Inpis joint meeting nei; resolution 7 an passed
CCPUR: Zani sun dar 11:00 khan Simveng­a Simte In, CCPur­ah Zomi Council, Kuki Inpi, Hmar Inpui le Mizo Peoples Convention thuoitu han joint meeting pawimaw tak an nei a, 3 Anti­Tribal Bills; JAC sukhrat dan ding, CCPur district­a nundan pangngai sukbuoi rawp hlak chungtu, Transfer of Land Records; tulai hnaia inthuoihmangna; Leaders Forum indin ding chungthu le Private School Guardians’s Association chungthu an hriltlang. Hieng a chunga thu hai uluk taka an hriltlang hnungin resolution 7 an passed.

Resolution an passed hai lai­Anti­Tribal Bills 3 hai le inzawma movement fe mek chungthuah mipui tamlem la rawn hmasa a, meeting nawkah hmalak pei dan ding thuah final decision lak ding; JAC sukhrat dan ding thuah May 10, 2016, 7AM in JAC leh KKL Complex hmuna meeting neia hriltlang ding; CCPur district­a  Bandh/strike um thut thut hlak leia nundan pangngai nasa taka a sukbuoi hlak chungthuah, Bandh thawtu ding han darkar 24 hmaa Inpis/Tribe Council haia inthawk phalna (permission) an lak hmasa ding; Sub­Divisions le Blocks siem thar le um mek haia land record transfer thua rawtna (proposal) chu la hmang lo phawt ding le CCPur land records hai DC/Bishnupur office­a inthawk DC/CCPur office­a hung pek vat a ni theina dinga DC/CCPur inhmupui ding; tulai hnaia CCPur district sunga inthuoihmangna inzinguta a tlungna chu nasa taka demin, hiengang thil thawtu hai chu tawpsan ding dingin an ngen a; an hmatieng Joint Innpi Forum indin dingin an remtih. Chun, Private School Guardians Association sukhring/indin nawk dingin joint meeting chun an rel.

NFSA Ration Card pekir mi 34 an tling tah
CCPUR: CCPur district­a chun National Food Security Act (NFSA) hnuoia Ration Card nei, mani ration card DC Office­a Food and Civil Supply Department  kuoma pekir (surrendered) May 9, 2016 chen khan 34 an tling tah. NFSA hnuoia hamthatna hmu thei dinga sawrkarin a ruot hai chu kum khatah (1 year) a sum laklut (income) Rs. 1 lakh (cheng nuoi khat) phaklo; insunga sawrkar thawktu umlo; motor ke 4 nei (4 wheeler) neilo hai an ni a. Kum khat­ah Rs. 1 lakh le a chungtieng lalut chinhai chun hi hamthatna hi an dawng phal lo a nih. NFSA hnuoia hamthatna dawng ve ding ka ni nawh tia hieng mi 34 hai hin an Ration Card an pekkir a nih.

Returnee­hai ta dinga meeting
CCPUR: Hmar hnam movement le inzawma ieng pawl khawm, returnees taphawthai ta dingin May 13, 2016 zing dar 10 khin Pu Siemkung In, Saikawtah meeting ko a ni a, returnees po po thang seng dinga inhriettir ei nih. A san tha tak bova thang lo hai chu “Returnees” anga ngaininaw nihai tiin P.L. Dawna, meeting Convenor chun thusuok a siem.

JNV Admission form lak thei
CCPUR: JNV, Tuinom, CCPur­a kum 2016­17 session sunga Class VI inchuk ding lakna written test­a hlawtling mi 80 hai ta dingin May 9, 2016­ May 27, 2016 inkar sungin JNV,Tuinom office­ah Admission lak thei le May 31, 2016 chenin  peklut thei ning a tih. Chun, June 19, 2016 (Sunday) khin JNV, Tuinom a Class IX laterial Exam (2016­17) um dinga candidate hai chu a hun taka tlungkim seng dingin Principal i/c, JNV Tuinom chun inhriettirna a siem.

