NFSA hnuoia Bufai le K.Oil laksuokna ding Order semdawk
CCPUR: National Food Security Act (NFSA) hnuoia Churachandpur district sunga Bufai le Khawnvartui (Kerosine Oil) sem ding le inzawmin zanikhan District Supply Department/CCPur chun District Traning Centre, Tuibuong­ah Rationing Agents le S.K. Oil dealer hai kuomah Release Order a semdawk.

Churachandpur District­a Assembly Constituency dungzuiin Bufai sem ding a ni a, hi le inzawm hin lottery system hmang a ni a, 1st in CCPur A/C; 2nd Saikawt A/C; 3rd. Singngat A/C 4th Thanlon A/C; 5th Tipaimukh A/C le 6th Henglep A/C ning a tih.



May 27, 2016, 7:00AM khin Headquarter Veng­a FCS godown­ah M. Ginzasuan, District Supply Officer, CCPur chun CCPur A/C a Release Order No. 1­36 kuomah Bufai semdawkna neiin flag­off nghal bawk a tih.

CCPur district­ah Rationing Agents le SK Oil Sub­Dealer 386 an um a, chuonghai chu, 55­Tipaimukh A/C ah 22; 56­Thanlon A/C­ah 32; 57­Henglep A/C ah 56; 58­CCPur A/C ah 125; 59­Saikawt A/C­ah 92 le 60­Singngat A/C­ah 59 an nih.

JAC Against Anti­Tribal Bill in meeting an nei
CCPUR: JAC Against Anti­Tribal Bills (JAC) chun zanikhan KKL Complex, IB Road, CCPur­ah Inpui le Tribe Councils hran hran han palai/member an ruot thar hai leh meeting an nei. June, 2016 a inthawk Salphate Pumbuk, Hiangtam Lamka Community Hall tuola Dharna/sit in protest nei tan nawk ding, Motivation & Monitoring Cell, Transport Cell, Fund­Raising Cell hai meeting nawk huna indin ding; meeting nawk chu May 30, 2016, 2:00PM in JAC Information Centre, KKL Complex, IB Road a nei nawk ding tiin an rel. Chun, JAC a palai tirtu  GTC, GTU, HI, MTC, MPC; PTC, STC; TCU, TI; UZO le VPC  hai chunga  JAC chun lawmthu a hril.

Exposure visit in Moreh­ah an fe
CCPUR: Phungkhothang Govt. H/S a Class IX & X student  100 le teacher 10 hai chu Exposure visit in  zanikhan Moreh­ah an fe. Students le teachers hai hi zani zingkar dar 8 khan T. Goukhomang, ZEO/CCPur in Phungkhothang Govt.H/S campus a inthawk a vailiem.  Hi huna hin Kaikhanlian Guite, DI of School/CCPur chun student hai infuina thu hrilin invak thang mei mei lo ding le fimkhur taka hun hmang seng dingin an fui. Moreh an cham sungin Moreh Hr. Sec. School, Heritage Centre, Budhism Centre, Tamu­International Market, Museum, Botanical Garden le a dang dang hai sir an ta, May 28, 2016 khin hung tlung nawk an tih. Hi thila ding hin RMSA chun Rs. 1 lakh a sanctioned a nih.

DHS GB meeting
CCPUR: June 9, 2016, 11:00am khin Mr Lunminthang Haokip, DC/CCPur le Chairman, Governing Body District Health Society inrawinain BRGF Resource Centre­ah District Health Society Governing Body meeting um a tih. Hi huna hin kum 2015­16 sunga sinthawna ennawn an ta, Dist. Prog. Managment Support Unit han block wise performance report peng an ta, thu pawimaw dang dang hriltlang an tih.

