S.Kotlian le Bungalow inkar­ah bomb hmu
CCPUR: Zanikhan S. Kotlian le Torbung Bungalow inkara leilak bul lai 7­Assam Rifles, E­Coy, tuta COB Khengjang hmuna um han Bomb hmu a, a hnungin Bishnupur­a Army bomb disposal squad han  hi pawitawk lo dingin an sukpuok.  Bomb hi a sietu hriet ninaw hai sienkhawm phairam helpawlhai kam ni ngei dinga an ring thu Police chun an hril.



Bomb hmua um hi IED niin Torbung Bangla­a BSF CI­Post (G­Coy) a inthawk metres 150 vela hlana hmuna hmu a nih. Hi lei hin CCPur le Imphal inkara passenger le private motor hai chu darkar 5 sung zet sukchawl pha a nih. S. Kotlian le a sevela cheng mipui hai chun, tuta tum hi hi lai hmuna bomb kama a um vawikhatna chau a nitanaw leiin bomb kamtu hai chu nasa takin an dem a, bomb kamtu hai man dawka hremna pe dingin thuneituhai an ngen.

School Food Drive an thaw
CCPUR: Humanitarian organisation Northeast FoodBanking Network (NeFN) chun zanikhan Chinkham Modern High School, Zomi Colony, CCPur­ah “School Food Drive” an buotsai. Hi huna hin May 28 a WORLD HUNGER 2016” hmang ding le inzawmin students le staffs mi 600 vel thangin food items an thawlawm (donate) tawl. NeFN chun School principal /Headmasters hai kuomah food drive an thangna le inzawmin Appreciation Certificate an inhlan bawk. Zanita hi school­a food drive an thaw huna hmusuok hai lai Bufai bag 5 (kg. 330);  Alu bag 2,  Tomato pieces 2, le Purunsen  piece 2 a thang.

Mizo subject thua inrawnna
CCPUR: Mizo Literature Society, Textbook Sub­Committee, Manipur chun vawisun, 10:30AM­2:30PM inkar sung hin “Teaching and Motivation Technique” ti thupui hmangin Mizo tawng subject thuah inrawntlangna nei an ta, hi programme hmangzo hin zanbu kiltlang an tih.

ECT Graduation 
CCPUR: Zani 10:30 AM khan Evangelical College of Theology (ECT) Chapel, Congregational Centre, Nehru Marg, Rengkai, CCPur­ah ‘Graduation cum Commissioning Ceremony’ hmang a nih. Rev. Khen P. Tombing, Principal, Rayburn College in Pathien thucha thuhrilna hun a hmang a, Rev. L. Sata, Chairman, ECT Managing Board in Graduates hai Commissioning Service an neitir. Graduates hi an rengin 27 an ni a, M.Div. 12 le B.Th.15 an thang.

Agent hai kuoma semdawk
CCPUR:  National Food Security Act (NFSA) hnuoia CCPur A/C sunga beneficiaries hai kuoma sem ding bufai zani 7:00AM khan FCS Godown, Headquarter Veng, CCPur­ah semdawk tan a nih. Bufai sem ding hai hi Rev. K. Mawia, GBA in tawngtainaa an hlan zoin Mr M. Ginzasuan, DSO/CCPur in a flag off. Zanita DSO/CCPur in a flag off hi CCPur A/C sunga releasing Order No. 1­36 hai an nih.



DSO/CCPur chun, NFSA sukpuitlingna dinga hin harsatna nasa tak a um a, chuong harsatna tam tak hai palthlanga NFSA hnuoia bufai man tlawma sem thei dinga a hung um ta chu lawum a ti thu hrilin,  NFSA hnuoia hamthatna hi mipui han an sawr tangkai ngei a beisei thu a hril.

Vawisun chen form la sem ding
CCPUR: Manipur Police Department hnuoia Police constable (Male) post 2052, Manipur Rifle­a Riflemen post 441 le Police Dept. hnuoia Follower post 564 lakna ding le inzawma SP, CCPur Office­a application form sem dawkna chu a fe pei a, May 28, 2016 khawm hin sem sunzawm la ning a tih.  Tuchena hin Police constable a dingin forms 1920; MR a dingin 713 le Follower a dingin 820 semdawk a nitah.

