Responsive Ad Slot

Football Club LDV F.C. Saidan haiin a vawili-na dingin Inchûklai Award semna hun an hmang

Saturday, June 11, 2016

/ Published by VIRTHLI
Saidan CCpur | Virthli (ONP) : June 9, 2016 (Thursaday) zan khan khan Lenruol Duoilo Val F.C. buotsaina hnuoiah, tukuma Saidan a HSLC le HSE Exam a hlawtling hai lawmpuina le thawțha bîk zuol hai kuomah Award semna hun “The 4th Saikhawpui Inchûklai Award-cum- Felicitation Programme” chu Saidan Community Hall-ah hmang a nih.

Hi huna hin Pu.Isaac L.Pakhuongte, Principal, Sielmat Christian Higher Secondary School chu khuollien in a țhanga, Pi.Lalrinmawi, Headmistress, Happy Heart School, Bethel chu khuol inzaum in a țhang. Khuollien in thu a hrilnaa chun “ Ei hnam a inthawk hin pawl 10 le 12 țhataka passed suok ei tama, amiruokchu hlawtling taka muolsuo ei tam ngai naw hi ei tumru tâwk naw lei a nih. Pathienin eini nêka thiemlema a siema ei ngai vai hai nêkin ami siem thiemnaw bîk nawh. Tukum kan school a students Science stream a admission thaw mi za ah sawmkuo hai chun doctor ni annuom a, chuongangin Arts stream a mi za ah sawmkuo haiin Civil Services officers le Army Officers ni an nuom thu an mi hril. Hieng hai po po hin an thil ti an suk puitling chun ei hnamin Civil Officers le doctors hau hleng ei tih. Amiruokchu inchûklai hai hi ei inchuknaa tung a um met leh, hlawsama eiin ngai nghal hlak. Ei tum suk ru ei tiu” tiin infuina thucha a hril a, chun tukuma Saidan khawsunga pawl 10 passed hai laia thaw țhatak Ms.Tracy Lawmnapar, Happy Heart School a inthawka zo chu Sielmat Christian Higher Secondary School ah a kai ding bawk leiin a kumkhat fee a awl ding thu a puong bawk a nih. Khuol inzaum Pi.Lalrinmawi khawmin inchûklai hai chu mani sin hrechienga, hun tamlem pea, tumruna le nungchang țhataka inchûk hi hlawtlingna ani zie hai uor takin a  hril. Hi huna hin Tv.Michael Paugoulian le Nk.Ledya Nungate haiin hla mawi tak tak el an saka, mipui an sukhlim hle.


Hi huna hin Pawl 10 exam a thawțha tak (L)Upa.V Thanga Memorial Award (Memento + Rs.5000) le MIL (Hmar) a thaw țhatak nina LDV MIL-Hmar Topper Award (Memento+ Rs.500/-) chu Ms.Tracy Lawmnapar (76%) kuomah inhlan ania, Pawl 12 (Science/Commerce) exam a thaw țhatak nina (L) Hnawla Infimate Memorial Award (Memento + Rs.5000) chu Mr.Fimlunthang (74%) le Arts Stream a thaw țhatak nina (L) Remruotmawi Award (Memento + Rs.5000) chu Mr.Martin Lalrosang (72%) kuomah inhlân a nih. Inchûklai hlawtling hai po po kuomah Lawmpuina Certificate  inhlan seng anni bawk a nih. Organisers hai hi football club CDSA le NYK a affiliated club, District Block level Youth Club competition ah lawmman hai an sinthaw țhat leia lo la ta an nih.

Don't Miss
© all rights reserved
made with by Simon L Infimate