DC in Dr Ambedkar Merit Award an hlan
CCPUR: Dr.Ambedkar Foundation, Ministry of Social Justice & Empowerment, govt of India in Churachandpur district sunga SC (female) student Dr Ambedkar National Merit Award dawng dinga a thlang mi pahni hai kuomah zani 2PM khan DC/CCPur in award Rs. 20,000/­ cheque le Certificate inhlanna a nei. Hi Award dawngtuhai chu Ningthoujam Keflyn Devi d/o N.Ibomcha Singh of Chiengkawnpang, T.G Hr Sec.School, Imphal le Ms.M.Baby Devi d/o M. Inao Singh of Zion Veng,Tuibuong, Rayburn College hai an nih.


Hi award dawng dinga thlang India ram pumpuia 1st hai kuomah Rs. 60,000/­+ Certificate, 2nd hai Rs. 50,000/­+ Certificate, 3rd. Rs. 40,000/­+ Certificate, 4th le 5th hai Rs.20,000/­+ Certificate inhlan an nih.

NSSU Teachers Workshop
CCPUR: EFCI Saikawt Presbytery chun Hmar tawng tiem le ziekchung chângah May 28, 2016 khan Saikawt Presbytery sunga khaw tinah NSSD hotu hai ta dingin Teachers’Workshop a buotsai. Saidan Station­ah Resource person in Upa R. Tawna Khawbung; Sielmat station­ah Dr Laldawmlien; Rengkai station­ah Pu H. Zaneisang; Saikawt station­ah Pu L. Ruoivel Pangamte le Muolbem station­ah Pastor Fimthasang Infimate hai an thang.

Muolvaiphei ICI KTP in thisen an pek
CCPUR: District Hospital Blood Bank Unit le thangruolin Muolvaiphei ICI Kristien Thalai Pawl (KTP) chun zanikhan Muolvaiphei Nursing Home/Centre­ah Blood donation camp an buotsai. Hi huna hin nuhmei 3 le pasal 16, an rengin mi 19 han thisen Unit 19 an pek. District Hospital, CCPur­a damnaw thisen mamaw han emergency thila an hmang dinga Blood donation camp buotsaia thisen hi an pek a nih.


One Day Consultation an nei
CCPUR: Zani 10:30AM a inthawk khan Mizo Literature Society (MLS) Office, YMA Complex, Hmuia Veng­ah MLS Textbook Sub­Committee huoihawtnain Mizo Language Subject teachers thuah “One Day Consultation on Teaching and Motivation Technique” nei a nih. Session­I ah Lalkunga in ‘Teaching & Motivation Technique’ti thupui hmangin thu a hril a, Session­ II 1:00 ah Upa MB Sanghnuna chun ‘Pattern of Question Setting’ ti thupui hmangin thu a hril.


Class X&XII pass hai lawmpuina an nei
CCPUR: Zani sun dar 12 khan Koite khuoa Lamkhopao Kipgen chengnainah kum 2016­a Koite khuoa inthawk Class X le XII passed hai lawmpuina nei a nih. Hi huna hin Rev. Hemkhomang Haokip, Principal,DTS chun Class X passed mi 5 le Class XII passed 19 le motor nei mi 64 hai ta dinga tawngtaipekna a nei. Chun, zani 11:00AM khan Bijang Youth Club huoihawtnain Bijang Community Hall­ah tukumah Class X  pass mi 24 le Class XII passed mi 21 hai lawmpuina hun hmang a ni a, Upa Sokholal in student hai ta dinga tawngtaipekna a nei a; John Singson, EA, PHED le Michael Thangminlien Mate, General Manager,  Accelerate Insitution han career guidance an neipui bawk.

Thangching Herbal Enterprises hawng
CCPUR:  Mr Thangzamuan Hauzel, Chief General Manager, RBI, Imphal chun zanikhan Lydi’s Hall, Angels’ Place,Bungmual­ah Thangching Herbal Enterprises“Lemongrass Essential Oil & Home Decor+Aroma Diffuser’ khuolliena thangina hawng. Hi huna hin Guest of honour in Pauneithang Valte, Branch Manager, SBI/CCPur a thang.


