DC in LLIN program a hawng
CCPUR: May 23, 2016, 10:00AM khan District Vector Control Program, CCPur hmalaknain CMO Mini Conference Hall­ah Launching Program of Long Lasting Insecticide Net Program hmang a nih. Hi huna hin Mr Lunminthang Haokip, IAS, DC, CCPur le Chairman, District Health Society, CCPur khuolliena thangin program hi a hawng a, functional president in Dr Thanchinkhup, CMO le Guest of honour in Dr Liankhawjam Guite, District Nodal/Malaria Officer, NVBDCP/CCPur a thang.

DC, CCPur chun, state le Central sawrkar han mipui hamthatna ding scheme tum tum le program tum tum an siem a, CCPur District­a sungkuo (household) 60132 han Bufai kg. 1­ah Rs. 3 peia an inchawk theina ding hmalakna a fe mek a nih. Hriselna (Health Sector) tienga India sawrkar thiltum chu India mipui po po suk hrisel a ni a, India mipui hai an hrisel chun Sector tum tum Agriculture, Industries etc. haiah hmasawnna a hung um ding a nih. Hi lei hin mipui khawmin development le health sector­ah state le central sawrkar hmalakna le sinthawna thlawp a tul tiin a hril.


CMO/CCPur chun, CMO hnuoia staff tamna tak le sin hau tak chu Malaria department an ni thu hrilin program dang hai ang ni lovin Central tieng report a hun taka thawn zing a tul leiin bandh le Blockae hun haia khawm sin an thaw a tul hlak. Tuta hawng­a um Long Lasting Insecticide Net (LLIN) beneficiaries hai kuom a tlungna dingin sum le pai tam tak a lut ding a ni a, sienkhawm tuchena hin sawrkar­a inthawk fund (transportation) a la hmu nawh tiin a hril.

DMO chun, LLIN hlawtlingna ding ASHA worker le ASHA facilitators hai liengkoa innghat a ni thu hrilin theitawp suo dingin a ngen bakah beneficiaries han an dawng ngei theina dingin tukhawma sukbuoi lo dingin a ngen.

Free Medical Camp nei
CCPUR: PASS le ALIMCO, Guwahati hai thangruola huoihawtnain zani zingkar khan Synod Hall, IB Road, CCPur­ah Disabled person hai ta dingin Free Medical Camp nei a nih. Hi huna hin ALIMCO, Guwahati­a inthawk Sanjoy Kr Ghosh, Audiologist; Alamgeer, Prosthetist & Orthotist le Abhinav Gupta, Data Operator hai an hung thang a, Disabled person hai medical check­up an thaw. Disabled person han hmangruo an ngen (applied)hai lai Wheel Chair (small 11, Large 22) Tricycle 13; Elbow Crutch 1, Crutch 4 le hearing Aid 208 a thang.


Kum 2015-­16 sungin HIV Positive 137 
CCPUR:  District AIDS  Prevention and Control Unit (DAPCU) in CCPur District­a kum 2015­16 sunga HIV/AIDS le inzawma report an pek dungzuiin hi hun sung hin General Client mi 5433 thisen lak le enfel a ni a, hi lai hin positive 137 an hmu dawk. Nuhmei naupai mi 5568 hai thisen enfel a ni huna positive 25 hmu a ni a. IDU (Injecting Drugs User) mi 1759 hai thisen enfel huna HIV/positive 3 hmu a ni a.

Female Health Worker (FSW) han mi 1758 hai thisen laa an enfelnaah positive 1 an hmu a, AIDS invawi nu­le­pa (positive) nauhai thla 18 a upa mi 85 hai thisen enfel huna Postive hmu  a ni nawh. Opium/No. 4 addict overdose leia buoi an um chun District Hospital, Sielmat Christian Hospital le Saikawt PHC haiah a thlawna damdawi kap thei zing a nih tiin DAPCU official hai chun an hril.

