Senvawn V/A in relief item an sem
CCPUR: May 16, 2016 khan Senvawn khuo chun Hmar Martyrs’ Day ropui takin an hmang bakah April 21, 2016 nia thlipui le Riel in thil a suksiet tuortu hai kuomah Senvawn Village Authority chun thangpuina sum an sem. Hieng thil hai hi DC, CCPur Pu Lunminthang Haokip, Tipaimukh SDO, HYA Hq. le Bieltu MLA Dr Chaltonlien hai hmalakna leia an thaw thei a ni thu hrilin Senvawn V/A Chairman Pu Lalropieng chun Hmasawnna Thar fethlengin Senvawn mipui aiawin an chungah lawmthu a hril.


Shutdown leia buoina suok hriet a ni nawh
CCPUR: JAC Againsts Anti­Tribal Bills in May 16, 2016 zanrila inthawk May 18, 2016 zanril chen darkar 48 sung Manipur­a tlangmi hai chengna biela Total Shutdown/Bandh an thaw chu zani zanril khan a tawp ta a, hi thu ei sut chenah bandh leia buoina suok hriet a ni nawh. Manipur Assembly in August 31, 2015­a Anti­Tribal Bills 3 a passed hai India President pawmpui dinga thawn tah,  President kuta um mek, President in suoi thaw a, Act a hung ni theina dinga nawr dinga Manipur CM rawia all political party team Delhi inzin dinga rel a ni dodalnaa JAC in total Shutdown hi an puong a nih.

Hmar Inpui in lawmthu a hril
CCPUR: Hmar Inpui Assembly in khawvel hmun tum tuma May 16 Hmar Martyrs’ Day inkhuongruol taka hmang a ni theina ding Hmar Inpui GHQ mawphurna a pek anga ursun taka inser dinga ngenna siem a nina zawm a, hmuntin ram tina May 16 Hmar Martyrs’ Day ursun taka hmang a nina thuah LRS Puruolte, Jt. Secy. (Inf. & Media) chun Hmar Inpui GHQ hmingin ursun taka insertu hai po po chunga lawmthu a hril.

HI in thusuok a lo siem ta angin repor kimchang tak Hmar Inpui Head office, HSA Campus, Rengkai, CCPur, Manipur anawleh email­hmarinpui@yahoo.com/fb­Hmar Inpui GHQ ah pelut dingin a ngen nghal bawk.

Lampui­a tuihawk a luong
CCPUR: Zani hmas zantienga inthawk ruo sur leiin CCPur khawpui sunga chun lampui haiah tuihawk nasa takin a luong. Ruosur nasat lei bakah JAC in total Shutdown an sunzawm leiin khawpui sung lampui haiah mihriem inlawn hmu ding an vang hle. Bijang a inthawk tuihawk luongthla hai nulla in a kengnaw leiin District Transport Office zawn lampui haia chun vadung angin tui a luong dum dum el.



Morgue­ah tawngtairuolna an nei
CCPUR: All Manipur Tribal Women Union (AMTWU) chun zani zingkar dar 7 a inthawk zanting 3:00PM chen khan District Hospital, CCPur morgue­a Tribal martyrs 9 hai ruong inthungpuiin bungheia tawngtairuolna an nei. Bungheia tawngtairuolna hi May 20, 2016 chenin an la sunzawm ding niin ei thu dawngna chun a hril. Anti­Tribal Bills 3 hai Act a hung ni nawna ding; ram le hnam ta ding le martyrs sungkuo hai ta dinga tawngtairuolna hi nei a nih.


Ruotui tamin harsatna an tlun
IMPHAL: Ni 2 sung sun le zan inzawma Manipur State sunga ruo a sur zawm leiin nundan pangngai a sukbuoi el bakah Manipur phairam biel sungah harsatna nasa tak an tlun pha. Imphal kahwpui sunga chun ruo sur nasat leia tuihawk tam taluo leiin motor le kelawnga inlawn vel hai ta dingin harsatna namenlo takel an tlun. Bishnupur le Thoubal district haia chun thlaile Ngakulhai a suksiet a, Nga vaitu le thlai chingtuhai an beidawng hle. Imphal Vadung, Nambul vadung, Iril Vadung, Thoubal Vadung le Maklang vadung hai khawm tikum inchikna pel vang vangin an luong mek. In zatel sungah tui a luong lut leiin mi sangtelin harsatna an tuok mek bawk. ICAR, Imphal report danin ni 2 sung ruo a la sur zawm pei ding niin a hril.