Ka sawrkar Corruption thawa intumna a la um nawh: Narendra Modi
SAHARANPUR: Narendra Modi Prime Minister nina le BJP thuoina hnuoia National Democratic Alliance (NDA) sawrkar chu zanikhan kum 2 a tlingna a nih. May 26, 2014 khan Narendra Modi chu Prime Minister dinga sesamna neiin Central­ah NDA in sawrkarna an chel tan a, vawisun chen hin tluong takin a la fe pei a nih. NDA sawrkar kum 2 tlingna hi India rama hmun tum tum haiah vantlang inkhawmna neia hmang a nih.

Zani zantieng dar 4 a inthawk khan Saharanpur, Uttar Pradesh­ah NDA sawrkar kum 2 a tling lawmna inkhawm nei a ni a, hi huna hin National BJP President, Amit Shah, Unnion Ministers, NDA thuoituhai, an party mi le sahai an thang tawl. Hi thil le inzawm hin mipuiin lampui hrawna an nei a, mi sangtel an thang.

Saharanpur­a vantlang inkhawmnaa Narendra Modi in thu a hrilnaa chun, ka sawrkar Corruption thawa intumna vawikhat khawm a la tuok naw a, ka sawrkar chu thienghlim taka ram le mipui ta dinga inpe a nih. India mi vaibelsie 125 hai chu ka sunghai an ni a, tuta inthawk kum 3 sungin mi rethei vaibelsie 5 hai  kuomah LPG inzawmpek (connection) ning an ta, mi retheihai hmakhuo ngaina leiin mi khawsa thei vaibelsie khat chuongin LPG mantlawm (subsidy) an dawng chu anni nuom thuin an pekkir ta a nih. Ka sawrkar um hmaa state le UT tum tum han Central fund an hmu chu 35% vel a ni a, NDA sawrkar a hung um a intahwk 65% an hmu ta a, ka sawrkar chun thangruola State le UT sawrkarhai chu thuneina tamlem pek hi a nih. Lamlien le leilak siemna dingin budget siema um ta laia chun ka sawrkarin budget a siem hi a la tam tak a nih. India chu a hung inthlakthleng pei a nih. Hi thil hi thenkhat chun an dit nawh. Swachh Bharat Mission hi mi hausahai ta ding a ni nawh. Ka sawrkar chun hmasawnna le inthanglienna sin thaw pei a tih. India ram pumpuiah sawrkara thawk Doctor­hai pension hun chu kum 65 dingin a hun suksei ning a tih tiin a hril.

Minister 2 in NH­2 an va en
IMPHAL: Zanikhan Manipur Works Minister Ksh Biren le IFCD Minister Ngamthang Haokip han NH­2 (Imphal­Dimapur Road) ngirhmun an va en a, Chief Engineer (Works) le officials han anzui. National Highway­hai siemna ding hin sum a um a, sienkhawm National Highway siemna sin sukbuoitu an um hlak leiin hrat taka sin thaw thei a ninaw pha a nih tiin Ksh Biren chun a hril. Hi kawngah hin mipuihai thangpui dingin a fiel.

Delhi­ah Manipur Nurse an hmang
IMPHAL: May 16, 2016 zing dar 5 vel khan Manipur Nurse pakhat, Delhi­a sinthaw chu a umna chin hriet lovin an hmang. A staff chanpui thenkhatin an thuoihmang ni dinga ringhla a nih. Nurse inhmang hi Naorem Reena d/o Naorem Chaoba Meitei of Kshetrigao Wakha, Imphal East a ni a, Sai Nursing Home, Janakpuri, West Delhi a thawk lai a nih.

MHGEA Manipur sawrkar ultimatum an pek
IMPHAL: Manipur Home Guard Employee Association (MHGEA) chun Apex Court of India rel anga Home Guards hai honorium sukpung dinga Manipur sawrkar kuomah ngenna siemin Supreme Court thupek dungzuia Home Guards hai honorium tuta inthawk thla khat sung (June 25, 2016) chena a sukpuitling naw chun nuorna le helna hrat le nasa lem an thaw ding thu zanikhan hi pawla an President Y. Mangi chun Imphal­a Chanchinbumihai kuoma a hril. Hi le inzawm hin May 25, 2016 khan Manipur CM, Dy. CM le Cabinet ministers hai kuomah Ultimatum khawm an lo pek ta thu a hril bawk.

