ANM le ASHA workers HDC training
CCPUR: Dr Thangchinkhup Guite, CMO/CCPur chun zani 10:00AM khan Synod Hall, IB Road, CCPur­ah ANM le ASHA workers hai ta dinga HDC training prog. khuoliena thangin a hawng. Mipui hriselna ding kawngah ASHA workers han mawphurna lien tak an nei thu hrilin record tha taka enkawl dingin an fui a, sin thaw tha peilo hai chu thlakthleng pei ning an ta, mani sin thaw peinaw leia thlakthleng an lo um chun tukhawm intum thei naw nihai tiin a hril. Technical session­ah Dr V.C. Pau, DFWO CCPur in ASHA Worker/Facilitator le ANM hai kuomah nau inkhatna (contraceptive pill) hmang dan inchuktirna a nei.


Awareness campaign thaw dingin Thanlon
CCPUR: Anti­Tribal Bills 3 a passed hai dodalna le inzawma Tribal movement fe mekah JAC Against Anti­Tribal Bills a inthawk team member 15 hai chun vawisun hin Tui­thaphai suoksanin Bills chungthuah mipui hai hrilhrietna (awareness campaign) thaw dingin Thanlon pan an tih. Parbung a khawm hiengang awareness hi thaw dinga ti nisienkhawm Parbung le a se vela cheng mipui hai remchang lem huna dinga la thul a nih tiin zanita JAC Against Anti­Tribal Bill in thusuok a siem­a chun an ziek.

Arunachal Pradesh, Mizoram le Nagaland haia Inner Line Permit System (ILPS) hmang mek le Anti­Tribal Bills 3 hai le tuta Bills 3 hai hin inkungkaina ieng khawm a nei nawh tiin JAC thusuok chun a hril a, Tribal movement fepui mek hi Manipur­a tlangmi hai him le dam khawsuokna ding a ni ti hrie a, inthuruol taka thawtlang  dingin mipui hai a ngen.

Tipaimukh area VA union election
CCPUR:  September 2, 2015 a meeting resolution No. 2 dungzuiin hungtlung ding June 7, 2016 khin Lungthulien khuoah Tipaimukh area Village Authority Union election (inthlangna) um a tih tiin Tipaimukh Area Village Authority Union Chairman le Secretary han zanikhan inhriettirna an siem.  Inthlangna hih hi ni zing dar 9:00 a inthawk tan ning a tih.

NFSA thuah AMTWU in ngenna an siem
CCPUR: All Manipur Tribal Women Union (AMTWU)/CCPur district chun, National Food Security Act (NFSA) 2013 Manipur pumpuia hmang mek le inzawmin CCPur district­ah NSFSA fe pui meka Guidelines indik taka zui dingin an ngen a. Beneficiaries hai chu bufai kg 1­ah Rs. 3/­ chunga tukhawma la lo dingin ngenin, guideline zui lo an um chun AMTWU in a bawzui ding  thu; a zawr ruk (black market) an um khawmin tukhawm inchaw lo dingin an ngen a, ei ram le hnam thatna dingin mitin thangruol seng dingin an ngen.

Prayer­-cum­-fellowship
CCPUR: Nationwide Gospel Music Festival (NGMF) huoihawtnain June 25, 2016 khin EBC Centenary Hall New Lamka­ah “Prayer­cum­Fellowship” nei tum a nih. Hi huna thang dingin CCPur khawpui le a se vela Kohran tum tum 26 haia inthawk member hai thang seng dinga fiel an nih.

Hi program hmang ding le insuktuo dinga tu pawl khawma bandh/total shutdown/prog. siem lo dingin ngenna a siem.

NFSA thuah AMTWU in ngenna an siem
CCPUR: All Manipur Tribal Women Union (AMTWU)/CCPur district chun, National Food Security Act (NFSA) 2013 Manipur pumpuia hmang mek le inzawmin CCPur district­ah NSFSA fe pui meka Guidelines indik taka zui dingin an ngen a. Beneficiaries hai chu  bufai kg 1­ah Rs. 3/­ chunga tukhawma la lo dingin  ngenin, guideline zui lo an um chun AMTWU in a bawzui ding thu; a zawr ruk (black market) an um khawmin tukhawm inchaw lo dingin an ngen a, ei ram le hnam thatna dingin mitin thangruol seng dingin an ngen.

