna an nei tawl tiin  zanita JAC thusuok chun a hril.

Hi huna hin declaration 5 an siem a, chu lai chun Manipur Assembly in Bills 3 a passed demin, tribal representatives han an mipui le an ram hai humhalna dinga dodalna an la neinaw an dem thu; Bills 3 hai tribal areas haiah hmang an remti ngainaw ding thu; Thanlon mipui han inthuruol taka hieng bills 3 hai dodal tlat ding; Thanlon Sub­Divsion ah Joint Action committee in din dinga an remti angin Sub­Division level committee; Pu Dongchinpau, Chief of Thanlon chu convenor a ruot le committee indinna dinga mawphurna pek a ni thu hai a thang.

G.P. Women’s College thil suksiet le Answer Sheets keithler; CM lim raw
IMPHAL: College Students’ Council of Manipur (CSCM) Volunteers han zanikhan G.P. Women’s College an va hlukhum a, Computers, Laboratory equipments le hi College thil chi tum tum (Properties) thahnemtawk tak  tak an suksiet bakah B.A. le B.Sc. 4th Semester exam laihai answer sheets hai an keithler. Chun, College Lecturer pakhat Mobile phone lapekin an suksiet. Manipur University hnuoia B.A. le B.Sc.4th Semester exam hi zanita (04­06­2016) a tan a nih. CSCM chun tuta hma deua intahwk khan hi exam ding hi an boycott thu an lo puong ta a nih.

Haptakar liemtah khan CSCM Volunteers han Education (U) Office an va kal a, hi thil tlung le inzawm hin Police han student pahni an man a, students mana um hai hi thu hnung le thu hma um ta lo dinga insuo an phut a. Amiruokchu, mana um student­hai hi insuo an la ninaw zingleia CSCM hin nuorna an nei bakah exam hi an boycott a nih. CSCM a hin Colleges 13 a inthawka student­hai an thang a nih.

CSCM Volunteer­hai hin D.M. College, Thoubal College, Waikhom Mani College le Y.K. College, Wangjing haia B.A. le B.Sc. 4th Semester exam hai va sukbuoi an tum a, nisienlakhawm hieng College­hai hi Police han vengin an lo dang tlat leiin exam an va sukbuoi thei nawh. Exam chu a pangngaia nei a nih. Manipur tlangram biela College students han CSCM nuorna hi an zawm ve naw leiin Exam tluong taka nei a nih.

Churachand Higher Secondary School student­hai khawmin an School students 2 mana um hai insuo dinga ngennain zanikhan Wangkhei­Konung Mamang Road­ah Peace Rally an nei a, hi huna hin Manipur CM O.Ibobi Singh lim an siemfawm chu an raw. An student chanpui pahnihai hi ILPS ngenna le inzawma JCILPS hmalaknaa an zawm le thang huna Police han an man a nih. An student chanpui mana um hai hi insuo anni hmakhat an nuorna anla sunzawm pei ding niin an hril.

Motior 3 a neituhai kuomah
IMPHAL:  June 2, 2016 a eksiden leia intang motor pahni, Bolero le Jeep hai chu zanikhan Red Shield Division hnuoia 210 Field Workshop Company, Senapati Brigade chun lasuokin a neituhai kuomah an pekkir. Chun, Kangpokpi hmuan Truck pakhat raw siet nuol an hmu a, a neitu kuomah anpekkir bawk niin PIB Defence Wing, Imphal thusuok chun a hril.

Kum 15 sungin Rs. 426,77,75,7131/­
IMPHAL:  Modernization of State Police Forces hnuoiah Manipur Police Department chun kum 15 liemta (2000­2015) sung khan Construction of Infrastructure a hmang dingin sum Rs. 426,77,75,713 lai zet an dawng niin DIPR thusuok chun a hril.

Dy. CM in New Delhi a pan 
IMPHAL:  Manipur Deputy CM Gaikhangam chun zanikhan Imphal suoksanin new Delhi a pan. Ama khawm hin New Delhi­a lo um tah All Party palaihai a zu zawm ve ding nia hril a nih. CM, O.Ibobi Singh khawm direct in New Delhi a pan naw a, June 3, 2016 zan khan Kolkata­ah a riek a, zanikhan New Delhi a pan chau niin ei thu dawngna chun a hril. New Delhi­a cham mek all party palaihai khawmin zani chen khan chu Central thuoituhai inhmupui an la nei naw niin ei thu dawngna chun a hril.

