Responsive Ad Slot

Hmasawnna Thar | 02 June, 2016

Thursday, June 2, 2016

/ Published by VIRTHLI
Tribal Euphony­ Solo Hunt Manipur Season 1
CCPUR: June 11­ July 23, 2016 inkar sunga Tribal Euphony the Solo Hunt Manipur Season 1 hung um ding le inzawmin zani zantieng 1PM khan Tingleila Production House (TPH) a inthawk mi 4­ Vania Chawang, Judge & former Orange Queen, Sian Simte, Judge, Awungshi Khaiyar, Manager, TPH le GilV ashun, Photograher, TPH han MHJU Press Club ah press/media hai an inhmupui.
   
Hill district 6 haia inthawk hlasakthiem hai ta dinga platform siem pek, traditional & culture humhalna ding le Hill districts hai inkara inlaichinna thalem a um thei ding ditnaa Solo Hunt Manipur Season 1 hi buotsai tum a ni thu; June 11, 2016 in TRI, Imphal, June 14, 2016 in Ukhrul; June 16, 2016 in Senapati, June 18, 2016 in CCPur; June 20, 2016 in Chandel le June 22,2016 in Tamenglong district ah audition round nei a ni ding thu an hril.
   
Promotion Tour/Concert July 4­16, 2016 inkar sungin hill district tina angin Mumbai­ah nei ning a ta, Judge round June 25&26, 2016 in um a ta, hi taka inthawk elimination round tan ning a tih. June 28 & 29, 2016 in TRI Imphal­ah Stage round, July 2, 2016 in TRI, Imphal­ah final round le July 23, 2016 in TRI Imphal­ah Grand Finale um a tih.
   
Hi taka thang (participants) hai chun folklore pakhat bek an sak ngei ding ti a nih. Lawmman pakhatna latu kuomah Rs. 2 lakh, pahnina in Rs. 50,000 le pathumna in Rs. 25,000 dawng an ta, pakhatna latu chu TPGH in Album an siempui ding niin an hril.

ZUF Overground AR han an man
CCPUR: May 31, 2016, sun dar 11:30 vel khan Hengkot khaw bul lai Zeliangrong United Front (ZUF) overground ni dinga ringhla Soithianlal (35) s/o Lalkhogou of Khousabung le a nuhmei Kimneihnem (34) hai chu 7­Assam Rifles han an man tiin Police thusuokin a hril. 7­Assam Rifles chun Lamka­a inthawk Khanpi village, Henglep Sub­division tienga phur an tum Bufai kg. 25 senga rik Bag 50, Rs. 1,52,000 khawm an mansa a, May 31, 2016, 10:00PM khan Police kutah an peklut.  CCPur Police chun FIR No. 27 (5) 2016 CCP­PS U/S 400/34 IPC an registered a, zanikhan an pahni hin CJM/CCPur Court hmaah an inlangtir a, Court chun June 6, 2016 chen Police Custody­a la um phawt dingin an chungthu a rel.

Saikawt Sub­ Division thuah inrawnkhawmna nei

CCPUR: June 1, 2016 zingkar khan Muolvaiphei Community Hall­ah Saikawt Sub­Division Demand Committee inrawinain Saikawt Sub­Division thuah demand area sunga khuo Lal, Authority, hnam thuoitu le fielbik han inrawnkhawmna an nei.
   
Hi huna hin final village DC, CCPur kuoma pekluta um ta chu Revenue Department, Govt. of Manipur kuoma an rang thei anga thawn dinga intlun dingin an rel a, palaina sin thawtu dingin Pu Timothy Z. Zote, Chairma, Pu R Lalkaisanga, Secretary; Pu L.Z. Fanai, Executive member, SDDC hai ruot an nih.
   
Ruota an um angin Pu T.K. Simte, MCS, Asst. Commissioner, CCPur chu June 1, 2016 khan an van hmupui nghal a, ama khawma a lo ngaipawimaw pek hle a, June 2, 2016 khin Revenue Dept. Govt. of Manipur kuomah thawn hman dingin tul le pawimaw hai a zofel ding thu a hrila, tuta inthawk kar hni sungin Gazette Order a suok hman a beisei thu a hril bawk leiin ama van hmupuitu hai chu an lawm hle tiin zanita committee thusuok chun a hril.
   
