CEO in Training dinga thlang hai vangnei inti dingin a hril
CCPUR:SSA hnuoia Inclusive Education for Disability (IED)/CCPur huoihawt nain zanikhan Tuibuong Govt. Jr. H/S­ah “5 Days program on Curriculum Adaptation Training’ hawng a nih. Hi huna hin Ms Mannuamching, IAS, CEO/ADCC le T. Goukhomang, ZEO, CCPur hai Chief Guest le functional president in an thang. Training hi June 3­7, 2016 inkar sunga nei ding a nih.


Ms. Mannuamching chun, kum 3/ 4 liemtaa  inthawk Right to Education hnuoia sawrkarin kum 14 le a hnuotieng hai education pek ngei ngei dinga hma a hung laka inthawk education system nasa takin  a hung inthlakthleng a; disabled  le disabled lo hai khawm education pek vawng dinga RTE Act passed a ni leiin physically challenged student hai ta dinga  teacher hai training pek an nih tiin a hril. Schools teachers training dinga thlangsuoka um hai chun inhremnaa ngai lova vangnei inti lem ding anni thu a hril a. Training hi hrietna sukzauna a ni a, training lo hai inhnar ding a ni nawh; teacher po poin an nuom thua training el thei a ninaw leiin training dinga thlangsuok hai chu mi vangnei an nih tia hrilin lunglut taka training dingin teacher hai an fui. SSA hnuoia teacher tam tak training pek an nita a, an thathnempui am ti ruok chu hrietna a neinaw thu hrilin teacher pakhat nia, lekha thiem ei ni chun Rights & duties ei hriet a tul tiin a hril bawk.

ZEO, CCPur chun, CCPur district­ah disabld students 940 an um a, hieng disabled student hai tha taka lekha inchuktir an ni theina dinga training hi buotsai a nih tia hrilin lunglut taka training dingin teacher hai a ngen. Eini tlangmi hienganga disabled leia vangduoia inngaina ei nei lien a, IED hnuoiah scheme tum tum sawrkarin a siem a, chuong hai an dawng theina dingin mawphurna ei nei a nih tia hrilin disabled person hai talent phawrsuok
ngei dinga hma la seng dingin a ngen.

Trainin­a hin ZEO/CCPur hnuoia Schools 33 le ADC/CEO hnuoia Schools 24haia teacher hai thang an ta, Disabled thuah Special teacher 10 in training peng an tih.

Rengkai road blactopping thaw vat a nita ding thu a hril
CCPUR: Rengkai Remier League 2016 (football tournament) chu zani zantieng khan Rengkai  playground­ah tan a nih. Hi tournament hawngnaa khuolliena thang Upa Laldawnlien Varte, President, HYA GHQ in thu a hril huna, tuta inthawk sawtnawte hnungah CCPur Police station tuol Rengkai Road lut tanna a inthawk Rengkai lampui black topping thaw ani ta ding thu, tukhawma sum an fakral theinaw ding thu le Rengkai Road­a khawm solar street light inbuk vat a ni theina dinga bieltu MLA leh an inbiek thu a hril.

Functional President Pu Lalvullien, President HAA chun, inkhel ding hai an taksa enkawl fimkhur ding le zu le sa thaw lo dingin an fui. Opening match­ah Cristo FC le Alliance FC in an khel a, Cristo FC chun 3­0 in hratna an chang.

Lekhabu thar
CCPUR: Pu L. Ruoivel Pangamte in a ziek Thangthar Sekibusuok (Ka Lunglai Hluozotu 2­Na) le HRINGNUN LAM SUK LAM TUNG (Ka lunglai Hluozotu 3­na) hai chu Rs. 50/­ le Rs. 60/­ in Pine Hill Agency, Opposite Police Station, Churachandpur; T.K.Medicos, Opposite UBI, Churachandpur; Ralsun Store, H.Zaneisang Building, Rengkai Vengpui, Churachandpur le Pu Zamkhanthang (Hmarveng) le Pu Zokung Ralsun (Rengkai)  haiah inchawk thei dinga sie a nih.