1st Convocation –Felicitation an hmang
CCPUR: Eastern Children’s Academy/Home, Rengkai, CCPur chun zani 11:30AM khan NECA Auditorium­ah 1st Convocation le Felicitation programme an hmang a, Rev. Dr Lalhmuoklien, Sr. Dir. EAC chun tukum HSLC Exam­a hi school­a inthawka hlawtlingna changhai ta dinga tawngtaipekna a nei. Hi hun hmangna hi Pu Joseph Lalrothang, President, Hmar Inpui, Tv. Alan Famhoite, AGS, HYA GHQ, Pu Lalhrillien, MDC, Pi J. L. Sawmi, President, HWA, Pu David Lungtau, Asst. Professor, Lamka College le mi pawimaw dang dang han an uop.



Tukum Manipur HSLC Exam­a khan student 19 an exam a, an rengin an passed vawng (100%) a nih. (input Jr.Amo)

Rs. 3 chunga zawr hai chunga action lak ding
CCPUR: Churachandpur district sunga National Food Security Act (NFSA) hmang mek le inzawmin  Pu M. Ginzasuan, DSO, CCPur chun zanikhan inhriettirna siemin Agent­hai chu NSFA hnuoia bufai kg. 1­ah Rs. 3/­ neka tama zawr lo dingin an hriettir a, hi rate neka insanga zawr  hriet an ni chun Essential Commodity Act hnuoiah hremna pek ning an tih tiin a hril.

A that tawk nawna um chun a kuoma hril dingin
CCPUR: Special Contractor P.Tongthang Zou chun Hot Mix Plant machine 2 hmangin tulai hin Tipaimukh Road­ Lamka Cemetry, Zellang Veng, Mission Veng – District Hospital­a TB Clinic inkar; Mandop leikai le Police quarter lutna lampui, Zomi Colony lampui hai a siem zo ta a, June 3, 2016 khin Phailian­New Lamka inkar Marian Street blacktopping sin a tan nawk ding thu P. Tongthang Zou chun a hril. Lampui siemna fe meka a that tawk nawna hmun a um chun ama kuoma inhriettir ding le siemthat pei a ni ding thu a hril bawk.



Hieng laizing hin EE/PWD/CCPur chun, Special Contractor P. Tongthang Zou in NABARD funding hmangin CCPur khawpui sung hmun iemanizat­a lampui siemna blacktopping a thaw a, state sawrkarin total amount a inthawk 30% released ta sienkhawm state sawrkarin Govt. account­ah a deposit nawk leiin contractor in sum laksuok a la nei nawh tiin a hril a; duthusama sin thaw a ni ditna leiin nitin SO pakhat­pahni an duty in an enfelpui zing a nih tiin a hril.

Form semdawk tan
CCPUR:SSA/RTE­IED huoihawtnaa Synod Hall, IB Road­a January 19, 2016 nia kum 18 le a hnuoitieng Disabled person hai ta dinga Medical Assessment camp neia thang, Disabled Certificate pek dinga thlangsuok mi 100 hai ta dinga Disabled Certificate lakna ding Aplication form zanikhan Inclusive Education for Disabled (IED) Recourse Room­ah semdawk tan a nih. June 10, 2016 chenin form hi lain peklut thei ning a tih.

ADC members meeting
CCPUR: June 14, 2016, 11:0AM khin Autonomous District Council (ADC)/ CCPur member meeting District Council Hall­ah um a tih. Hi huna hriltlang/rel ding (Agenda) nei Members hai chun June 8, 2016 chenin Secretary/CEO/ADCC kuomah peklut thei ning a tih tiin Secretary/CEO, ADCC chun inhriettirna a siem.

