An hmatieng President kuoma Joint Representation pek dingin an rel
CCPUR:  May 13, 2016, 11:00AMkhan Hmuia Veng­a MPC Office­ah Kuki Inpi Manipur; United Naga Council; Kuki Inpi/CCPur; Hmar Inpui; Mizo Peoples Convention; Zomi Council le Zomi Council hnuoia constituent bodies hai, JAC le ATSUM thuoitu han joint meeting pawimaw tak an nei. Hi huna hin May 9, 2016 nia Manipur CM inrawinaa all  political party meeting in Bill 3 hai Act a hung ni theina dinga President of India in ‘asent’ a pek theina dinga Delhi inzin dinga an rel chungthu le JCILPS hmalak dan chungthuah inrawntlangna an nei a, hun sawt tak an hriltlang hnungin thutlukna (resolution) 4 an siem.



Chuong resolution hai chu­
1. Tribal leader han May 9, 2016 a Manipur CM O.Ibobi inrawinaa All Political party meeting in thutlukna an dem a, political party thutlukna chu tlangmi hai ditdan a ni nawh.
 2. JAC (Against Anti­Tribal Bills) in May 16­18, 2016 inkar tlangram biel pumpuia darkar 48 sung total shutdown an puong chu a hlawtling theina dinga thlawp ding.
3. Anti­Tribal Bills dodalna hrat lema fepui a ni theina ding le JAC hmalaknaa 3 bills dodalna sukhrat zuolna dingin Manipur pumpui huop Co­Ordination Committee an hmatienga indin ding; UNC President le Kuki Innpi Manipur (KIM) hai Convenor le Co­Convenor nina hnuoia Co­Ordination Committee indin ding; UNC, KIM, HI, MPC le Zomi Council a inthawk Member 2 seng thangnaa hi Committee indin ding.
4. Anti­Tribal Bills 3 hai pawmpuina (assent) pe lo dinga ngenna joint representation an hmatienga India President kuoma pek ding ti hai an nih.

Upa Benjamin Lalneisang Saiate Dy. GM a inthawk GM in a kaisang
CCPUR: Manipur State Power Distribution Company Limited (MSPDCL) Orders No. 14/30/2015­MSPDCL (HR) 1163­68 Dt. Imphal 11th May, 2016 dungzuiin Upa Benjamin Lalneisang Saiate s/o Upa C.N.Vunga chu Deputy General Manager a inthawk General Manager (Commercial), MSPDCL in a kaisang.



Order dungzuiin Pu B.L. Saiate hin GM (Commercial) MSPDCL a chel bakah DGM Senapati le DGM Kangpokpi la chelsa zing bawk a tih. Upa Benjamin Lalneisang Saiate hi a nuhmei Pi Dr Lalzarzolien Saiate le a nau pasal 4 hai leh Vengthlang, Rengkai, CCPur­ah an cheng.  Manipur tlangmi hai lai Upa Benjamin Lalneisang Saiate hi MGPDCL (Power Dept. Manipur) ah General Manager kai hmasa tak a la nih.(MSPDCL hi tuta hmaa Power Department tia hriet kha a ni a, tuta General Manager hi  Superintending Engineer (SE) tia ko a lo ni hlak)

A kaisangna hi HYA GHQ khawmin a lawmpui thu a puong a, hmatieng tuta neka insang lema la kaisang pei dingin ditsakna an hlan. Ei chanchinbu khawmin a kaisangna hi a lawmpui hle.

Tekin Pu Thanglien­thuom in a deng
CCPUR: May 12, 2016 zantienga Tek tla khan Shillong Hills, Rengkai, CCPur­a Ngaite compound­a um Pu Thanglienthuom chengna in building chung sipzum a deng thuoi vuot a, inchung sip teklei a deng khawk met. Sienkhawm mihriem thi le hliemna tuok an um nawh. Tekin a deng khawkna inchung sipzum hi zanikhan siemthat nghal a nih. In neitu Pu Thanglienthuom chun Tek hin a pheia a hrut phei ni dinga a ring thu a hril.


Relief material sem dingin an suok
CCPUR: Saichang Area Relief Committee­a inthawk Relief Team hai chu Relief material sem dingin zani zing 7:00 vel khan a vawithumna dingin Saichang area an pan. Anni hi CV Duhawma, President, GYMA in tawng­tainain an thlaliem. Relief item hai DI Tata 1 le 407 Tata 2 hmangin Bufai bag 10, Rangva bundles 60) an phur a a, Bolero le Gypsy an thuoi sa bawk. Relief team hi S. Thienlal Joy Gangte, Chairman, Relief Committee le  CV. Duhawma, President, GYMA, Manipur President in an inrawi a, zani zan khan Saichang ah riek an ta, vawisun hin khuo 9 (D. Loupum, Saichang, Konpi, Maumual, K. Zoar, Santing­1, Santing­L, Chongchin leh C. Zalen) haiah relief item hai sem an tih.

