Responsive Ad Slot

Hmasawnna Thar | 07 May, 2016

Saturday, May 7, 2016

/ Published by VIRTHLI
KIC in HI Prez. Le ZC Chairman thar hai lawmpuina an nei
CCPUR: Kuki Inpi, CCPur chun  zani 11:00AM khan KIC Office, Tuibung­ah Hmar Inpui President Joseph Lalrothang le Zomi Council Chairman thar B. Dongzalian Simte hai lawmpuina hun an hmang a, lawmpui inentirnain parthi inhlitirna le thingpui dawnpuina an nei.

KIC President Thangjang Haokip chun, CCPur district­a buoina tum tum um huna tha taka hma laktlang a ni theina ding le inhmelhrietuona dinga hi hun buotsai a ni thu hrilin, buoina suok huna hnam thuoitu hai ei thangruol naw chun mi hai hmusit ei ni ding a nih tiin a hril a; CCPur district sunga kidnapping (inthuoihmangna) case um thu ah thuoituhai ei thangruol naw chun hmatieng buoina nasa lem ei la tuok pei ding a nih tiin a hril.


B. Dongzalian Simte chun lawmpuina KIC in a nei chu lawmum a ti thu hrilin buoina tum tum um hunaCCPur Dist. a Inpui hai ei thangruola sukfel a pawimaw thu a hril.  

Joseph Lalrothang chun, Hmar Inpui President a ni hnunga parthi a awrna hmasa tak a ni thu hrilin Manipur­a Non­Naga tribe tum tum hai ei thangruol naw chun tu hnam khawm hlawtling le damkhawsuok ding ei um nawh; Anti­Tribal Bills thuah JAC hnuoia hnam tum tum han inthuruol taka movement an fe pui anga lungril thar puta inthuruol tak le ke khata ngir nawk dingin hnam thuoitu hai a ngen.

Hi huna hin CCPur Dist. a Land Records, District sunga bandh/strike thaw a ni hlak dan, food security le JAC in May 10, 2016 chena Inpui hai representative 3 seng tir dinga an ngenna chungthu,   CCPur district sunga parents/guardians Association indin tum chungtu, Kidnapping thu hai an hriltlang a, May 9, 2016 a Simte Inn, Simveng­a joint meeting huna hriltlang nawk dingin an remtih.

DTO in Revenue Rs. 6,40,018/­
CCPUR: District Transport Office (DTO), CCPur chun April, 2016 thla sung khan Revenue Rs. 6,40,018/­ a hmu a, challan in sawrkar­ah a submit. Chun, April, 2016 thla sung khan DTO/CCPur­a chun motor hran hran 123 registered a ni a, chu hai lai chun Truck 4, Van 5,  Car 11, Jeep  2,  Autorickshaw 8, 2­wheeler 92 le Others 1 a thang.

Singngat­ah DLCC meeting nei
CCPUR: Zani sun dar 12 khan Mr Lunminthang Haokip, DC, CCPur inrawinain Singngat khuoah   District Level Coordination Committee­cum­review meeting nei a nih. Hi huna hin SDO/Tuibuong chun SAGY le inzawmin report a pek a, DAO/CCPur chun PMKSY le inzawmin report a pek. Singngat khuo mipui hai laia department tum tum sinthaw hai hrilhrietna nei malam nuomna leia DLCC meeting hi Singngat khuoa nei a nih.

DI Sinngat inhmupui dingin
CCPUR: ZEO Control­na hnuoia DI of School, Singngat block sunga Utilized Teacher hai chu an hmatieng DI of School/Singngat inhmupui dinga inhriettir an nih.

