Happy Heart Junior College­a upgrade
CCPUR: Happy Heart School, Bethel Churachandpur chu kum 2016­17 Session a inthawk Class XI inchuk thei dingin Happpy Heart Junior College a upgrade (dawmsang) a nih. Happy Heart Junior College hi Pu David Buhril Principal nina hnuoia upgrade a nih. Pu David Buhril hi thiemna tieng Ph.D a ni a, inchuklaihai an subject hnesaw taka inchuktir bakah tulai competition nasa taka an sang ta le inzawmin sin (career) le inzawma lampui kawkhmu (guidance) tiengpang nasa taka uor an tum thu a hril.
   
Pu David Buhril hi India rama Journalist chawimawina (Award) insang takel ‘Ramnath Goenka Excellence in Journalism Awards 2006­2007’ lo dawng tah, talent nei tha takel a ni bawk.

Class IX ah Simte le Gangte MIL
CCPUR: Board of Secondary Education Manipur (BSEM) chun Academic Session 2016­17 a inthawk Class IX Simte le Gangte MIL subject hmang thei ta dingin remtina a nei/pawmpui ta a, hi le inzawm hin ZEO/CCPur control­na hnuoia School tina Headmaster/ Headmistress/Principal hai chun hieng subject la ding student an nei chun privilege pe dingin T. Goukhomang, ZEO, CCPur chun zanikhan office memorandum an suo.

Agent hai kuomah release order sem ding
CCPUR: National Food Security Act (NFSA) hnuoia Rationing Agent & SK Oil Sub­Dealer hai kuomah May 26, 2016 khin District Traning Centre, Tuibuong­ah Bufai le Khawnvartui lak theina ding release order sem ning a tih. Hi huna hin Agent hai chu mani Identity Card chawia, office hour sunga la dingin Mr M. Ginzasuan, DSO, CCPur chun an hriettir.

Lamka College B.A. Admission
CCPUR:  Lamka College, CCPur a B.A. Admission thaw nuom hai ta dingin May 26, 2016 a inthawk Office hour sungin Admission forms le Prospectus lak thei ni tang a tih tiin Dr M. Lokendra, Principal,  Lamka College, CCPur chun inhriettirna a siem.

Teacher lakna din official notification
CCPUR: Education (S) hnuoia SSA Primary Teacher, Upper Primary Teacher le RMSA teacher lakna ding le inzawmin District Employment Exchange, CCPur chun official notification a hmu ta a, tuta inthawk sawtnawte hnungah Employment Exchange fethlenga apply thei a ni ta ding niin ei thu dawngna chun a hril.

HSO in lawmpuina nei an tum
CCPUR: Haokip Students’ Organisation chun tukuma Class X & XII pass hai lawmpuina June 3, 2016, 10AM khin B. Vengnuom Community Hall­ah nei an tum. Hi huna hin Rev. Hemkhomang Haokip, M.Th. Principal, DTS K. Salbung in student hai tawngtaipekna nei a ta, Lunminthang Haokip, IAS, DC, CCPur in Career Guidance tiengpangah thuhrilna hun hmang a tih. Mangkhogin Haokip, IPS, SP, CCPur in Career Counselling, James Doujapao Haokip, SDO/BDO Tuibuong in Tips towards success ti thupui le Joel Haokip, SDO/BDO Thanlon in “Inportance of Discipline in Student’s Life” ti thupui hmangin thu hril bawk a tih.

Diploma training thei
CCPUR: SSA hnuoia Primary le Upper Primary teacher in­service training la nei lo hai ta dingin 2 years Diploma in Elementary Education training thei ning a tih. Training dinga hnina pe, selection­a la thang lo hai khawm training­a hin thang thei ning a tih. ZEO Office­ah Proforma form lak thei ning a tih.

Pass hai lawmpui tum;HYA GHQ in a lawmpui
CCPUR:  Tukuma BSEM le COHSEM hnuoia Class X le XII result suok­a khan Senvawn mi 50 laiin hlawtlingna an chang a, HYA Senvawn Branch chun hlawtlingna chang hai lawmpuina hun hmangpui a tum tiin Pu Paulalsiem, President, HYA Senvawn Branch chun a hril. Hi le inzawmhin HYA Senvawn Branch le khawtlaing thuoitu hai an inpuocha mek tiin a hril.
   