A sunga thu um hai hi inchuklai le naupang hai nun keihruoitu dinga tha hlie hlie; Nu le pa ni ta le la hung ni mek hai ta dinga nau­le­te le insung enkawlna kawnga keihruoi theitu tha tak tak vawng an nih.

Thingkak an phun ding
CCPUR: Autonomous District Council, Churachandpur le Divisional Forest Officer, Southern Forest Division hai thangruola an hmalaknain June 5, 2016 khin Council Complex, Bungmual,Churachandpur­ah “World Environment Day 2016” hmangna le inzawmin thingkak phunna um a tih. Hi huna hin Chairman, ADC, CCPur, MDCs le Special Invitees hai thang an tih. Programme chu 2:30PM a hmang tan dinga ti a nih.

YPA GHQ election nei a nih
CCPUR: Zanikhan YPA GHQ Hall, Hiangtam Lamka­ah kum 2016­2019 sunga YPA GHQ thuoitu ding mi thlangna (election) nei a ni a, Central Working Committee a Chairman dingin ChinNgaihPau le Vice President dingin Paukhanmawi Guite thlangtling an nih. Office Bearers­ President dinginT. Khailianthang; Vice President in M. Luahkhanchin; Gen. Secy. in Lianmuanthang Valte; Jt. Secretaries in K. Thangkhogin le Thathang Langel; Finance in  Chinkhenmung le Treasurer in V. Vungzapau hai thlangtling an nih. Rev. E. Paukhanlian, DS, EBCC North in tawngtaipekna a nei a, Returning Officer LT Juan Tonsing, Adviser YPA GHQ in intiemkamna an neitir.


Mi 3 jail­a thun, 2 bail­a insuo
CCPUR:  Bongbal area­a T. Lala Vaiphei JCB driver kidnapping case FIR No. No.24 (5) 2016 CCP­PS U/S 400/365/34 IPC & 25 (1­C) A.Act hnuoia Police Custody­a um mek mi 5­ Lunliansiam Vaiphei (22) s/o Letzathang Vaiphei of Salam Patong village, Sadar Hills; Letkhogin Vaiphei (47) s/o Nekthang Vaiphei of Salam Patong Village, Sadar Hills;  Mrs.Tingngaineng (30 ) w/o (L) Thanglallian Vaiphei of Salam Patong village, Sadar Hills, Jangkhohao Khongsai @ Haopu (39) s/o Thenkhothang of Pangjol village le Thenkhosei Baite (35) s/o Khuplet Baite of L.Bualkot village hai chu zanikhan Police han CJM Court hmaah an inlangtir nawk. CJM rel le thupek angin mi pathum­ Lunliansiam Vaiphei; Letkhogin le Mrs.Tingngaineng hai chu Jail­a thun an ni a, Jangkhohao Khongsai @ Haopu le Thenkhosei Baite hai chu bail­a insuo an nih.

CM inrawinain all Political party palai han zanikhan New Delhi an pan
CCPUR:  Manipur Chief Minister O.Ibobi Singh inrawinain zani zingkar khan Manipur­a All Political Party palaihai chun Imphal suoksanin New Delhi an pan. CM rawia New Delhi pan hai lai hin BJP Spokesperson R.K. Shivachandra, BJP Media in­charge Basanta Kshetrimayum Sharma; LJP MLA Karam Shyam; MPP President N. Sovakiran; CPI (M) General Secretary Shanta Kshetrimayum le AAP Manipur thuoitu Goswami hai an thang. Chun, zani zantieng khan MPCC President T.N.Haokip; MLA K. Ranjit, Congress MLA tho pahni han Imphal suoksanin New Delhi an pan bawk. Hieng Congress MLAs palihai khawm hin Delhi­ah All Political party palaihai hi an va zawm ve ding niin ei thu dawngna chun a hril. Chun, Politicians hlun O.Joy, BJP member le CPI General Secretary M. Nara Singh hai chu tuta hma deua inthawk khan New Delhi­ah anlo um ta a, anni khawm hin All political party palaihai hi New Delhi­ah an lo zawm ve ding nia hril a nih. Dy. CM Gaikhangam khawmin vawisun hin New Delhi a pan ding niin ei thu dawngna chun a hril.

