Responsive Ad Slot

Shillong-ah Martyrs’ Day hunser hmang,1st Hmar Martyrs' Trophy JFC Knights in a'nlak

Tuesday, May 17, 2016

/ Published by VIRTHLI
Shillong, May 16, 2016 (VIRTHLI) : Zan dar 7 khan Shillong-a Hmar nauhai chun Hmar Youth Association (HYA), JHQ, Shillong huoihawtna hnuoi-a Hmar mihrang pasaltha hnam ta dinga hringna chan hai hrietzingna hunser EFCI Centennial Hall, Demthring ah an hmang a, nu-le-pa, thalai an fekhawm tha hlea, hall in a keng naw rak a nih. Shillonga Martyrs Day prokram a mipui pungkhawm rawn tak tum anga hril a nih.

Pu Francis Songate​, General Secretary, Hmar Inpui, General Headquarters, Hmar Welfare Society, Guwahati (HWSG) an'thawk Pu Thanghlun Hmar, Chairman, Pu Rosanglien Puruolte​, Asst. Secy., Pu Lalzuithang Hrangate​, Information Secy-cum-Val Upa le Tv. James H Songate​, President, HSA Guwahati JHQ haiin an hung uop bawk a nih.

Shillong HYA Secy.& Publicity Pu L Parlien Hrangchal-in hun a keihruoi a, hun hawng tawngtaina Pro-Pastor Gospel Darsiemlien in a nei zoin, Pu Ramhninglo Inbuon, Secretary, HYA Jhq Shillong chun mipui lawmlutna le Secretarial Report pekna a nei. Hi zo hin hnam ta dinga Martyr hai inzana le hrietzingna ‘Silent Prayer’ Rev. Lalngaizuol keihruoinaa nei a nih.



Pu Lalthankunga Hmar, President Hmar Inpui, Meghalaya Region chu World Customs Organisation Certificate of Merit le Presidential Award for the Year 2016 for Specially Distinguished Service a dawngna le inzawmin  Hmar Inpui Meghalaya Region chun Chawimawina Certificate an hlan.

Thuhrilna hun Pu Lalthankunga Hmar, President Hmar Inpui, Meghalaya Region le Rev. Dr. J. Huoplien Neitham, Moderator, EFCI haiin an neia hnam inthuoruolna le impumkhatna pawimaw zie hai an hril tlangpui.

Shillong Hmar Martyrs Day hmangpui dinga a hran tawpa hung Pu Francis Songate, General Secretary, Hmar Inpui, General Headquarters in thuhrilna hun a nei bawka, a thuhril huna chun hmuntin ramtina cheng Hmarnauhaiin Hmar Martyrs Day an inser ti hai ei hang hriet chu ei lungril-ah hnam hmangaina ala thi naw chu a sukchienga, tawngbau ringawta hnam hmangaitu niloa a tak ngeia hnam hmangaitu ni seng ei tiu, ei Hmarram ei hang ena lungsiet a um em em, a tutu khawm indemtuo thei ding ei um nawa, hnam thuoitu, politician le mipui hai khawm ni inla indiknawna ei nei senga, Kohran, pawl, pahnam in ami thea ei inpumkhat thei naw nih. Martyr hai an inpekna hi inpumkhatna in hmang inla, Hmar hnam ei nina bek hin inthuruol inla nuom a um a ti thu le Martyrs Day hin rasuok sien, theitawpa hnam ta dinga inpe a, Hmar hnam indinthar nawk ei tiu tiin mipui pungkhawm hai hmaa chun a hril a nih.

Hunkarlak ah Nk. Esther Lalumpui Hrangate, Nk. Lalvarzing, Nk. Mary Jones Buongpui, Tv. Emmanuel Zate le Nk. Rohminghlu hai a'nthawk hnam hla ngaithlakna nei a nih.

Hi huna hin 16 May 2015- May 2016 inkar sunga tlawmngaia HYA Jt.Hqrs.Shillong hminga Thisen petuhai mi 12 hai kuomah Chawimawina Certificate HYA Jt.Hqrs.Shillong chun inhlanna a nei.

Pu Rohminglien Buhril, IFS, President, HYA Shillong Jhq in mipui fekhawm hai, hlasaktu, hun neitu, hall hmang phalpektu EFCI, rimawi remtuhai le midang dang kuoma lawmthu hrilna hun a nei bawk a nih.

Hun hmang zova Shillong HYA-in refreshment a buotsai chu fak ani bawk.

Hmar Youth Association (HYA), JHQ, Shillong huoihawtna hnuoi-a 1st Hmar Martyrs' Trophy Final chu vawisun khan TA Ground, Happy Valley, Shillong hmuna JFC Knights le Sinlung FC hai inkhelin JFC Knights haiin Sinlung FC chu 2-0 a hnein 1st Hmar Martyrs' Trophy Final hrattak nina nopui chu an dawm a nih. Best Player chu Tv. James Vaiphei of Sinlung FC in a laka, Best Goal Keeper chu Immanuel Zate, Top Scorer chu Tv. Lalhmangaizam, Unau United FC ami chun Goal 8 lai thun in a lak a nih.

Photo Credit: Jeffrey D Tusing & Joyful






1st Hmar Martyrs' Trophy Final







Don't Miss
© all rights reserved
made with by Simon L Infimate