Virthli Sports, 30/05/2016: Europe khawmuolpuia football club inelna insangtak UEFA Champions League 2016 nopui chu penalty shootout ah 5-3 a Atletico Madrid hnein Real Madrid hai chun an lo dawm tah. Hieng hin Real Madrid hai chu European Champions vawi 11 zet an lo ni tah.

Tukum January laia Rafael Benitez thlaktu Zinedine Zidane hin a rawihai a khelṭhapui em em a La Liga chu point khat char a Barcelona hnawtphak lovin an chan tah a, Champions League ruok chu an khaw chanpui Atletico Madrid hai hnein a lakpui nawk thung anih. Zidane hi 1960 a Miguel Munoz a hnunga player le coach anga European Cup/Champions League Real Madrid lakpuithei nawktu hmasatak anih.

Vawizana Milan khawpuia inkhela hin hun pangngaiah 1-1 in an inhnetawk a. First half a goal lut sun hi Toni Kross a freekick a’nthawka Bale in a lo head chu goal bula um Ramos in a lo suk lut anih. Ramos hin 2014 final khawm khan goal a lo thun ta bawk a, hieng hin Champions League final dang dang pahni a defender goal thun thei hmasatak anih.


La Liga 2015-16 a clean sheet 24 zet neitu Jan Oblak a khelṭha em em a, goal zawna an hung pet hai chu a lo man deu vawng ani. First half sung khan chu field khingtiengah khawm Keylor Navas a sin a zang hle a, Atletico Madrid ha’n goal zawnah an pet inkhat khawpel a, an pet sun hai hlak chu Pepe le Ramos ha’n an lo dang hman pei anih.

Second Half ṭan ani a, Diego Simeone chun a central midfielder Augusto Fernandez chu lasuokin AS Monaco a’nthawka an inchawk thar Yannick Carrasco chu a thunlut a, a thaw fuk hle. Carrasco hin ball a khelkuol thei bak ah a ruolhai ta dingin chance a siem thiem a, gameplay khawm a hung thleng nasa hle anih. First half nek daiin Atletico Madrid ha’n an nawr nasa lem a, inkhel ṭan hlim ani in Torres chun Griezmann a ball pass a lo dang tum laiin Pepe in Torres chu a sukthluk a penalty a hlawdawk. Hi penalty hi Griezmann chun vangduoitlak takin goal bar a pet khuma, Arjen Robben in 2012 a penalty a thun ṭhel hnunga Champions League final a penalty thunṭhel nawk hmasataktu anih.

Atletico Madrid hai hin an nawr nasa em em a, an full-back hai pahni Filipe Luis le Juanfran hai an up nasa thei taluo chu tuorin minute 70 na ah Modric chun field sir tienga Benzema free em em a um chu pass in Benzema chun goal thuntheina chance ṭha tak a neia, sienkhawm Oblak a hmazawntakah a pet leiin awlsam takin a lo man anih. Hin hnung sawtnawte ah Ronaldo’n box sung a’nthawka a pet chu alo dang nawk a, hi ball inting hi Bale chun lo pet nawk nghal sienkhawm defender ha’n an lo dang hman anih. Minute 79 na ah Atletico Madrid chun gaol an thun ve ta nghe nghe a, Gabi ball chip chu field sir tieng anthawkin Juanfran in a hung cross tunga, Carrasco chun goal in alo inchangtir anih.
Hun pangngaiah 1-1 in an inhnetawk leiin extra time inkhel ani a, hi taka khawm hin an inhnetawk hle. Chance ṭha nei zeu zeu hai sienkhawm goal in an inchangtir theinaw ani deu tak.

Chuongchun Penalty Shootout a a hratlem zawng a ṭul tah a. Penalty Shootout ah hin Real Madrid ta dingin Lucas, Marcelo, Bale, ramos le Ronaldo ha’n an pet goal vawng a, Atletico Madrid ta dinmgin Griezmann, Gabi le Saul ha’n an pet goal a anachu game sung popo laia inkhelṭha em em Juanfran chun a pet goal tanaw leiin 5-3 in Real Madrid in hratna an lo chang tah anih. Atletico hai hin Champios League final ah vawithum hratna an chang zo naw na anih.

San Siro a mipui ri chu a ṭha hle a, lawm leia mitthli tla le tuornat taluo leia mitthli tla an inkat nuk bawk. English pachal kum 41 mi Mark Clattenburg chu mi ring nekin a thuthluknahai a ṭhat leiin inpak a hlaw hle. Madrid Derby ni bawk, Champions League final ani bawk leiin ṭhang ana chu ning a ta, mi pariet zetin yellow card an hmu anih.

Post a Comment

Powered by Blogger.