HSA in Govt. school hai inspection an thaw
CCPUR:  HSA CCPur Jt. Hqrts thuoitu hai chun April 6, 2016, 11:00AM a inthawk khan HSA CCPur Jt. Hqrts in a huom sunga Government Schools 8 hai fangkuolin inspection an thaw a, Schools 4­ Thenmuol JB School; Muolvaiphei UP School; Saidan JB School le Thingchom JB School hai chu tha takin an fanction a, school dang 4 hai chu kai lo, building chau um an ni leiin concern headmaster hai explanation call thaw ning a tih tiin HSA CCPur Jt. Hqrts President chun a hril.  School kai tha hai khawmin facilities an hmu thanaw thu an hril a, hmatieng peiah school hai tha taka an function theina dinga hma lak pei ning a tih tiin HSA CCPur Jt. President chun a hril.


Manipur CM kuomah Memorandum an pek
CCPUR: KIC Office, Tuibuong­a Inpui/Tribe Council leader han hmatienga hmalak dan ding an hriltlang zo hin tulai hnaia CCPur District sunga inthuoihmangna (kidnapping) inzing uta a tlung le inzawmin zanikhan Mr T.K. Simte, MCS, AC­to DC/CCPr fethlengin Manipur Chief Minister kuoma Memorandum an pek.



An Memorandum a hin Inpi, Tribe Council  hai chun March, 2016 thla sunga hmelhrietlo han Muanthang le Suanmang of Lingsiphai village thuoihmang­a Rs. 50 lakh an ngen, Civil society organisation tum tum hai hmalakna leia dam taka inthlasuok an ni thu; Mi 2 hai thuoihmang an ni hnung April 26, 2016 khan GS Haupu, MLA 60­Singngat PRO Thangsianbiak  @ Biabiak Zou chu  sum le pai ditna leiin Tribal  Revolutionary Army (TRA) han thuoihmangin an tlansuokna dingin Rs. 70 lakhs an ngen a, tuchen hin an lan thlasuok naw thu an zieklang.

CSO leaders han insuo a ni theina dinga hma an lak lai zingin Contractor hnuoia sinthaw JCB driver Khumanthem Tondanba Singh s/o Kh. Kwaklei Singh of Pukhao Naharup Awang Leikai chu May 3, 2016, 11:30PM vel khan ralthuom chawi mi 6/7 vel han sum ditna lei bawkin an thuoihmang tiin  an zieklang.

Hiengang criminal activities suktawp le control a ni theina dingin state sawrkar hma la dingin an ngen a, thuoihmanga um mi 2 hai dam taka inthlasuok an ni theina ding, mipui ditdan anga hma la ding le mi thuoihmangtuhai chunga ram dan (law of the land) dungzuia  action la dingin an ngen.

Memorandum a hin, Simte Tribe Council President; United Zou Organisation President; Tedim Chin Union President, Hmar Inpui President; Vaiphei People Council President;Paite Tribe  Council President; Gangte Tribe Council President; Kuki Inpi (KIC)CCPur President; Mate Tribe Council President, Thangkhal People’s Organisation President le Mizo People Convention President han hming an ziek.

JPO in an dem thu an puong
CCPUR:  Zanikhan Joint Philanthropic Organisation (JPO) Churachandpur chun Kuki Khanglai Lawmpi (KKL) Office­ah meeeting an nei a, Mr Thangsianbiak @ Biabiak le Toudoubi Singh hai tu ti hrietlo han an thuoihmangna thuah Condemnation an insuo a, mi thuoihmangtu hai demin, an mi thuoihmangtu hai chu him le dam taka an hmatienga insuo ding le hienganga mi thuoihmangna tawpsan dingin an ngen bakah Manipur sarkar khawm hma la dingin an ngen bawk.


Condemnation a hin YMA Manipur President; KKL GHQ Gen. President; ZYA GHQ President le HYA GHQ Gen. President han hming an ziek.

