JAC le tribal bodies, councils/Innpis han  joint meeting an nei
JAC in May 16 zanrila inthawk darkar 48 hill district Total Shutdown an puong
CCPUR: Manipur Assembly in August 31, 2016 nia Anti­Tribal Bills 3 a passed hai le inzawm le thil dang dang le inzawmin zani khan JAC Informaton Centre, KKL Complex, CCPur­ah JAC Against Anti­Tribal Bills; tribal apex bodies/tribe councils/Innpis han joint meeting an nei. Hi huna hin JAC ngenna angin Tribe Council tinin JAC­ah members 3 seng an tir belsa ding; a pawimaw le tul ang peiin JAC in press statements insuoin media outlets haia hrilfiena an siem pei ding; United Naga Council, Kuki Innpi Manipur, Hmar Inpui, Mizo Peoples Convention, Zomi Council, ATSUM, JAC le a dang dang hai leh district dang haia khawm JAC indin ding; C. Rampana in Inpi leaders hai Mizoram inzina Pu Zoramthanga inhmupui dinga a fielna lawmum an tih a; Manipur hill areas haiah May 16, 2016 in Bandh ko ni sien tiin rawtna siem a ni a, Joint meeting chun a tul anga hma la dingin JAC mawphurna an pek.


Hieng laizing hin JAC chun hma la nghalin, May 9, 2016 nia Manipur Chief Minister inrawina hnuoia All Political party meeting in Bills 3 Manipur Assembly in a passed hai chungthua New Delhi­a all political party palai tir dinga a rel dodalna le Manipur sawrkar chunga an lungawinawna suklangnain Joint Action Committee (JAC) Against­ Anti Tribal Bills chun May 16, 2016 zanril a inthawk May 18, 2016 zanril chen, darkar 48 aw dingin Manipur a Tribal (tlangmi hai chengna biel) areas haiah Total Shutdown an puong thu zani May 10, 2016 nia JAC Against Anti­Tribal Bills in Press Release an suo a chun an zieklang. Bandh hi May 15 zanrila inthawk tan dinga ti a ni a, sienkhawm Hmar Martyrs’ Day May 16, 2016 a hmang ding leia Hmar Inpui President in ngenna a siem leia a hun hi sawn nawk a nih.

Leadership Training nei
CCPUR: Zani sun dar 12 a inthawkkhan HSA JHQ CCPur le Rural Women Upliftment Socity (RWUS) hai thangruola huoihawtna le United NGO Mission, Manipur (UNM­M) sponsored­nain Hmar Secretariat, HSA Campus, Rengkai, CCPur­ah Leadership training nei a nih. Mr Lalthanzau, President, HSA JHQ in lawmlutna thucha a hril bakah Mr LRS Puruolte, Jt. Secy. (Inf & Mdia), Hmar Inpui le Chief Admin, Virthli (Online News Portal), Ms Thelma Ramthienghlim, Secy. HSA JHQ, Delhi khawm hi huna thangin thu an hril tawl.

Resource person in Mr. Timothy Z. Zote Adviser, HSA CCPur JHQ le Ms. Lalhlimum Joute Secy., Edn., HSA JHQ, CCPur hai  an thang.

JCB Driver dama insuo a ni tah
CCPUR: May 3, 2016 zan dar 12 vela Bongbal khuo, CCPur District­a inthawka thuoihmang T. Lala, Special Controctor hnuoia sinthaw JCB Driver Tongdon Singh (39) s/o Kh. Kwaklei of Dulaithabi, Imphal West chu  dam le himin a thuoihmangtu han an insuo ta a, dam takin in a tlung ta niin ei thu dawngna chun a hril.

Zu dawr hai dar 6 hnunga hawng an khap
CCPUR: Zomi Re­Unification Organisation /Zomi Revolutionary Army Town Commander chun zanikhan inhriettirna insuoin CCPur khawpui sungah Zu dawr hai zan dar 6 hnung tienga hawng khap a ni thu; zan dar 6 hnunga tukhawm Zu dawn le zu inchawk phal ni tanaw ni a, zurui leia buoina siem, zu le inruithei leia nuhmei le naupang suk thlaphang khawpa risie siem hai khawm an enthlak zing ding thu thusuok a chun an ziek. Inruithei zawr le supply, khawlaia invak kuol hai khawm an thilthaw tawpsan dingin an inhriettir a. Mipui ditna anga thusuok siem a ni a, complaint a tam leia hi thusuok hi siem a nih. Hi thu insuo a inthawk thil tlung a um chun an nin a maw phur an tih tiin thusuoka chun an ziek.

