“Chun, Lalpa Pathienin saktieng Eden a chun huon a siem a;” Gen 2:8
“Chun, Gethsemane (huon) an ti hmun chu an tlunga...” Mark 14:32
April 17, 2016 tuk khan Dr. M R De Haan in “Two Gardens” ti a ziek ka zuk tiem a, danglam deu takin ka lungril a hung lakin ka hriet a. Ka lungril ah tulai ringtuhai hi ‘Huon chi hni’ in ka zuk the sin a, ka ngaituo zawm pei leh, ka lekha tiem ngaituozawm talem lo chun; hi thu hi ka hung ngaituo zawm pei leiin, ka hung ziek suok ta lem a nih.
Huon Hmasa lem: Bible ah huon inlar emem pahni hmuin a um a. Pakhat chu ‘Eden Huon’ a na, a pakhat lem chu ‘Gethsemane Huon’ a nih. Huon hmasa hi Pathienin mihriem hmasa Adam le Eve hai nupa inhawi tak le hnienghnar taka an khawsakna ding le Ama le an inpawl rawpna dinga a siem a nih. Fak ding thei chi dang dang, tulaia ei hriet phak talo le thing hring dup hmun alo buotsai pek a. Ramsa tinreng leh hlim em ema leng hmunkhat in an um nawk nghal a. Lungril sawl ngailo le hadam taka hlim le lawm em ema lenga an chengna dinga buotsai a nih. Tension umlo, lungkham ding le ti ding iengkhawm umlo, suol inlenglo huon, Pathien buotsai sa ramah an cheng a nih. Chu hmun inhawi le iengkim Pathien buotsai sa hieu chu suolna leiin Adam le Eve chun an lo chan ta duoi duoi el a. An nina pangngai kha insit in, mit var zing kha ‘hung var sap’ ding le Pathien anga um kha, nuhmei Eve khan a hang beisei tlat el a nih! Lusiphar tlukna le tlakna (Isa 14:12-20) ang deu a khan a hung tla ve tah a nih. Chu suolna lei chun ‘Huon Hmasa’ chu ei lo chan tah a nih- Thlarau tienga thina leh. Chu duamna rapthlak tak le mani chan insitna maktak lei chun‘Huon Hmasa’ malsawmna ra kil phak lovin ei lo um tah a. Chu chau chu ni lovin, Pathien le ei inzawmna-hringna ngei khawm ei lo chan tah a nih. Pathien thu awilo hi alo va pawi sei de aw! Chu Huon mawi Satan chul rama inchang tah chu tungding nawk dingin Isu hmangin Pathienin ‘Huon Thar’ a hung buotsai a nih
Tulai Eden Huon: Tulaia ringtu tamtakhai hi “Eden Huon” ram nun ah ei la cheng zing! Chu ram chu ‘Thlarau dangcharna ram’ (Spiritual emptiness) a nih. Lalpa thupek hre si a, zawm lo, duam le hmasiel, mani nina insit, tha inti emem bawk, suol pawlnel nun, chakna suol, inthiengnawna pawisa lo, thil thawtheina inhnar bawk, nun dangcharna, thlaler nun in mani ning ninga khawsakna nun hi a nih. Hieng ang nun hi “Eden Huon nun” ka ti a nih. Suol tieng panga chu an vun hi a sa emem hlak. Satan zaihlema ei um lei le Satan bauthiem in ami zim hne lei a nih. Satan a thiltum lientak chu Pathien le mihriem inthe tir hi a nih a. A sin a hin a hlawtling zie chu ringtuhai nun ah a chieng hle a nih. Eden Huon nun, mit var zinga varsap nuom, Pathien thu neka, Satan, hmel hrietchienglo thu zawm tlat el, ami siemtu Pathien anga power zuk nei nuom el le milem biekna rama cheng zing nun hi “Eden Huon nun” ka ti a nih. Ringtu tamlemhai hi vawisun chenin hi huona hin an inkul zinga, suok zai reng rel lovin an nun an pham zing a nih! Chuonghai chu ‘Satan chul rama’ cheng an nih! Unau, nang teh, ieng huon am I um a?