Hmar Martyrs’ Day inhmang dan ding thenkhat
CCPUR: May 16, 2016, 10:30AM a inthawk khin Saikawt playground, CCPur­ah Manipur state level in 13th Hmar Martyrs’ Day le Martyrs’ trophy final le closing function ursun taka hmang tum a ni a. Hi huna hin hnam ta dinga hringna lo inhlan ta hai inzana hun ser hmang ni bawk a tih. Program tan hma 9:30AM in fam lo chang tah mihrat Pu Khuplal tupa Mr Khuplal Lalzahmang (16) s/o (L) Khupzahmang of Parbung chun, Pathienin talent tha tak a pek suklangna nei a ta, a ha (teet) in mihriem a seput ding a nih. Nikum khan Bufai bag khat a haa seputin iemanichen zet a lo lawnpui ta bawk a nih.

Chun,  Slight Change Band khawmin Hmar Martyrs hai sunna hla an sak ding bakah Hmar hlasakthiem hlun, Album khawm 50 chuong zet lo siem tah Ms Nienglawmkim Sungte;  Jeneth L. Varte (Lungtau); Joseph Pakhuongte, James Pakhuongte, Hossanmawi Songate, Blessed Choir han hnam hla mawi tak takin mipui inawi bawk an ta. Hmar Returnee Association (HRA) in Pasaltha fam lo chang ta hai Condolence Salute peng an ta, Rengkai HYA Branch in Gun Salute pe bawk an tih.

Hienghai baka hin Cultural Items um a ta, Kom hai khawmun Cultural Show nei an tih. Saidan, Sielmat, Rengkai, Muolvaiphei le Saikawt han Fahrel Tâwk Lâm a ruolin inentir bawk an tih.

13th Hmar Martyrs Day hmangna ding le inzawma HMARTOB in In tina tar dinga a buotsai Flag chu Rs. 150/­ le  T­Shirt Rs. 350/­ pekin Downtown Grafix, Sielmat, CCPur le
Father pa dawr, Near Atha Bek Bek Store, Rengkai Vengpui­ah inchawk thei zing a nih.

Free Medical Camp nei
CCPUR:  Zani zingkar khan State AYUSH Society, Manipur huoihawtnain Bethesda School of Nursing, Muolvaiphei­ah “National AYUSH Mission” hnuoiah Public Health Outreach activities in Free Medical Camp nei a nih. Medical Camp hi Dr. L.Lokendro, Director National AYUSH Soceity, Manipur in an rawi a, Dr. Iboton, Medical Officer (MO); Dr Gitarani, MO; Dr Ngaimuankim, MO; Dr. Dhaneshori, MO; Dr. Ritamathuri, MO; Dr. Tennyson, MO; Dr Lukhoi, Sr MO le Dr Aken, Yoga Instructor han Muolvaiphei le a se vela mi hai, mi 200 chuong hriselna an enfel.


Escort & Transport Allowance semna nei
CCPUR:  Inclusive Education for Disabled (IED)/SSA Resource Centre, Thangzam road –ah zani sun dar 11:30 khan IED hnuoiah Disabled person hai ta dingin kum 2015­2016 a Escort and Transports Allowance semna nei a nih. Hi huna hin Chief Guest in Lalthanzam Infimate, BO/HQ DC’s office a thang a, Guest of Honour in T.Goukhomang, ZEO/CCPur a thang. Chief Guest in mi 131 hai kuomah Transports Allowance a sem a, Guest of Honour in student 115 kuomah Escort allowance a sem. Transports & Escort allowance­a hin mi 1 in Rs.2500 pei an dawng a nih.


BO HQ chun, Children With Special hai thangpui ngai zing an ni leiin nu le pa han tha taka an enkawl le special attentionpe dingin a ngen a, anni thangpuitu dingin midang nekin an nu le pa hai chu teacher tha tak an nih tiin a hril.

ZEO chun, disabled person hai thangpuina ding scheme tum tum siema um hai tha le ropui a ti thu hrilin piengphunga ruolbanlo hai sawrkarin tha taka a mi enkai pek chun, iengleiin am mani thisen a pieng ngawingawi hai tha takin enkawl nawng ei ta? tiin nu le pa hai chona a pek. Piengphunga ruolbanlo hai chu in ngaisie el ding an ninaw zie, talent tha tak tak nei an ni naah chuong an talent hai hrie a hmang thiem chun mani intodel thei an nizie, an talent hai phosuokna dingin nu le pa han mawphurna lien tak annei thu a hril.