Music video album tlangzar
PARBUNG: Buongkhawpui Awitu 2015­2016 hla inruolsietkna huna top 10 chen kai phak hai, hla tienga hmasawnna le khawtlang inthuruolna thalem um theina ding beiseiin Music Video Album siem a ni a.  Album hi Pu Danielthang Parbung V/A Chairman in May 8, 2016 khan a tlangzar. Awitu thupui chu ‘inchawimawiintuo in hmatieng pan ei tiu ti a nih.  Organizing Board le PSA/Parbung Sieli Association chun album hi an zawr mek a, tlawmngai taka lo inchaw seng dingin Organizing Board chun ngenna a siem. (Lalnunthang Songate)

Tuibuong SDO office inhlanna
CCPUR: Zani 11:00AM khan Kholmun­ah Tuibuong Sub­Divisional Office inhlanna le lawmthu hrilna nei a ni a, Upa Ngamkhokai Haokip, Fin. Secy. Block ChiefAssn. chuntawngtainain an hlan. Hi huna hin Saikawt MLA le MPCC President T.N. Haokip le Singngat MLA Ginsuanhau hai bakah MDC iemanzat in an uop.


HMARTOB in lawmthu
CCPUR: Hmar Inpui hrietpui, Manipur­a 13th Hmar Martyrs’ Trophy 2016 le May 16 ­Hmar Martyrs’ Day Saikot Playground, Saikot, CCPur a inserna ding le inzawma sum a thangpuina petu Hmarveng V/A, Thenmuol V/A le Valpakot V/A hai chung ah HMARTOB chun lawmthu a hril.

Awareness Prog. nei
CCPUR: Zani 11AM khan CMO Conference Hall­ah District Leprosy Unit han Awareness prog. an hmang. Hi huna hin Dr Kimneihlam, Dist. Leprosy Officer; Th.Ranjit, Physiotherapist le Herachandra, Superviser,NMS han Leprosy chungthuah inveng dan ding le sukdam thei a ni zie hai hrilhrietna an nei. Hi huna hin Female Health Worker Training School a student hai khawm an thang.

Staff Nurse post 219 a ruok
CCPUR: Jawaharlal Nehru Institute of Medical Sciences (JNIMS), Porompat, Imphal hnuoiah Staff Nurse post 219 (ST­80, SC­5, OBC­M 33, OBC ­MP 11, OBC­N/T) 1 le UR­89) a ruok. Hi sin lakna dinga interview­a thang nuomhai ta dingin May 13, 2016 chenin District Employment Exchange, Churachanpdur­ah hming peklut thei ning a tih. Hming pelut an tam ta hle.

Civil Services 2015 final result puong
Manipur­a inthawk tlangmi 2 thangin mi 7 an hlawtling
IMPHAL/NEW DELHI: Union Public Service Commission (UPSC) huoihawtna hnuoia Indian Administrative Service (IAS); Indian Foreign Service (IFS); Indian Police Service (IPS) le Central Services Group ‘A’ le Group ‘B’ lakna dinga Civil Services Examination, 2015 neia um final result chu zanikhan puong a ni a, Manipur­a inthawk tlangmi 2 thangin mi 7 in hlawtlingna an chang. Manipurta inthawk hlawtlingna chang hai chu­ Khumanthem Diana Devi (Rank 24), S. Asker Ali (Rank 167), Krito Das Thokchom (Rank 540), Haridas Rajkumar (Rank 686); Kshetrimayum Shivakanta Singh (Rank 752) tlangmi hlawtlingna chang 2 hai chu­ M Thangsuansang Zou (Rank 915) S/o Haulienthang Munluo of M Bethel le Elvina Lalmuanpuii Leivon (Rank 1018) hai an nih.