Tuilienlin leilak a fen hmang
IMPHAL: Zani zingkar dar 7 vel khan Tamenglong district sunga Izek vadung chunga leilak (Bailey bridge), Rs. 40 lakh zet senga daw zo hlim chu tuilienin suksiein a len hmang. Hi leilak hi official­a la hawng lo nia hril a nih. Hi lei hin Tamenglong District le Manipur state a district dang hai chu infepaw thei lovin an um pha.

Scrutiny thaw zo a nih
IMPHAL: June 2, 2016 nia Imphal Municipal Corporation (IMC) election hung um ding le inzawma nomination file­a um hai enfelna (scrutiny) chu zanikhan Imphal East le West haia SDO/RO Lamphel (DC Complex) le SDO/RO Porompat haiah nei a nih. Imphal East­ah Councillor seats 7 inchu dingin candidates 23 an um a, candidate hai lai hin Congress le BJP 6 ve ve, CPI 2, LJP 1 le Independent 8 an nih. Imphal East  seats 20 uma chun candidates 64 an um a, Congress le BJP in candidates 20 ve ve; CPI 3, LJP 2, JD(U) 1 le Independent candidates 18 an nih.

State 4 le UT 1 haia Assembly election vote tla hai vawisun tiem ding;
Assam-ah BJP, WB-ah TMC, Tamil Nadu-ah DMK , Kerala-ah LDF le Puducherry-ah Congress le DMK an hrat ring
NEW DELHI: India mipuihai ngaiven hlaw takel States 4­ Assam, West Bengal, Tamil Nadu, Kerala le Union Territory pakhat Puducherry haia Assembly Election a vote tla hai chu vawituk zing dar 8 a inthawk hin tiem tan ning a ta, result hi vawisun 11AM vela inthawk hriet tan thei le zantieng dar 3 velah chun result hi hriet kim le sawrkar siem thei ding party hai hriet theia a hung um beisei a nih tiin Election Commission thusuok chun a hril. Vote hi tiemna hi venghimna khau tak hnuoia nei dingin thil iengkim sukfel vawng a ni ta tiin Election Commission of India thusuok chun a hril.

Exit Polls dungzui chun Assam­ah BJP le an thlawppuihai, West Bengal­ah Mamata Banerjee thuoina hnuoia Trinamool Congress (TMC); Tamil Nadu­ah DMK, Kerala­ah CPM thuoina hnuoia Left Democratic Front (LDF) le Puducherry­ah Congress le DMK thangruol han hratna an chang el thei niin an hril. Exit Poll thawhai laia India TV­C voter chun Tamil Nadu a hin J. Jayalalitha thuoina hnuoia AIADMK in hratna an la chang nawk a ring a, Exit poll thawtu danghai ruok chun an ring nawh.

Assam state a hin BJP, AGP le BPF hai an thangruol a, an Chief Ministerial candidate chu Union Minister of State (Independent Charge) nilaizing Sarbananda Sonowal a nih. Hieng laizing hin Assam CM Tarun Gogoi chu hrat an ring tanaw lei amani ding an sungin Thailand ah an inzin mek niin ei thu dawngna chun a hril. Assam a hin kum 2014 a Lok Sabha election a khawm khan BJP chu a hrat tak an lo ni ta hrim a nih. Hi lei hin sawrkar thar, BJP thuoina hnuoia mi chu a hugn pieng ring a lo ni ta hrim a nih.

Assam state a hin Congress party chun kum 15 zet sawrkarna an lo chel ta a, hi hun sung hin Tarun Gogoi chu inzawmzatin Chief Minister term 3 lai zet a lo chel a nih. Exit Polls thawa um hai an dik le indiknaw chu vawisun hin hrietin a hung um ding a nih. Kum 2014 a Lok Sabha election a khan chu Exit Poll result hi a hung indik a nih.

Khawlum tuorzo lova thi mi 309
HYDERABAD:  Telangana state sunga khawlum taluo tuorzo lova mihriem thina tuok chu 309 an tling ta niin State Disaster Management thusuok chun a hril. Telangana state sawrkar chun thina tuok sunghai chu zangnadawmna Rs. 50,000 pei pek dingin a puong. Khaw lum zuolna hai chu Nalgonda, Mahbubnagar le Khammam district hai an ni a, 44 degree Celsius a kai phak. Nalgonda district ah mi 90, Mahbubnagar­ah 44 le Khammam­ah mi 37 an thi taa hril a nih.