Hmun dang han hma an sawn thei chun NE biel khawma hma a sawn thei ding a nih: Narendra Modi, PM
SHILLONG:  North Eastern council (NEC) Plenary Session a vawi 65­na Shillong­a neia um chu zanikhan hlawtling taka zo a lo ni tah. NEC Session hi ni 2 sung nei a ni a, zanikhan hi session hi PM Narendra Modi in a hung hmangpui. Kum 33 neka tam a liem hnunga India PM in NEC session a hmangpui vawikhatna a nih. Hi Session a hin India hmarsak biela Governors, Chief Ministers, Chief Secretaries le high officials dang danghai khawm an thang.

India sawrkar chun India hmarsak biel hmasawnna ding hi a ngaipawimaw hle a, suk hmasawn ngei tumin hma a lak a nih. Tlaktieng, khawthlangtieng le hmun danghai hma an sawn thei chun India hmarsak biel khawmin hma a sawn ve thei ding a nih. NEC chun khawsakna, entrepreneurship, fund le Skill Development hai ngha zawngin hma a lak a, sin tam tak a hung siem ding a nih. Sawrkarin Act East Policy hmangin hma a hung lak zing a. NE biel mi han enhrana an inhriet le ngaina sukbo dingin NE bielah motor, Rel, Tui le boruok tienga infepawna thil hai bakah telecom, power le a dang danghai siem thatna hai a hung ngaipawima zuol a, tuta  kum fe mek sunga NE biel sukhmasawnna dingin budget a khawm Rs. 30,000 crore neka tam hmang dingin riruong a siem a nih tiin zanita Modi in NEC Plenary Session­a thu a hrilna huna a hril.



Modi chun zanikhan Video Conferencing hmangin Shillong­a inthawk hin Silcahr­Jiribam, Manipur le Silchar­Bairabi, Mizoram broad gauge passenger Rel service a vai liem. Chun, Kamakyakatra Express Rel khawm a service ta a, India mihai chu hi Rel service a inthawk hin direct in Kashmir an tlung thei ta ding a nih tiin Modi chun a hril bawk.

Silchar­Jiribam Rel service hi 8:45AM in Silcahr suoksan a ta, 11AM in Jiribam hungtlung a ta; 3:00PM in Jiribam suoksan nawk a ta, zantieng 5:20 in Silchar tlung nawk hlak a tih. Rel hi hmun 7, Jirighat, Kamranga,Shribar, Ranigaon, Manarband, New Silchar le Arunachal  Junction haiah  chawlin passenger a lak hlak ding a nih. Jiribam­Silcahr Rel lampui hi km. 55 a sei a ni a, Rel chuongman chu mi pakhatah Rs. 15 pei a ni ding a nih. Silchar­Bairabi inkar hi km. 84 a hla a ni a, Rel chuongman chu mi pakhatah Rs. 35/­ a ni ding a nih.

Zanita Jiribam a hi Rel service tan le inzawma function neia chun Manipur Inner Lok Lok Sabha MP Dr Thokchom Meinya, Outer Manipur Lok Sabha MP Thangso Baite, Smt. E. Ashalata Devi, Chairperson, Jiribam Municipal Council; M. Lakshmikumar Singh, IAS, Commissioner (Transport), Govt. of Manipur le Ajit Pandit, Chief Administrative Officer, Northeast Frontier Railway hai  khawm an thang.

Jiribam Rel lampui hi suklien pei ning a ta, Broad gauge railway line (111km) hin Imphal chen a la hungtlung ding a nih. Hi Rel lampui siemnaa sum hmang dinga riruong chu Rs. 9047 crore a ni a, Jiribam­Dholakhal (12.5km) chen zo a ni tah. Hi rel lampui hi suklien pei ning a ta, Moreh, Manipur chen tlung a ta, Moreh a inthawk Myanmar tieng la fe pei dinga riruong a nih.

NEC Plenary Session a thang ve CM O.Ibobi Singh chun, special category state chungthu, NLCPR, Power, Sports University, PMGSY, NH­37 (Imphal­Jiribam road), lamlien, leilak, IT, Information Technology le Communication  le thil dang danghai chu hung ngaipawimaw dingin PM kuomah ngenna a siem.

Drugs Rs. 29 lakh manhu leh an man
IMPHAL: Moreh Forest Gate bulah zanikhan 7­Assam Rifles le Custom thawktu han WY mum thangsain drugs Rs. 29 lakh manhu vel leh Mr Jilkhothang Lhungdim an man niin Police thusuok chun a hril. Mana um hi Chandel District mi a nih. Drugs mana um hi Manipur­a chun mum khatah Rs. 1,000 dama zawr le Delhi/Chennai vela chun Rs. 2,500 dama zawr hlak niin official thusuok chun a hril.