Tukum UPSC hnuoia Civil Services Topper chu Delhi nunghak Tina Dabi a ni a, Jammu & Kashmir mi, tuta Railway officer ni laimek Athar Aamir Ul Shafi Khan chu top 2­nain a thang. Chun, Delhi mi tho Indian Revenue Service (IRS) office ni lai mek Jasmeet Singh Sandhu chu top 3­na a nih. Artika Shukla le Shashank Tripathi hai chu palina le pangana an nih.

Civil Services Topper Tina Dabi (22) hi Lady Shri Ram College­a graduate niin tuta tum hi a vawikhat exam­na (first attempt) a ni a, a vawikhat exam­naah topper in a thang a nih. Hiengang first attempt­a topper la hi an la an tamnaw hle awm ie. Top 2 latu Athar (23) khawm hi a vawihni exam­na chau a nih. A vawikhatnaah kum 2014 khan Indian Railway Traffic Service (IRTS) a hmu a tuhin Lucknow hmuna Indian Railways Institute of Transport Management­a training lai mek a nih. Top 3 Jasmeet hi kum 2014­a civil services exam­ah Indian Revenue Service (IRS) hmu, tuta Faridabad hmuna National Academy of Customs, Excise and Narcotics­a training lai mek a niin tuta tum hi a vawi 4 exam­na a nitah.

Candidates 1078 (General 499, OBC 314; SC 176; ST 89) an hlawtling a; Post ruok dan dungzuiin mi 180 IAS (Gen. 91, OBC 49, SC 27, ST 13)  pek ning an ta, IFS mi 45 (Gen. 25, OBC 13, SC­7; ST­0); IPS 150 (Gen. 77, OBC 37, SC 23 le ST 13); Group A mi 728 (Gen. 372, OBC 196, SC 104, ST 56) le Group B 61 (Gen. 20, OBC 19, SC 15 le ST7) pek ning an tih.

Sawrkar leh an inbiekrem tah
IMPHAL: Joint Administrative Council of All Manipur Under Five Tonne Passenger Service thuoituhai le State sawrkar palai han zanikhan Manipur Transport Minister Dr Kh. Ratan Kumar office­ah inbiekna annei a, hi huna hin inbiekremna an nei thei leiin zani zanrila inthawk khan hi JAC hnuoia Auto, Tata Magic, Winger etc hai chun an service an sunzawm nawk ta niin ei thu dawngna chun a hril. An inbiekremna dungzuiin One Time Tax (token tax chau)  chu September, 2016 zo tienga intahwk pek tan ding le tax pek dan ding hi Manipur mihai ngirhmun le inmil thei dinga siem that ding tihai a thangsa.

Pizza­II film black a zawr tumtu man
IMPHAL: Manipuri film Pizza­II DVD disc black­a zawr tumtu, Nahakpam Rishikanta @ Athoi (19), s/o N. Kaper of Khabem Bhamdier chu zanikhan Film Forum (FFM) members han Nambol Naorem hmuna an man. Hi disc hi pakhat Rs. 50 in Malom a Video Parlor pakhata inthawk an chawk a, a copy siemin disc pakhatah Rs. 400, Rs. 300 le Rs. 70 in iemanizat a lo zawr hman ta niin Athoi hi an puong. Hi film­a changtuhai chu Kaiku, Boney le Bala hai an nih.

Uttarakhand chungthuah RS sukchawl
NEW DELHI: Uttarakhand chungthuah zanikhan Rajya SAbha ah sawrkarna cheltu le Selkaltu pawl member­hai lai inselna nasa tak a suok a, rorelna fepui thei lova a um leiin Deputy Chairman, Rajya Sabha chun zani zantieng dar 4 khan zanita dingin Rajya Sabha inthung a sukchawl. Uttarakhand Appropriation Bill chungthu Rajya SAbha­ah putlut a ni a, Congress party member hai chun floor test nei a ni a, Congress in hratna an chang ta leiin hi Bill thu hi hril a tul ta nawh tiin an hril. Floor test result hi official­a la puonglang lo, vawisuna Supreme Court in a puong ding a nih.