Hi huna R. Sanga in  thu a hrilnaah, a nu Thangching hrietzingna dinga  Herbal Enterprises hi a thaw a ni thu hrilin, kum 2008 a inthawka lemongrass ching hi a tan a ni thu; tuhin a tui sawrna ding khawl pathum Singngat­ah 2 le Angels Place­ah 1 an thut ta thu a hril.

Missionary Commissioning Service
CCPUR: ICI Kohran chun May 29, 2016 (Pathienni) zan inkhawm 6:00PM hin Sielmat ICI Biekin­ah Missionary Commissioning Service nei an tih. Kohran mipui a nuom taphawt thang dinga fiel an nih.

DC in a hawng
CCPUR: Mr Lunminthang Haokip, IAS, DC, CCPur chun zanikhan Samulamlan block huom sunga G. Songgel khuoah NERCORMP­II hnuoia CFC a hawng. Hi huna hin Guest of honour in N. Sukajit, Project Manager NERCORMP, CCPur le Thempi Khongsai, Chief Functionary, Sahei Foundation hai an thang a, Functional president in Thangjapao Lhungdim, Chief of G. Songgel village a thang.

Voter hai thamna a nasa leiin EC in Tamil Nadu­a A/C  2 a Election kansel dingin Governor kuomah a recommend
NEW DELHI: India history­a la um ngai lo le a vawikhatna dingin Election Commission chun June 13, 2016 nia Tamil Nadu­a Aravkurichi le Tanjavur Assembly Constituency haia Election nei dinga notification a lo insuo ta chu candidates le political party tum tum han voter hai thamna dinga pawisa le thilpek (gift) nasa taka semna tawpsan lova an la sunzawm pei leiin kansel dingin Governor K. Rosaiah kuoma a recommend.

Hieng seat 2 haia election May 16, 2016 a nei dinga ti chu May 23, 2016 a nei dingin Election Commission in a lo sawn tah, May 21, 2016 nia EC in June 13, 2016 a Election nei dinga notification an suo nawk a nih.

Tuchena hin hieng constituencies 2 haia hin pawisa Rs. 8 crores chuong election officials han an man ta bakah hmun tum tum an dapnaah Zu litres 2,500 chuong; tangkaruo (silver), dhotis le sarees hai thangin thilpek (gift)­a voter hai kuoma sem ding tam tak an man ta a nih. Pawisa man hai baka hin Voter hai thamna dinga pawisa sem ta hi a rengin Rs. 150 crores a tling ta niin report chun a hril.

Election Commission chun rigging le boothcapturing hai leiin election hi a lo kansel ta hlak a, sienkhawm hienganga candidates le political parties han voters hai an thamna leia election  nei dinga ruot tah a kansel­a vawikhatna a la nih tiin Election Commission chun a hril.

Election Commission chun Tamil Nadu Governor K. Rosaiah chu hieng constituency pahni haia election notification insuoa lo um ta chu kansel dinga recommend­in election nei hun ding chu a thara a la ruot/recommend ding thu an hriettir bawk.

Election Commission chun Election observers, Central Observers le special teams han report an pek hai tha taka a enfel le ngaituo hnunga thutlukna hi a siem niin a hril.

Rul chuk AR han an sukdam
IMPHAL: May 26, 2016 khan Khamasom Khullen, Ukhrul district­a nupui pakhat, Mrs Jolly (45) chu a lo sinthawnaah rulin a chuk a, 41­Assam Rifles Unit Hospital panpui a ni a, Assam Rifles a doctor han enkawlin an sukdam niin Assam Rifles thusuok chun a hril.

Sawrkar schools 73 hai pass pecentage Zero
IMPHAL: Board of Secondary Education, Manipur (BSEM) hnuoia HSLC Examination, 2016 result suoka khan sawrkar schols 323 hai laia Schools 73 hai pass percentage Zero le sawrkar schools 28 haiah student pakhat seng chau an pasi bakah top 20 hai laia sawrkar school­a inthawk pakhat khawm an thang nawh. Sawrkar schools 323 haia inthawk students 6,484 an exam a, students 2,781 chau an pasi a, pass percentage 42.8 a nih. Kum 2013 khan Govt. Schools 28, kum 2014 in schools 48 le kum 2015 in schools 70 haiah student pakhat khawma pasi um lovin an lo um ta bawk.