IED puokah BSF 1 a hliem
IMPHAL: Zani zantieng dar 4:30 vel khan Lamlai Police Station huop sunga Moirangpurel ah IED a puok a, patrolling­a fe BSF Constable pakhat a hliem a, RIMS panpui a nih tiin Police thusuok chun a hril.

Bihar CM hlui Manjhi convoy motor bei a nih
GAYA: Zanikhan Bihar­a Gaya District sunga Dumaria hmuna chun Bihar Chief Minister hlui Jitan Ram Manjhi convoy motor lunga deng a ni bakah a vengtu hai chuongna motor bakah Police hai motorbike 3 raw a ni a, sienkhawm Mr Jitan Ram Manjhi ruok chu dam le himin a suokdawk. Zani hmasa khan Panchayat election campaign le inzawmin mi 2­ Sudesh Paswan le Sunil Paswan Maoist han an that a, hi thil tlung dodalna (Protest) neitu han an lo bei a nih. Hi thina thua hin Manjhi hi biek an tum a, sienkhawm a mobile phone a switch off tlat leiia lungsena mipuiin an lo bei niin ei thu dawngna chun a hril. Dumaria hmuna hin boruok a sosang hle a, boruok sosang pei ding vengnain senior police officers hai khawm hi hmuna hin an inkul mek. Manjhi hi mi 2 thi hai ral dinga fe tum a nih.

Online NEET II zanita inthawk hawng tan
NEW DELHI: Central Board of Secondary Education (CBSE) huoihawtna hnuoia Medical le DentalCollege hran hran haia admission thaw theina dinga National Eligibility Cum Entrance Test­II (NEET) online application chu May 26, 2016 a inthawk thaw thei dinga hawng tan a ni tah. NEET­II exam hi July 24, 2016 a nei nawk ding a nih. Supreme Court thupek dungzuiin NEET­I a in register  lo annawleh exam lo hai khawmin NEET­II hi apply thei ni dinga hril a nih.

Juvenile Justice Act 2015 draft released
NEW DELHI: Women and Child Development Minister Ms Maneka Gandhi chun Juvenile Justice Act hmang lai mek siemthat/thlakthlengtu dinga induong Juvenile Justice Act 2015 draft model chu zanikhan a release. Draft Rules hi ministry website­ah  sie a ni a, Civil Society Organisations, NGO’s, mimal le State sawrkar hai ta dinga hi draft thua hrilsap nei nuom annawleh thurawn pe nuom hai ta dingin en thei le  comments chu  ni 15 sung peklut thei ni dingin ei thu dawngna chun a hril.

Modi sawrkarin Advt.­ah Rs. 1000 crore a seng
NEW DELHI: Delhi Chief Minister Arvind Kejriwal chun, Mr Narendra PM nina hnuoia NDA sawrkar chun kum 2 liemta sung khan Advertisement in Rs. 1000 crore chuong a seng tiin an tum. Hieng laizing hin Delhi sawrkar chun kum khat sungin Rs. 150 crore a hmang tlingnaw niin a hril bawk.

WB a MLA hausa takin Rs. 40 crore a nei
KOLKATA: West Bengal Election Watch data dungzuiin West Bengal Assembly election nei zo hlima MLA dinga thlangtling thar 294 hai laia hausa tak chu Taldangra biela Trinamool Congress MLA Samir Chakraborty niin, laksawn thei le laksawn thei lo thangin rothil Rs. 40 crores manhu a nei.A pasie tak chu East Panskura constituency­aCPI(M) MLA SK Ibrahim niin, nomination paper a file huna affidavit a peklut dungzuiin kutah Rs. 1,000 le bank­ah Rs. 48,703 a nei. Ama hi social worker niin rothil iengkhawm neilo, a pa ina um a nih. MLAs100 vel crorepatis an um.