Hi leihin demand le inzawmin biel mipuihai sawrkar lakah risie le thil ditum lo tlung thei lakah lo fimkhur dingin Demand Committee thuoitu hai chun ngenna le inhriettirna an siem a, biel mipui hai inthuruolna le Pathien zar lieu lieu a nih ti hre zinga Sub­Division ei hmu vat theina dingin Pathien kuoma tawngtainaa thangpuina lo hni sunzawm pei dingin Demand Committee chun a ngen.

HKI in June 27­30 sung sit­in­protest

PARBUNG/CCPUR: Hmarram Kohran Inzawmkhawm­HKI (tuta hmaa HPO tia ko) General body meeting in a lo rel ta angin June 27­30, 2016 inkar sung khin HKI huoihawtnain Sit­in­Protest nei tum a nih. Hi huna hin a bik takin Communication, transport, Civil Supply, Medical hai thangin demand/Memorandum nei tum a nih. Hi le inzawma thurawn pe nuom le tlawmngai nuom hai chu lo inbuotsai dingin HKI thuoituhai chun an ngen. HKI hi sum le pai nei lo, mi tlawmngai hai thahnemngaina zara hrat taka fe pei a ni a, thangpuina pe nuom hai ta dingin Phone No. 8794903108/ 9615936084 haiah inhriettir thei ning a tih. (Lalnuntluong Songate)

Class X pass hai lawmpuina an nei ding

CCPUR: North Eastern Children’s Home & Academy, Bethlehem Veng, Rengkai chun June 2, 2016, 11:30AM hin NECH Auditorium­ah 1st Convocation­cum Felicitatin programme hmang an tih. Hi huna hin tukuma BSEM huoihawtnaa HSLC exam­a zaah za (100%) an passed le student passed hai lawmpuina nei an tih. Hi huna hin Pu Joseph Lalrothang, President, HI; Upa Laldawnlien Varte, President HYA GHQ; Pi J.L. Sawmi, President,HWA le Pu Lalhrillien, MDC hai khawmin thuhrilna hun hmang an ta, David L. Lungtau in career guidance le inzawmin thuhrilna hun hmang bawk a tih.

Online exam ding Candidates 360 an um
CCPUR:  Staff Selection Commission (SSC) huoihawtnain June 4­7, 2016 inkar sung khin Laitui Medico, Opposite NEILIT CCPur Extension Centre­ah Delhi Police le CAPF hnuoia Sub­Inspector le CISF hnuoia Asst. Sub­Inspector lakna dingin Computer hmangin Online Examination, 2016 um a tih. Hi taka ding hin candidates 360 an um. Morning batch han 10AM­12Noon le Evening batch hai 2PM­4PM inkar sungin exam an ta, shift khatah mi 45 pei exam an tih.

Bag sukhmang
CCPUR: Mr Imanuel Remruotsang s/o (L) Zothangluoi of Parbung, JNV, Tuinom, CCPur­a Class VII inchuklai chun May 13, 2016 khan Tuithaphai/CCPur ­a inthawk Parbung pana an fe naah, a sunga a lekhabu (subject), Bible le a thuomhnaw dang dang umna Bag dum (black) a sukhmang pal a, a lo hmu hai chun Upa Lalruotthieng, Parbung Ph. No. 8259053967/ 8415978735 haiah inhriettir dingin ngenna an siem.