Lamdeng­ah Solid Waste Treatment Plant dawmsang
IMPHAL: State sawrkarin Rs. 4175.00 crore senga Lamdeng hmuna Solid Waste Treatment Plant a siem chu Waste to Compost a inthawk “Wast to Compost and Energy”in a dawmsang. Hi project hi Public Private Partnership (PPP) hnuoia enkawl a hung ni ta ding a nih. Hi project enkawltu dingin state sawrkar chun Ahmedabad, Gujarat a private Agency, Innovative Eco­Care Pvt. Ltd. a ruot fel ta niin DIPR thusuok chun a hril.

Student 2 hliem, pakhat khaw hre lovin
IMPHAL:  Zani 11:30AM vela Police han Kwakeithel hmuna ILPS ngenna le inzawma student lampui hrawhai dang le hnawtdarna dinga tear gas an kap khum bakah an silai kawm haia an sutna leiin student 2 an hliem a, student pakhat khaw hre lovin a tlu. Hliem hai hi Zenith Academy a Class XII inchuklai, nuhmei ve ve, Nandibala le Kalpana hai niin ei thu dawngna chun a hril.

CBSE Class X result puong
NEW DELHI: Central Board of Secondary Education (CBSE) chun zanikhan 2016 Class X result a puong a, a pumpuia pass percentage chu 96.21 a nih. Nikum nekin pass percent a tlawm lem. Nikuma pas percentage chu 97.32 a nih. Pasal nekin nuhmei pass percentage an sang lem. Nuhmei pass perecentage 96.36 a ni a, pasal pass percentage chu 96.11 a nih.

Regions anga thaw tha tak chu Thiruvananthapuram region niin an pass percentage 99.87 a nih. CBSE hnuoia Class X exam a khan student 1490000 chuong an exam a nih. Result hi www.cbseresults.nic.in le www.cbse.nic.in haia en thei a nih.

Congress in Chibambaram le Kapil Sibal
NEW DELHI: Maharashtra­a Rajya Sabha biennial election hung um dingah Congress chun Finance minister hlui P. Chidambaram; Uttar Pradesh­ah senior leader Kapil Sibal le Karnataka­ah Jairam Ramesh hai an party candidate dingin an ruot. Karnataka­a hin Oscar Fernandes, Punjab­ah Ambika Soni; Chhattisgarh­ah Chaya Verma; Madhya Pradesh­ah Vivek Tankha le Uttarakhand­ah Pradeep Tamta hai an ruot bawk.

Assam Assembly Session June 1­ah
GUWAHATI: 14th Assam Legislative Assembly inaugural session chu June 1, 2016 a inthawk tan le June 3, 2016 chena nei dinga beisei a nih.  Hi thua hin Governor Padmanabha Balakrishna Acharya chun June 1, 2016, 9AM a inthawk Dispur­a Assembly chamber­a nei dingin a ko. Governor chun AGP MLA Phani Bhushan Choudhuru chu Pro­tem Speaker dingin a ruot a, Speaker ding thlang a ni hma po Speaker mawphurna chel a ta, Assembly tan niin Speaker ding thlang ning a tih.

PM in Elephant Fall a va sir
SHILLONG: Prime Minister Narendra Modi chun zanikhan Meghalaya­a Shillong khawpuia inthawk km. 12 vela hla, khuolzinmihai hiptu tak pakhat Elephant Falls a va sir.  PM hi Minister for Department of North­Eastern Region (DoNER) Jitendra Singh in a zui a; PM hin thla an lakpui nghe nghe bawk. Hi baka hin PM chun Shillong­a inthawk Km. 25­a hla Mawphlang village khawm a va sir a, hi hmuna hin Khasi hnam han lam chi tum tum inentirna an nei.

ATM a thun ding Rs. 1.39 crore an tlanhmangpui
COIMBATORE:  Brinks India Private Limited hnuoia thawktu pahni  Udumalpet mi ve ve K. Satheesh (29) le K. Arun Kumar (22) hai chun ATM a thun dinga an chawi Rs. 1.39 crores zet chu ATM a thun lovin an tlanhmangpui. Anni pahni hi Coimbatore district sunga Pollachi le Udumalpet  area haia ATMs haia pawisa thuntua hmang an ni a, sienkhawm thla khat sunga audit thaw a ni hnungah indiklo takin ATM a  thun ding pawisa hi an lakhmang ti hrietsuokin a hung um a nih. ATM  hai hi manual an ni leiin sum an thunzat ding chu tha takin an hmetlut a, sienkhawm a sum tak sie loin an lakthen hlak ni a hril a ni a, a thun dinga nitin Rs. 32­50 lakh  peksuok hlak chu a then a zar chau an thun hlak a nih. Police chun hienganga pawisa an lak hai hi a hlawk uma semin a hnungin ATM ah an thun nawk hlak ni dinga an ring thu an hril.