Puducherry Lt. Governor AK Singh an ban  
PUDUCHERRY:  Kum 2 sung zet incharge­a Puducherry Lt. Governor sin lo chelsa tah Lt. General (retd) A.K. Singh chun zanikhan Uttarakhand Governor a ninaa inthawka inbanna  a pek tah. Puducherry Lt. Governor dinga IPS Officer hlui Kiran Bedi ruot a hung nita leia inbanna hi a pek a nih. Singh hi Lt. Governor, Andaman and Nicobar Island chel lai mek a nih. Puducherry Lt. Governor thar ding Ms Kiran Bedi chun May 29, 2016 khin Lt. Governor sin hi chel tan a tih.

Schduled Tribe list­a zieklut belsa ding
NEW DELHI: Zani hmasa a PM Narendra Modi inrawina hnuoia Union Cabinet meeting chun Constitution (Scheduled Tribes) Order 1950 siemthatna dingin Parliament Session nawkah Bills 2 putlut dingin an rel. Scheduled Tribe list­a zieklut belsa dinga sawrkar thlungpuiin a remtipui tasa hai chu, Assam state­ah Karbi/Mikir,Boro, Boro Kachari; Chattisgarh­ah Bhuinya, Bhuiyan, Dhanuwar, Kisan, Saunra le Saonara; Tamil Nadu a inthawk Malayali Gounder, Narikoravan le Kurivikkaran; Tripura a­ah Darlong; Jharkhand­ah Bhogta, Deshwari, Ghanjhu, Dautalbandi/Dwalbandi, Patbandi, Maajhia, Khairi/Kheri le Puran hai an nih tiin official thusuok chun a hril.

VAWISUN THUPUI
Aw nangni hin ka thupekhai chu lo ngai chu ni unla chu aw! In chungah inremna chu vadung ang ela umin, in felna chu tuisuoriet fawnhai ang elin a um ding bah; ­ Isai 48:18

Editorial: Quality Education

Quality Education ei dit seng a. Ei ram thuoituhai khawmin an hril ngun. Quality education neina ding chun, students, zirtirtu, sawkar, nu le pa hai mawphurna hi a lienin an sang hle a. Ngaitha le namnul thei chi a ni nawh. Hi lei hin nu le pahai chun theitawp suoin hma an lak a, an nei bak sengin an nauhai hi lekha an inchuktir a nih. Hi thil hi nau han an hrietpui a tul. Nu le pa hai hmalak dan hi nau han an hrietpui naw chun lekha inchukhai hin quality education ei ti hi nei ngai nawng an tih. Quality education nei theina ding chun a bul tan that a tul bek bek el a nihti hi student han an hriet a, an ngaipawimaw hle a tul. Thiemna thlungpui indik tak nei ding chun preparatory class a inthawka nu le pa han ei nauhai ei ching that a tul a nih.

Ei hriet seng angin tulai khawvel hi chu a thiem thiem, a tlin tlin, a tlak tlak, a fel fel, a tha tha hai ngirsuokna hun annawleh a ru dawng dawng suoka tina hun a hung ni ta leiin, pawl insang, division insang le letter mark hmu el kha a huntawk tanaw a, quality education ei ti, thiemna thlungpui indik tak nei a tul ta a, hi lei hin makmawa quality education nei ve thei ngei dinga students han thang ei lak a hun ta takzet a nih.  Eini lai ngei khawm hin Darwin in a lo hril “Survival of the fittest”, Darwin theory tia hrietlar kha a hung indik ta a, a la hung indik pei ding a nih. Pasina el kha ei lekha inchuk hlawtlingna a la ninaw a, hlawtlingna chu sin tha nei theia umna kha a la hung ni chau a nih.