PM inhmupuina ding appointment hmu a la ni hri nawh: O.Ibobi Singh
IMPHAL: Hun sawt taka inthawk khan Prime Minister Narendra Modi inhmupuina dingin  Appointment ngen a ni ta a, sienkhawm PM inhmupuina ding appointment hmu a la ni hri nawh tiin Manipur CM O.Ibobi Singh chun zanikhan a hril. Bills 3 hai chungchanga hin manipur­a inthawka all party palaihai chun PM le Central thuoitu danghai chu New Delhi ­ah fea zun hmupui an tum a nih. May 16, 2016 khan all party palaihai chu Imphal suoksana New Delhi pan dinga riruong siem a ni a, amiruokchu remchangnawna thenkhat leiin thul a lo ni ta a. Nisienlakhawm hi Bills chungthua hin mipui tienga inthawk nawrna nasa tak a um leiin May 30, 2016 a State cabinet meeting chun CM rawiin all political party palaihai chu June 3, 2016 a Imphal suoksana New Delhi fe dinga a reltluk a nih.

Manipur chungchang chau ni lovin PM chun Idnai ram pumpui huopa thil ngaituo ding a hau el bakah foreign inzin ding a ni leiin all party palaihai inhmupuina dingin hun a la nei thei naw a ni el thei. All political party palaihai  chu New Delhi­ah in camp an ta, Appointment an hmu thei hun huna PM, Union Home Minister  le Central thuoituhai an inhmupui el ding a nih tiin O.Ibobi Singh chun a hril. Shillong­a NEC meeting huna khawm khan PM hi all party palai han inhmupui an nuom thu ka lo hril ta a, kha huna khawm khan PM  hin dawnna a mi pek nawh tiin O.Ibobi Singh chun a hril bawk. Hieng laizing hin Bills 3 thlawptuhai chun all party palaihai hi kutruoka an hungkir a ni chun mipui lungsenna an chunga a tla ding a nih tiin an inhrosa niin ei thu dawngna chun a hril.

Buoina um loin IMC election zo
IMPHAL: Public Curfew puong bakah helpawl thenkahtin zanikhan general strike thaw hai sienkhawm IMC election chu buoina lien taluo um loa zo fel a nih. A pumpuia vote tla chu 80% niin ei thu dawngna chun a hril. Vote tla hai hi June 6, 2016 ah tiem ning a tih. IMC election hi Imphal East le Imphal West district huom sunga Assembly constituencies 7 huom sunga nei a ni a, voters 1,75,864 an um a, polling stations 255 hawng a nih. Councilors candidates 86 um hai lai nuhmei 36 an thang a nih. Election a hin ballot paper hmang a nih.

IE district­ ah Cr.P.C. 144 puong
IMPHAL:District Magistrate, Imphal East District chun zanikhan Imphal East district pumpuiah Cr.P.C. 144 puongna Order an suo. Hi Order hi June 3, 2016 a inthawk August 2, 2016 chen huom a tih. Imphal East district sunga hin buoina siem tum an um ti report hmu a ni leia Cr.P.C. 144 hi puong a nih tiin District Magistrate, Imphal East thusuok chun a hril.

TET form peklut hun suksei
IMPHAL: Board of Secondary Education Manipur (BSEM) chun Teacher Eligibility Test (TET)­ 2016 a dinga Application Form peklut hun chu June 7, 2016 chena dingin hun a suksei. TET, 2016 hi June 12, 2016 a nei ning a tih. Hall ticket chu June 9, 2016 ah peksuok ning a tih tiin BSEM chun inhriettirna a siem.

Pasal pakhat inkhaihlum saa hmu
IMPHAL: L. Gourau (22) s/o (L) L. Rai of Leimakhong Army Camp, P.S. Sapermeina, Sadar Hills chu zani zingkar dar 5 vel khan an in bula building pakhat sungah inkhaihlum saa hmu a nih. A ruong hi JNIMS, Porompat­ah postmortem thawzo a ni hnungin a sunghai kutah inhlan a nih.

Gurlbarg society riot case­ah mi 14 thiemnaw inchangtir
AHMEDABAD: Gujarat­a Special SIT Court, Ahmedabad chun, kum 2002­a Godhra Gulberg society riots case­ah inrawlna neia intum mi 66 hai laia mi 24 hai thiemnaw an changtir. Godhra Gulberg society riot/buoina suoka khan Congress MP hlui Eshan Jafri thangin mi 69 zetin thina an tuok a nih. Hi case­a inrawlna neia intum BJP corporator Bipin Patel thangin mi 36 hai chu Special Court Judge PB Desai in, intuma an umna le inzawmin evidence thatawk a umnaw leiin thiem an changtir. Hi case­a inrawlna neia intum mi 66 hai laia 6 hai chu an chungthu rel a ni sungin an lo thi ta a nih.
 