KSA GS le KSA Volunteer 4 man
IMPHAL: Zani zantieng dar 3:30 vel khan City Police OC, Sudhir le a rawi han Kangleipak Student’s Association (KSA) General Secretary Sukham Bidyananda le KSA Volunteers 4 an office­a inthawk an va man. Keishampat a Vai dawr pahnia inthawk Machi thalo (adulterated salt) anzawr tia an machi zawr an va man pek bakah Dawr neitu mi 2 hai chu thuoiin Chanchinbumihai hmaah an inlangtir ti leia hieng KSA General Secretary le Volunteers 4 hai hi mana um niin KSA thusuok chun a hril.

Common Entrance Test (CET) nei ding
IMPHAL: Academic Session 2016­17 a Government Higher Secondary School haia Class XI admission thawna ding le inzawmin June 15, 2016 khin Government Higher Secondary School 26 haiah Directorate of Education (S), Government of Manipur chun Common Entrance Test (CET) huoihawt a tih. Churachandpur district a ding chun CET hi Rengkai Govt. Higher SEcondary School­ah nei ning a tih. Hi Schol­a hin Arts Stream ah seat 120 le Science stream ah seats 60 a um. Thu chieng lem le admission form www.manipureducation.gov.in ah hmu le download thei ning a tih. Application form peklut theina hun nuhnungtak chu June 7, 2016 ning a tih. Application form hi Directorate of Education (S) le mani umna district­a exam centre ding haiah peklut thei ning a tih.

Ms Mamata in WB CM dingin sesamna a nei
KOLKATA: Trinamool Congress Chairperson Ms Mamata Banerjee chun a term hnina dingin zanikhan red Road hmunah West Bengal Chief Minister dingin Governor Keshri Nath Tripathi hmaah sesamna a nei. West Bengal Assembly election nei zo hlima khan Assembly seats 294 umah Trinamool Congress chun seats 211 zet lain hrat filawrna an chang a nih.

Ms Mamata Banerjee (61) hin Bengali tawngin sesamna a nei. Ms Banerjee ministry a hin minister 42 an um a, hi laia 18 hai chu mi thar an ni a, minority community­a inthawk minister 7 an um bawk. Chun, Ms Banerjee thangin  nuhmei minister 4 an um bawk.  Hi huna hin Union Finance Minister Arun Jaitley,  Babu Supriyo, Bihar CM Nitish Kumar,  UP CM Akhilesh Yadav,  CM hlui Lalu Prasad le Faruque Abdullah  le  Bhutan PM Tshering Tobgay hai khawm an thang tawl.

THWS Annual meet nei
AGARTALA: May 27, 2016, 11AM khan Rev.Lalchawisang, Secretary, Tripura Hmar Welfare Society (THWS) chengnainah THWS Annual meet nei a nih. Hi huna hin member tam tak an fekhawm a, hmatieng peia THWS fe pei dan ding le hmalak dan ding hai  hriltlangin resolution iemanizat an passed. Chun, kum 2016­18 sunga THWS thuoitu ding thlangna nei a ni bawk. President dingin Rev. Chalrosung Huolngo;Vice. President in Rev. T. Lawmthang; Gen. Secretary in Rev. Lalchawisang; Asst. Gen. Secy in Mr Ramditum Ralsun; Fin. Secy in Pastor Thangropui Varte le Treasurer in Mr Lalramkiemlo Hmar hai thlang an nih. Anni baka hin  Excutive members 13, Auditors 3 le Advisors 3 ruot/thlang an ni bawk. (Ramditum Ralsun)

J&K in Jail bawlna dingin Rs. 7 crore a ngen
NEW DELHI: Jammu and Kashmir sawrkar chun, terrorist thiemnaw inchangtira um le an chungthu rel lai mek hai khumna ding bik Srinagar­a Jail bawlna dingin sawrkar thlungpui kuomah Rs.7 crore a ngen. Jail­a intang terrorist han intang dang hai an thuoisuol inlauna leia Jail hran bawl dinga rawtna hi siem a nih. J&Kashmir hin Central Jails 2, District jails 10 le sub­jails a um a, intang mi 2,500 vel an um a, a tamlem an chungthu rel lai mek hai an um a nih.

