Sakawrdai, May 16, 2016 (VIRTHLI): Sakawrdai, Sinlung Hills Development Council Headquarters ah Hmar Pasalțha Ni chu Sakawrdai Community Hall-ah Advisory Board huoihawtna hnuoiah hmang a nih a.

Kumdang hai nekin mihriem an tamin Hall i kenglo khawp mipui an pungkhawm a, puotieng khawm mipui an tam hle.

Hi huna hunser hmangtu Pastor, Lalhmangaihawma chun ursun taka hi hun hi hmang a țul thu le literature tienga khawm hieng neka hma ei sawn lemna dinga naupangte a inthawka puitling chen hai khawma țhang ei lak a țul thu hai a hril.

Pi Zonunsiemi'n "Hmar Pasalțha" hla lungrun takin a sak chu mittui far ngiel ngiel khawm an um nuol.

Hmar Pasalțha hai parțhi inhlan hma hin ex-HVA, Sakawrdai hai chu intlar tir an nih a, hilai zing hin pasalțha hai parțhi inhlanna party hrang hrang le NGO hrang hrang bakah Martyrs sungkuo le mimal a inthawk nei a nih.

Pasalțha sunna hunser hi Presbyterian Pastor Pu Samuel Lalmuanpuia Pachuau in a hmang a, hmar țawng a thiem ang ang a hung kheksuok pui a nih.

 Pi Lalhmingkim in "Pasalțha fam zûn ana ngei el" ti le Nk. Esther Jessy in "Mihrang valruol hai saw entu" ti hla thiemtak le lungruntakin an hung sak suok bawk.

Sakawrdai Advisory Board aiaw in Pu Lallungkham chun thu a hril a. A thuhrilna a chun Martyrs' Day ei hmangna a hin ei lungril siemfel inla, indikna le ringumna in ei hnam hi țhuoi inla, political party hrang hrang hai khawma politics ei khelna ah indikna le ringumna nei ei tiu. Inkhik neu neu na ei nei sung chu par suok ngai naw ma nih ti a hril sa bawk.

Pu D. Lalhmangai chun HPC Hqrs. aiawin thuhrilna neiin Hmar Martyrs' Day hung pieng nasan le hmuntin le ramtina mi haiin ruolkhai taka hmang a ni theina dinga hi hun hi ruot a ni thu le ram le hnam tadinga inpe lai hin Hmar hnam cho nilo in Vaiphei, Thado hai le Raju hai chen khawm an țhang thu a hrilsa bawk. Chun, HPC le Mizoram sorkar accord signed a ni dan chu mipui hriet dingin a hril bawk. A hril peina a chun famtah hai hi eini leia fam an nih a, tu el khawma hi hi ei hriet zinga țhangruol a pawimaw zie a hril sa bawk.








Post a Comment

Powered by Blogger.