ILPS le inzawma Agust 31, 2015 a Manipur Assembly in Bills 3 a passed­hai tuchena India President  in suoi a la thaw naw zing na thuah President in Bills 3 haia suoi a thaw vat theina dinga sawrkar thlungpui zu ngen dinga All Political party palaihai hi New Delhi a inzin an nih. PM, Home Minister, Law minister le President hai inhmupui dinga appointment ngena lo um ta chu an hmu hmakhat New Delhi­ah chamin an nghak el ding nin CM chun ahril.

An mi hmu tum hai laia mi PM Narendra Modi chu rambung tumtum 5 sir dingin vawisun hin New Delhi suoksanin Afghanistan khawpui Kabul a pan ding nia hril a nih. Modi hin Afghanistan rama Afghanistan­Indian Friendship Dam (Salma Dam) a hawng ding a nih.

Hieng laizing hin JCILPS hmalakna thalwtuhai chun zani khawm khan Imphal khawpui sunga hmun hran hran haiah ILPS le Bills 3 haia suoi thaw dinga ngennain thungbuma nuorna le lampui dangna an la zunsawm pei. President in Bills 3 haia suoi a thaw hmakhat chu an hmalakna hi anla sunzawm pei ding niin an hril. Hmun hran hranah tyres raw le lampui dangnaa hmang thingtum, lung le thil dang dang hmu ding a la tam hle.

ILPS ngenna leia thi chen huoma bunghei Tourangbam Manoj @ Bikanta s/o Tourangbam Naobi of Naoremthong Khulem Leikai chu a bunghei leia taksa chau leiin zani zantieng 3PM khan RIMS panpui le admit a nih. Manoj hi Model Hr. Sec. School, Takyel a Class XI inchuklai, ni 4 sung Samushang Community Hall­a bungheia nuorna nei ta a nih.

JCILPS hmalakna hrat tak a fe lai mek hin JCILPS Convenor Khomdram Ratan chu zani hmasaa inthawk khan Manipur sawrkarin UNLF member a nih ti le Manipur mihai lai intheidana chi thedartu a nih tiin Wanted in a puong a, Police han Criminal case an registered khum. Chun, Kh. Ratan man a ni theina dinga information pe theitu kuomah lawmmanin Rs. 5,00,000 pek ning a tih tiin Manipur Police Department  chun a puong.

MPSC Exam a thara nei ding
IMPHAL: May 15, 2016 a MPSC huoihawtna hnuoia Manipur Civil Services Combined Competitive Examination (Preliminary) neia um chu MPSC in a cancelled a, Exam hi a tharin July 3, 2016 a nei dingin Secretary, MPSC chun Order an suo. June 15, 2016 a inthawk MPSC website: www.empsc.gov.in. ah admit card download thei ni dingin MPSC thusuok chun a hril. Exam hmasaa khan question paper ah an diknaw a um ti sawiselna a um leia exam hi cancelled a nih.

IAS Officer 3 sin sawidanglam
IMPHAL: Manipur­a IAS Officers 3 hai sin state sawrkarin a sawidanglam. M.H. Khan, Principal Secretary (CAF&PD) chu zanita inthawk khan Principal Secretary (MOBC/AE) incheltir a ni a, B.B. Sharma, Commissioner of AE chu Commissioner (CAF&PD) a ruot a nih. Gopen Meetei chu Secretary (IFCD/Agri/Fisheries) a ruot a nih.

Ni 7 sunga sukfiena pe dingin
IMPHAL: Manipur sawrkarin JCILPS Convenor, Khomdram Ratan UNLF member a nih tia an tumna chu tuta intahwk ni 7 sunga sukfiena pe dingin  BJP MLA Kh. Joykishan chun State sawrkar  a ngen. A ngenna hi sukpuitling a ninaw chun ama ngeiin nuorna (agitation) a thaw tan ve ding niin zanita Khoyathong­a a chengna ina chanchinbumihai an hmupui huna a hril.

BK Moirangcha in Convenor in­charge a lak
IMPHAL: Manipur sawrkarin UNLF member a nih tia an tum le luman a puong khum leiin Joint Committee on Inner Line Permit System (JCILPS) Convenor Kh. Ratan chu a ninaa inthawk an ban a, an banna hi Committee chun a pawmpek. Hi lei hin B.K. Moirangcha chun zanita inthawk khan JCILPS Convenor charge a chel tan. B.K. Moirangcha chun Kh. Ratan intuma a umna chu sukchiengna pe dingin Manipur sawrkar a ngen.