J&K­ah helpawl 4 kap hlum
SRINAGAR: Jammu and Kashmir­a Kupwara district Naugam sector­a Line of Control (LoC) lai a ruka India rama hung lutruk tum helpawl hai le security forces hai an inkaptuo a, inkaptuonaa hin helpawl 4 kap hlum an ni bakah army jawan pakhat a thi a, Havildar Hangpand Dada chu na takin kaphliem a ni bawk.

Mittal kuomah Havard Alumni award inhlan
NEW DELHI: Bharti Enterprises founder le Chairman Sunil Bharti Mittal chu Harvard Business School Alumni Achievement Award 2016 inhlan a nih. Hi award hi kum 1968 a inthawk kum tina  Harvard Business School in an school­a lo kai  mi hlawtling hai kuoma an hlan hlak a nih.

Sakei in pitar kum 70 mi a se hlum
RAJKOT:  Gir­Somnath district­a Kodinar town a inthawk km. 5 vela hla Vadnagar village huop sunga Lo pakhata um pitar kum 70 mi Valay Lakhani chu Sakei in a se hlum. Ms Valay Lakhani hin Lo a sin a thaw lai zan dar 6 vela Sakei hin a se a nih. Thangpuitu ding koa a khekri hrie han an hnawt nghal leiin Sakei hin fa lovin a fe hmang san a, inrang takin Hospital panpui a ni a, sienkhawm damzo lovin a thi a nih. April 5, 2016 khawm khan Gir­Devdi village a chun loa thlai hai tui a pek laiin pasal kum 21 mi Vijay Jadav chu Sakei puiin a lo se hlum ta bawk a nih.

Pasal hawn khatin kum 16 mi an sawisak
NEW DELHI: Delhi­a Inderpuri area­a chun tulai hnai el khan pasal hawn khatin tleirawl kum 16 mi chu a silfen hlip pekin nasa takin an sawisak nia hril a nih. A sawisaktu hai hi zu an inrui nia hril a ni a, Police chun hi thilthawtua intum mi 4 an man tah. Sawisaka um pasal tleirawl sunghai chun, zu an burkhum bakah a ser­ah hmarcha phit an nal pekin saruokin khawlai an infangtir a nih tiin Police­ah complaint an peklut.  Hi thil hi May 23, 2016 a kha tlung a ni a, sienkhawm zani laia hrietsuoka hung um chau a nih. An sawisak lai nia hril video a chun a kut le ke hai hruia khitin an  vuok bakah a mawngkuoah  beer bottle thun pek an tum lai an lang  a hril a ni a, sienkhawm a video hi enchieng a la ni nawh.

VAWISUN THUPUI
Ngai ta, Lalpa Pathien chun mi thangpui a tih; tuin am thiemnaw min changtir a ta? Ngai ta, chuonghai po po chu silfen angin la hlui a ta, hangthimin fa se vawng a tih. ­ Isai 50:9

Editorial: Inelna tha le thienghlim

Ei chengna khawvel hi inelna ram (competitive world) a ni ta leiin inelna chang le inelna lungril ei put a hun ta takzet a nih. A bik takin thalai han inelna chang le inelna lungril puta ei hun le nun dan ei her danglam a tul ta bek bek el a nih. Inelna chang hre lo, inelna lungril putlo, inelnaa thang ve lo hai chu mihai hnuoisie, endawng le sirde an la hung ni pei ding a nih. Amiruokchu, ei inelna chu inelna tha le thienghlim a ni ngei ding a nih. Inelna tha le theinghlima ei inel a ni phawt chun ei mimal nun, ei sungkuo nun, ei khawtlang nun le ei society sungah hlimna, lawmna, hmsawnna le hlawtlingna ei tihai hi ei chang ve le a neitu ei hung ni seng ding a nih.

Education tiengpanga inelna dam hi thiltha tak el, thaw thei seng inla nuom a um. Eudcation tienga inelna chang hre hai hrim hrim mi hlawtling, mihai inza, mihai en chung le mi naran hai chunga leng an hung ni nge nge hlak. Inthungpui fuk leia division thaa pasi ti dam hi inelna tha le thienghlim a ni thei nawh. A hnunga a hung rasuok chu beidawngna le hlawsamna a nih. Mani hrietna le thiemna hlutzie hrehai chun ruol elna chang an hriet a, an ruolhai thaw theile hriet thei chu thaw thei ding le hriet ve thei ngei dingin tumruna le taimakna an nei ngei ngei hlak.