May 25, 2016, 12:00Noon khin District AIDS Control Officer/CCPur  inrawinain Dist AIDS Prevention and Control Unit (DAPCU) office­ah monthly review meeting um a tih. Hi huna hin NGO­hai, Stand Alone ICTC staff hai, PPO staff, F­ICTCs, CCPur district­a National AIDS Control Prog. a Facilities Centre hai thang an tih. CCPur District sunga HIV/AIDS dona le inzawma hmatienga hmalak dan ding hriltlang an tih.

Thangpuina Rs. 5000/­ an pek
CCPUR: EBCC Pethuel, New Lamka chun, District Hospital Morgue­a All Manipur Tribal Women Union (AMTWU) inrawinaa bungheia tawngtaina nei hai kuomah zanikhan thangpuinain Rs. 5,000/­ an pek.

The 16th EIMI Meet, 2016
CCPUR: Manipur University EIMI Cultural Meet, 2016 chu May 26, 2016, 11:30AM a inthawk hin Centenary hall, Manipur University­ah “Together for a common cause” ti thupuia hmangin nei ning a tih. Pu Lhunkhosei Zou, Chairman, ADC, Chandel Chief Guest, Pu K.T. Vaiphei, IPS, ADG (L&)) le Pu D.K. Thangboi Haokip, MCS, ADC, Kangpokpi & CEO, Sadar Hills ADC hai Guest of honour le Prof. Lal Dena functional president in thang a tih.

Graduation ­cum ­Commissioning ceremony
CCPUR: May 27, 2016, 10:30AM khin ECT Chapel, Nehru Marg, Rengkai, CCPur­ah Evangelical College of Theology (ECT) Graduation­cum­ Commissioning Ceremony um a tih. Hi huna hin Rev. Khen P. Tombing, Principal, Rayburn College in Pathien thucha hril a ta, Rev. L. Sata, Chairman, ECT Managing Director in Commissioning Service nei a tih.

Miss East Queen India lawmpuina
CCPUR:  Kuki Women Union  hmalaknain May 31, 2016, 3PM khin Indoor Stadium, Peace Ground, Tuibuong, CCPur­ah Miss East Queen, India 2016 title latu Miss Veineinem Singson d/o Paokhokam Singson of Sirhima, Dimapur, Nagaland, tuta AG Colony, Kohima, Nagaland­a um mek chu lawmpuina nei an tih.

Hi huna hin Lunminthang Haokip, IAS, DC, CCPur khuollienin thang a ta, Guest of honours in  Langkhanpau Guite,Chairman,ADCC, Brig. RK Sharma, Commander 27 Sector Assam Rifles; L. Mangkhogin Haokip, IPS, SP/CCPur hai thang an ta, Special invites 23 um an tih.

Mimkei nasa tak a tlung leiin Manipur le state danghai infepaw thei lovin an um pha
IMPHAL: Haptakar khat lai zet Manipur­a ruo a sur leia tui tam leiin mipui han harsatna lien tak an tuok pha. Ruotui tam leiin hmun hran hranah mimkei a tlung leiin Manipur chu state danghai leh motor­a infepaw thei lovin an um pha niin ei thu dawngna chun a hril. NH­2 (Imphal­Dimapur Road) a Kohima, Nagaland bulah mimkei nasa tak  a tlung leiin motor fe thleng thei lovin lamlakah an intang mek. Hiengang bawk hin NH­37 (Imphal­Jiribam Road) a khawm mimkei nasa takin a tlung a, lamlien hmun hran hranah a dangchat leiin motor tlan inlawn thei lovin a um bawk niin ei thu dawngna chun a hril. Imphal­Moreh Road khawm hiengang tho hin a um niin a hril.