HYA GHQ khawmin hlawtlingna changtu hai po po a lawmpui thu a puong a, hmatieng hlawtlingna tha lem le insanglem chang pei dingin ditsakna an hlan a. Tuta tuma hlawsam hai khawm inthlada el lova nasa lema hma la ding le kum nawk tieng hlawtlingna chang ngei dingin ditsakna an hlan bawk.

Zangnadawmna Rs. 4,00,000 pek
CCPUR: April 13, 2016 nia Churachandpur/Manipur­a Simkhawlei inhning huna titthawngna leia lungphu chawla thi (L) Jangkholal Haokip s/o Khailun of Ukha Tampak Village sunghai kuomah zangnadawmna Rs. 4,00,000/­ pek a nih.

Chief of Army Staff General Dalbir Singh Manipur­ah a hung inzin; AR 6 hai kap hluma an umna hmun a va sir
IMPHAL: India rama sipai lu tak Chief of Army Staff General Dalbir Singh chu zanikhan Manipur­ah a hung inzin a, May 22, 2016 a Chandel District a Hengsing Village bula Assam Rifles convoy Manipur phairam helpawl han an lambunna hmun a va sir. Kha nia inlambunnaa khan Junior Commission Officer pakhat thangsain Assam Rifles 6 an thi a, an silaihai khawm an lakpek a nih. General Dalbir Singh hi Lieutenant General Praveen Bakshi, Army Commander, Eastern Command in a hung zui.
   

General Dalbir Singh le Lieutenant General Praveen Bakshi hai hin zani ma khan 29 Assam Rifles Battalion Headquarters an va sir a, Major General V.S. Sreenivas, Inspector General, Assam Rifles (South) an inhmupui. Major General V.S. Sreenivas chun May 22, 2016 a thil tlung dan le an hmalak dan hai a lo hril. Hi thil tlungna hmun le a se vel haiah combing operation thaw zing a la ni thu Major General V.S. Sreenivas hin Army hotulienhai a lo hril.
   
Helpawlhai do le tukdawlna ding kawngah operation thawa um chu sukhrat le thaw uor zuol a tul thu,helpawlhai chetna leia thina tuok sunghai a sunpui thu, thina tuok sunghai zangnadawmna le thangpuina tha tawk tak pek anni ngei ding thu General Dalbir Singh hin a hril. A sin thaw ding a zo hnungin General Dalbir Singh hi Manipur suoksanin zanikhan New Delhi tieng a kir nawk nghal.
   
Hieng laizing hin Assam Rifles han helpawlhai zawngna sin an la sunzawm zing a, zani zing dar 9 vel khan India le Myanmar inrina bula Mintha Village a inthawka hla rak lo, No Man’s Land tia ko India le Myanmar ram inkarah helpawlhai camp chu an va suksiet bakah zani ma khan border pillar No. 87 bul hnaiah Indian Security Forces le helpawlhai an inkaptuo a, thi le hliemna tuok an um naw niin ei thu dawngna chun a hril.

JNIMS ­ah Eye Bank
IMPHAL:Zanikhan JNIMS, Porompat­ah Health & Family Welfare Minister D. Korungthang in Eye Bank le Clinic thar a hawng. Eye Bank hawnga um hi Manipur­a ding chun a pakhatna a la nih. Eye Bank a hin thi hnunga mani mit thawlawma pe nuomhai ta dingin pek thei a ni tah tiin Dr L. Deven, Director, JNIMS chun a hril.

Party tum tum office an khek khum
IMPHAL: JCILPS hmalakna thlawptu han zanikhan MPCC, MPP le CPI Office­hai chu an va khek khum nawk. Zani hmasa ang khan chu mipui le Police ineptuona a um ta nawh. Zani zantieng dar 3 vel khan Johnstone Hr. Sec. School, CC Hr. Sec. School le Uripok road haiah hun iemanichen human chain thawin lampui an dang.