Entrance test hran nei theinaw nihai:SC
NEW DELHI: Supreme Court chun, India rama Medical Colleges hran hran haia MBBS le BDS inchuk ding lakna dinga sukthar single­window entrance National Eligibility Entrance Test (NEET) ti loah unaided private medical colleges han admission/entrance test hran buotsai theinaw ni hai tiin hrilfiena a siem. Private colleges thenkhat han entrance test a hrana nei dinga inbuotsai le test lo nei ta hai thua lawyers thenkhatin hrilfiena pe dinga ngenna an siem le inzawma Supreme Court in hi thua hrilfiena hi a hung siem a nih. NEET exam phase 1 chu May 1, 2015 khan nei a lo ni ta a, phase hnina NEET­II chu July 24, 2016 khin nei nawk a ni ding a nih.

EFI NE India Secy. thar in charge a lak
CCPUR: Rev. Halikha Ama chun May 6, 2016 khan outgoing Secretary Rev. H. Thiek a inthawk Evangelical Fellowship of India (EFI) North East India Secretary charge (mawphurna) a lak. Rev. Ama hi Nyshi  Baptist Association,  Arunachal Pradesh a  General Secretary sin thaw hlak le EFI National  Committee Vice Chairman lo ni hlak a nih.

Centre in Uttarakhand Assembly–ah floor test a remtih; May 10 in floor test a um ding
NEW DELHI: Uttarakhand President Rule hnuoia sie a nina le inzawma Supreme Court in ama (SC) enkaina hnuoia Uttarakhand Assembly­a floor test nei a remti le remtinaw dawnna pe dinga sawrkar thlungpui ana hriettirna thuah sawrkar thlungpui chun dawnna zanikhan a pek a, Mr Harish Rawat inrawinaa Congress sawrkar chu majority a command le command­naw floor test (buk) dingin a remtih. Hi le inzawm hin Supreme Court chun May 10, 2016 khin Assembly­ah majority a command le command­naw inentir dingin an hriettir. Amiruokchu, Uttarakhand Assembly Speaker in Congress MLA 9 a disqualify hai chu Harish Rawat sawrkar buk a ni huna vote an thlak ve a remti nawh. Assembly­a Harish Rawat sawrkar bukna (floor test) um ding lei hin floor test hun darkar 2 vel sung chu Uttarakhand President Rule hnuoia siena hlip lailawk ning a tih.


Sawrkar bukna ding le inzawm hin SC chun observer a ruot ding bakah Chief Secretary le DGP hai chu vote thlaknaa thang thei ding member hai kim taka an thang seng theina ding le felfai taka floor test nei a ni theina dinga hma lo la dingin an hriettir.

Vote lak huna hin Harish Rawat thlawptu pawl hai Assembly house side khatah inthung an ta, opposition hai side khatah inthung an ta, Court in hmang tulna a nei leh ennawn thei dingin vote lak hun sung hi video in tha taka thla lak ning a ta, votes tla hai hi a tuomna (sealed cover) leh May 11, 2016 khin Supreme Court hmaah phar ning a tih.

Hieng laizing hin Chief minister Harish Rawat peithlak tuma an hel  le BJP  bel Congress MLA 9 hai Speaker in anti­defection law hnuoia March 27, 2016­a a disqualified han appeal an thaw le inzawmin Nainital­a Uttarakhand High Court chun May 7, 2016 hearing nei a tih. Disqualify­a um MLA hai vote nei thei lo dinga SC in a ti lei hin vawisuna hearing result hin sawrkar bukna dingah kakhawk a nei hle dinga ngai a nih.

Uttarakhand Assembly­a hin member 70 an um a, Congress MLA 9 hai hel lei hin Harish Rawat chun tuhin thlawptu Congress MLA 27 a la nei a nih.

Nundan pangngai a sukbuoi
IMPHAL: JCILPS in  August 31, 2016 a Manipur Assembly in Bills 3 an pasihai Act a siem dinga an ngenna le inzawma darkar 42 Public Curfew an thaw chun nundan pangngai nasa takin a sukbuoi. Imphal le a se vel haia chun dawr, bazar, inchuknain le sumdawngna hmun ha ikhar an ni a, mimal motor tlan inlawn an um nawh. Thoubal le Bishnupur district haia khawm nundan pangngai a sukbuoi nasa hle.Tlangram biel haia ruok chun umzie a nei nawh tiin ei thu dawngna chun a hril.