Vuongna toilet sungah rangkachak kg. 3.6 
CHENNAI: Directorate of Revenue Intelligence (DRI) official hai chun zani hmasa khan Bangkok­a inthawk Chennai hung vuonglut Spicejet Fligt 96 ekin (toilet) sunga inthawk rangkachak (gold bars)  kg. 3.6 zeta rik, Rs. 1.06 crore manhu ding dapdawkin an man. Hi vuongna hi Chennai­a hun tawite a chawl hnunga Delhi pana vuongsuok nawk ding niin DRI thusuok chun a hril.

ADC an beisei sunzawm zing chun
AIZAWL: HPC (D) in Autonomous District Council (ADC) an ngenna an sunzawm pei a, ADC an ngen tlat a, ADC an beisei sunzawm zing chun, hmatienga inbiekna nei tuma um hin umzie neinaw ni a, inbiekremna a um thei ring a um nawh tiin Mizoram Home Minister R. Lalzirliana in May 27, 2016 a Congress Bhavan, Aizawla Political Conference an neinaa a thu hrilna huna a hril.

Assam CLP leader thu High Command in
GUWAHATI: Assam­a chun zani hmasa khan Congress Legislature Party (CLP) meeting nei a ni a, sienkhawm CLP leader ding thuah inlungruolna a la um thei naw a, thutlukna/thutawp Congress High Command siem dingin an sie. CLP meeting huna hin Assam Assembly election neizo hlima thlangtling thar Congress MLA hai le MP thenkhat an thang a, CLP leader ding thua hin sawrkar hmasaa minister Rockibul Hussain le Ajanta hai bakah Debabrata Saikia, MLA hai hming hrilrik a nih. CLP meeting a hin senior AICC leaders – CP Joshi, Abinash Pandey le Ambika Soni hai khawm an hung thang a nih.

Arun Jaitley Japan ramah
NEW DELHI: Finance Minister Arun Jaitley chu Japan rama ni 6 sung cham dingin zanikhan New Delhi suoksanin Tokyo khawpui a pan. Jaitley chun vawisun hin Soft Bank thangin Japanese companies tum tuma CEOs hai inhmupu a ta, May 30, 2016 khin 22nd International Conference on The Future of Asia­ah thangin Japan PM le ministers hai inhmupui bawk a tih. Jaitley hin Suzuki Motor Corporation Chairman, Osamu Suzuki khawm an hmupui ding niin official thusuok chun a hril.

Kum 20 sung jail intang dingin
BUENOS AIRES: Argentina Court chun junta leader hlui Reynaldo Bignone chu kum 20 sung jail intang dingin thiemnaw an changtir. Ama baka hin sipai officers 14 hai khawm thiemnaw inchangtir an nih. Kum 1970s laia a ruk a rala Operation Condor thaw a ni huna Left­Wing activist tam tak thuoihmangin Argentina, Uruguay, Brazil, Chile, Paraguay le Bolivia hmun haia sukhlum an ni a, hi thua thiemnaw inchangtir a nih.

VAWISUN THUPUI
I puon in hmun chu zau rawh, i umnahai puon in chung chu keipharin um raw se; ret naw rawh, i hruihai chu suksei la, i keimarna hemburhai chu sukdet rawh. ­ Isai 54:2

Editorial: Ei state puotienga lekha inchuknaa ei sum seng hi
Board of Secondary Education Manipur hnuoia HSLC Examination, 2016 result a hung suok a. Manipur a khawm Class XII chen inchukna hi a la tha tawka ngai a ni leiin Class X pasi zova ei state puotienga Class XII inchuk zawm dinga fe suok hi um de hai sienkhawm an tam naw a. Hi lei hin nu le pa hai ta dingin sum seng a zie a la um deu niin an lang. Amiruokchu, Class XII zo hnunga hin chu ei state ah College tha tawk ei neinaw lei ni ngei a ta, Class XII zohai laia a nei deu nauhai chu Manipur suoksanin vai ramah inchukna insang lem sunzawm dingin Manipur an suoksan leiin nu le pa hai ta ding chun sum seng a hung tam nuom sawt hle. Amiruokchu, thiemna hi a hlu a, thiemna ei dit leiin sum seng chu nu le pa han ei huom hlak.