Zani hmasa zan dar 10 vel khan Imphal­a Kyamngei bula Imphal vadung, vadung kam ft. 100 neka lien chu vadung tuiin a hawr siet a, tui nasa takin a luong liem a, In za tamtak sung haiah tui a lut a, hi hmuna chenghai chu a sukbuoi nasa hle.  In 10 hai lem chu chengna thei talo hielin a suksiet. Khurai Puthibi Leikai a khawm hiengang harsatna hi a tlung a, an bieltu MLA Dr Ng. Bijoy le Leikai mipuihai inkarah inhrietthiemnawna a suok pha. An MLA chungah lungawi lovin zanikhan Kunai Sajor Leikai Meira Paibis han Khurai Tinsid Road­ah thungbuma nuorna an nei.

Ruotui tam leiin phairam biela cheng han harsatna nasa takin an tuok mek a; Imphal East le Imphal West District hai bakah Thoubal le Bishnupur District haia khawm tui a luongliem nasa leiin thlai le theira hai nasa takin a suksiet bakah Ngakulhai chu tuiin a chim a, Nga tam tak an suokhmang pha leiin Nga vaituhai bei a dawng hle. In sungah tui nasa taka luonglut leiin mi tam tak riekna ding an neinaw leiin khuo le venghai inah an riek tawl niin ei thu dawngna chun a hril.

Kap hluma um AR 6 hai ruong postmortem thaw
IMPHAL: May 22, 2016, 1PM vela helpawl han Chandel district a Tengnoupal Police station huop sunga Joupi bula Hengshi a 29 Assam Rifles pawl an lambunnaa thi Assam Rifles 6 hai ruong chu zanikhan RIMS (Regional Institute of Medical Science), Imphal­ah postmortem thaw an nih. AR thina tuokhailai hin Junior Commissioned Officer pakhat a thang. Helpawl han AR hai ralthuom INSAS Rifle 1, AK­47 Rifle 4 le LMG pakhat an lakpek, CorCom chun AR­hai hi anni pawl lambun niin an hril. Assam Rifles kap hluma um hai ruong hi vawisun hin Impal Tulihal International Airport­a inthawk an khuo tieng   phur ning an tih.

Kum 11 mi tuiin a len hmang
IMPHAL: Zani zingkar khan Imphal East District­a Lamlai Police station huop sunga Sabungkhok Khunou a Leimakhong vadunga Chengkawl ruta a naupa le fe, Songamchan Singaisui (11) s/o Aton Singaisui of Layarm village chu vadung tui hratin a len hmang a, a hnungin an khawmi han a thisain a ruong hi an hmu. A ruong hi a lennaa inthawka kilimetre chanve vela hmu a nih.

Hun tiemchin um lova postponed
IMPHAL: Revenue Department hnuoia Revenue Inspector, Zilladar, Mandal, LDC, Driver, Lambu, Peon, Process Server le Chowkidar sinhai lakna ding le inzawma application form peksuokna le application peklut hun chu IMC election, law & order ngirhmun le khuorel sietna tlung hai leiin hun tiemchin um lova postponed a nih tiin Under Secretary (Revenue) Govt. of Manipur chun inhriettirna a siem. Application form peksuok le peklut ding hun hi a thara inhriettirna la siem nawk ni dingin a hril bawk.

Naupang electric in a man hlum
IMPHAL: Zani 2Pm vel khanPorompat Police Commando Complex bulah Thokchom Malemnganba (7) s/o Th. Sanou of Kongpal Ningthoubung Leikai chu electric in a man hlum. Naupang hi a ruolhai le an inhnelnaah electric hrui tla thla a tawkfukleia electric in a man hlum nia hril a nih.

J&K­ah helpawl han Police 2 an kap hlum
JAMMU: Jammu and Kashmir­a Srinagar khawpuia chun zanikhan Police patrolling­a fe Police hai helpawl ni dinga ringhla han an lo lambun a, Police 2 in thina an tuok niin Police Control Room (PCR), Srinagar official thusuok chun a hril. Kap hluma um Police hai chu­ Assistant Sub Inspector Ghulam Mohammad Bhat of Lolab Kupwara , north Kashmir le Head Constable Nazir Ahmad Mir of Handwara tehsil, Kupwara district hai an nih.