Police han Driver 2 an sansuok
IMPHAL: Zani hmsa zan dar 6 vela NSCN (IM) ni dinga ringhla han an thuoihang Pallel Forest Gate a Driver pahni Md. Indra Ahmad (45) s/o Md. Mubarak of Waithou of Saigomshang le Md. Sabir (26) s/o Md. Jalaudin of Waithou Sangomshang hai chu zani zing dar 10 vel khan Chandel district a Tengnoupal Police station huop sunga Tuisimi Village­ah Thoubal Police District Police Commando han an motor MN04A­4741 & ML01/8476 hai leh  an sansuok niin Police thusuok chun a hril.

AR han IED pakhat an hmu
IMPHAL: Zani zing dar 6 vel khan 22 Assam Rifles han Thoubal District sunga Pangalthabi an ti hmuna bomb (IED) an hmu a, Assam Rifles a bomb disposal Squad han an va lak a, pawi tawk nawna ding hmuna zani 11AM vel khan an sukpuok niin HQ IGAR(South) thusuok chun a hril.

Original Certificate lak thei
IMPHAL:Council of Higher Secondary Education, Manipur hnuoia Higher Secondary Examination, 2011 a (Compartmental Examination, 2011 thangsain) Original Certificate chu May 9, 2016 a inthawk Council Office, Imphal­ah lak thei ning a tih tiin  Secretary, Council of Higher Secondary Education, Manipur chun inhriettirna a siem. School or mimal khawma laksuok thei ning a tih.

Pasal pakhat AK­56 leh man
AIZAWL: Zani hmasa khan Mizorama Champhai Police le 10Assam Rifles thangruol han Mizoram le Myanmar ramri zula Hnalan­ah Myanmar mi Dalsiammung chu AK­56 Rifles 4,  magazine 4 le a chuongna Bike leh an man a, District Jail­ah an sielut. Dalsiammung silai hai hi ama ta ni lovin a neitu tak chu Tiddim, Myanmar mi an nih tiin Police hai kuomah a hril.

LPG subsidy tawpsan 1 crore chuong 
SHILLONG: India rama chun May 1, 2016 chen han LPG hmangtu 1 crore chuong han LPG Subsidy an tawpsan (surrendered) tah tiin Minister of State (I/C) for Petroleum & Natural Gas Dharmendra Pradhan chun zani hmasa khan Rajya Sabha an hriettir.

India hmarsak biel bika state tum tum haia LPG subsidy tawpsan umzat chu­ Assam­ah 184505 chuong; Manipur­ah 46123; Mizoram­ah 43854; Nagaland­ah 31233;Tripura­ah 17047; Arunachal Pradesh­ah 22713; Sikkim­ah 7693 le Meghalaya­ah 7404 an nih tiin Minister chun a hril.

Sonia, Singh le Rahul hai man le insuo nawk
NEW DELHI: Modi sawrkar chu democracy thattu le Congress chu thu bulbal nei lova intumtu tia dodalnain zanikhan Congress party chun Jantar Mantar a inthawk Parliament House chen lampui hrawna neiin “Save Democracy” tiin Parliament an khekkhum. Hi lampui hrawnaa thang Sonia Gandhi, PM hlui  Manmohan Singh le Rahul Gandhi hai chu Police han an man a, sienkhawm insuo nawk an nih.