Inchukna tha lem beisei laia Manipur puotienga student fesuok hi an tam thei hle a, kum tin an la pung belsa pei a, ruol elna a nasa ta leiin Manipur mi, Manipur state puotienga inchukna insang sunzawm dinga fesuok hi ei la pung pei ding a nih. Student­hai chau ni lovin tlawma a nei chin deu nu le pahai chun mani nauhai Vai rama sie pei hi ei thiltum a hung ni ta niin an lang. A nei lemnaw hai khawmin  professional Course an inchuk ding chun educational loan  annawleh a neihai sum puk hielin hmunpui tieng an pan a tul tho tho hlak. Manipur puotienga lekha inchukna leia ei sum seng hi a tam hle a, thla tina ei sum seng hi a nuoitel el chau ni loivin cheng vaibelsie iemanizat zet a tling phak ring a um.

State puotienga fesuokhai hi an sum seng an ang lem nawh. Guwahati le Shillong chena chun sum seng hi a zie a la um deu. Amiruokchu, India hmarsak puotieng, Delhi, Mumbai, Pune etc haia chun sum seng hi a dabawl a nih. Khawpuilien china lekha inchukhai chun a tlawm takah thla khatah mi pakhatin an seng hi Rs. 10,000/­ a inthawk a chungtieng a ni ngei ring a um. Hi baka hin pocket money, sil le bil hai a la thangsa nawh. Hi taka intahwk hin Manipur mi han state danga lekha ei inchuknaa ei sum seng rawn dingzie hi hisap thei hung ning a tih. Manipur mihai sum seng thla tina Vai rama ei thawnlut hi cheng vaibelsie iemanizat a tling phak ring a um.

School tha, College tha le University tha le changkanga inchuk Manipur mi sang iemanizat an um bawk. Hiengang student­hai sum seng lem hi chu thla khatah Rs. 20,000­30,000/­ inkar vel nia hril a nih. Hi chau hi a la ni naw a, mi hausa thenkhat, nauhai lekha inchuk leia khawpui liena inhluo, nu takin a umpui dam, unaua in hluo, Bike le Car leh inthuo khep khupa um khawm an bo bik nawh. Hienganga khawsa hai tiemsa lem chun Manipur mi han kum khat sunga Manipur puotienga lekha inchuknaa ei sum seng hi cheng vaibelsie tel a tling ngei ring a um. Manipur a hin khawlaia sum inleng vel hi tam thei ding ngirhmuna a um naw hrim hrim a nih. Hi baka hin state dang mi, Manipur a sumdawng le inhlawfaa hung umhan thla khata Vai rama sum an thawnlut khawm hi cheng vaibelsie tel ning a tih.

Manipur sum hi nitinin cheng iengzat am vai ramah a lut ding ti khawm hi ngaituo tham a tling. Ei ramin thawsuok le tharsuok bakah sum hmuna ding resource a nei meu si naw leiin fak le dawn, sum le pai haiah hin harsa ding hrim ei nih. Ei thawsuok le a laklut neka tam lem state dangah ei thawnlut sung hin chu intodel le hmasawnna chungchuong, mihai hip le inhnar khawp chu ei nei ngainaw ding a nih. Hi lei hin ei ramah ei sum tam lem hai an vir kuol theina dinga thang ei lak hi a tul takzet a nih.

Inchuknain tha ei neinaw leia state danga sum luongsuok hi a tam tham a, inpam a um hle. College tha, Medical College, Engineering College, NIT etc tha, mi hip thei khawpa tha le changkang ei ramin a mamaw em em el a nih. Mi ram han inchuknain tha le Hospital tha, changkang tak tak, mihai hip thei hiel an nei leiin ei pan sup sup el a nih. Hieng thilhai hi an sum laklutna sukpungtu tha takah an hmang thei liin inhnar an um em em el a nih. Ei College nei ve haia intahwka inchuk suok, eiram puotienga sin zawng ngam ei tam tawk naw dana inthawk hin insiem that ei mamaw hle a nih ti a chieng hle.

Post a Comment

Powered by Blogger.