MTFD in Manipur Bhavan­ah 
NEW DELHI: Anti­Tribal Bills 3 hai  Act a hung ni theina dinga President in suoi a thaw vat theina dinga zu nawr dinga Manipur CM O.Ibobi Singh inrawinaa Manipur all party palaihai Delhi­a an in camp mek le inzawmin zanikhan Manipur Tribals’ Forum, Delhi (MTFD) inrawinain tribal student bodies tum tum hai  chu Manipur Bhavan­ah an fekhawm. Hi huna na fekhawm hai chun “We’ll finish what our Martyrs started”, “Manipur tribals: Silent no more”, “Kill the anti­tribal Bills”, “India, hear our cries”, “Manipur MLAs: Blood on your hands” ti hai inziekna placard hai an chawi tawl.

Maharashtra Minister Khadse an ban
MUMBAI:  Maharashtra Revenue Minister Eknath Khadse chu corruption thawa intum a ni leiin zanikhan Chief Minister Devendra Fadnavis kuomah minister a ninaa inthawk inbanna a pek. Central BJP leader han party hming a suksiet ding a nih tia inban dinga an inhriettir hnunga inbanna hi a pek a nih. Pune hmuna Maharashtra Industrial Development Corp ram acre 3­a lien Ram hi Rs. 40 crore manhu vel ding Rs. 3.75 lakh chaua zawr a nina thuah corruption thawa intum a nih.

Apparel & Garment making Centre
AIZAWL: Union Minister of State for Textiles (Independent Charge), Santosh Kumar Gangwar chun Industrial Growth Centre, Luangmualah zanikhan Mizorama a hmasa tak ding Apparel & Garment Making Centre a hawng. Hi hunser hmangnaa hin Union Minister of State for Food Processing, Sadhvi Niranjan Jyoti, Jharkhand CM hlui Arjun Munda le Textiles tienga officer pawimawhai khawm an thang.

Mathura incident CBI insuitir dingin 
LUCKNOW: Jawahar Bagh, Mathura hmuna buoina suoka Police 2 thanga mi 24 zetin thina an tuokna thubuoi chu CBI insuitir dingin BJP le BSP han an ngen. Mathura buoina hmun sir dingin zanikhan BJP MP Hema Malini chu a va fe a, sienkhawm Police han Jawahar Bagh area an inluttir phal naw leiin hi buoina suoka thi SP City Mukul Dwivedi sunghai a va kan a, hi case hi CBI insuitir dingin a ngen. Hi buoina suokna hmuna hin zani hmasa khan ralthuom tam tak dapawk le man a nih. BSP Supremo chun hi buoina suok hi UP CM Akhilesh Yadav in a ngaitha tia hrila ama lei a nih tiin an   tum a,  CBI insuitir dingin a ngen.

Muzaffarnagar district­a Police Personnel hai chun an nikhat hlaw seng thawlawm dingin an rel. Muzaffar district­a Police han an nikhat hlaw seng an thaw lawm hi Rs. 34.50 lakh a tling phak ding niin SSP Deepak Kumar chun zanikhan a hril. Police 2 thi hai kha SP, Mukul Dwivedi le SHO, Santosh Yadav hai an nih.

Helpawl han Police 2 an kap hlum
JAMMU:  Jammu and Kashmir­a Anantnag district­a chun zani zingkar khan motorcycle­a chuong silai chawi han Police station bul hnai laia Bus station­a um Police hai silaiin an kap a, Police 2 an kap hlum bakah Police personel dang pakhat na takin a hliem.

Chun, zani hmasa khan Jammu & Kashmir­a Bijbehara hmuna BSF patrolling­a fe hai helpawl han an lo lambun a, BSF 3 in thina an tuok. BSF hai hi chawl hmang zo an duty sunzawm nawk dinga hung kir, Jammu­a inthawk Srinagar pana phurtu motor 23 a chuong an nih.