NFSA Ration Card pekir mi 34 an tling tah
CCPUR: CCPur district­a chun National Food Security Act (NFSA) hnuoia Ration Card nei, mani ration card DC Office­a Food and Civil Supply Department  kuoma pekir (surrendered) May 9, 2016 chen khan 34 an tling tah. NFSA hnuoia hamthatna hmu thei dinga sawrkarin a ruot hai chu kum khatah (1 year) a sum laklut (income) Rs. 1 lakh (cheng nuoi khat) phaklo;  insunga sawrkar thawktu umlo; motor ke 4 nei (4 wheeler) neilo hai an ni a. Kum khat­ah Rs. 1 lakh le a chungtieng lalut chinhai chun hi hamthatna hi an dawng phal lo a nih. NFSA hnuoia hamthatna dawng ve ding ka ni nawh tia hieng mi 34 hai hin an Ration Card an pekkir a nih.

HYA in Vangai Road an sukfai
VANGAI: HYA Thingkal Branch chun Vangai Road­a tuihawk intlingkhawm, an ram sung poa mi hai inthielfaina sin an thaw. HYA Thingkal Branch hin group­a inthe a, lampuia tuihawk intling intling hai sukfaina sin an thaw a nih. (Alan F)


Inruithei laklut le zawr a khap
CCPUR: JL Hmar, Town Commander, HPC(D) chun May 7, 2016 khan thusuok siemin, Hmar People’s Convention (D) operation area sungah May 7, 2016 a inthawk inruithei laklut le zawr khapna thupek an suo. Hi thusuok pawisa lo le inzanawtu an lo um a, hrietsuok le man an lo ni chun an phu tawk hremna pek ning an ta, tukhawmin sawisel theinaw ni haia, an chungah ieng thil khawm tlung sien anni mawphurna ning a tih tiin thusuok chun a zieklang.

All Party meeting in Delhi­ah palai tir dingin an rel; 
May 16 in all party palai han New Delhi an pan ding
IMPHAL: Zani zing dar 9 a inthawk khan  CM O.Ibobi Singh inrawinain Chief Minister Bungalow, Imphal­ah All Political parties meeting nei a ni a, Inner Line Permit System (ILPS) le August 31, 2015 a JCILPS thil ngen le nawrna leia Manipur Assembly in Bills 3 a passed, The Protection of Manipur People Bill, 2015; The Manipur Land Revenue and Land Reforms (Seventh Amendment) Bill, 2015 le The Manipur Shops and Establishments (Second Amendment) Bill, 2015 chungthu hai uluk takin an hriltlang a, hi meeting­a hin Delhi­ah palai tir an remtitlang.

All Political Party palaihai hi CM O.Ibobi Singh­in inrawi a ta, May 16, 2016 khin Imphal suoksanin New Delhi an pan ding niin ei thu dawngna chun a hril. All Political Party palaihai hin Delhi khawpuia an cham sungin India President, Prime Minister le Union Home Minister hai inhmupui an ta, Bills 3 pasia um hai hi an hmatienga President in pawmpuia suoi a thaw dingin ngen an tih tiin ei thu dawngna chun a hril.

JCILPS hmalaknain zani hmasa zan khawm khan Imphal khawpui sunga hmun hran hran haiah Bills 3 hai suoi thaw dinga ngenna in nuhmei ruolin meiser sitin lampui an hraw a, BJP le Congress Office hai an khekhum. Zani sun  lai khawm khan Greater Imphal area sunga hmun hran hran haiah students le Meira Paibis han ILPS hmang nawk ding le Bills 3 haiah President in suoi thaw raw seh tia ngennain lampui an hraw a, Police han lampui hraw hai hi an dang a, insukbuoina lien tham ruok chu a tlung nawh.

Delhi­ah Manipur mi 1 an hmang
IMPHAL: May 7, 2016 a inthawk Manipur mi pakhat chu Delhi khawpuiah a umna chin hriet lovin an hmang. Mi inhmang hi Thangkholun (30) s/o Zamkhogin of Kangvai,CCPur district nia hril a nih. Thangkholun hi May 6, 2016 a Delhi tlung, Kotla Mubarakpur, South Delhi­a a ruolpa in a tlung, May 7, 2016 zing dar 9 vela a tlungna ina inthawka suokdawk, chu hnunga inlawi ta lo nia hril a nih.

Cabinet meeting nei a nih
IMPHAL: Zanikhan CM O.Ibobi Singh inrawina hnuoiah Cabinet meeting nei a nih. State Cabinet meeting chun Govt. Higher Secondary School haia part­time Lecturer le Govt. Aided College haia Lecturer­hai sin suknghet ding le Govt. Aided Colleges 12 haia  thawk ding Lecturers 290 lak dingin thutlukna an siem niin ei thu dawngna chun a hril.