Special Exam huoihawt dingin
IMPHAL: MPSC in Combined Civil Services (PReliminary) Examination,2016 a huoihawta thang candidates thenkhat chun answer booklet a instruction siema um hrilfiena dawng tha hman lo candidate hai ta ding chauin Special Exam huoihawt dingin MPSC an ngen. ATSUM le KSA hai chun hi exam hi nei that dingin MPSC an ngen a nih.

SHAIDC in Mizoram sawrkar Gauhati High Court­ah a hek
AIZAWL:Sinlung Hills Accord Implementation Demand Committee (SHAIDC) Chairman, Mr Vanlalsiama chun, Sinlung Hills Development Council (SHDC) accord sukpuitlingna ding chungchangah Court­a khing kher tul lo dingin Accord a sukpuitling ding le ding naw thla khat sunga dawnna le thuchieng pe dingin ngen a ni a. Amiruokchu, iengkhawm dawnna hmu a ninaw leiin May 25, 2016 khan mipui ditdan ang ngeiin HPC le Mizoram sawrkar, tuta sawrkar lai mek Pu Lalthanhawla inrawi Congress party le kum 22 liemta, July 27, 1994 a inremna thuthlung an lo ziek tah, vawisunni chena la sukfel lo, thubuoi chu Gauhati High Court rel dingin, pek a lo nitah tiin zanikhan a hril.
   
Hi chungchanga hin Mizoram mipui bakah Zohnathlak hmun tina cheng hai ta dinga hriet tul makmaw chu, Mizoram sawrkarin “Hmar hnam hi Mizoram neitu el bakah hnam bila chun a tam tak in ni bawk a, hnam hming zawnga District pek in ni chun Ralte Lusei etc khawmin hung ngen pei an ta, Mizoram hi neitu bik um lovin hnam dangin an mi chimral ding a nih” tia HPC thuoitu hai an ngenna chu HPC thuoitu han pawmin, Hmar District aiin SHDC sawrkarin a phuok pek ngei chu an lo thlang ta lem a nih tiin a hril.
   
Hi lei hin SHDC Accord sukpuitlingna hi hnambil politics ang zawnga ngaina hi Zo nauhai thangmawbawk laia pakhat a nih ti hi ei hriet tlat a tul. Christian zaah  nia insalna ram  ngeia, khawvel politics­a inhlemna tirdakum tak le lien tak, political accord interim period kum hni dinga a ti chu kum 22 lai zet a lo tling ta a, chingfel a ni chun Zonauhai insuikhawmna dinga rabi pakhatna ei chuongkai ding a nih ti hi hre seng ei tiu. SHDC inremna thuthlung hi chingfel a ni ngeina dingin Zoram mipui popo mi lo tawngtaipui dingin kanngen cheu tiin P Vanlalsiama chun ngenna a siem.

Assam sawrkarin inter­state check gates sukbo
GUWAHATI: Mr Sarbananda Sonowal Chief minister nina hnuoia BJP­AGP­BPF thangruol sawrkar chun inter­state check gates sukbo dingin zanita cabinet meeting hmasa tak an nei huna an rel. Hi bakah hin Central Govt. Policy angin sawrkar sin lakna kawngah 3rd le 4th grade chin lakna haiah interview sukbo dingin Cabinet meeting chun a rel bawk. Mr Sonowal chun a minister hai chu state hmasawnna dinga theitawp suoa sin thaw ding le mipui han harsatna an nei hai an rang thei anga chingfel dingin a ngen tawl a, minister hai chu an hun tamlem mipui ta dinga hun hmang dingin a ngen bawk.
   
Hienglaizing hin Assam CM Sarbananda Sonowal chun a ministers hai portfolio ding a sem ta a, hi dungzui hin amain Home le Political Department hai a chelsa a, Himanta Biswa Sarma chu Finance, Health le Education department a pek. AGP President Atul Bora chu Agriculture; BPF leader Pramila Rani Brahma chu Forest Department; Senior BJP leader Chandra Mohan Patowary chu Transport and  Commerce departments pek a nih.