Hnam chite te in sukbingna, kohran pawl in sukbingna, kohran pawlkhat sungah pawl chite te muk lala um, hmangaina ra neka, inthiktuona le indemna, inchotuo le in elrelna, taima neka thabona, mani tha intina tlang sanga ngira tlang insam hringna hai hi Eden Huon nun an nih. pathien ram neka pawlram ngainatna, thlaraua insiemtharna neka sawma pakhat ngaina lem tlat. Sum be hnam le sum be kohran hai chetna zawl a nih.
Gethsemane Huon: Mihriem hmasa haiin suol le thina leia an lo chan tah Eden huon chu tungding nawk dingin Isu’n “Gethsemane huon” a hung bel a nih. Eden huon inhmang hnung tungding nawk dingin Gethsemane Huon ei mamaw hrim a nih. Eden huon hmasa, iengkim hnienghnar taka inzosa diema um hlak kha suksiet le thupin a um ta leiin “Huon Pahnina” buotsaiin a um ta a nih. Eden huon tlukna siemthar nawk dingin Isu’n a khat chauin “Gethsemane Huon” a pan hlak a, lungngai inrum hril ruollo le nitin in suol a do hlak a nih. “Keima thu ni lovin, nangma thu thu ni lem raw se” tiin, a tuor dinghai popo hre si in, Gethsemane huon a khan “Eden Thar” huon mawi chu alo indin suok a ni kha. Gethsemane huona chenghai hin an thiemthu hrilin mi tin mi tang an deu saw in an lei li tha an vawr suok ngai nawh a, pharisaic hai ang elin mi deusaw an ching ngai bawk nawh. Beramte a hmul vawtu hma a a to zing ang khan, “To tawk” le Pa thu awi in hnena alo chang ta lem a nih. Gethsemane huon nun hi ringtu indiktak hai nun indiktak ram a nih. Ei nuom dan le ei dit dana hring ni lovin, ei nuom dan le ei inhawk zawng thaw ding ni ta lovin Pathien thu thua um le hring ding ei ni zie a tarlang. An hawi khawmin, a rinum khawmin, “Keima thu ni lovin Nangma thu thu ni raw se” ti hi Pathien chibai bukna le inhlanna ropui tak, ani el chau bak ah Pathien lampui buotsai sukdik theina umsun a nih. Gethsemane huon nun hi ‘Tawngtai nun’ le ‘thu awi nun’ ram a nih. Hi hi a nih, Tlangchar Tuihnar (Stream in the desert) ti Mrs. Charles Cowman in alo ziek kha. A pasal leh China ram ah missionary sin thaw a an umlai, mak takin kum tamtak tho dawk thei lovin a pasal a hung dam naw a. Dam dingin Pathien kuomah a ngen a. Iemani chen hnung ah chu “Lalpa ka pasal hi China ram ah a thi a tha I ti ani chun I thu thu ni raw se”tiin hnena thu an sam hnungin, Lalpa’n a pasal hringna alo lakpek an tah. “I thu ang peiin” ti hi tulai ringtu “Gethsemane Huon” nun changtuhai hla a nih. Unau, nang teh khawlai huon am I cheng a? Eden huon ah I la cheng zing el am? Gethsemane huon tieng insawn a hun ta naw maw? “Chuongchun, a hringhai chu anni tadinga hring ni ta lova an thi aia thi a tho nawk tading chun an hring lemna dingin a nih, mi popo aia a thina chu”. “Eden chul hnung huona chenghai” nun le “Gethsemane huona chenghai” nun hi chieng emem in thlier hrang thei a nih!
Adam le Eve in an suk riral tah Eden huon ah iem beisei ding a um a? Kha huon kha a um ta nawh! Ram ruok le ram tawl, Satan chul ram ani tah. A chenghai tukhawm hlim le lawma lungawi an um nawh. Insum theinaw le hmasielhai ram le hnukrawl hai chengna ram a nih. Lalpa Isu tungding ram thar mawi emem “Gethsemane Huon” tieng kir ei tiu khai! Chutaka chun, Thlarau ra kimtakin dawng thei a nih a, Pathien le inpawl zing theina lampui a ni bawk. Amen!
HT/Sunday Sermon, May 29, 2016