India hnam pa Mahatma Gandhi chun “Education is a life long process” a lo ti hi an dik a, mihriemhai ta dingin inchukna (education) ei ti hi ei damsunga ei inchuk pei ding a nih. Thiemna, varna le technology hai insangin hma nasa takin a hung sawn pei a, sin zawngna a competitive exam haia khawm online a exam tul a hung um ta a. Computer thiem chu makmaw a hung ni tah. Class X, XII, BA, MA etc pasi a, certificate le marksheet nei el chau kha a huntawk ta nawh. A thiem thiem, a tlin le tlak hai chau an hung hlawtling thei ta ding a nih.

BSEM le COHSEM hnuoia Class X & XII Examination, 2016 result a hung suok a, first le second division a pasi an tam lem a, third division a pasi chu tlawmte chau an nih. A division le a grade zawnga en chun ei result hi lawm a um hri phawta ngai inla. Amiruokchu, ei result lawmna hin hun ieng chen am a dai ding ti chu hunin a la hung rel ding a nih. Mani hrietna le thiemna tak tak hmanga first division le second division a pasi ei ni chun, inchukna insang lem (higher education) ei thawna haiah le sin zawng huna competitive exam­a ei thang huna a la hung inlang fie hle ding a nih. Chu huna chun iem ei chang tawl ding maw?

Exam huna hin luck, thungpui fuk le thungna fuk hi a um thei tlat a. Luck lei le thungpui fuk leiin pasi ve thei, division insanga pasi theile grade tha hmu thei nga a nih. Hiengang ngirhmuna division insang le grae insang hmu ei ni pal chun ei pasi lawmna le hlimna khan hun sawt dai naw ni a, insirna, beidawngna le harsatna chi tum tum a mi la hung intlun el thei a nih. Chu huna chun midang intum thei ninaw nihai. A mawphurtu chu mani seng ei ni ding a nih. Hi lei hin quality education hi ngaipawimaw  hle ding a nih. Competitive Exam a chun luck chu a la um thei a, thungpui fuk ti ruok hi chu a ni thei ta nawh. A thiem thiem, a tlin tlin le a tlak tlak hai chau hlawtlingna  a ni tah.

Class X, Class XII, Bachelor degree le Master Degree insang tak taka pasi chu ei tam ta ie. Degree insang chau ni loivn medal dawng phak ta hiel khawm ei thahnem thawkkhat ta hle. Amiruokchu, ienglei am a ni ding UPSC, SSC le Board dang dang exam haia hin ei hming an lang tlawm thei hle. Hi thil hi ngaituo le sui chet chet a tul ta niin an lang. Ei rama education quality hi an hnuoi lei a ni ding?  Annawleh Competitive exam a thanghai education quality an hnuoi lei a ni ding? A iemani tak chu a ni ding an leiin suisuok chu a tul a nih.

Class X & XII first divsion le grade tha le insanga pasi hi chu ei tam ta ie. Amiruokchu, inchukna insang tiengpangah hin ei ri a re a, division le grade insanga pasi pei chu ei hung inkhat phar el ta hlak. Ei Class X & XII pasina quality kha an dik naw lei am a ni ding ti khawm hi sui dinga tha a nih. Ei mamaw chu division tha le grade insanga pasi mei mei nekin thiemna thlungpui indik tak neia pasi mawl kha a nih.

Tienlai khan chu first division a pasi hi chu an tam ngai naw a,vangkhatte anni hlak. Amiruokchu, second le third division a pasihai khawm kha quality education an nei tha ni ngei a ta, IAS, IFS, IPS etc. exam a hlawtling kha tulai huna nekin an tam lem dai. Hieng ei mithiem hmasahai hi an pension zo ta a, an hmun ruok hluosiptu ding ei tlasam der ta a nih. Hieng hi ei ngirhmun a nita leiin ei education quality hi ei siem that nuom a um. Zirtirtuhai khawmin exam oriented chau ni lovin student­hai hi Job oriented le competitive mind neia ei inchuktir sa a pawimaw em em el a nih.

Post a Comment

Powered by Blogger.