Entrance test hran nei theinaw nihai:SC
NEW DELHI: Supreme Court chun, India rama Medical Colleges hran hran haia MBBS le BDS inchuk ding lakna dinga sukthar single­window entrance National Eligibility Entrance Test (NEET) ti loah unaided private medical colleges han admission /entrance test hran buotsai theinaw ni hai tiin hrilfiena a siem. Private colleges thenkhat han entrance test a hrana nei dinga inbuotsai le test lo nei ta hai thua lawyers thenkhatin hrilfiena pe dinga ngenna an siem le inzawma Supreme Court in hi thua hrilfiena hi a hung siem a nih. NEET exam phase 1 chu May 1, 2015 khan nei a lo ni ta a, phase hnina NEET­II chu July 24, 2016 khin nei nawk a ni ding a nih.

MISSIONARY DAY CHAWL
CCPUR: MHJU Holiday dungzuiin May 7 hi kum dang ang bawkin Missionary Day chawl­a a hmang a ni ding leiin MHJU hnuoia um tuolsung chanchinbu office­hai chu  khar an ni ding a nih. Hi lei hin May 8, 2016 khin Hmawanna Thar thangin tuolsung nitin chanchinbuhai suok naw nihai. Chun, May 8, 2016 Pathienni chawl a lo ni nawk leiin Hmasawnna Thar chu May 10, 2016 in a hung suok nawk chau ding a nih.

A sangpa kap hlumtu man
IMPHAL: Zani hmasa khan a sangpa kap hlumtu Thotrei Muivah (27) of New Canaan, Ukhrul district chu Litan Police han Yaingangpokpi bula Leiyaram khawsungah an man. Thotrei Muivah hin April 24, 2016, 10:30AM vel khan 12bore licensed silai hmangin a sangpa Ngamlei Muivah (18) a kap hlum a, hi hnung hin a tlan hmang a nih. A sangpa le hin an insel lungsen leia a kap hlum nia hril a nih.

NE biela dingin Rs. 33097.02 crores
NEW DELHI: India hmarsakbiel (NE) –a Central ministries/departments tum tum 56 hai sum hmang dingin sawrkar thlungpui chun Rs.33097.02 crore a sie bakah DoNER ministry kuomah Rs. 2400 crore le Sixth Schedule hnuoia ADCs haia sum hmang dingin Rs. 1000 crores sie a nih tiin Union minister of state (I/C) for Development of North Eastern Region (DoNER), Dr. Jitendra Singh chun ani hmasa khan Rajya Sabha an hriettir.

Thla 6 dang AFSPA sie nawk
NEW DELHI: Sawrkar thlungpui chun Arunachal Pradesh a districts 12 haiah Armed Forces Special Power Act (AFSPA) la sie naw dingin a rel. AFSPA hun hi May 4, 2016 khan a bo a, AFSPA hi May 5, 2016 a inthawk thla 6 dang keisei nawk a nih tiin Union Home Ministry thusuok chun a hril.

Teacher 1 chau umna Primary School 1,917 a um
ODISHA: Odisha­a districts 29 haia chun teacher pakhat chau umna School and Mass Education Department hnuoia Primary schools 1,917 a um tiin School and Mass Education minister Debi Prasad Mishra chun a hril a. Hiengang teacher pakhat chau enkawlna hnuoia um primary school hi Maoist hai hratna Rayagada district­ah a tam tak tiin a hril a, teacher pakhat chau enkawl primary Schools 437 zet a um niin a hril.

Darkar 72 Police kuta um dingin
AIZAWL: Sumdawngtu thenkhat rangkachak kg. 5, Rs. 1450 lakh manhu vel lapektua intumna leia man 39th Asam Rifles Commandant Col. Jasjit Singh chu zanikhan Court in thu indawn chieng dingin darkar 72 sung Police kuta la um dingin a rel hri phawt leiin Mizoram Police hnuoia SIT kutah sie a la nih.

Telangana­ah lum leia thi 234 an tling tah
HYDERABAD: Telangana a chun boruok lum tuorzo lova mihriem thina tuok 234 an tling tah. Khaw lum tuorzo lova mihriem thi tamna tak chu Nalgonda district niin mi 76 zetin thina an tuok tah. Hieng laizing hin zani zingkar khan Telangana state sunga hmun tum tum haia thli le ruoin nasa takin a nuoi a, thlai le thil tamtak a suksiet.