PM in Afghan­India Friendship Dam a hawng
KABUL:  Khawvel rambung 5­ Afghanistan, Qatar, Switzerland, US le Mexico hai sir dinga zanita inzin suok PM Narendra Modi chu zani zantieng khan Afghanistan a tlung. Zanikhan PM Modi le Afghanistan President Ashraf Ghani han Herat Province­ah a ruolin Afghan India Friendship Dam (Salma Dam) an hawng. PM Modi hin zani ma khan Afghanistan suoksanin Qatar khawpui a pan nawk. PM Narendra Modi hi Afghanistan rama civilian chawimawina insang tak Amir Amanullah Khan Award inhlan a nih.

KNP­ah permanent office indin dingin
GUWAHATI: Assam Chief Minister Sarbananda Sonowal chun, Assam Forest Department chu Kaziranga National Park (KNP) sungah permanent Principal Conservator of Forest (PCCF) indin dingin an hriettir. Mr Sonowal chun tuta fiscal year fe mek sung forest revenue Rs. 1,000 crore bek hmudawk tum dingin an hriettir bawk.

Mohammad Ali kum 74 mi niin a thi
LOS ANGELES: Kum 1964 a World Heavyweight champion lo ni tah, Mohammad Ali chu thuok harsatna natna leiin June 3, 2016 khan enkawla a umna Hospital­ah a thi. Mohammad Ali hi kum 74 mi a ni tah. Ali hming hmasa chu Cassius Clay a ni a, sienkhawm Islam sakhuoah  inleta, Islam sakhuo a zuia inthawk a hming chu Mohammad Ali tiin a thlakthleng a , chu taka inthawk Mohammad Ali tia ko a hung ni ta a nih. Kum 1980 khan Olympics­ah Gold medal a lak a, kum 1964 khan Sonny Liston hnebanin World Heavyweight Champion title a lak a nih. Kum 1996 a Atlanta khawpuia Summer Olympic Games a khan Olympic meiser sittu a nih. Kum 2005  khan, khang hun laia US President George Bush in President Medal of Freedom a lo inhlan a; April 1967 laia Vietnam War huna khan Ali hin US Army a thang a nuomnaw leiin World Boxing Association chun a World title a hlip pek pha. June 20, 1967 khan US Federal Court in Selective service laws a bawsiet leiin kum 5 lungin intang le dollar 10,000 chawi dingin thiemnaw an changtir a nih.

VAWISUN THUPUI
Kei Lalpa  chun ka hril tah a, hung tlung ngei a ta, thaw khawm thawng ka tih, kir nawk naw ning a, hla naw ning a, insir bawk naw ning; i umdanhai ang pei le i thilthawhai ang peiin ro relpek an ti che, Lalpa Pathien chun a tih,” tiin.­ Ezekial 24:14

Editorial: Harsatna chi tum tum

Harsatna tuok nuom hi ei um der nawh. Nisienlakhawm mitinin harsatna chi tum tum ei tuok mek a, ei la tuok pei ding niin an lang. Manipur­ah ei state sawrkarin National Food Security Act (NFSA) hmang a ni ta ding thu a puong a. Nisienlakhawm hi Act hi a tak taka hmangna chu hmu le hriet ding  a la tlawm hle. Manipur mipui, a bikin mi naran le pasie han bufai kg. 1 ah Rs. 3/­ a hmu thei dinga beiseina annei laiin bufai man chun kaisang le to tieng a pan pei.NFSA hmang dinga puonglang a ni hma khan Vai bufai (Superfine rice) chu bazar hmuna dawr haiah kg. 1 ah Rs. 20 damin hmu a ni a, tulai ruok hin chu hiengang bufai hi dawr haiah inchawk ding a vang a, inchawk dinga hmu theia um hai khawm kg. 1 ah Rs. 28/­ a ni tah. NFSA leia hi thil hi a hung um a nih. Hi lei hin NFSA hi mi tam lem hai ta dingin hamthatna siemtu nekin harsatna intluntu a nih. Hi thil hi thuneitu han an enfel vat nuom a um.

Manipur­ah a ni telin thil man a kaisang pei a, thil fe dan enin a la kaisang pei ding niin an lang.  Ei state sungah hin thil man enkawltu an um naw mani  ti ding hiel khawpin thil man hi a kaisang bakah  thil man (rate) in mumal a nei nawh. Hi lei hin mipui han  harsatna namen lo takel an tuok mek. Thil man enkaitu le controltu an um naw chun Manipur mipuihai hi ei rimsi hle ding a nih. Tu hri hin chu market rate control­tu chu sumdawngtuhai, a bikin Vai mahajon lienhai an nih ti inla ei hril suol taluo ring a um nawh. State sawrkarin market rate a control naw hi sumdawngtuhai chun remchangah an lak a, an nuom dan le an dit dan dana thil man siemin an zawr el ni takin anlang. Hi chungthua hin sawrkar a chet vat vat nuom a um hle.