Thiemnaw inchangtir hai laia 11 hai chu tuolthatna case­a thiemnaw inchangtir an nih. VHP leader Atul Vaidya khawm a thang a, thiemnaw inchangtira um hai hrem dan ding chu June 6, 2016 ni khin  puong ning a tih.

Hi case suizui le reltu SIT in inrawlna neia an tum mi 66 hai laia 9 hai chu jail­ah an intang mek ta a, a dang hai chu bail­a insuo ta an nih. Gulberg Society case hi kum 2002­a Supreme Court in a ruot Gujarat riots cases 9 hai laia pakhat a nih.

Topper­hai test nei a ni ding
PATNA: Bihar School Examination Board (BSEB) hnuoia Class XII Examination, 2016 result suoka topper (1­7 rank holders) chen hai chu vawisun hin test thaw ning an tih. Hi test hin Arts & Science stream a huomsa a nih. Arts topper Ruby Rai chu interview thaw a ni huna “Political Science” ti dingah “Prodigal science” tiin a lam bakah Political science umzie iem a na? tia indawn a ni hunah ‘thlai suong dan inchukna’ tiin a dawn a. Science topper Saurabh Kumar in election le proton tihai umzie a hreit naw bawk a. Hi leia topper­hai hi test thaw dinga ti an nih.

Odisha­ah Tekin mi 17 a deng hlum
BHUBANESWAR: Odisha state a hmun hran hran haia chun zani hmasa khan Tek tlain mi 17 zet a deng hlum bakah mi 9 in hliemna an tuok. Tek tla le ruo nasa taka a sur leiin ran 21 lai zetin thina an tuok bawk. Tuta tekin mi 17 a deng hlum hai le hin tuta thla sunga Odisha state­a Tekin mihriem a deng hlum chu 25 an tling ta a nih. May 1, 2016 khan a state sung hmun hran hranah Tekin mi 8 a lo denghlum ta bawk a nih. Special relief Commissioner’s office report dungzuiin tukum (2016) sunga Odisha state sunga Tekin mi a denghlum chu 85 an tling ta niin a hril.

Guard in Bank thawktu a kap hlum pal
THALASSERY: Kerala­a IDBI Bank branch vengtu (security guard) chun zani zingkar dar 9:30 vel khan a silai chawi lai a sukpuok pal leia silaimu vuongsuokin Bank­a thawktu nuhmei kum 25 Ms Vilna chu a dengfuk leiin a hmuna a thi nghal. Ms Vilna hi thla khat vel chau la liema kha hi bank­a sales deparment zawm a nih. Security guard hi Harindranath (51) niin Army­a Electrical­Mechanical Engineering wing­a lo thawk hlak, Army­a inthawk kum 2011 a pension, kum 2013­a inthawk hi bank­a thawk tan nawk a ni a. Asst. Manager kuta inthawk silai a zuk lak fel zoa a zuk load huna thawsuola a kappuok pal a nih. Harindranath hi hrentang le IPC 304 hnuoia case siem khum a nih.

AICC hung inrawl dingin a ngen
SHILLONG: Meghalaya­a Congress party sunga buoina um mek le inzawmin Meghalaya Congress Committee (MPCC) working President Deborah Marak chun All India Congress Committee (AICC) chu party sunga buoina um mek hi control thei lo khawpa a um hmaa kut hung rawla chingfel dingin a ngen. Party sunga buoina hi chingfel vat lova a um chun President Rule khawm la hung um el thei dinga inlang niin ei thu dawngna chun a hril. Congress party sunga member (MLA) iemanizat han Chief Minister Mukul Sangma peithlak dinga hma an lak leia buoina hi hung um a nih.