Relief bufai phurtu 407 Truck vai liem
CCPUR:  SDO/Pargung Block le ADC Pherzawl area­a huop sunga khuo tum tum haia tulai hnaia thlipui, ruo, riel le tuilien leia harsatna tuortu hai thangpui le sawmdawlna ding Relief bufai hai chu zani zingkar 9:35AM khan DTC Hall Campus,Tuibuong­ah HYAGHQ. thuoituhai mithmu ngeiin 407 Truck MN02A­8019 a load kai  le phursuok a ni a, Tv. Alan Famhoite, Asst. Gen. Secy. HYA GHQ in Relief item phurtu motor hi a vai liem. Hi huna hin Shyamchandra Sharma, SDO/Parbung/ADC Pherzawl; MLA workers le HYA GHQ tienga inthawk LRs Puruolte, Executive Member, Info. & Publicity, HYA GHQ khawm a thang. Relief bufai hi  a la nuhnung tienga  thang an ni leiin bag 70 chau a ni a, hi thua hin SDO/ADC le MLA workers hai chun an la hung ngaituo belsa ding thu an hril, hun danga khawm an dai tawk hmu a tak hlak thu hrilin pawi an ti thu an hril. Hmatieng peiah HYA GHQ chu thangruolpui pei dingin an ngen. (Photo : Lalruotlien Duhlien /HYA File Pictures

UPF le sawrkarin kum 1 dang an keisei nawk
CCPUR: United Peoples Front (UPF), Central sawrkar le Manipur sawrkar hai chun  May 30, 2016 khan New Delhi hmunah Tripartite Agreement kum khat sung keisei nawk dingin inremna an ziek a, sawrkar chun dialogue tan vat ta dingin a lo tiem bawk. Hi le inzawm hin UPF thuoitu hai chun meeting an nei nghal bawk tiin ei thu dawngna chun a hril. UPF thuoituhai hi zanikhan Manipur an hungtlung nawk tah.

Prepaid meter 8490 activate tah
CPUR: Electric Department, CCPur chun May 31, 2016 chen khan CCPur­ah Electric Pre­paid meter box 8490 an activate ta bakah pre­paid meter box 11833 an inbuk (installed) ta niin Department report chun a hril.

LLIN/ITN sem dingin an suok
CCPUR: District Malaria Dept. staff hai chu Singngat le Behiang area haia Malaria affected area­a khuo 40 haia Thosilen Long Lasting Insecticide Net/Insecticide­treated Net (LLIN/ITN) sem ding chawiin zanikhan Tuithaphai an suoksan. June 2, 2016 khin Teisieng bazaar­a inthawk New Pangsang inkar­a khuo 32 haiah  sem nawk bawk an tih.

Disabled Certificate lakna ding  Application form lak thei
CCPUR: Synod Hall, IB Road, CCPur­a January, 2016 a Disabled Person hai ta dinga Medical Assessment Camp nei huna thang hai ta dingin Disabled Certificate pek thei a ni  ta a, hi le inzawm hin June 2, 2016, 10AM­1PM sungin Laitui Medico bula Inclusive Education for Disabled (IED) Recource Room­ah Application lak thei ning a tih. Application form la ding han School Identity Card Xerox copy annawleh residential certificate chawi tul a tih. Disabled certificate pek thei ding mi 100 hai list khawm IED Recourse room­ah en thei dinga tar a nih. 

Venghimna khau tak hnuoiah vawisun IMC Election nei ning a tih
IMPHAL:Venghimna khau tak hnuoiah vawisun hin Imphal Municipal Corporation (IMC) Election nei ning a tih.  Election vote thlakna hi zing dar 8 a inthawk zantieng dar 4 inkar sungin nei ning atih. IMC inthlangna a hin Councillors 27 le Ward members 53 thlangna um a tih. Councillor thlangna dinga hin Congress le BJP han candidates 26 ve ve, CPI in candidate 5, LJP in candidate 3, JD(U) in candidate 1 an nei bakah Independent candidates 25 an um. Councillors 27 thlangna dinga candidate umzat chu 86 le Ward members 53 thlangna dingah candidates 129 an um. Ward 27 um hai laia 9 hai chu nuhmeihai ta dinga huol a nih.
   
IMC hi Imphal EAst District le Imphal West District huom sunga um a ni a, Polling stations 255 a um. Imphal East district­ah Wards 7­ah polling stations 66 a um a, hienghai laia Polling stations 9 hai chu Hyper sensitive, polling stations 21 sensitive le polling stations 36 hai chu normal a ngai an nih. Imphal West district sungah Wards 20 le Polling stations 189 a um a, polling station po po hyper sensitive a pong an nih. Vote nei mi 1,75,864 an um a, hi laia 84,045 chu pasal le 91,819 hai chu nuhmei an nih. Pasalnekin nuhmei votes 7774  zetin a tam lem a nih.
   