Sawrkar thawktuhai hlaw hmu thatnaw lei le contractor­hai bill hmu that naw leiin mipui han harsatna nasa tak ei tuok pha mek bawk.A hmaa ei lo hril ta angin Manipur mipuihai innghatna tak pakhat chu sawrkar thawktuhai an nih. Sawrkar thawktu han hlaw anlak tha naw bakah sawrkara an sum hmu ding le hamthatna chi tum tum an hmu dinghai an hang hmu regular naw hin chu khawlaia pawisa inleng vel hi a hung tlawm a, mipui han harsatna nasa tak ei tuokel hlak a nih. Hieng a ni lei hin ei state sawrkarin sawrkar thawktuhai hlaw hi ngaipawimaw zuol sienla, thla tinin regular takin sawrkar thawktuhai hlaw bek hi pe thei sienla chu mipui lawm hleng an tih. Sawrkar thawktuhai hlaw thang lo hin chu ei khawsa thei tak tak naw a ni deu tak.

Hlimna le lawmna ding nekin harsatna hi a ni telin a hung tlung zut zut el a nih. Manipur Public Service Commission (MPSC) in Combined Civil Services Examination, 2016 a huoihawtnaa thil indiknaw a um leiin MPSC chun exam that a rawt nawk a, sin zawngtu thalai lekhathiem sangtelin harsatna antuok pha. Candidate thenkhat ta ding chun exam that nawk hi vangneina le candidate thenkhat ta ding chun vangduoina a hung ni ding a nih. Competitive Exam meu hienga a hung um thei el hi candidate­hai ta dingin phurnawna le lunghnuolna a hung intlun thei ding a nih. MPSC exam chau ni lovin Staff Selection Commission (SSC) hnuoia Competitive Exam thenkhata khawm question leak a um ta rawp el leiin Competitive exam a thanghai ta dingin harsatna nasa tak an tlun pha a nih. Harsatna intlun thei ding zawng hin chu exam huoihawt ta ngai naw hai sienla nuom a um.

JCILPS Convenor Khomdram Ratan State sarwkarin Wanted­a a hung puong el khawm hin ngaituona a suksei hle. Intuma a umna hi suichiengna a um hmaa Wanted a puong a ni el hi thil indik a ni am, sawrkar thil thaw dan ding a ni am ti hi ngaituo chet chet a tul hle in anlang. Hi thil hi Ratan tanna lei a ninaw a, thil hi dan ang taka thaw ni hlak sien nuomna lei a ni lem. Mipui hmalakna chu Ratan hin a mimalin a tuor a, harsatna lientak el a tuok pha ta a nih. Hienganga state sawrkarin thil a thaw chun ILPS le inzawma Bills 3 passed a nina leia tribal movement hung suoka hotu le thuoituhai ta ding khawmin harsatna a la hung siem el naw ding maw? Manipur a tribal leader­hai khawm Wanted a puong ninaw nihai ti thei ding chi khawm niin an lang nawh.

Social Media, internet, facebook, whatsapp etc haia thu le thlalak thedara um hai suichieng le a sukfiena hmu hmaa action lak a ni pei chun harsatna tuor ding hi ei tam hle ring a um. Ratan le mi thenkhatin UNLF Flag an khai lai lim or thlalak social media­a tarlang a ni leia Ratan hi Wanted a puong a nih. Hi thil tlung zo hin Manipur CM, O.Ibobi Singh le  Dy. Chief Minister  Gaikhangam han NSCN(IM) kuoma Cheque an pek lai niawm tak lim/thlalak social media  thenkhatah tarlang a hung ni nawk a. Annawleh anni khawm hi Wanted a puong an ninaw ding maw? ti indawnna nasa tak a hung suok nawk ta a ni hi! Harsatna ding ruok thil a hungtlung a, a la hungtlung pei ring a um. Hi lei hin social media­a thil insuo a um hai hi chu suichieng hmasa ni hlak sienla thiltha a ni ngei ring a um.

Post a Comment

Powered by Blogger.