PwDs hai kuomah Unique ID
NEW DELHI: Union Minister for Social Justice and Empowerment Thaawarchand Gehlot chun, Persons with Disabilities (PwDs) hai kuoma kum khat sungin Unique Identity Card pek vawng ning an tih tiin zanita New Delhi hmuna state Social welfare ministers conference­a thu a hrilna huna a hril a; Identity Card hi India ram khawlai hmuna khawm hmang thei (valid) ning a ta, welfare schemes dawngna ding kawngah piengphunga ruolbanlo (disabled) hai nasa takin a thangpui ding a nih tiin Mr Gehlot chun a hril.

Lodhi Road ­ah Common secretariat  
NEW DELHI: Sawrkar thlungpui chun, tuta Central sawrkar hnuoia ministries le department tum tuma, building hran hrana um hai hmun khata an um khawm vawng theina dingin Lodhi Road, Central Delhi hmunah Rs. 20,000 crore sengin Common Secretariat bawl a tum. Common secretariat bawl tumna le inzawma Central Public Works Department (CPWD) to Urban Development Secy. Rajiv Gauba in rawtna a peklut dungzuiin tuta inthawk kum 5 sungin sungkuo 4,000 hai chengna residential complexes chu inthielfai/thiek fai vawng a ni ding a nih. Proposal hi PM Narendra Modi pawmpui dinga thawn ning a tih tiin official thusuok chun a hril.

Septic tank an sukfainaah mi 4 an thi
CHANDIGARH: May 31 le June 1, 2016 inkar zan khan New Delhi a inthawk km. 20 vela hla Haryana NCR area­a Rai industrial area­ah Septic tank sukfaia sinthaw pasal 4 hai chu thuok insamin an thi. Mi 4 thi hai chu­ Sukanta (25), Lakho (35) Seth Sarfaraj (18) le Dharminder Kumar (36) hai an nih. Midang 3 hai khawm an ruolhai sansuok an tumnaah khaw hre lova an um leiin hospital panpui an nih. Hi thil tlung le inzawm hin Rai Police station chun Industrial unit neitu Uma Kant chungah case an registered.

Siwan journalist thinaa mawphurtu taka intum an pe
PATNA: May 13, 2016 nia Hindi daily Bureau Chief Rajdeo Ranjan kaphlum a nina le inzawma mawphurtu taka intum Azharuddin Beg aka Laddan Mian chu zani zingkar khan Siwan Court hmaah an pek. Chief Judicial Magistrate chun ni 14 sung Judicial custody (jail) a la um phawt dingin a chungthu a rel. Rajdeo Ranjan kaphlum a nina le inzawma a kaptu tak Rohit Kumar thanga mi 5 Police hai inpuongnaa inthawk  Laddan  Mian in inrawlna a nei thu hi hrietsuoka hung um a nih. Laddan Mian hi MP hlui le jail­a intang mek RJD leader Mohammad Sahabuddin in kut le ke taka a lo hmang hlak nia hril a nih. An pe (surrender) naw chun a thil nei hai po po man pek vawng dinga inhriettir a ni leia hung inpe a ni a, Court chun ama manna ding May 27, 2016 khan order a lo insuo ta bawk a nih.

VAWISUN THUPUI
Thil po po nekin lungril hi an khel a; a se bik rieu a, tuin am hre thei a ta? Kei Lalpa hin lungril chu ka  zawng suok hlak a, mi tin chu a thilthawhai ra ang pei le, a lampuihai ang peia pek dingin an inthununna chu ka fie bawk a.~ Jeremia 17:9­10

Editorial: Semi­final anga ngaina

Manipur state khawpui tak Imphal khawpui sungah zanikhan Imphal Municipal Corporation (IMC) election nei a ni a. IMC hi district pahni, Imphal West district le Imphal East district huop sunga um a ni a. Councillors 27 le Ward members 54 inchu dingin candidates 128 an um a, candidate um po po hi 214 an nih. Candidate tam dana inthawk hin politics annawleh election­a inhnik mi an tam ti an lang thei. ILPS chungchang le inzawma JCILPS hmalakna hrat takin fe zing sienkhawm IMC election a vote thlak dinga fe le vote thlak an tam dana inthawk khawmin mipui han IMC election hi an inhnikin an ngaipawimaw hle ti an lang. Public Curfew puonga um khawm hi migrants/non­local an ti hai IMC election­a hin thang venawhai sienla annawleh an vote thlak ve nawhai sienla tina niin an lang.