Hun tiemchin um lovin Rajya Sabha session sukchawl, Rajya Sabha members 53 inthla an nih
NEW DELHI:Rajya Sabha Session April 25, 2016 a tan chu zanikhan Rajya Sabha Chairman, Mohammed Hamid Ansari in hun tiemchin um loin a sukchawl (adjourned). Session hi tawi sienkhawm chona tha tak pe le siemtu a nih tiin Hamid Ansari chun a hril. Sitting vawi 15 nei a ni a, hi hun sung hin Government Bills 12 passed or thawnkir a nih. Session sunga member­han an hriltlanghai laia a thupui zuolhai chu khuo inthal le Augusta Westland Chopper Deal chungthu hai an nih. Major bills passed­a um hai lai Finance Bill le Railways Appropriation Bill hai a thangsa. Chun, Inpui pahni han Insolvency and Bankruptsy Code, Mines and Minierals Bill le Anti­Hijacking Bill hai an pawmpui Rajya Sabha­ah hriltlang le pasi ding pending Bills 45 lai a la um tiin Union Minister of State for Parliamentary Affairs, Mukhtar Abbas Naqvi chun a hril.

Rajya Sabha members han zanikhan an member chanpui, an hun (term) tawp ta ding members 53 hai inthlana annei. Hieng member hai hi states 14 haia mi, June le July haia an hun tawp ta ding an nih. Members  inthlaa um hai lai Congress 13, BJP 11, BSP 6, JD(U) 5, AIADMK le Samajwadi Party haia intahwk 3 ve ve, TDP, DMK, BJD le NCP haia inthawk pahni seng, Shiv Sena le Shiromani Akali Dal haia inthawk le Independent 2 an nih.

Hieng Rajya SAbha seats hung ruok ding haia biennial election chu June 11, 2016 a nei dingin zani hmasa khan Election Commission of India chun a puonglang tah. Rajya Sabha member an hun tawp ta dinghai lai hin Union Minister ni laizing M. Venkaiah Naidu, Nirmala Seetharaman, Piyush Goel le Mukhtar Abbas Naqvi, BJP vawng hai an thangsa. Chun, Congress a inthawk an term tawp ta ding laia an lar zuolhai chu Mohisina, Ambika Soni, Oscar Fernandes le Jairam Ramesh hai an thang. PM  Modi chun Goods and Services Tax (GST) Bill le Compensatory Afforestation Fund Bill, 2016 hai tuta session sunga pasi hman lova um chu pawi a ti thu a hril.

Lok Sabha session chu a hmaa Session neidinga hun ruot ni 2 la bakin May 11, 2016 khan hun tiemchin um lovin Speaker Sumitra Mahajan in a lo sukchawl ta a nih. Tuta tuma Lok Sabha session a hin minute khat elkhawm buoina tlung leia session sukchawl hri a um der nawh. Rajya Sabha a ruok chun vawi tam tak session fe lai sukchawl lailawk a ni ve thung.

IGNTU online admission hun suksei
IMPHAL:  Indiara Gandhi National Tribal University (IGNTU), Regional Campus Manipur hnuoia PG le Ph.D Course tum tum inchuk dinga online admission form peklut thei hun chu May 20, 2016 chena dinga suksei a nih. Thu chieng lem University website: www.igntu.ac.in ah hmu thei ning a tih tiin S.L.Varte, Director, i/c chun zanikhan inhriettirna a siem.

AR han thangpuina an pek 
IMPHAL: Zani zingkar dar 8:15 vel khan Tengnoupal, Chandel district­ah kangmei a suok a, Inpakhat a kang a, 12­Assam Rifles han kangmei suok hi thelin thangpuina sin an thaw nghal a. Hun sawtnawte sungin kangmei hi an thelmit a, kangmei nasa tak suok ding lakah le mihriem hringna le insunga thil um hai an sanhim. Mi pakhat a hliem a, an Unit Hospital­ah thuoiin first aid an pek niin HQ IGAR (South) thusuok chun a hril.

Vote campaign tan a nih
IMPHAL: June 2, 2016 a Imphal Municipal Corporation (IMC) election hung um ding le inzawmin Political party tum tum le Candidates han vote campaign an thaw tan. In tinah luta vote campaign an lar hle. Congress in an candiate ding hming 25 le BJP in 24 an puonglang tah. State Election Commission chun Model Code of Conduct hmang tan nghal a ni thu a puong.