Saphu kawrkg. 93 leh  pasal 1 man
AIZAWL: Zani hmasa khan Mizoram le Myanmar ramri Champhai hmunah pasal pakhat C. Thanga (39) chu Saphu kawr kg. 93 leh man a nih tiin zanita Police thusuok chun a hril. Saphu Kawr hi tuolsung rate­ah Rs. 20 lakh manhu a hisap a ni a, Myanmar fethlenga China rama phurlut tum a ni ding a nih tiin Police chun an hril.

Mathura buoina tlunga thi mi 24 an tling tah
MATHURA: Uttar Pradesh­a Mathura­a Jawar Bagh hmuna zani hmasaa Police le mipui inbeituona leia buoina suoka mihriem thina tuok chu 24 an tling tah. Hi buoina tlunga thi hai lai hin Police personnel 2 le buoina siemtu mipui tieng 22 in thina an tuok niin Uttar Pradesh DGP Javed Ahmad chun a hril. Police thi  hai chu SP City Mukul Dwivedi le SHO Santosh Yadav hai an nih.

Allahabad High Court thupek anga Jawahar Bagh hmuna dan lova um hai Police han hnawtdawk an tum huna  inbeituona hi tlung niin ei thu dawngna chun a hril.
 
Tuchena hi lai biela security forces han dappui an thawnaah silai 47, rifles 6 le Hand Grenades 178 dapdawkin an man ta bakah mi 260 chuong man an nita bawk.

Bihar toppers han interview an hmasawn ta hlak ding
PATNA: Bihar School Examination Board (BSEB) huoihawtnaa Class XII Exam, 2016 Arts Topper Ruby Rai le Science Topper Saurab Kumar han interview nei huna indiklo le awmlo taka dawnna an pek le inzawmin Bihar sawrkar chun Bihar School Examination Board chu tuta inthawk Class X le  XII exam a merit list a thang ding hai interviews le an answer­sheets checking thaw a ni hma chu an hming puonglang ta lo dingin an hriettir.

Bihar Board chun tukuma Arts, Science le Commerce toppers 14 hai chu topper ni dinga thiemna an nei chie le chienaw enfelna dingin re­examiniation thaw dingin a lo ko ta a nih. Hieng toppers hai in examnaa CCTV thlalak hai khawm enfelna sin thaw mek a nih tiin Education minister Ashok Chaudhary chun a hril.

Arts­ah subject­a topper le Political science­a marks 100­ah 91 hmu Ruby Ray chu interview thaw a ni hunah ‘Political science’ ti ding ‘Prodigal science a ti el bakah Poltical science chu thlaisuong dan tiengpang a ni thu in a dawn a nih.

Class VIII pasi ITI course zo hai Class X zo­a pawm ding
NEW DELHI:  Zani hmasaa PM Narendra Modi inrawinaa National Skill Council meeting hmasatak neia chun Class VIII zo hnunga ITI hnuoia courses zo hai chu lekha an inchuk zawm theina dingin Class X pasi anga pawm ta dingin thutlukna siem a nih. Hi meeting­a hin Maharashtra Chief Minister Devendra Fadnavis khawm a thang. Hi baka hin Class X zo hnunga ITI Courses zo hai chu Class XII zo anga pawm an ni bawk ding a nih.

Electric in sungkhata mi 3 a man hlum
NAGPUR:  Zani hmasa khan Nagpur district­a Mankapur area­a Police ASI pension Kishor Ambadas Damle (61), a nuhmei Anjali (55) le an naunu pasal nei tah Vinisha Kale (33) hai chu an insunga electric fe suol leiin electric in a man hlum. An naunu Vinisha Kale in an insunga air­cooler a hang on hunah electric in a man a, a khek leia a nu le pa han sansuok tuma an beinaa a nu le pa khawm hi  electric in a lo man, chu taka inthawk an pathuma electric hin a man hlum an nih.