MCVJAC in hun tiemchin um lo strike
AIZAWL:  Mizoram Commercial Vehicles Joint Action Committtee (MCVJAC) chun zanita inthawk khan hun tiemchin um lovin strike an thaw tan a, taxi, Bus, Maxicab le Truck hai chun an service an chawlsan vawng a, sawrkar motor­hai chau an tlan inlawn. Lifetime Tax (kum 15 sunga ding tax peklawk vawng ding) pek dinga an state sawrkarin Order an suo dodalna le hlip dinga an nawr le ngenna leia Strike hi an nei a nih. MNF le MPC chun an strike thaw hi an thlawp thu an puonglang.

January­a inthawk ‘panic button’
NEW DELHI: Women and Child Development Minister Ms Maneka Gandhi chun, nuhmei hai him lemna dingin January 1, 2017 a inthawk  Mobile/Cell phone po poah ‘panic button’ inbuk a nita ding thu a hril. Nuhmei tu amani mi thenkhatin sawisak tum an naw leh an lo hnawt a ni chun mobile phone­a panic button hmet a ta, Police han an bawzui nghal thei ding a nih tiin a hril.

Prithvi­II missile hlawtling taka ensin
CHANDIPUR:  India chun Integrated Test Range, launch complex­3, Chandipur, Odisha Coast­a inthawk  Prithvi­II missile chu hlawtling takin zanikhan a kapsuok. Prithvi­II missile hi kum 2003­a kha Indian Armed Forces hmang dinga laklut ta a ni a, user trial chu February 15, 2016 khan hlawtling takin hi lai hmuna bawk hin ensin a lo ni tah.

Rangkachak Rs. 4.27 crore manhu man
AIZAWL: May 17, 2016 khan Custom officials han Mizorama Seling check Gate­a motor chi hran hran hai sukchawla an dapnaah Maxicab motor pakhata inthawk rangkachak 13.998 kgs an dapdawk a, a neitu Zoliansanga of Tahan, Myanmar leh an man. Rangkachak mana um hi Rs. 4.27 crore manhu vel ni dingin Custom thawktu han an hril. Rangkachak hi Myanmar a intahwka hung phur, Aizawl panpui a ni lai meka man a nih. Seling hi Aizawla inthawk km. 40 vela hla a nih.

ITBP in Assam Rifles an thlakthleng el thei
NEW DELHI: India le Myanmar ramri venghimna sinthawtu Assam Rifles hai chu Indo­Tibetan Border Police (ITBP) han an thlakthleng el thei nia hril a nih. Hi thua hin tulai hnai khan centre chun high­level meeting tumhni lai a lo nei ta a, Assam Rifles hai thlakthleng tha ti a nih. Junior Home Minister Kiren Rijiju chun hi chungthua hin meeting nei a ni ta a, sienkhawm thutlukna siem a la ni nawh tiin a hril. Defence ministry hnuoia Mr R.N. Ravi inrawi Committee chun Assam Rifles hai thlakthleng dingin a recommended a nih. Hi thua hin Assam Rifles battalions thenkhat ITBP a inlettir le ITBP battalions thar 30 vel indin nisien tia hrilna a um bawk a nih. ITBP chun ramri vengna sin thaw dinga remtina a lo nei ta bawk a nih. India chun Myanmar le hin ramri km. 1,643 a sei a nei a nih.

Assam-ah mimkei leiin mi 10 an thi; Dima Hasao biela hmun tam takah mimkei a tlung
GUWAHATI/SILCHAR/HAFLONG: Assam rama Karimganj le Hailakandi district, Barak Valley haia chun ruosur leia mimkei leiin zani zingkar khan mi 10 in thina an tuok. Karimganj district­a Sonachirra hmuna mimkei tlung leiin sungkuo pakhata mi 5 an thi a, Hailakandi district­a Bilaipur le Ramchandi area haia mimkei leiin mi 5 dangin thina an tuok bawk niin Police thusuok chun a hril.  Imu inhnik taka an inlai an in a keichim leia thi an ni tawl. NDRF le Police thangruol han sansuokna le sawmdawlna sin an thaw mek.