IMC Election a hin Polling stations 235 hawng a ni a, hienghai laia polling stations 200 hai chu hyper sensitive  le polling stations 21 hai chu sensitive polling stations a puong an nih. Hi taka inthawk hin candidates le political party tum tum hai lai thang a na hle a, insukbuoina hung um thei ngai a nih ti chu election huoihawtttuhai hmu dan a nih. Hi leia hyper sensitive, sensitive le normal polling station tia thehrana hung um niin an lang bawk. Chuong ninaw sien chu hyper sensitive, sensitive le normal polling station tihai hi the hran a ni ring a um nawh.

Manipur Assembly election nei nawkna ding hi thla 8 vel chau a bak ta a. IMC election result a inthawk hin kum 2017 a Manipur Assembly election hung um ding hlimthla a hung inlang ding nia ngaina le hrietna an nei leiin political party hran hran, a bikin ei state­a sawrkarna chellai zing Congress party le BJP hai chun IMC inthlangnaa hin thang an lak nasa zuol a nih ti inla  ei hril suol taluo ring aum nawh. JD(U), LJP le Independent candidate um ve hai sienla khawm IMC election a hin an beituo ding tak chu Congress party le BJP hai an nih. IMC huop sunga hin voters 1,75,864 an um a,  tu party in am  hratna an chang ding ti chu June 6, 2016 khin hriet theiin a hung um ding a nih. Manipur  mipuihai chun hi election result hi nghakhla takin an lo thlir thup a nih.

Tuta hma deuva Manipur Assembly Constituency pahni haia byelection a khan BJP candidate­hai ve ve thlangtling an nih ti ei hriet seng. Kha byelection result a inthawk khawm khan Manipur phairam biela chun sawrkar chel laizing  Congress party nek chun BJP pawlin thlawp an hlaw lem an naw maw ti theiin a um. Manipur a khawm BJP chun hma a sawn pei ti hi election result hin a tarlang. Tuhin IMC election a hung um nawk a, hi election hi mi thenkhat chun Manipur a Assembly election hung um dinga semi­final ni thei dinga an ring thu an hril. Ni khawm ni thei ngai a nih. Football tournament huna club le team hran hran an inkhel hlak a, chu huna quarter­final, semi­final le final inkhelna a um ang deu khan an inkhi tina a nih. MLA election hung um ding hi final khelna dingah an ngai a nih. A ni khawpel, MLA election a chun Manipur­ah tu party in am sawrkarna an siem ding ti chu hriet theiin a hung um ta ngei ngei ding a nih.

India ram simtiengpang state haia tulai hnaia Assembly election nei ta haia khan chu BJP hrat bek beknaw hai sienkhawm an tling ngai der nawna state haia khawm seat thenkhat an lak leiin National party hai laia chu BJP chu an dar lien pei a, kuo a suot pei a nih. Congress party ruok chu hnung a tawl pei a, India rama states 29 um haiah state 6 haiah chau sawrkarna an chel tah. Kum 2014 a Lok Sabha election zova inthawk khan chu chet that nekin an hnungtawl pei ta a nih.

BJP chun India hmarsak biela khawm an ngirhmun an hung siem tha pei a. Khawvel insiengtira inthawk BJP la sawrkar ngai nawna Assam­ah sawrkarna an siem ta bakah Arunachal Pradesh­ah sawrkarna siemtu anni ta bawk. Tuhin Meghalaya state ah kuo an suot tan a, Meghalaya state a Congress sawrkar an sawihning mek. Manipur Assembly election hung um dinga lem hin chu an theitawp khelah an thiemna le hrietna tha hai hmangin hma an lak ngei ngei ding a nih ti chu a chiengsa a nih. Manipur ngirhmun ei hriet seng a. Tuta buoina fe mek hi a fe pei chun law & order ngirhmun hung se deu deu a ta. Sawrkar thlungpuiin remchanga lain Manipur hi President Rule ah hung sie naw nih ti thei a ni der nawh.

Post a Comment

Powered by Blogger.