Thamna Rs. 50,000 a lak leiin Engineer man
SAGAR: Madhya Pradesh­a Lokayukta officials han Madhya Pradesh Police Housing Development Corporation office­a posting  Sub­Engineer R.K. Pandey chu contractor kuoma inthawk thamna Rs. 50,000/­ a lak laiin a office­ah an va man niin Lokayukta Police Dy. Supdt. of Police  K.K. Agrawal chun a hril. Police Training School­a construction sin thawna pending bills 40 lakh inpekfelna dingin engineer hin Contractor kuomah 3% a ngen a nih. Contractor chun, Engineer pa hin a sinthawna Bills Rs. 4.5 crores vel lakna dingin kum iemanizat liemta sung khan thamna Rs. 30 lakh vel a lo pek ta niin Police kuoma a hril a nih.

TN Speaker le Dy. Speaker ding thlang
CHENNAI: Tamil Nadu  Legislative Assembly chun zanikhan Speaker dingin P. Dhanapal le Deputy Speaker dingin Pollachi V. Jayaraman hai lungruol takin an thlangtling nawk. Dhanapal le Pollachi hai hi kum 2011­16 AIADMK sawrkar­a Speaker le Dy. Speaker lo ni ta an nih. Dhanapal hi Avinashi (reserved) constituency­a inthawk a term 6 na dinga tulai hnaia Assembly election­a kha thlangtling nawk a ni a, Mr Jayaraman hi Pollachi seat­a inthawk a term 4­na dinga thlangtling nawk a nih.

Khingtu um loa tlinga puong an nih
CHENNAI/MUMBAI: Tamil Nadu­a Rajya Sabha seat 6­a biennial election um ding le inzawma nomination paper hnukdawk theina hun zani zantienga tawp le inruolin zanikhan mi 6 hai chu khingtu um lova tlinga puong an nih. Chuonghai chu­ AIADMK candidate R. Vaithilingam; A.Navaneethakrishnan, A.Vijayakumar, Union minister hlui SR Balasubramoniyan; RS Bharathi (DMK), TKS Elangovan (DMK) hai an nih.

Chun, Maharashtra­ah Union Power Minister Piyush Gohal le senior Congress leader le Finance Minister P. Chidambaram; Union minister hlui Praful Patel (NCP); Vinay Sahasrabuddhe (BJP); Vikash Mahatme (BJP) le Sanjay Raut (Shiv Sena) hai khawm khingtu um lova tlinga puong an ni bawk.

Bihar a khawm Ram Jethmalani le Lalu Prasad’s naunu hai Misa Bharati (RJD); Gopal Narayan Singh (BJP), Sharad Yadav(BJP) le RCP Singh JD(U ) hai khingtu um lova tlinga puong an ni bawk.

VAWISUN THUPUI
In bawsietnahai chu sum samup sukboin ka sukbo tah a, in suolhai chu sum sukbo angin ka sukbo ta bawk a; ka kuomah hung kir nawk ro, kan tlan ta si cheu a.­ Isai 44:22

Editorial: Mipui himna dingin traffic rule hriet le zui

Khawsak awlsam lemna beiseiin thingtlanga inthawkin khawpuiah ei inpem lut pei a, ei lan pemlut pei ding a nih. Thingtlanga um inhawi ei tinaw a, a mipui chau ni lovin  khawsung Lal (village chief)  ei tihai chenin an inlalna khuoah um lovin an hun tamlem khawpuiah an hmang a, village chief tam lem chu khawpuia cheng, In le lo nei an ni tah. Thingtlanga um hi ei pei naw ngang chu ning a tih. Sawrkar thawktu,thingtlanga posting­haikhawm an posting­na hmuna an um pei naw a, an hun tamlem chu phairamah an hmang ti chu sawrkar le tlang hriet a nih. Sawrkar le student pawl han thingtlanga posting sawrkar thawktuhai an posting­na hmuna fe le um dingin theitawp suoin hma an lak a, nisienlakhawm vawisun ni chen hin a la hlawsam a nih.