Dima Hasao district huop sunga chun ruo nasa taka a sur leiin Haflong thangin nundan pangngai nasa takin a sukbuoi a, hmun tam takah mimkei a tlung bawk niin official thusuok chun a hril. Hi lei hin District Administration chun zani hmasa khan private le govt. schools haia chawl a puong bakah mipui hai chu fimkhur ding le zan huna inzin suok lo dingin an hriettir.

Muolhoi Haflong khawsung le a se vel haia khawm mimkei nasa takin a tlung a, Muolhoi khawsung ringawta khawm sungkuo 3 hai chun an Ina um ngam lovin an suok san tawl a; Hmar Women Association,NC Hills & Karbi Anglong Region chun a thei ang angin mi harsa zuolhai kuomah thangpuina sum an pek bakah harsatna tuortuhai an kankuol tawl niin ei thu dawngna chun a hril.

DD Road, NH 54 le Haflong le Lumding inkar le Haflong le Silchar inkar lampui hmun tam tak mimkei in lampui a hnawping niin ei thu dawngna chun a hril.

Nagaland­ah AAP Unit hawng
KOHIMA: Nagaland­a Dimapur hmuna Aam Aadmi Party (AAP) Nagaland Unit hawng a nih. Ngaland AAP Unit hi AAP National Executive Committee member le North Eastern States observer Habung Payeng hmu lehrietpuinaa hawng a nih. Nagland AAP Unit Executive member dingin mi 13 thlang an ni a, Dr S. Amos Longkumer chu Coordinator le Riikhietuonuo chu Secretary dinga ruot a nih.

President May 24 in China ramah 
BEIJING: India President Pranab Mukherjee chu Chinese President Xi Jinping fielna angin May 24­27, 2016 inkar sung khin China ram an zin ding niin Chinese Foreign ministry thusuok chun a hril.  China ram a cham sungin President Mukherjee hin China ram thuoitu tum tum hai an hmupui ding bakah  India­China Business Forum –ah thuhrilna hun a hmang ding bakah May 26, 2016 khin Peking University –a meeting huna thu a hril bawk ding  niin ministry official thusuok chun a hril.

Rio NPF a inthawk suspended
KOHIMA: Nagaland Chief Minister hlui le Nagaland Lok Sabha MP, Neiphiu Rio chu May 17, 2016 khan Naga Peoples Front (NPF) primary membership a ninaa inthawka suspended a nih. Party kalzawnga a chet leia NPF primary membership a inthawka suspended a nih tiin NPF President Dr Shurrhozelie Leizeitsu chun May 17, 2016 khan Suspension order an suo.

May 31 hmain CBSE result
NEW DELHI: Central Board of Secondary Education (CBSE) hnuoia Class X & XII examination, 2016 result chu May 31, 2016 hma ngeia insuo ning a tih tiin Union Human Resource Development minister Ms Smriti Irani chun a hril. State hran hrana Board hai khawm Class X & XII examination, 2016 result hi May 31, 2016 liem hma ngeia insuo dingin inhriettirna pek an nih tiin Smriti Irani hin a hril bawk.

ATS in thu phierrutu taka intum an man
GODHARA: Gujarat Police­a Anti­Terrorist Squad pawl chun February 27, 2002­a Godhra Railway Station­a Sabarmati Express train raw a nina le inzawma thu phierrutu taka intum (main conspirator) Farooq Bhana an man. Godhara hmuna Rel raw a ni huna khan mi 59 zetin thina an tuok a, kha thil tlung lei khan buoina nasa tak a suok pha bawk a nih. Farooq Bhana hi Godhara Municipality Councilor hlui a ni a, Panchmahal district­a Kalol town hmuna man a nih tiin ATS Superintendent Himanshu Shukla chun a hril. Rel rawna dinga Petrol supply­tu tak a nih tiin a hril bawk.

Pak. mi Drugs­a sumdawngtu a sukhlum
ABU DHABI: Saudi Arabia sawrkar chun Pakistan mi drugs­a sumdawngtu pakhat zani hmasa khan a sukhlum; tukum sunga Saudi Arabia in thi dinga thiemnaw inchangtir a sukhlum 93­na a nih. Saudi Arabia rama hin thi dinga thiemnaw inchangtir a tamlem hai chu an ring­a tanbawng an ni hlak. Amnesty International, Saudi Arabia report dungzuiin kum 2015 khan Saudi Arabia chun mi 158 a sukhlum a, Pakistan in 326 le Iran in mi 977 zet a sukhlum niin a hril.