Mr Sonowal Assam CM dingin sesamna a nei ding
GUWAHATI: Assam­a chun BJP, AGP le Bodoland People’s Front (BPF) joint delegation team han zani hmasa khan Assam Govenor PB Acharya inhmupuiin sawrkar insiemtir dingin an ngen a. Hi dungzui hin Mr PB Acharya chun BJP le a thangruolpui parties hai chu sawrkar thar siem dingin a fiel. Hi dungzui hin Mr Sarbananda Sonowal le a minister ding hai chun May 24, 2016 hin Chief Minister le Ministers dingin Governor hmaah sesamna nei an tih.

Mr Sonowal le a minister han sesamna an nei huna hin PM Narendra Modi, BJP President Amit Shah, NDA sawrkarna states haia Chief Ministers hai bakah Union ministers thenkhat an hung thang ding niin ei thu dawngna chun a hril.

Sonowal hin zani hmasa khan Union Minister of Youth Affairs and Sports a inthawk an banna  President Pranab Mukherjee kuoma a pek ta a, President chun minister of state Dr Jitendra Singh chu in­charge in Ministry of Youth Affairs and Sports (independent charge) lo chelsa dingin an hriettir.

Ms Jayalalitha in CM dingin sesamna a nei
CHENNAI: AIADMK General Secretary Ms J. Jayalalitha chun zanikhan Madras University auditorium hmunah an Governor K. Rosaiah hmaah Tamil Nadu Chief Minister dingin sesamna a nei. Tuta tum hi Ms Jayalalitha in Tamil Nadu CM dinga sesamna a nei vawirukna ani tah. Hi huna hin Council of Minister dingin mi 28 han sesamna an nei nghal bawk.

Minister thar dinga sesamna nei hai lai hin mi thar 13 le Jayalalitha sawrkar hmasaa ministers 12 an thang. Minister lo nit ah, tuta tuma sesamna nei hai lai hin MP hlui OS Manian le Dr V. Saroja bakah Assembly Speaker hlui D.Jayakumar hai an thang.

Ms Jayalalitha chun Police, Home, Public, IAS, IPS, IFS services le General Administration   hai a chel a, minister thenkhat chu an portfolio pangngai incheltir le thenkhat portfolio dang incheltir an nih.

India in Space Shuttle RLVTD a kapsuok
SRIHARIKOTA: India chun zanikhan Sriharikota, Andhra Pradesh­a inthawk Reusable Launch Cehicle­Technology Demonstrator (RLVTD) chu hlawtling takin a kapsuok tah. RLVTD hi zani zingkar dar 7­a kha kapsuok a ni a, ramdang thangpuina thang lova India in ama khata a siem hmasa tak a nih. RLVTD hi metre 9 a sei, tonnes 11 a rik niin van boruok km. 70 a insang a tlung hnungah Bay of Bengal tuipuiah a hung tum nawk ding a nih.  President Pranab Mukherjee,Vice President Hamid Ansari le PM Narendra Modi chun RLV­TD hlawtling taka kapsuok a nina thuah ISRO chu an lawmpui thu an hril.

Uttarakhand­ah mimkei leiin mi 10 an thi
DEHRADUN:  Uttarakhand­a Dehradun district sunga Chakrata hmuna chun zani zingkar inhmatak khan mimkei  nasa tak a tlung a, sinthawa inhlawfa (labourers ) mi 10 an thi bakah midang 5 in hliemna an tuok. Hi thil hi zani zingkar dar 1 vela kha imu inhnik taka an inlaia an riekna hmun mimkei in a keichim niin ei thu dawngna chun a hril. Hi thil tlunga thi hai ruong laksuok vawng a nita a, hliem hai chu Hospital­a admit an nih tiin District officer Ravinath Raman chun a hril.