North East Democratic Alliance indin
GUWAHATI:  BJP chun platform thar North­East Democratic Alliance (NEDA) an din a, Assam­a BJP sawrkar thar­a number two a ngai Congress a inthawk BJP a lut tah Himanta Biswa Sarma chu Convenor­a ruot a nih. Mr Sarbananda Sonowal in Assam Chief Minister 14­na dinga sesamna a nei zo sawtnawte hnunga NE states hai sukhmasawnna ding le inzawma BJP President Amit Shah inrawinaa meeting huna NEDA hi indin a nih. Hi meeting­a hin Mr Sonowal, Arunachal Pradesh, Nagaland le Sikkim CMs hai bakah BJP National leaders dang danghai khawm an thang. India hmarsak state hmasawnna ding le hmarsak state hai inkara le Centre sawrkar hai le inlaichinna thalem um theina dinga NEDA hi indin a nih.

NE Assembly Speakers Meet May 30­ah
AGARTALA: India hmarsak biel states 8 haia Assembly Speakers le Deputy Speakers hai thangna ni 3 sung aw ding North East Region Commonwealth Parliamentary Association (NERCPA) chu May 30, 2016 a inthawk khin Agartala, Tripura hmuna nei ning a tih. Conference hi Lok Sabha Speaker Sumitra Mahajan in hawng a tih tiin Tripura Assembly Speaker Ramendra Chandra Debnath chun a hril. Conference huna hin Lok Sabha Dy. Speaker le senior AIADMK leader M. Thambidurai, Rajya Sabha Dy. Chairman P.J. Kurien le Lok Sabha Secretary General Anoop Mishra hai khawm thang an tih. Hi huna fekhawm hai chun parliamentary democracy sukhrat dan ding, NE a soil erosion le thu pawimaw dang dang hriltlang an tih.

Manipur­ah NPF le BJP han sawrkarna
KOHIMA: Kum thara Manipur Assembly Election hung um dinga hin O.Ibobi Singh CM nina hnuoia Congress chu hungkir nawk tanaw ni a; Ibobi sawrkar chu fe hmang a ta, NPF le BJP thangruolin Manipur­ah sawrkarna an siem ta ding a nih tiin Naga People’s Front (NPF) President Dr Shruhozelie in zani hmasaa NPF Central Office, Kohima hmuna Chanchinbumihai an pawlpuinaah a hril. NPF chu Manipur tlangram biela seats 14 le phairam biel seat thenkhatah hratna an chang ding a nih tiin Dr Shurhozelie chun a hril bawk.

PM rawiin Council of Ministers meeting
NEW DELHI: Zani zantieng khan PM Narendra Modi inrawinain New Delhi hmunah Council of Ministers meeting nei a nih. Meeting­a hin Union Ministers Rajnath Singh, Arun Jaitley, Nitin Gadkari, Manohar Parrikar le Venkaiah Naidu hai khawm an thang. Hi huna hin NDA sawrkarin kum 2 sunga hma a lo lakna hai ennawn a ni bakah Union Cabinet sawidanglam ding thu khawm an hriltlang ring a nih.

Pinarayi in Kerala CM dingin
THIRUVANANTHAPURAM: CPI(M) leader Pinarayi Vijayan chun zani zanteing khan Thiruvananthapuram­a Central Stadium­ah Kerala Chief Minister 12­na dingin Kerala Governor Justice P. Sathasivam hmaah sesamna a nei. Hi huna hin ministers dingin mi 18 han sesamna an nei bawk. Minister dinga sesamna nei hai lai hin CPI(M) a inthawk MLA 11, CPI MLA 4 le  Congress (S), NCP le Janata Dal (S) pakhat seng an thang.

Ganja Kg. 700 dapdawk a nih
RAIPUR: Chhattisgarh­a Balod district­a chun zanikhan Mini Truck pakhata inthawk Ganja Kg. 700, Rs. 1.5 crore manhu ding Police han dapdawkin an man a, mi man ruok chu an nei nawh. Truck hi chawl dinga an ti hnung khawm chawl loin a tlan pei leiin Police hai hin an hnawt a, hmun pakhatah an hnawtphak a, sienkhawm driver le helper hai chu an lo tlanhmang hman leiin an man naw a nih.

UP­ah  thli le Tek tla  leiin mi 23 an thi
LUCKNOW: Uttar Pradesh­a chun zani hmasa zantienga thli le ruo inthuoa a sur le tlak bakah Tek tla leiin mi 23 in thina an tuok. Auraiyya district­ah bang le In chim in mi 7 zet a del hlum a, Unnao hmuna mi 5, Kanpur Dehat ah 4 le Etawah hmuna mi 3 in thina an tuok bawk. Chun, Raebareli hmuna mi 4 in thina an tuok bawk.