Judges 4 in SC Judges dingin 
NEW DELHI: Justices AM Khanwilkar, DY Chandrachud, Ashok Bhushan le L. Nageshwar Rao hai chun zanikhan Chief Justice of India (CJI) Thakur hmaah Supreme Court Judges dingin intiemkamna an nei. Hieng Judges thar 4 hai le hin CJI TS Thakur thangin Supreme Court chun Judges 29 a nei tah. CJI thangin Supreme Court­a sanctioned Judges chu 31 a ni a, Judges 5 hai chu tukum hin an pension ta ding a nih. Tuhin SC Judges ah nuhmei pakhat chau a um a, chu chu Justice R. Banumathi a nih.

BSF jawan in Inspector a kap hlum
VATAKARA: Kerala­a May 16, 2016 nia Assembly Election hung um dinga duty dinga fe BSF jawan Umesh Prasad Singh chun a service rifle hmangin an hotu (BSF Inspector) Ram Gopal Meena (45) a kap hlum. Mr Prasad Singh le Ram Gopal hai hi chawl (leave) chungthuah an insel a, chu huna Prasad Singh hin Ram Gopal hi a kap hlum niin Police thusuok chun a hril. Hi thil hi zani hmasa zan dar 11:30 vela kha tlung a nih. Election duty dinga Islamic Academy, higher secondary school­a innghat an nih.

Tek in mi 5 a deng hlum 
MALDA: West Bengal­a  Malda district­a chun  Tek tlain mi 5 a deng hlum bakah midng 8 in hliemna an tuok niin zanita official thusuok chun a hril.

Garo Hills­a motor­a inthawk Rs. 5 lakh man
TURA: Meghalaya­a Tura Lok Sabha seat­a byelection May 16, 2016 a hung um ding le inzawmin motor inlawn hai nasa taka dap zing a ni a, election hung um ding le inzawma voters hai kuoma sem tum ni dinga ringhla Rs. 5 lakh zet chu Jengjal village­a Bolero motor sunga inthawk dapdawk a nih. Pawisa dapdawka a umna motor neitu hi official han an puonglang naw a, an suizui mek. Zani hmasa khan Union Minister Jual Oram chuongna motor khawm dap a nih.

Khawvela vuongna lien tak Hyderabad­ah a tum
MUMBAI: Khawvela thil phurna vuongna (cargo aircraft) lien tak, Antonov AN­225 Mriya or ‘the Dream’ chu India rama a hung tum vawikhatna dingin zanikhan Hyderabad­a Rajiv Gandhi International Airport­ah a hung tum. Hi Vuongna hin turbofan engines 6 neiin khawvela vuongna siema um hai laia sei tak le rik tak la niin a rik dan chu 640 tonnes niin ei thu dawngna chun a hril a, khawvela vuongna service hai laia thla (wingspan) nei lien tak a nih. Antonov AN­225 hi khawvel rambung hranhran hai inkara thil tonnes 180­230 a rik phurlawnna ding bika siem a nih.

BSF le BGB han Dhaka­ah border talks
DHAKA: Border Security Force (BSF) le Border Guard Bangladesh (BGB) chun border venghimna thuah zani hmasaa inthawk khan ni 5 sung aw dingin Dhaka khawpuiah inbiekna an nei tan. Hi huna hin ramri venghimna tiengpang le dan lova sumdawngna do dan ding chungthu hriltlang an tih. India tieng chu BSF Chief KK Sharma innrawinain  palai mi 21 an thang a, Bangladesh (BGB) tieng chu BGB Chief Maj. Gen Aziz Ahmed inrawinain member 23 an thang ve thung. India team a hin Union Home Ministry le border enforcement agencies official hai khawm an thangsa.

VAWISUN THUPUI
Ringnaa chun in um a, nangni insin hlak unla, nangni ngei infie hlak ro. Annawleh, nangniah Isu Krista chu a um ti nangni ngeiin in hriet chieng naw am a nih?  dit naw in ni nghal naw chun.  ­ 2 Korinth 13:5

Editorial: Pass percentage

Council of Higher Secondary Education, Manipur hnuoia Higher Secondary Examination, 2016  result chu  zani hmasa khan insuo a ni ta a. Thenkhat ta ding chun May 12, 2016 kha hlimna le lawmna ning a ta, thenkhat ta ding ruok chun nguina ni le tapna ni ni ngei a tih. Council in result an suo dungzuiin students 26934 an exam a, students 17566 an pass a, student 9368 an qualified a nih. A pumpuia pass percentage hi a tha bek naw niin an lang. Churachandpur District a inthawk students 1047 an exam a, 673 an qualified a, students 374 an hlawsam a nih. A pumpui thu chau ni lovin Churachandpur District a ding khawmin result hi that le kaisang tieng nekin siet tieng le inhnuoi tieng a pan pei a nih. Manipur­ah District 9 a um a, hienghai lai hin pahnina ngirhmuna ei la um thei a,lawm umah ngai el inla a tha awm ie.