Puducherry Lt. Governor dingin Kiran Bedi
NEW DELHI:  India rama nuhmei IPS Officer hmasa tak, a sina inthawk pension ta le BJP thuoitu Ms Kiran Bedi (66) chu May 22, 2016 khan India President in Puducherry Lieutenant Governor dingin a ruo. Puducherry Lt. Govenor sin hi Andaman & Nicobar Island Lt. Governor, Lt. General (retd) Ajay Kumar Singh in kum 2 vang in­charge­a a lo chelsa a ni tah. Kiran Bedi hi 1972 batch IPS officer a ni a, a sin a chawlsan hnungin Politics a lutin kum 2015 Delhi Assembly election a khan Krishnanagar A/C ah BJP ticket in a ngir a, sienkhawm a tlingzo naw a nih. Kha huna khan BJP Delhi Chief Ministerial candidate a ni nghe nghe a nih.

Mizoramah In chimin mi 2 a del hlum
AIZAWL: Tulaia inzing uta ruo a sur lei hin India hmarsak biela chenghai chun harsatna nasa tak an tuok pha. May 21, 2016 zantieng khan Zonuam khuo a sungkuo pahniin an hluol In pakhat a chim a, hi In chim hin Lalthlengliani (35) le a naunu Lalhmangaihzuali (12) hai chu a delhlum a, an In hluopui Rualthankhuma nu Kaplali (92) chu a del hliem leiin Hospital panpui a nih. Zani hmasa khan Bairabi a Tlawng vadung chunga leilak daw laimek khawm tuilien hin a sukchim.

School­a kangmei suokah student 17 a kang hlum
BANGKOK:  Thailand rama Chiang Rai province­a chun zani hmasa zan khan sawnghni­a insang Pithakkiart Witthaya School hostel –a inthawk kangmei a suok a, nuhmei student, kum 5­12 inkar mi 17 zet a kang hlum. Hi hostel­a hin nuhmei student 38 an um a, kangmei suok huna hin a tamlem chu an lo in (sleep) ta leia kangmei suok hin a kang hlum nia hril a nih. Student meiin a kanghlum hai laia a tamlem chu tu’m an nih ti hriet thei ta lo ding khawpin an taksa a kangsiet niin ei thu dawngna chun a hril. Kangmei suok nasan enfeltu dingin Scientic Crime Detection Division Official hai tir an nih.

VAWISUN THUPUI
Vawisun hin vankhuphnuoi hnam tin chunga chun nangma tina  le titumna in um tantir ka ta, i chanchin lo hrieng an ta, inthin an ta, nangma leiin lungngaitakin um an tih,” tiin.    ­ Deuteronomy 2:25

Editorial: Ei nnghatna bulpui tak sawrkar thawktuhai

Ei ramah industry lien le company lien tham a um naw a, industry ei neihai khawm hi a lien le hlawtling tak tak an la ninaw a. Industry tia ei nei a tam lem hai khawm hi Cottage Industry anni tlangpui. Sum siemna le thawkna annawleh sin (employment) tam tham pe theitu an la um meu naw a, sum hmuna le siemna lien tak chu ei rama ding chun sawrkar sin hi a la nih. Hi lei hin sawrkar sin chu sin tha, innghatna tlak, mitin dit, thangthar sekibusuok a nih. Sawrkar sin neihai chun mihai ringzo an hlaw a, dawrkai le mi hausa hai khawmin thil le sum inbattir an nuom hlak. Hi lei hin ei rama chun sawrkar sin nei chu a hlu em em a, sawrkar sin ei zawngnin ei inchu mur mur a, sum nei le a che thei hai chun cheng nuoitelin sawrkar sin an inchawkngam hlak. Sawrkar sin hin mihriem dam hun sung deuthaw a dai a, pension la hmu phakhai ta ding lem chun damsung a dai a nih.

Ei sawrkar sinthawhai hlaw le enkawlnaah hin ei ram budget zatve neka tam a lut a, hi lei hin sum inleng vel hi sawrkar thawktuhai hlaw a inthawkin a ninaw thei nawh. Thil man (rate) khawm hi sawrkar thawktuhai hlaw a inthawka siem a ni tlangpui. State danghai chun natural resource an nei tha a, an rama agriculture products­in  an ram economy ngirhmunah umzie a nei a. Ei ni state­a chun agriculture product leiin ei ram economy an hning ve hlei thei nawh. A ram mipuihai fak tak le a boa ei um thei lo chu bu (rice) hi a nih. Ei rammipui fakhawp bu hlak chu ei tharsuok zo ta sinaw leiin vai bufai chu ei innghatna le ei fak tak a nih. Hi lei hin vai ram bufai a hungtlung thanaw chun ei ramah tam atla el hlak a nih.