Imphal West district sungah Polling  personnel 945, Security personnel 1325 le Sector Magistrate 6 ruot an ni a, Imphal East district a chun polling personnel 330 le reserved  35 ruot an nih. Polling duty dinghai chun an duty­na ding hmun seng an tlungkim ta a, election­a thil tul dinghai sukfel vawng a ni ta bawk. Re­poll tulna a um leh June 4, 2016 in nei ning a ta, votes tla hai June 6, 2016 a tiem le result puonglang nghal ning a tih. Vote tiemna hi Counting table 10 peiah nei ning a tih. Control rooms 5 hawng a ni a, contact Nos. 0385(2458387) ; 8730877424; 9863429327; 9862405688 le 9856969306 haiah biek thei ning a tih.

RIMS Dy. Director inah Grenade; IED 4 hmu
IMPHAL: Zani zing dar 8:30 vel khan RIMS Deputy Director, Y. Rajendro of Andro Khunou, Imphal East chengna in gate­ah Grenade hmu a nih. Police han an va lak a, pawitawk nawna hmuna an sukpuok.
   
Chun, Zanikhan Chandel District­a Molcham Police station huop sunga Phaisangjang area­ah 4­Assam Regiment han IED bombs 4 zet an hmu a, bomb disposal squad han pawitawklo dingin an sukpuok. IED­hai hi helpawl han security force­hai beina dinga an sie ni dinga ring a nih.

Lunginah pasal 1an khai hlum
IMPHAL: Zani zingkar dar 4 vel khan Sajiwa Jail­a intang Arambam Naobi (27), s/o  (L) A. Ibomcha chu an tangna Jail sungah tukver­a Iron bar thangsanin inkhaihlum saa hmu a nih. Naobi hin Khundrakpam Sanathoi a that bakah midang 2 a sukhliem leia Police han an man le July 4, 2015 a lungina an khum a nih. A sunghai chun lungril kimlo niin an hril.

MU in reservation policy hmang dingin
IMPHAL: May 30, 2016 a Manipur University (MU) Academic Council meeting chun University Grant Commission (UGC) in reservation policy a siem thar tak chu hmang ni ta dingin a rel. March 23, 2016 a reservation policy a hung pek dungzuiin OBC hai ta dingin seats 27%, SC hai ta dingin 15% le ST hai ta dingin seats 7.5% huol pek ding ti a nih.

CM in June 6­ah a ennawn ding
IMPHAL: Special Plan Assistance (SPA) hnuoia project chi tum tum thawa um mek hai chu June 6, 2016 khin CM O.Ibobi Singh in ennawn a tih. Project chi tum tum hai enkai le thawtu chu Manipur Development Society (MDS) le Manipur Tribal Development Corporation (MTDC) hai an nih. SPA fund hmang hin hmun hran hran haiah Nursing schools, Community Health Centres (PHC) le Primary Health Sub­Centres (PHSCs) building­hai bawl mek an nih (hill district haiah). Chun, 13th Finance Commission sum hmangin Integrated AYUSH Hospital, District level sports Infrastructure le Khuman Lampak sports complex sukliena hai nei mek a ni bawk.

ST/SC hai ta dingin free coaching
IMPHAL: Directorate of Employment Exchange, Manipur chun ST/SC mi le sa, Competitive exam hran hran a thang dinghai ta dingin July 1, 2016 a inthawk khin free Special Coaching le One year “O” level computer training buotsai a tum. Free Special Coaching a thang nuomhai ta dingin hnina lekha June 16, 2016 chenin peklut thei ning a ta, Computer training­a thang nuomhai ta dingin June 23, 2016 chenin hnina lekha peklut thei ning a tih. 80% class a thanghai chu stipend thla khatah Rs. 500 pek ning an tih. Thu chieng lem Sub­Regional Employment Officer, Imphal kuomah ngaiven ding a nih tiin Assistant Employment Officer, Imphal chun inhriettirna a siem.

