Responsive Ad Slot

Parbung Govt. H/S a inthawka Class X passed hai lawmpuina hun hmang

Monday, May 30, 2016

/ Published by VIRTHLI
CCPUR (Virthli): May 30, 2016 zantieng dar 3 PM khan BoSEM (Manipur) hnuoia HSLC/Class X exam 2016 result suok a Parbung Govt. H/S a inthawka hlawtlingna chang hai lawmpuina an School Headmaster Pu Lalruot Ralsun a chengna In Saikot, CCPur hmuna thlaithleng buotsaiin hun hmang a nih. Hi hun hi Saikot bieltu MDC Pu Lalhrillien, Parbung V/A Chairman Pu Danielthang, Tipaimukh Block a Education Committee member Pu Lalsangvel, Bungkhawpui Education Upliftment Society thuoitu le Virthli Palai haiin an uop. Hi school a inthawk hin external le regular student 24 in hlawtlingna an chang a nih.

Hi huna hin Pu Lalruot chun nulepa haiin an nauhai Parbung Govt. H/S ah an in kai tir nuom chu lawmum a ti thu, a thawktu chanpuihai, Study Camp thahnemngai taka huoihawttu Tv. Charles Lalenglien Ralsun le a thawruolpui hai le Parbung khawtlang thuoitu hai chungah lawmthu a hril a. Lawmthuhrilnain Tv. Charles kuoma hin Suit Case tha tawk tak Headmaster hai nupa in inhlanna an nei.

Pu Lalhrillien chun Class X exama hlawtlingna changhai chu a lawmpui thu a hril a, mani postingna a khawm um peilo tamtak an um laiin hi School a Headmaster Pu Lalruot ruok chu a sina mi ringum, a hmun ngeia fe hlak a ni thu, MDC biel a chun ama biel ni naw sienkhawm hnam hmakhuo enin Hmar biel chu ama biel ang thoa a en thu, hiengang chanchin lawmum a hriet hin a suk lawm hle thu le an result that chu hnam hmel suklangtu a ni thuhai a hril.

Pu Danielthang chun Parbung H/S kum tam tak thi ta hnung Pu Lalruot in a hung kei thar nawk chu lawmum a ti thu, hi school a kai student hai Parbung Govt. H/S hming suk thatu an ni thu le Parbung khawtlangin an lawmpui hle thu hai a hril. Class X exam a hlawtlingna chang hai chu hmatieg peia mani thiemna ngeia in ziek kai thei dinga thang la ding le in chawk fawm a sin zawng lo dingin a'nfui.

Pu Lalsangvel chun ama ngei khawm 1972 a Parbung Govt. H/S a Class X passed a ni thu a hril a, Pu Lalruot chu piengphunga en chun sawrkar dan angin a chengna in ainthawka hnaite ah khawm thawk thei zing a ni thu, hlaw hmu ding chau ni lova ram siem tha tuma hmalatu le kal a pen suok ngam chu inpakum a ti thu hai a hril.

Parbung khawtlang mipui khawmin result suok hlim khan hienganga an khuo a School in result tha a hung nei chu an lawm hle. Parbung Govt. H/S hi Govt. of Manipur Cabinet chun Dt. 22/12/2014 khan Higher Secondary a hlangkai dingin a lo remti ta kha a nih. April 7, 2015 khan Manipur Governor chun remtipuina lo nei tah in Order No. 8 of 2015; No. 12/31/2014-SE(H/S) besanin Order a lo insuo tah a. Tuhin inspection hmabak mek a la ni a. Hmatienga hai khawtlang chun a tul ang anga ram khawm an pek suok ding thu an lo hril tah niin Virthli palai kuomah Headmaster chun a hril.

Pathien kuoma lawmthu hril tawngtaina Pro-Pastor Solomon Tuolor ICI Saikot North chun neiin hun hmang a nih. Chu zo chun lawmna ruoi thlaithleng tuihnai tak buotsaia um chu awt tlang a nih.

Report & Photograph: Muona Infimate | Virthli
Don't Miss
© all rights reserved
made with by Simon L Infimate