SIN RUOK
State Mission Director, ICDS, Government of Manipur hnuoiah kum 1 sunga dingin hieng a hnuoia sin hai hi a ruok. Application form chu May 21, 2016 chenin Rs. 500/- (general), Rs. 300/- (ST, SC,OBC) le  Rs. 300/-(general), Rs. 200 (ST,SC,OBC)( pekin campus of the Govt. of Deef & Mute School Welfare Complex, Takyelpat, Imphal-ah lak le peklut thei ning a tih.
STATE ICDS MISSION
1. Programme Manager Post 3 (Gen). Pay Rs. 13,700/- (9300+GP 4400). Thiemna Master Degree in Social Work/Public Health/Business Administration/Food & Nutrition.
2.  Sr. Consultant/Consultant post 5 (Gen-4, ST-1). Hlaw le thiemna a chunga mi ang tho, sienkhawm Ph.D dit bik an nih.

DISTRICT ICDS MISSION
3. District Coordinator post 40 (Gen. -22, ST-12, OBC-M 5, OBC-MP 1, PwD-I (LD). Hlaw le thiemna a chnga mihai ang tho.

PROJECT ICDS COMMITTEE BLOCK
4. Nutrition & Health mobilizers post 43 (Gen. -23, ST-13, OBC(M)-6, OBC (MP)-1, Pwd-I (VI). Thiemna Graduate. Pay Rs. 7,100 (5200-GD 1900)
5. ECCE Coordinator Post 43 (Gen. 23, ST 13, OBC(M) 6, OBC(MP) 1, PwD 1 (HI).
6. M&E Nutrition Surveillance Coordination post 43. Thiemna, pay le reservation a chunga mi ang tho.
BLOCK ICDS RESOURCE CENTRE
7.Counsellor post 5 (Gen. 4, ST-1).Thiemna Post Graduate in Nutrition/Social Work/Psychology/Social Sience. Pay Rs. 13,700 (9300+GP 4400)
8. Para Counsellor Post 5 (Gen. 4 & ST 1). Thiemna Graduate/Post Graduate in Social work/Psychology/Social science/Nutrition. Pay Rs. 7,100 (5200+GP 1900).
9. Outreach worker-cum-Helpline Operation post 5 (Gen. 4, ST-1). Thiemna le hlaw a chunga mi ang tho.

Kum zat ding 38 years, ST/SC 43 years, OBC 41 yrs, PwD 48 yrs.
Medical Directorate, Govt. of Manipur hnuoiah hieng a hnuoia sin hai hi temporary basis in a ruok.
1. Driver (light) post 61 (UR-32), OBC(M) 8, OBC(MP) 2, ST-18, SC-1).
2. Office Assistant-cum-Computer Operator post 91 (UR-46, OBC(M) 12, OBC (MP) 3, ST 27, SC-21)
3. Pharmacist (Allopathy) post 62 (UR-32, OBC(M) 9, OBC(MP) 2, ST-18, SC-1).
4. Health Worker post 64 (UR-32, OBC(M)-9; OBC(MP) 2, ST-20, SC-1)
5.  Grade-IV post 352 (IUR-177, OBC(M) 44, OBC (MP) 14, OBC (Teli, Badi (Nepali) Etc. 1, ST-109, SC-7)
6. Staff Nurse post 163 (UR-81, OBC (M) 19, OBC(MP) 7, OBC(Telibadi Nepali etc) 1, ST-51, SC-4)
7.  ANM/FHW post 155 (UR-79, OBC (M) 19, OBC(MP) 6, ST-48, SC-31).
A chunga sin ruok apply nuomhai chun mani umna district tina Employment Exchange-hai fe thlenga apply ding a nih. Sin ruok umzat hi suktlawm or suktam thei le PwD candidate-hai ta dingin seat 3%  huol pek ning an tih tiin Director, Health Services, Govt. of Manipur thusuok chun a hril.