Education Minister in a phum
IMPHAL:Sapam Robinhood hrietzingna lungdaw siemna ding lungphum chu zanikhan Education minister Dr Kh. Ratan Kumar in Ananda Higher Secondary School Complex­ah a phum. Hi lungdaw hi Sapam Robinhood Remembrance Committee hmalaknaa daw ding a nih. Hi hmuna hin Sapam Robinhood lim inthut tum a nih. Minister hin Gallery­cum­Library bawlna ding lungphum khawm a phumsa. Sapam Robinhood hi Class X inchuklai niin ILPS hmang dinga ngenna leia lampui hrawa a ni hun, June, 2015 a Police hai silai hmetpuok huna kap hlum a nih.

An service an la chawlsan zing
IMPHAL: Imphal khawpui sunga Diesel Auto,Petrol Auto, Tata Magic, Winger le Bus hai chun an service an la chawlsan zing. Joint Administrative Council of All Manipur Under Five Tonne Passenger service pawl chun May 6, 2016 zanrila inthawka kha hun tiemchin um lova an service hi an chawlsan a nih. State Transport Department in one time taxing system hmang dinga order an suo dodalnaa an service hi an chawlsan a nih.

AK­56 Rifles 2 leh pasal 1 man
AIZAWL:  May 7, 2016 zan khan Assam Rifles le Mizoram Police thangruol han Luangmual, Aizawlah Lalrintluanga of Luangmual chu AK­56 Rifles 2, magazine 2 le silaimu 500 leh anman niin Police thusuok chun a hril. May 5, 2016 khawm khan Champhai district sunga Hnahlan khuoah Champhai Police le Assam Rifles thangruol han pasal pakhat AK­56 Rifle 4 leh an lo man ta bawk a nih.

PM Modi May 27 in Shillong an zin ding
SHILLONG: PM Narendra Modi chu May 27, 2017 khin Shillong­ah inzin a ta, North Eastern Council (NEC) Plenary Session­ah a thang ding bakah hi ni ma hin Polo ground­a public meeting huna mipui hmaah thuhrilna hun hmang a tih tiin DoNER Secretary Naveen Verma chun a hril.

Opium kg. 54 leh mi 4 man
GUWAHATI: Narcotics Control Bureau (NCB), Guwahati pawl chun zani hmasa zantieng khan Ulubari hmunah pasal 4 hai chu Opium kg. 54.6 le morphine kg. 2.05 leh an man. Mana um hai chu­ Abdul Kalam, Md Mazibur Rahman, Sohrab Khan le Ram Milan hai an nih. Inruithei hai hi Manipur­a inthawka lak, Bihar tienga phur an tum niin Police thusuok chun a hril.

Rahul inthat dinga vauna a tuok
NEW DELHI: AICC Vice President Rahul Gandhi chun that dinga vauna a tuok niin Puducherry a Congress party thusuok chun a hril. Hi thil le inzawm hin Senior Congress thuoitu Anand Sharma chun zanikhan Union Home Minister Rajnath Singh an hmupui a, Rahul Gandhi chu venghimtu huntawk pe dingin a ngen. Union Home Minister chun hi thi hi a lo bawzui ding thu a hril.

Khuo 105 haiah electric pek nawk
NEW DELHI: Chawlkar hmasa (May 2­8, 2016) sung khan Deen Dayal Upadhyaya Gram Jyoti Yojna (DDUGJY) hnuoiah India rama state tum tum haia eletric la tlung lona khuo 105 hai electric meivar pek nawk an ni leiin DDUGJY hnuoia tuchena electric meivar peka um ta khuo chu 7,654 a tling tah tiin zanita Power ministry thusuok chun a hril a; hienghailai hin Arunachal Pradesh­ah khuo 6, Assam state sungah khuo 33, Jharkhand­ah khuo 12, Rajashan­ah khuo 9, Bihar­ah khuo 23, Chhattisgarh­ah khuo 5, Odisha­ah khuo 3 le Manipur le Himachal Pradesh haiah khuo 1 ve ve le Uttar Pradesh­ah khuo 12 a thang. DDUGJY hnuoia hin May 1, 2018 chena electric tlung lona khuo 18,452 hai electric meivar pek dinga riruong siem a nih.