Ei ram mipuihai innghatna bulpui tak chu sawrkar thawktuhai sum chelek inleng vel hi a nih. Sawrkar thawktu han anhlaw an hang lak thanaw deu chun ei ramah sum inleng vel a tlawm a, sumdawngtu le dawrkai hai khawm an thil zawr a hung tlahnuoi a, an thil zawr tam tak khawm batin a fe a, harsatna nasa tak an tuok pha hlak. Sawrkar thawktu han an hlaw an lak thanaw hin chu ei reng a ramin ei tuor a ni deu tak. Financial year lei le state sawrkar sum ngirhmun a thanaw leiin sawrkar thawktuhan thla 2/3 lai an hlaw an hang laknaw meu chun sum inleng vel a hung tlawm a, thlabia hlaw nei le a neinaw hai khawm ei buoi pha a, sum a  vang ti chu ei hril rawn tak niin an lang.

Sawrkar thawktuhai chu lo thei lovin inza an kai a nih. Ei innghatna tak anni tlat lei a nih. Ei inkhina khawm sungkuoah tu am sawrkar sin thaw an um ti hi a nih. Sawrkar thawktu umna sungkuo chu ei inkhina a dang a, ei en dan le hmu dan khawm a dang. A san chu sawrkara inthawkin an hlaw bakah hamthatna chi tum tum an hmu thei a, chuleiin a tuel khawmin sawrkar sinthaw ei nuom a, ei tum a, innghatna tlakah ei ngai a nih. Hiengang khawpa sawrkar thawktu ei ngaisang a, ei ngai ropuina san chu thil dangah innghatna tlak ei ram hin a la neinaw lei a nih. Hi lei hin sawrkar sin thaw hi ei thiltlum lien tak a ninaw theinaw a nih.

Ei rama lekha inchuk tamlem hai beisei khawm sawrkar sin tho a la nih. Mi naran le mi rethei hai chau ni lovin mi hausa, milien le mimal nauhai khawmin an dit le an beisei chu sawrkar sin tho a nih. Ei rama lem chu a hausa nau nau le a milien a milal nau nauhai hi sawrkar sin hmu theiah an la hang thang nawk lem a nih. Mi hausahai khawmin mi tam tak sin pek theina ding industry le company lien indin nekin sawrkar sin ma anla beisei lei hin mi naran le mi retheihai ei rimsi zuol bik a nih. Mi rama hai chun mi hausa han company lien  an indin a, sawrkar sin chu an ngaisang ve lem nawh. Hieng company haia thawk ding hin ei thalaihai an fe a, an thawk tasa le a la thawk dingin anfe mek a, an la fe pei ding a nih.

Kohran pawl tum tum hai khawmin sawrkar sinthawhai chu ei biek tha sup sup el. Thenkhat lem chun ei kohrana thang dingin ei fiel a, kohranah ngirhmun tha pek khawm ei hniel naw niin an lang. Ieng dang lei an naw a, an sawmapakhat ei dit lei a nih. Sawrkar  thawktuhai hi kohranah an thaw hlawk leiin ei inza a, a tlawna ei tlawn khawm an bo bik nawh. A faru thiem thiem le thamna lak rawn leia sawrkar thawktu hausa sahai hi ei la ngaisangin ei lan za zuol lem  deu deu ti inla ei hril suol taluo ring a um nawh. Hi lai kawngah hin Kohran pawl tum tum han ei thil thaw nuom dan hi ei ennawn nuom a um. Duamna hi suol ve tho a nih.


Post a Comment

Powered by Blogger.