Irag­a hmun 3 a bomb puokah 77 an thi
BAGHDAD: Iraq­a Baghdad khawpui hmun pathum haiah zani hmasa khan Islamic state helpawl han bomb an sukpuok leiin mi 77 han thina an tuok bakah midang 140 chuongin hliemna an tuok. Tukuma dingin tumkhata helpawl hai chetna leia khawpuia mihriem thi tam tum tak a la nih. Bomb hi Baghdad­a al­Shaab, Sadr city bul le al­Rasheed hmun haia sukpuok a nih.

13th Hmar Martyrs’ Day Individual lawmman latuhai
SHOT­PUT (10 PARTICIPANTS)
1st. Mr Lalrosang Khawbung  s/o Tlangdanglien of Sielmat
2nd. Mr James Lalremruot s/o Lalmalsawm of Hmarveng
3rd. Mr Darneikham s/o Vanlalrem of Saikawt
FAHREL INHER (10)
1st. Isak L. Hrangchal s/o H. Samson of Rengkai
2nd Mr Michunghnung of Muolvaiphei
3rd.Mr David Thangboi of Hmarveng.
MARATHON 
(nuhmei) (18)
1st.  Ms Ramthienghlim of Saidan
2nd. Esther Lalsiamliani of Muolvaiphei
3rd. Ms Priya Lalparmawi of Rengkai
Pasal (48)
1st Mr James Hangbiaklian of Muolvaiphei;
2. Mr Elsadai of Saidan le
3. Mr Immanuel Ruolthakhum of Muolvaiphei.

First, second le third hai lawmman chu Marathon­ah Rs. 3,000/­, Rs. 2000/­ le Rs. 1000/­;’ Shot­put ah  Rs. 1500, Rs. 1000 le Rs. 500 pek an ni a, Fahrel inher­ah  Rs. 1500/­, Rs. 1000/­ le Rs. 500/­ a nih.
BADMINTON
Under 16: Winner: Dennis R. Joute s/o Upa Robert Joute
Runners up: Robert L Joute s/o (L) Pauneikhum (Sielmat)
VETERAN
Winner: Upa Lalchelzing Joute s/o Pastor Laltawn (Saikawt)
Runners up: Samuel L. Shakum s/o (L) Thangkhawsiem (Khawmawi)
Mens Double
Winner: Joshua L. Varte s/o Lalbieksang (Saidan) & Suresh s/o Lalhmunzo ( Saidan)
Runners up: Joseph R. Joute s/o Zosanghlei Joute (Lamka) & Josh Lalthlangfel s/o John F. Tusing (Lamka)
Mens Single
Winner: Magnus R. Joute s/o Lalchunglur (M Ramthar)
Runner up: Josh Lalthlangfel s/o John F. Tusing (Lamka)

Fox Journal People’s Choice Award chu Mohun Bagan U­19 league a khel zo chau Mr Jerry Pulamte  kuomah Rs. 5000/­ le Memento inhlan a nih.

VAWISUN THUPUI
Chuleiin, Krista leiin hratnawnaahai, sietnaahai, hnengdenaahai, suknawmnatnaahai, hnawchepnaahai, ka lawm hlak a nih; ka hrat naw po leh ka hrat hlak a nih. ­ 2 Korinth 12:10

Editorial: Hnam dang le inremnawna

Khawvela hin hnam hran hran ei chengtlang a, ngaidan, dit dan, du zawng, khawsak dan, sakhuo le culture dam a hung inang naw a, inrem naw chang ei hung nei hlak. A chang lem chun insukbuoi le indo hiel chang khawm a um hlak. Hiengang hnam le hnam insukbuoi le indo hi tha naw hle sienkhawm vawisun chen hin khawvel hin a la fesan thei naw a, hi thil hi thil pawi tak a nih. Ei chengna Manipur state a ngei khawm hnam le hnam inkara buoina, inremnawna le indo hiel chang khawm a lo tlung ta hlak a, thil tha lo le thil pawi tak a nih ti chu a hretu seng ei nih. Inremnawna, buoina le indona hai hin ra tha an suo ngai naw leiin ei rama hin hnam le hnam inkara buoina le indona hi tlung nawk ta ngai naw sienla nuom a um a, chu ding chun Manipur a hnam hran hran cheng hai hin thang ei laktlang nuom a um hle.