Assam Assembly Speaker dingin Ranjit Kumar Das
GUWAHATI: Assam Assembly chun zanikhan Dispur, Guwahati hmunah BJP in Assam Assembly election, 2016­a hratna an chang hnunga session hmasatak an inthung tan. Hi huna hin Pro­tem Speaker Phani Bhusan Choudhury hmaah Chief Minister Sarbananda Sonowal le MLAs thar han sesamna an nei a. Hi zo hin MLA hai chun BJP MLA Ranjit Kumar Das (51)  chu 14th Assam Assembly Speaker dingin lungruol takin an thlang. Mr Ranjit Kumar Das hi Indian Information Officer (IIS) hlui, Barpeta district­a Sorbhog A/C a inthawk MLA dinga thlangtling a nih.

Subsidised LPG man Rs. 21 in a kaisang
NEW DELHI: Sawrkar thlungpui chun thlaisuongna (LPG) 14.2 kg cylinder pakhat pei man Rs. 12/­ in a sukpung. Hi dungzui hin Delhi­a chun non­subsidised LPG cylinder pakhat man chu Rs 548.50 hung nitang a ta, subsidised chu Rs. 419.18 a hung ni ta ding a nih. Sawrkar thlungpui chun Aviation turbine fuel or Jet fuel man khawm 9.2 percent in a sukpung bawk. Non­subsidised LPG man hi May 1, 2016 khan Rs. 18/­a sukpung a lo ni tah.

Petrol le Diesel man a kaisang
NEW DELHI:  Indian Oil companies hai chun May 31, 2016 zanril­a inthawk khan Petrol le Diesel man an sukpung. Petrol hi litre 1­ah Rs. 2.58 le Diesel hi Rs. 2.26 a sukpung a nih. Hi dungzui hin Delhi­a chun Petrol litre khatah Rs. 60 ni hlak chu Rs. 65 ni tang a ta, Diesel litre 1­ah Rs. 53.92 a hung ni ta ding a nih. Indian Oil Corporation in thautui man a sukpung nuhnungtakna chu May 17, 2016 kha a nih. Khawvel pumpuia thautui man kaisang izir le exchange rate dungzuia thautui man hi sukpung a nih.

VAWISUN THUPUI
Chun, kei chu mi hung ko in in ta, feng in ta, ka kuoma chun tawngtai in ta, chun, kei khawma lo ngai ka ti cheu. ~ Jeremia 29:12

Editorial: Manipur hmakhuo ding hi!

Ei hriet seng angin tulaia Manipur­a thu lum hlet hlawt, bu suonghmin zo hlim ang ela khu hlawt hlawt chu ILPS leia Manipur Assembly in August 31, 2015 a Bills 3 a passed ta chungthu a nih. HI bills leia phairam district­hai, a bikin Greater Imphal area sungah nghawng tha lo le ditum lo a hung nei tan mek. Education, fak le dawn zawngna, sin zawngna, sumdawngna, sawrkar rorelna le thil dang dang hang hrillang el thei lo tam takel a thanaw zawngin a nghawng tan der ta a, nghawng tha  lo a la hung nei pei ding a nih. State sawrkar chun Manipur phairam biel sunga inchuknain haiah ni 3 sung chawl a hei puong taphawt a, hi thil hi a tawpna ding niin an lang nawh. JCILPS hmalak dana inthawk hin nikum ang bawkin phairam biel sunga inchuknainhai hi hawng thei lo le kai thei lo ding hiel khawpa buoina a la hung intlun ngei ding niin an lang.
   
JCILPS nawrna leiin Manipur Chief Minsiter inrawinain all political party palaihai chu June 3, 2016 a Imphal suoksana New Delhi pan dingin an insingsa a. New Delhi inzin hi an sukpuitling thei ngei khawm ring a um. Amiruokchu, India rama thuneitu tak PM Narendra Modi chu rambung  tum tum 5 zet sir dingin June 4, 2016 khin New Delhi suoksanin Kabul, Afghanistan a pan ding a ni a. Hi lei hin all party palai hai hin Modi hi  an inhmupui thei tak tak dim maw? An inhmupui thei a lo ni khawma all party palaihai thil zu ngen ding hi a sukfel le a lo sukpuitling pek nghal chu beisei a um nawh. Hiengang hi thil umdan ding le fe dan ding a ni leiin all party palaihai hin JCILPS thil dit le duthusam chu an hung hawn el ring a um nawh.
   