HC in Congress MLA 9 hai petition a hnawl
DEHRADUN: Uttarakhand Assembly Speaker in a disqualify Congress MLA hel 9 han disqualify an nina le inzawma Uttarakhand High Court­a appeal an pek le inzawmin zanikhan hearing nei a ni a, Justice UC Dhyani in a hnawl pek a, An nuom chun Speaker Govind Singh Kunjwal kuomah disqualify an nina ennawn dinga ngen dingin thurawn a pek. MLA 9 han disqualify an nina thuah zanikhan Supreme Court­ah appeal an thaw  nawk a, sienkhawm Supreme Court chun disqualify an nina stay a remti pek nawh.Hi lei hin May 10, 2016 nia Uttarkhand Assembly­a Mr Harish Rawat in floor test a nei huna vote an thlak theinaw ding a nih. Vawisun 2PM hin Uttarakhand Assembly­ah floor test um a ta, vote tla hai May 11, 2016, 10:30 AM in Uttarakhand Legislative Assembly Principal Secretary in Court hmaah a phar ding a nih.  

Uttarakhand Assembly­a hin members 70 an um a, tuhin BJP chun MLA 28, Congress in 27, BSP in 2,  Independent MLA 3, Uttarakhand Kranti Dal (P) 1, Congress MLA 9 disqualified le BJP MLA hel 1 a um bawk. Congress hi Progressive Democratic Front (PDF) MLA 6 in an thlawp a nih.

BJP in PM Modi degree Certificates an pholang
NEW DELHI: Aam Aadmi Party leader Arvind Kejriwal in Prime Minister Narendra Modi  BA le MA degree chungthua sawiselna a siem le inzawmin BJP leader Amit Shah chun zanikhan New Delhi hmuna press Conference a ko a. Hi huna hin Mr Amit Shah chun, Delhi University hnuoia PM Narendra Modi BA degree Certificate le Gujarat University hnuoia  PM Modi MA degree Certificate hai a pholang. Mr Amit Shah chun Delhi Chief Minister Arvind Kejriwal chu thukhel thedara mipui lungril sukbuoitua intumin, PM qualification thua sawiselna le intumna a siem thuah mipui hmaa ngaidam inhni dingina phut. PM qualification thu sukchiengna dinga press meet ko a um chu thil vangduoithlak tak a ni thu Mr Amit Shah chun a hril. PM BA degree certificate an dik ngei a ni le ninaw thua reporter hai indawnna dawnin Mr Amit Shah chun Delhi University­a enfel el dingin an hriettir. Press Conference a hin Finance Minister Arun Jaitley khawm a thang.

AAP chun PM degree certificates pholanga um hai chu a lem a nih tiin an intum bakah Mr Kejriwal chun PM in a BA degree  hi a hming meimeia Alwar hmuna inthawka a lak niin an tum a nih. PM degree certificate pholang nisien khawm AAP chun nasa takin an la sawisel zing a, a BA marksheet le MA degree a hming ziek dan an ang naw bakah degree lak kum 1979 ni siin BA markshee­ah 1978 an ziek tiin an hril a; a BA marksheet­ah Narendra Kumar Damodardas Modi tiin a hming an ziek laiin Master degree­ah Narendra Damoderdas Modi tiin an ziek a nih tiin an hril.

VAWISUN THUPUI
Inngaitlawmna lawmman le Lalpa tina chu Hausaknahai le inzakaina le hringna a nih. ~ Thuvarhai 22:4

Editorial: Harsatna le buoina nasa lem a la hung intlun ding niin an lang

August 31, 2015 a Manipur Assembly in Bills 3 a pasina le inzawmin JCILPS chun public curfew le torch rally hai thangsain hma an lak tan nawk ta a. Anhmalakna hi hrat lemle nasa lema thaw an tum thu JCILPS chun an puonglang a. Hieng Bills 3 hai chungchanga hin phairam mihai le tlangram mihai lai ngaidanle dit dan nasa takin an kal a. Sawrkar chun hieng Bills 3 hai chungthua thil hungtlunghai hi chingfel chu a nuom a, nisienlakhawm awlsam taka chingfel el thei ding a ninaw lei ni ngei a ta, tuchen hin chiengfel theilovin a la um a nih. Hieng Bills 3 hai  lei hin Manipur mipui, tlangram biel le phairam biela chenghai chun harsatna chi tum tum ei tuok ta a, ei la tuok pha pei ding niin an lang. Iengang buoina le harsatna am a la hung intlun ding ti hi ngaituo tham le huphur um takel a nih.