Khawsakna inhawi lem le thiltha lem beiseia khawpuia inpemlut ei ni leiin beidawnga phairam suoksana thingtlanga inletkir nawk chu ei um meu ta nawh. Hi lei hin phairam annawleh khawpuiah mihriem ei pung pei a, ei ram leilung hlak chu a pung belsa bawk si tanaw leiin ei leilet le huon ramhai chu inhmun dingin ei thet zo tep ta a ni hi! Ei ram leilung a lien belsa ta sinaw laizing hin mihriem ei pung belsa pei si leiin ei khawpui le town hai chu an chep deu deu el a nih. Ei mamaw nia ei hriet, nitina mi belsatu langsar tak chu inlirthei hi a ni a, hang ngaituo tlang ei tih.

Churachandpur District­ah ringawt khawm hin Transport Office in nitina inlirthei a registered hi 3­4 a um ang niin inlirthei pung hrat dan nitin chanchinbu haia zieklanga um a inthawk hmu le hriet theiin a um. Mihriem am pung  hrat inlirthei ti  hriet harsa khawpin inlirthei hi a pung nasa a, nisienlakhawm ei lamlienpui chu an chep ngaiin a lan chep zing si a nih. Inlirthei han lamlienpui an hluo tlat chun traffic a hung Jam a, an khattawkin inlirthei eksiden a tlung a, mi thenkhatin hliemna an tuok a, thenkhatin thina an tuok a, inlirthei eksiden hi ei tuorhla hle a nih. Hi lei hin mipui himna ding chun traffic rule hriet le ei zui a hung tul ta a nih. Traffic rule hi namnul ding chi a ni der ta nawh.

Motor tlan inlawn vel thunun ding tam tak an hung um a, a pawimaw lema inngai Two wheeler an lo inphe sak a, a pawimaw tak mihriem lampui kan nuom an lo um awlnaw bawk a. Mani le mani khawm inthunun zo lo hai ta ding chun chuong po po thunun (control) a, an himna le hlimna pek vawng chu thil harsa tak a ni ding a nih. Trafic Police sin hi a pawimawin a ropui a, mihriemhai thi le dam hi an kutah a umna lai a um a, mawphurna lientak an kutah an nghat a nih. Chun, sawrkar sin thawhai lai chun mi po po mit hmua sawl bik em em an ni a, an sin hi inthlada a thieng naw a nih. Chuleiin traffic control­na kawnga hin inthlada der lova hma an lak nasa zuol deu deu nuom a um.

Inlirthei eksiden a hungtlung hin a khaltu chu an dik naw a ngaina a lien tak hlak a, inrui a nei ning a tih tiin ei hril tlangpui hlak. Inrui  nei puma inlirthei khal hi a him naw a, dan kal a ni leiin inrui nei puma inlirthei khal phallo a nia, nisienlakhawm a thawlui ei tam em em leiin inlirthei chetsuolna a tlungin inrui a nei ning a tih ei ti rawp  hrim a nih. Amiruokchu, mipui hin sign chi hran hran hai inchukin, hrein zui bawk inla, inlirthei  khalah fimkhur bawk inla chu eksiden tam tak hi chu tlung lo thei a nih. Lamlien  ei kan a, ei muong taluo chun motor tlan vel a sukbuoi a, insut pal le inbaw pal a awlsam a nih. Hieng a ni lei hin mipui or ei himna dingin traffic rule hriet, zui, ngaipawimaw le inza hi a tul bek bek el a nih.

Ei state sawrkar khawmin ei town le khawpui sunga traffic hi a ngaipawimaw hle a, zani hmasaa State Cabinet meeting chun traffic Police wing indin dingin a rel a, thil lawmum takel a nih. Kelawnga fena lampui foothpath a um zinglaia lamlienpuia ei fe lui tlat chun a him naw el chau ni lovin motor khalhai ei inchetsuoltir thei a nih. Lamlienpuiah kelawnga fe le lawn laia Cell phone thaw dam hi eksiden intlungtir theitu a ni leiin bansan hmak ding a nih. Lamlienpuia infiem, insai le inkhel dam hi eksiden intluntu a ni leiin thaw lo ding a nih. Nu le pahai bakah school zirtirtuhai khawmin nghawk lova mani naupang hai hi traffic rule ei hril nawn rawp ding a nih. Trafic rule zui le inza hi eksiden pumpel na tha tak a nih.

Post a Comment

Powered by Blogger.