States 26­ah SHRC indin a ni tah:Rijiju
NEW DELHI: Minister of State for Home Affairs, Kiren Rijiju chun, India rama states 29 um hai lai tuchena hin states 26 haiah State Human Rights Commissions (SHRCs) indin a ni tah tiin zanikhan ziekin Lok Sabha an hriettir. Andhra Pradesh le Telangana state hai chun State Human Rights Commission an neikhawm/inkawp tiin a hril bawk. Arunachal Pradesh, Mizoram le Nagaland hai chun National Human Rights Commission an hmatienga SHRCs indin dingin an hriettir bakah sawrkar thlungpui khawmin SHRCs indin dingin ziekin an hriettir tah tiin a hril bawk.

Uttarakhand Assembly­ah floor test nei; vawisun SC in result a puong ding
DEHRADUN: Supreme Court thupek angin Uttarakhand CM a inthawk peithlaka um Mr Harish Rawat chun zani sun dar 11 a inthawk khan Uttarakhand Assembly­ah majority a command le command­naw inentirna (floor test) a nei a, floor test hi darkar khat sunga zo a nih. Floor test huna hin Uttarakhand Assembly –a vote nei thei chin member MLAs 62 an thang a, a tul thila hmang dingin vote thlak lai hin video­a tha taka lak a ni bawk. Vote thlaka um hi May 11, 2016 hin Supreme Court hmaah phar ning a ta, Supreme Court in vawisun result a puong ding a nih.

Mr Harish Rawat chun hratna a chang an beisei thu a hril. Mr Rawat dit lova hel Congress MLAs 9 hai chu disqualify an ni leiin vote laknaa hin an thang thei nawh. Congress MLA Rita Arya chun, vote thlaktu MLAs 61 hai laia 33 han Rawat an vote niin a hril. BJP chun hneban an nih ti an pawm ta bawk. Congress le BJP chun MLA pakhat ve vein an party thlawp ni lo an vote (cross voted) niin an hril ve ve bawk.

Hieng laizing hin Mr Rawat in hnena a chang le changnaw chu vawisun Supreme Court in result a puong huna hriet theiin a hung um ta ding a nih. Independent MLA Harish Chandra Durgapal chun, PDF MLAs 6 (BSP 2, UKD 1 le Independent 3) han Rawat an vote seng thu a hril. BJP a hel Bhimlal Arya chun Congress a vote bakah Congress a Rekha Arya chun an khingpui hai tieng vote a pek tiin a hril bawk.

Floor test lei hin zani 10:30AM a inthawk khan darkar 2 le a chanve sung Uttarakhand­a President Rule hlip a nih.

MP­ah Gonds hnam hai lai hmeithai um lo
BEHANGA(MANDLA): Madhya Pradesh­a Mandla district­a Gonds hnam hai chun dan mak le danglam takel an hmang a, chu dan dungzui chun nuhmei pasal thisan hai chu an pasal hai thia inthawk ni 10 hnungah an sungkuoa pasal pakhat nuhmei la neilo tak chu pasalin an inneitir hlak a, an tuhai khawm nisien pasalin an inneitir hlak. An sungkuoa pasala nei ding an umnaw annawleh an sungkuoa a nei nuom an lo umnaw khawmin a bik taka siem banbun ‘Pato’ an ti silver a siem chu an pasal hai thi a inthawk ni 10 hnunga an inbuntir a, chu banbun a bun chun pasal nei­a ngai a ni hlak a, an bun tirtu  insungah a um hlak. Pasal naupang Patiram Warkhade khawm kum 6 mi chau a ni laiin a pu thi zo ni 9 hnungin a pi Pi Chamri Bai leh an inneitir a, hi dan hnuoiah kum tling lova hienganga nuhmei inneitir hai chu nuhmei dang an nei phal a ni leiin ama dit ngei Patiram hin nuhmei dang khawm a nei tho a, sienkhawm a pi thi hma po chu a thaikem (second wife) angin a um. Patiram hi kum 42 mi a ni tah.