Ruol elna chang hre a, ruolhai ei inelpui hi inelna tha le thienghlim, hnam var le ram changkanghai thaw dan a nih. Ruol elna chang hriet naw leia mani ngirhmun ding tlung zo lova  intal ta meimei hi ei society sunga hin  tam tak an um. Tlangval le nunghak ni laia officer lien ni dam hi inhawi takel a ni leiin thalaihai hi nuhmei nei le pasal nei inhma zawnga inel lo hrim hrim ding ei nih. India tawng takah ‘babu pa le babu nu’ ni thei dingin inel tawl ei tiu. Ei that lai le ei vang lai huna ruol elna chang ei hriet naw a ni chun ei hmabak ding chu ruol ngirhmun inhnarna a la hung ni ding a nih.

Ei Prime Minister Narendra Modi hi mi hausa le lekhathiem sungkuo a inthawka seilien a ninaw a, mi naran hnuoi ei ti hai hnuoia inthawka hung seilien a nih. Mi hausa le lekhathiem sungkuo nisienla chu a pa kha railway station bula lampui sirah thingpui zawr naw ni a, ama ngei khawm kha rela chuonghai lai thingpui zawr ngai naw nih. Amiruokchu, inelna tha le thienghlim a hriet a, a ruolhai elna chang a hriet bawk leiin Gujarat Chief Minister chau ni lovin India Prime Minister hiel a hung ni thei pha a nih ti a chanchin a inthawk hin an lang chieng hle.  Tuhin chu Indiamipuihai hriet chau nita lovin khawvel mihai hriet thei khawpa miinlar le mi ropui a hung ni ta a nih. Politics hi dirty games ti a ni a chu ama ta ding chun a ni ve nawh.

Games and Sports ei ti khawm hi inelna tha le thienghlim a nih. Ei hriet seng angin M.C. Mary Kom dam hi ruol elna chang a hriet leia tuta a ngirhmuna hi hung chuongkai a nih. A ta dinga inelna tha le thienghlim a hriet leiin khawvel mipuihai hriet thei khawpin boxing chu a hung ngirsuokpui a nih. India ram chau ni lovin khawvela mi inlar le mi ropui an hrilhai laia tiemsa a hung ni ta a. Tuzet hin chu mi inhnarum, mi ngaisang um, mi entawntlak a hung ni ta a nih. Ruol elna chang hre naw sienla chu tuta ngirhmuna hin um naw ni a, mihai hriet fuk hlaw lovin Manipur a khaw chiterekah a damlai hun a hmang ve el ding a nih.

Politics, Games & Sports, sumdawng le lekha inchukhai chau hi inelna dinga tha anni bik nawh.Mani inhnikna le chem fena zawng sengah inelna chang hriet a, inelna tha le thienghlim haia thangngam dinga mani hringnun khal hi a pawimaw em em el a nih. Inelna khawvela cheng ei ni ta leiin inelna a thang ngam lo hai ta ding chun dam man a um naw a, mi che thei lem hai biek that le tlawn thiem chu ei chan le thaw ding a hung ni el ta a nih. Chuongang ngirhmuna um ding ringawt chun thalaihai hi inphal tum lo hrim hrim el ding a nih.

Board of Secondary Education hnuoia Class X Examination 2016 result a hung suok a, private Higher Secondary School neihai ta ding chun inelna a nain an sang ta hle. A bikin hi thil hi Imphal khawpui le a se velah a nasa zuol bik a, position or rank la phak hai chu an school haia kai dingin an chuin an inchu a nih. Hi thil khawm hi Student­hai thatpui ding a ni el bakah inelna tha pakhat chu a hung ni el an naw mani thei a nih.

School thenkhat chun HSLC Examination, 2016 a top 25 position­a thanghai chu an school­ah an kai leh thla tin stipend Rs. 8,000/­ pek ding dam, free admission, free bus service, free school uniform, free monthly tuition fee, free coaching (including pre­medical engineering test),free reference books, cash incentive etc. pek dingin an thlemin an zawr ta nia hril a nih. School thenkhat lem chun cash incentive Rs. 1,00,000/­ chen an pek ngam an ti chu! Position or  rank la phak student­hai ta ding chun thil lawmum, an ta dinga phurna petu a ni el bakah an inrim le taimakna ra a ni a, an lak le an laknaw chu anni thu a nih. Private school­hai lai inelna hi a tha a, hung inel pei raw hai seh.

Post a Comment

Powered by Blogger.