JCILPS hmalakna leia public curfew le bandh tihai a hung um chang hin Manipur tlangram biel haiah umzie a nei naw a, tlangram biel hai thlawp a hlaw ngai nawh ti inlakhawm harsatna chi tum tum a hung intlun hlak ti chu a hretu le tuortu seng ei nih. Phairam bielah public curfew le bandh a um changin tlangram bielmipui ta ding chun ram dang or state dang fena ding a hung inkhar vawng a, CCPur District, Chandel district, Ukhrul district le Senapati district haia chenghai Arbawm sunga Ar khum ang elin Imphal khawpui le infepaw thei lovin ei hung um a, Imphal a thaw ding neihai ta ding chun harsatna nasa tak an tlun hlak. Hi lei hin an public curfew le bandh thawin tlangram bielah umzie a neinaw ei ti hi chu an dik naw a, umzie chu a nei ve a nih.

Manipur tlangram biela cheng han bandh le economic blockade ei thaw changin phairam biela cheng han thlawp nawhai sienkhawm kakhawk nasa tak a nei a, phairam biela chenghai chu Arbawma Ar khum khawm ang tho an hung ni a, harsatna nasa takin an tuor ve hlak. Hi kawnga hin tlangmihai nekin phairam mi han harsatna an tuok hi a nasa lem ring a um. Asan chu Manipur lampuihai po po khar ang a hung ni hlak lei a nih. Hiengang hi Manipur mihai ngirhmun a ni leiin Bills 3 hai chungthua hin state sawrkar le a ram mipui han inremna ei siem chu thil tul makmaw a nih.

Tulai taka ei buoina hi Inner Line Permit System (ILPS) thu chie khawm ni ta lovin ILPSle inzawma Manipur state sarkarin August 31, 2015 a Bills 3 a pasina thu hi a ni takin an lang. ILPS chu tha ei ti tlang seng a, a kal khawm ei um naw niin an lang. Amiruokchu, Bills 3 chungchang hi ei buoina tak chu a hung ni ta niin anlang. Chuleiin, Bills 3 pasia um  chungchang hi State sawrkarin ennawn nawk sienla thiltha le remchang tak a hung ni el naw ding maw? Hi Bills 3 hai chungthua hin tuta Manipur mipuihai um dan tak chu ‘Valley versus Hills’ mipuihai inbeituona niin an lang a, ILPS chu a kawk ta naw mani ding aw ti theia a hung umna chin a um.  State danga ILPS le ei state­a ILPS hi an ang ve naw mani ding maw? Manipur mipuihai ta ding chun ngaituo chet chet a tha awm ngei el.

Manipur a Senior Advocate Khaidem Mani in August 31, 2015 a Manipur Assembly in Bills 3 an pasihai “Anti­Tribal Bills” a ni nawh tia Anti­Tribal Bills tituhai public debate neipui a nuom thu a hril a. Public Debate nei hi Anti­Tribal Bills 3 hai leia harsatna le buoina hungtlung chingfelna ding chu a ninaw el thei. Amiruokchu, thil tangkai, Manipur mipui, a bikin Bills 3 hai chungchanga bengvarna le hrietna petu chu a hung ni thei beisei a um. Hieng Bills sunga thuziek umle a huopsa hai hi chieng fek fawka mipui han ei hriet le fie tha tawka ei um thei seng chu nuom a um khawp el. Amiruokchu, a se zawng ni lova a tha zawnga debate ni thei ngei sienla nuom a um.

Hieng Bills 3 hai chungchanga Manipur­a thil fe dan enin Manipur state  hung sukbuoi deu deu a ta, buoina le harsatna nasa lem a la hung intlun ding niin an lang. India President in Bills 3 hai hi pawmpuiin suoi thaw ni ta sien.la, Manipur a tlangmihai nuorin hel an ta, chuongang bawkin President in a pawmpui lo le Act a hung ni theina dinga suoi a thaw naw leh Manipur phairam mihai lungsenin nuor an ta, an helna (aggitation) a hung zuol sau sau ding a nih. Tu party khawm sawrkar hai sienla hi thua thutlukna siem harsa ti hleng an tih. Manipur­ah harsatna le buoina lienlem a la hung intlun ding niin an lang.

Post a Comment

Powered by Blogger.