Journalist thina thuah mi 5 man
PATNA: Bihar­a chun Journalist Rajdeo Ranjan kaphlum a nina le inzawmin a kaptu taka intum thangin mi 5 Bihar Police han an man. Mana um hai hin Journalist Rajdeo Ranjan thatnaah inrawlna annei thu an inpuong seng ta thu ADG Police Headquarters Sunil Kumar chun a hril. Journalist kap hlumnaa mawphurtu taka intum chu Laddan Mian a nih. Laddan Mian hi Siwan MP hlui le RJD leader Mohammed Shahabuddin mi­le­sa niin Police chun an hril a, iengleia an kap hlum am ti ruok chu hriet a la ni nawh. Mana um hai kuta inthawk country made Pistol 1, cartridge 2 le motorcycle 3 an mansa bawk.

TN MLA thlang thar han sesamna
CHENNAI: Tamil Nadu­a chun AIADMK Supremo le Chief Minister J. Jayalalitha, DMK President M. Karunanidhi le a naupa Opposition leader MK Stalin hai thangin zanikhan MLA dinga thlang thar 231 han Protem Speaker S. Semmalai hmaah 15th Tamil Nadu Assembly members dingin sesamna an nei.  May 16, 2016 Assembly election­a khan MLA dingin mi 232 thlangtling an ni a, hi laia 231 han MLA dinga sesamna an nei a nih. Tiruparankundram, Madurai­a inthawk MLA dinga thlangtling thar AIADMK­a SM Seenivel chu zani zingkar khan natlawk taluo um lovin a thi leiin member dinga sesamnaa hin a thang hman tanaw a nih.  Tamil Nadu Assembly a hin seats 234 a um a, Aravakurichi le Thanajvur hmun haia May 16, 2016 a inthlangna um dinga ti chu June 13, 2016 a nei dingin Election Commission in a sawnhla a nih.

VAWISUN THUPUI
Kei hi Lalpa chu ka na, a dang hrim an um nawh, keima naw chu Pathien hrim hrim an um nawh, mi hre ngai naw la khawm i kawng khitpek ka che: ­ Isai 45:5

Editorial: Pass percentage

Ei tung le nghakhla em em el BSEM le CoHSEM hnuoia Class X & XII Examination, 2016 result chu a hung suok ve ve ta a.  Exam a hlawtling le Division thaa pasihai ta ding chun lawmna le hlimna peng a ta. A hlawsam hai ta ding ruok chun nguina le lungril natna intlun ngei a tih. Class X & XII exam hai khawm hi inelna pakhat a ni a, exam po po hlawtling vawng ngeina hlak a um naw leiin a hlawsamhai ta ding khawmin mani hringnun sukse thei khawpa beidawngna le inngaisietnain hmang naw inla nuom a um. Lungrillien tak puta bei nawn nawk dinga insingsat hi a tulin a pawimaw lem a nih.
   
CBSE le ISC huoihawtna hnuoia Exam result hung suoka pass percentage leh khaikhin chun Manipur­a Class X & XII exam pass percentage hi an thlau hle. Manpur a pass percentage hi inhnuoi takel a nih. Exam pass percentage hi kaisang neka inhnuoi tieng a pan peina san hi ienglei am ning a ta ti hi ei ngaituo chet chet a tul hlein an lang. Pass percentage tlakhnuoina san hi tum tum um a tih. Chuhai laia thenkhat chu sawrkar school­hai thaw thatnaw lei dam, ei ramah bandh le buoina hran hran a tam taluo a, school kai theinaw hun a tam lei dam, students le zirtirtuhai taimak tawknaw lei dam, state sawrkarin education a fepui dan a tha tawknaw lei dam le a san dang dang tam tak um a tih.
   