Manipur a chenghai le state danga chenghai khawmin inremnaw chang ei nei bakah ei rama hung um hnam danghai leh inremnaw chang ei nei hlak bawk. Ei inremnaw a, ei insukbuoi changin tharum chau ni lovin hriemhrei, silai le bomb hai chen ei chelek hun khawm a bo bik nawh. Hi thil hi pumpel thei inla nuom a um hle a, nisienlakhawm inremnawna hi ei la pumpel thei nawh. Hi thil hi a tha naw leiin a tu tu hnam khawm ni inla bansan hmak dingin hma hang la seng inla nuom a um takzet el.

Churachandpur town le a se vel haia khawm tribe chi tum tum ei cheng a. Hieng Tribe tum tum hai hi unau, thlatu hmunkhat, innei pawl le sakhuo hmunkhat zuitu seng ei nih. Amiruokchu, ei lungril a chin a, ei hmathlir a hla ngainaw a, a changpo leh Zohnathlak, Zonauhai,Zomi, Mizo annawleh Kuki ei nina theinghilin ei tribe lungril ei put thut a, kawtthlera chen Pistol dam ei phawi a, unau le unau silaiin ei intintuo hlak. Hi thil hi thil pawi takel, tribe tum tum hai inkara inhrietthiemnawna le inremnawna an tlun pha hlak. Hi thil hi harfim lai a tlung ngai meu nawh. Zu inrui chang annawleh thil dang inrui nei changa tlung hlak a nih. Hieng a ni lei hin inrui chang hin chu hriemhrei annawleh silai hi chu inlet ngai naw inla nuom a um. Hi thil hi unau ei nina suksetu a ni leiin ei dotlang seng thil tul em em el a nih.

A bikin hnam dang hai leh ei dit dan le ei ngaidan a hung inkal a, inremnawna ei hung nei chang hin thil pahni a hung inlang hlak a, pakhat chu thangruol thei der lo hi a nih. Hnam dang le inremnawna ei nei chang hin ei inpumkhat nawna le ei thangruol nawzie a hung inlang suok a, hi thil hi Zohnathlakhai ta dinga vangduoina le ei hmalakna sukchautu a nih. Hieng a ni lei hin, hi thil hi hnam ta ding chun a pawi a, a vangduoithlak a nih. Mi hnam hi chu hnam dang leh an inremnaw chang hin an thangruol a, ei ni ruok chu indem zawng le inngei lo zawnga chet ei ching. Hnam dang le inep, inrem lo le inkhing hi a tha naw a, hrilmawi chi khawm a ni nawh. Nisienlakhawm hnam dang le inrem nawna ei nei chang hin hnam dang le ei inkar nekin ei ni le ei ni inkar lem hi hnuoi kak ang elin a hung kak a, kar (gap)  lien tak a hung um hlak. Hi thil hi hnam danghai le ei inrem nawna nek hmanin a pawi lem el thei niin anlang.

Hnam dang le ei inremnaw changa thil hung inlang hlak dang pakhat nawk chu fim tak le chik taka thil ngaituo lo zawnga ei chet le hma ei lak hlak hi a nih. Ei hnam pumpui ta dinga tha ding zawngin amani, sawrkar thlungpui le khawvel ngaia thiem ei changna ding zawngin amani ei ngaituo naw a, patling taka che lovin nuhmei takin ei che nawk hlak. Ei thiemna hrimah khawm dem dem le inthiem naw ei hlaw pha a, ei hmingsiet pha hlak.

August 31, 2015 a Manipur Assembly in Bills 3 a pasina thua khawm hin chalrang le tribal mihai ditdan le ngaidan chu inang lo le inpersan takel a nih. Manipur mi seng seng ni inlakhawm ei sakhuo le ei culture an angnaw bakah ei duzawng, ei khawsak dan le inhnik zawng khawm an ang der naw a. Hi lei hin ei ta ding chun hnam dang tiin  ei ko el hlak. Bills 3 hai chungchanga hin ei inkar a tha naw a, ei inrem thei naw a ni deu tak. Hilei hin phaimi le tlangmihai inkarah iengang thil am a la hung intlun ding ti ngaituo tham tak el a nih. Hi lei hin tlangmihai hi a hlawtling le a malsawm zawnga chet tum ei tiu. Iengkhawm nisienla, hnam dang le ei inkar hi siem that thei a ni a, siem that khawm ei tum hram hram ding a nih.

Post a Comment

Powered by Blogger.