Rahul Gandhi in an zin ding a kansel
NEW DELHI: AICC Vice President Rahul Gandhi chu a damnaw­khawsik leiin Puducherry, Tamil Nadu le Kerala haia inzina vote campaign nei a tum chu a thul. Rahul hi May 10 le 11, 2016 haia hieng states le UT haia vote campaign nei tum a nih. May 8, 2016­a kha damnaw tan a ni a, a doctor in ni 2 sung chu la chawlhadam dinga thurawn a pek leia an zin ding hi a kansel a nih. Hieng laizing hin Rahul Gandhi in vauna a dawng le inzawm a Congress thuoitu han Home Minister kuonga venghimna thatawk pe dinga an ngen angin Union Home Secretary Rajiv Mehrishi chun a vengtu SPG hai chu uluk taka venghimna sin thaw dingin thu a pek bakah Intelligence Bureau (IB) chu a tul anga bawzui dingin an hriettir.

GNLA Fin. Secy. thangin GNLA 14 an inpe
SHILLONG: May 9, 2016 khan Meghalaya­a chun Garo National Liberation Army (GNLA) Finance secretary Belding Ch. Marak @ Rakkaim thangin GNLA cadres 13 hai chu  Meghalaya Home Minister Roshan Warjri hmaah police headquarters­ah  an ralthuom hai leh an inpe. Belding Ch. Marak hi Class V passed chau a nih. Ralthuom an inpeklutpui hai lai AK rifles 4, HK rifle 1, Pistol 6, Grenades, VHF communication sets le document thenkhat a thang. Tulai hnai el khan GNLA 16 zet an lo inpe ta bawk.

BSF han Heroin Rs. 10 crore manhu an man
FEROZPUR: BSF hai chun May 9, 2016 khan Punjab­a Ferozpur sector, India le Pakistan ramri lai a dappui an thaw huna inruithei Heroin kg. 2, dapdawkin an man. Heroin mana um hi international market rate a chun Rs. 10 crore manhu vel ding  nia hril a nih. Hi le inzawm hin mi man ruok chu an nei nawh.

VAWISUN THUPUI
Vangduoi nia i chau el chun, I hratna chu a tlawm a nih. Thinaa thuoi hmanga umhai chu san suok la, That dinga inzosa tepa umhai chu chelkir rawh. ~ Thuvarhai 24:10­11

Editorial: Amendment thawin inrem thei hram inla

Manipur Assembly in August 31, 2015­a Bills 3­ The Protection of Manipur People Bill, 2015; The Manipur Land Revenue and Land Reforms (7th Amendment) Bill 2015 le The Manipur Shops and Establishment Bill (2nd Amendment) Bill 2015 a passed hai leia Manipur buoina chu a hung tal thar nawk ta ding niin an lang a; Hi le inzawm hin zani hmasaa Manipur CM O.Ibobi inrawina hnuoia Chief Minister Bungalow, Imphal­a all party meeting chun Bills 3­hai chungthuah Delhi –a palai tir dingin an rel a; hi dungzui hin CM inrawinain All party palai hai chu May 16, 2016 khin  Delhi inzin an ta, India President, Prime Minister le Union Minister hai inhmupuiin, Bills 3 hai Act hung  ni a, hmang vat a ni theina dinga President in an hmatienga suoi thaw dinga zu ngen an tum a nih.

Hieng laizing hin Joint Action Committee (JAC) Against Anti­Tribal Bills chun  hieng Bills pathum hai dodalnain movement chawl lovin a fepui zing bakah Bills hai dodalna leia thi mi 9 hai ruong khawm District Hospital Morgue­ah vui lovin an la um zing bawk. A tu tieng tieng khawmin ei thil phut le ei dodalna tawpsan tumna ei neinaw nia an lang lei hin Bills 3 hai chungthua Manipur phairam mi le tlangmi hai inkara ngaidan le ditdan inkalna hi chingfel vat a ninaw chun Manipur hin buoina namenlo ei tuok ding niin an lang a. Hi lei hin state sawrkar le Central sawrkar thuoitu han ngaipawimawa an hmatienga chingfel dinga hma an hung lak nuom a um hle a nih. Chun, Bill dit pawl le a dodal pawl hai khawmin inremna le inlungruolna a hung um theina ding lampui ei dap a tul bawk.