Council of Higher Secondary Examination (HSE) result hi kaisang nekinkum tin a tla hnuoi pei a nih. Kum 5 liemta a pass percentage chu­ 2012 in 82.86; kum 2013 in 81.44; kum 2014 in 76.89; kum 2015 in 61.09 le kum 2016 in 65.22 a nih. Kum 2015 nek chun kum 2016 in a hung kaisang nawk thet a, la hung kaisang pei dingin hang beisei phawt ei tih. Result thatna dinga mawphurtu chu student, Zirtirtu, nu le pahai ei nih ti inla ei hril suol taluo ring a um nawh. Hi lei hin result that lemna ding chun student, zirtirtu, nu le pa hai nasa nawk zuola thang ei lak a tul takzet a nih.

Chun, result tha lem ei nei theina dinga mawphurtuhai chu state sawrkar, Council of Higher Secondary Education, Manipur le School/College neituhai an nih. Student­hai hi ei hmatienga hnam, ram, khawtlang le sakhuo thuoitu dinghai, beisei taka ei lo nghak hai an ni leiin result tha lem ei nei theina dingin a hma neka nasa lema thang ei lak sup sup nuom a um. Zirtirtu indai naw le zirtirtuhai sawnkuol inzing ut el hi student han an tuorin an thawhla nuom hle a. Hi lei hin  ei state sawrkarin Zirtirtuhai ta dingin transfer & posting policy tha tak  neia, khau taka a zui le a hmang ngei ngei a tul. Result tha lem le insang lem ei hung nei theina ding kawngah hin sawrkar, a bikin Education Department in thang a lak nasat a tul zuol bik a nih.

Kum 5 liemta a Higher Secondary Examination result ei hang thlirkir chun, Government College le School hai pass percentage hi a se em em el a, student a pass um der nawna Government School le College hi thahnem tak an um hlak. Hi lei hin pass percentage tlak hnuoina san pakhat chu Goverment School le College hai lei niin anlang. Hieng a ni lei hin Government School le College han nasa nawk zuola thang an lak nuom a um. Kum 2016 a HSE a khawm Government School le College hai pass percentage a se em em a, an pass percentage 48.4 a ni laiin Private School le College pass percentage chu 72.46 zet a ni a, pass percentage hi an thlau taluo bek bek el a nih. Private school le College hai um naw lem sienla chu pass percentage hi inzapui um le muolphona tham a hung ni ding a nih.

Pass percentage a hung tla hnuoina san pakhat nia inlang chu Grading System ei hmang hi niin an lang. A hmaa ei thaw ngailo a ni leiin student­hai lungril sukphur nekin phurnawna a pek niin an lang. Mark insang le division zawnga fepui khan student­hai a sukphurin inelna nasa lem a siem pha hlak niin an lang. Hieng a ni lei hin Council in result siem dan hi a ennawn le a siem that annawleh a sukdanglam (modify) thil tul niin an lang. Mihai  thatpui le mihai seim thatna kha ei thatpui ve naw a, hmasawnna  neka ei hnungtawlpui lem  ding a ni chun hmang ve lo el khawm a tha lem ring a um. Council in hi chungchang hi chik taka a ngaituo le modify dan a ngaituo thil tha lem a ni ring a um.

Chun, tuta hma khan chu merit list siem le insuo sa a ni hlak a. Kha thil khan student­hai lai  inelna tha tak a pek a, merit list kha mipui hriet thei dinga siem le insuo thei nawk nisienla nuom a um. Manipur pumpuia topper annawleh top twenty ni phak leia Chanchinbu haia hming le thlalak chuong le insuoa um khan student­hai lai phurna le inelna nasa tak a siem a, students hai taimakna, tumruna le inelna nasa takin a siem pha hlak. Kum 2017 a Higher Secondary Examination a bek chu Council of Higher Secondary Education, Manipur in merit list siemin hung tarlang nawk ta ngei sienla nuom a um. Thiltha ding hi chu thaw el ding a nih.

Post a Comment

Powered by Blogger.