All political party palaihai hi New Delhi­a an cham sung hin JCILPS hmalakna chu a lo nep el thei. Amiruokchu, all political party palaihai hin an thil ngen le thil nawr hi andit anga a hung um naw chun an hmalakna hi a hung zuol sau sau ring a um.  Hieng a ni lei hin Manipur hmakhuo ding hi ngaituo um takel a nih. Manipur ram le a sunga chenghai hmakhuo hi a eng zawng nekin an thim zawngin a um tlat el a nih. JAC Against Anti­Tribal Bills pawl khawmin an hmalakna Manipur tlangram pumpuiah sukhrat le sukkhau zuol sau sau dingin plan an siem a. India President in hieng Bills 3 hai hi pawmpuia suoi a thaw khawmin, a thaw naw khawmin Manipur ta ding chun a tha zawngin  nghawng a nei ring a um nawh. Hi lei hin Manipur hmakhuo ding hi an thim map el a nih.
   
Manipur phairam biela JCILPS chetna hin tlangram districts 5 hai laia a effect tak chu Churachandpur district a chenghai an nih. Bandh le public curfew hung um lei hin motor hmanga state dang le infepaw thei lovin a um pha a. Nat le sat tuorhai le sin zawngtuhai ta dingin harsatna nasa tak el an tlun a nih. State sawrkar hnuoia sin lakna dinga exam le interview hai chu bandh le curfew leia a hun sawn thei a ni a. Sawrkar thlungpui hnuoia sin lakna ding haia exam le interview hun hai hlak chu Manipur a bandh le curfew a um leiin thul le sawn a ni ngai der si naw leiin JCILPS chetna hin Central sawrkar hnuoia sin zawngtuhai chu a suk harsa el chau ni lovin an beiseina le thiltum a sukhlawsam a nih.
   
Bills 3 hai chungthua thuneina neitu tak chu sawrkar thlungpui a ni a. Hieng Bills 3 hai hi Act a inchangtir a ni chun Manipur a cheng tlangmi le phaimihai inkarah buoina nasa tak a hung suksuok ngei ding a nih ti chu sawrkar thlungpui khawma an hmai ring a um der nawh. Hilei hin Bills 3 haia hin India President in suoi thawng a tih, thaw der naw nih tia hril el thei a ni naw a, fimkhur tak le hmathlir sei tak neia President, PM le a rawihai chun thil an thaw ring a um.
   
Bills 3 hai hi Manipur­a cheng, a bikin Manipur mi indik tak ni veve, phaimi le tlangmi hai ta dingin buoina bills a nih. Hieng bills 3 hai hin Manipur a phaimi le tlangmi hai inkarah intheidana, inthuruolnawna le inremnawna chi a tu tan mek niin an lang. JCILPS pawlin Manipur phairam biel sunga bandh le public curfew an thaw el chau hi ei thil tuok ding niin anlang naw a, Manipur a tlangram biel haia khawm hun tiemchin um lo bandh  le economic blockade hung intlun naw nih ti thei ding a ni nawh. Bills 3 hai hin phaimihai le tlangmihai inkarah intheidana, inremnawna le inthuruolnawna hai chau la hung rasuok naw ni a, Civil war an ti chen khawm hi a la hung intlun el thei ding niin anlang; Bills 3 hai thuah ei inrem theinaw tlat chun. Ei state history ei hriet seng a, Manipur a hnam tum tum chenghai lai hnambinga indona a lo suok ta hlak a nih. Khangang kha tlung tanaw nih ti thei a ni nawh. Manipur hmakhuo an thim hle a nih.

Don't Miss
© all rights reserved
made with by Simon L Infimate