Manipur sawrkarin JAC Against Anti­Tribal Bills kuoma hieng Bills 3 hai  chungthua  thil fel lo le an ditnaw hai zieklanga pelut dinga a lo inhriettir ta angin JAC chun  November 9, 2015 khan charter of demands le Bills­a siem­that dinga an ti hai an lo peklut ta a. Chu taka chun, The Protection of Manipur People Bill, 2015­ah ‘The Act shall not be extended within the jurisdiction of the Manipur (Hill Areas) Autonomuos District Councils as well as Hill Pocket Villages encroached by the Panchayati Raj Institution.” ti clause a inthangsatir ding; Clause 2(b) a (i) Cut off year 1951 chu 1981 tia  a siemthat ding; clause 2(b) a definition of Manipur people chu ‘Manipur People means Persons of Manipur whose names are in the Census Report 1981 and their descendants.” tia siemthat ding.
   
The Manipur Land Revenue and Land Reforms (Seventh Amendment) Bill, 2015­a inthangtir sa lo­ “The Act shall not be extended within the jurisdiction of the Manipur (Hill Areas) Autonomous District Councils as well as Hill Pocket Villages encroached by the Panchayati Raj Institution.” ti chu Clause a inthangsatir ding; Hill/tribal villages land records Valley district hieng Imphal East, Imphal West, Thoubal le Bishnupur district han an kawl hai a original district kuoma pekkir vawng ding; The Manipur Shops and Establishment (Second Amendment) Bill 2015¬ah “The Act shall not be extended within the jurisdiction of the Manipur (Hill Areas) Autonomous District Council as well as Hill Pocket Villages encroached by the Panchayati Raj Institution” ti clause a inthangsatir ding; Manipur Legislative Assembly (Hill Areas Committee) Order, 1972 a Section 4(2) of the Manipur Legislative Assembly (Hill Areas Committee) Order No. 1972 “other than a Money Bill” ti thaibo a siemthat ding ti hai a thang.

Amiruokchu, hieng hai le inzawm hin Manipur sawrkar tienga inthawk JAC chun dawnna tuchen hin a la hmunaw niin ei hriet a; Bills in­pass tirtu tak JCILPS in JAC thil phut hai hi an pawm theinaw leia sawrkarin dawnna a hung peknaw khawm a ni el thei. Hi lei hin tuchena an lang dana chun JAC rawtna hi JCILPS in a pawm nuom naw leia a ni ang anga infethlengtir tal an tum leia sawrkar khawma tuchena chingfel ngaina a hrietnaw ni takin an lang bawk.

Pawl khat ditdan sukpuitling a, pawl pakhat hai thil phut ngaisaklo le hnawl a hung ni vai chun buoina namenlo Manipur­ah a hung suok ding a nih ti hi a chieng hle a. Hi lei hin state le Central sawrkar thuneitu hai khawma fimkhur taka ro an hung rel le thulai an zawng thiem nuom a um hle. Hi kawnga hin JCILPS khawmin lungril puitling tak putin, mani ditdan ngawr ngawr fepui zing lovin,  hnam tin­chitin cheng hai inrem taka ei um tlang zing theina ding lampui ngaituoa,Bills pathum hai lakkir an lo remti hlawlnaw a ni khawmin Amendment thaw bek an remti thil tul makmaw a nih.

Chun, All Parties palai han Central thuoitu hai zun hmupui an tum le inzawm hin JAC thuoitu hai khawmin movement an la fepui zing ding a ni chun, an lo thaw ta a ni khawmin Central thuoitu­hai an rang thei anga an lo zu dawr a, an dit dan, Bills­a siemthat tul nia ei hriet hai an lo zun tlun vat a, Bills hai lakkir an remtinaw a lo ni khawmin siemthat (amendment) in thaw tir ding beka an lo zu nawr nawn nawk thil tul niin an lang. Hieng Bills 3 hai leia  Manipur­a cheng hnam tum tum hai kara  buoina a tlung ding nek chun, Amendment thawin inrem thei hram inla nuom a um takzet. State tieng nek hmanin Centre tieng ei nawr hrat hi a pawimaw in an lang. Hi lei hin JAC thuoitu han Centre tieng nasa taka hmathar an lak thil tul makmaw a nih.

Post a Comment

Powered by Blogger.