Private School­hai umnaw sienla lem chu pass percentage hi a tlahnuoi zuol ngei ding a nih. Sawrkar school tam lem hai an Nil thak thak laiin private school hai pass percentage chu a tlangpuiin a tha ti inla hril suol bek bek nawng ei tih. Hi lei hin pass percentage thatna ding chun sawrkar school le state sawrkar an thang nasat hle a tul niin an lang. Sawrkar school­hai siem that anni hmakhat chu pass percentage hin kaisang nekin tlakhnuoi tieng a pan pei ding niin anlang.
   
Kum 2011 a HSLC exam a pass percentage chu 71 a ni a, kum 2012  in 70 le kum 2013 a pass percentage chu 72 a ni a, hieng hun lai hin ei pass percentage a that deu hun lai chu a ni awm. CBSE le ISC result leh tekhin ruok chun hieng hun haia khawm hin ei pass percentage chu inthlau takel a ni tho tho. CBSE hnuoia pass percentage hi chu a tlangpuiin 80 le a chungtieng a la ni zar zar hlak. CBSE hnuoia School exam result ei hnawtphakna ding hin chu theitawp takmeu suo a thang ei lak a tul a nih. A bik takin sawrkar school­hai an insiem that le theitawp takmeu an suo a ngai a nih. Ei state sawrkar sum seng tamna pawl tak chu education hi a ni ve a. Hieng laizinga sawrkar school­hai result a la tha thei naw hi a pawi takzet a nih. Sum seng tam le inphu khawpa  sawrkar school han thang an lak nuom a um.
   
Education Department hin education campaign for Teachers hi a thaw nasat a tul hlein an lang. Zirtirtu han invawng uluk, taimak le mani mawphurna an hriet theina dingin inhrilhrietna hi a pawimaw a nih. Zirtirtuhai chu naupanghai entawn thei ding khawpa an khawsak le an nun an hmang uluk hi a tul em em a nih. Student­hai ang bawkin Zirtirtuhai  khawm hi dress code siem pek nihai sienla thil tangkai tak a hung ni beisei a um. Zirtirtu tawp taka an chei chun naupangin an nuisawin an hmusit thei a, an inchuktirna khawmin ngaisak a hlaw naw thei a nih. Inzaum lo taka zirtirtu a khawsak chun student han an ngainep thei a, chu chun lekha inchukna chenah nghawng ahung nei thei a nih. Chun, Zirtirtuhai lungrilah ngaisamna an neitir thei a, chu chu a thanaw a nih.
   
Zirtirtuhai chu a hmasa takin an inchuktir dingah an thiem in an hriet (expert) hle ding a nih. Chu thil chu zirtirtuin a ngaipawimaw hmasa tak ding a nih. Inchukna hi texbook ngawr ngawr a ni el naw a, inchuklai, Class room, school compound le a se vel haia inthawka thil an inchuk chen hin inchukna ei ti hin a huom a nih. Zirtirtu nunphung, chetzie, tawngbau le incheina chen hin inchuklaihai ta dingin umzie inthuk tak a nei a nih. Hienganga Zirtirtuhai an um thei naw chun result that le pass percentage insang ngaina a um nawh.
   
Inchukna quality tha, world class education ei dit thu ei hril lai meka pass percentage el chau khawm ni lo, sawrkar school­hai a pasi um der lova an hang Nil el hlak hi inzak a um a, a muolpho thlak hle a nih. Sawrkar school­a zirtirtu han an hlaw el chau beisei lova student­hai  hmangaina le an sin tha taka an thaw seng pha pha leh result tha le pass percentage insang hi ei nei thei nawk chau ding niin an lang.
   
Churachandpur district khawm inchukna le result kawngah hin hmasawn le kaisang pei nekin ei hnungtawlin ei tlahnuoi deu deu el ta hi a pawi hle. Tuta hmaa top ten laia thang phakhlak kha, tuzet hin chu a ni ve thei ta nawh. A pumpuia pass percentage a chun a thaw tha pawlah thang hlak inlakhawm tuta hma ngirhmun ei phakzo tanaw hi a pawi a, lungril a na hle a nih. Hi lei hin students, zirtirtuhai le school neituhai tuta hma ngirhmuna chuongkai nawk ding le khumkhel dinga hma an hung lak sau sau nuom a um. Division insang le pass percentage tha lem hnawt ei tiu.

Post a Comment

Powered by Blogger.