VAWISUN THUPUI
Mi pasie lunginsietttu chun Lalpa an puktir a na, A thil thaw tha chu ama chun pe nawk a tih. Beiseina a la um laiin i naupa chu thunun la, A sietna ding em chun lungril nei naw rawh. ­~Thuvarhai 19:17­18

Editorial: Pawisa dit leia inthuoihmangna

Kum 1991­94 inkar sung khan Uttar Pradesh state ah mihriem inthuoihangna (kidnapping) ei ti hi a hluor em em el a. Tienlai deua USA rama Texas le New Mexico mi inrukhmang an ching le uor bek bek hun ang el khan an ngirhmun a ni deu takin an lang. A bikin Aligarh, Bulandsahar, Ghaziabad, Meerut, Muzaffarnagarh, Haridwar, Saharanpur, Dehradun, Seoria, Barila, Varanasi, Mainpuri, Etwah, Kanpur le Agra haiah inthuoihmangna hi a hluor zuol bik. Hiengang khawpa mihriem inthuoihmangna a hluor elna hi san chi hran hran chu um mei a tih. A san bulpui tak ruok chu pawisa ditna leia inrukhmangna hi a hluor a nih. Manipur a khawm mihriem inrukhmangna hi a hluor em em el a, hiengang hun laia Uttar Pradesh ngirhmun angah hin Manipur khawm ei um mek niin an lang.

Uttar Pradesh state hi India rama state lien tak, mihriem bubitna tak, MLA le MP hau tak State a nih. Mirethei an tam ang bawkin mi hausa tak tak tam tak an um laizingin thalai sin nei lo an hung pung tuol tuol a, chuonghai ta ding chun mihausa turu tak tak le an nauhai le an sunghai thuoihmanga pawisa cheng nuoitela intlantir chu sin hlawk tak le awlsam taka pawisa hmuna tha em em el a hung ni thei leia hieng hun lai hin inthuoihmangna hi a hluor em em a nih. Politician le hieng misuolhai hin inzawm ruka thilthaw an ni leiin Police hai ta ding khawmin a harsain a khir hle a, thuoihmanga um sunghai ta ding khawma to tawka pawisa pek chu a him taka hriein misuolhai chun pawisa tam tak lalutin politician­hai leh an insem hlaka hriet a nih.

Misuol pawl (Gang) hai hin thil an thaw thei hle a, a san pakhat chu politician­hai leh an inzawm ruk lei a nih. Mi pawisa an lakpek hai hi an insem a, politician­hai chun vote campaign­nain an hmang hlak an ti chuh! India ram stare tin le khawpui tinah hin pawl hran hran, Gang­hai chu tulai hun chena hin an la bo bik naw a, an la um thlie thluo a nih. Tuta hma deu a India rama Gang turu, inlar em em, thil thaw thei tak el laia an lar zuol bikhai chu Dawood Ibrahim, Chhota Rajan, Haji Mastan, Arunjawali, Amar Naik le Ashwin Naik tihai kha an nih. Tulai hin chu hiengang Gang­hai hi an ri hriet ding a um ta nawh. Chhota Rajan chu man a ni ta leiin lungin run thim a nghak mek. Dawood Ibrahim ruok chu man a la ninaw a, Pakistan­ah an biru nia hriet a nih. India sawrkar buoipui em em el a la nizing.

Dawood Ibrahim hi chu mi turu tak le hausa tak el, sawrkar khing ngam misuol a nih. Bombay khawpui, tuta Mumbai thangsana hmanga a chet tak tak lai khan chu India sawrkar a sukluhai hne hle. Khanglai huna khan Dawood Ibrahim khing ngam a um a, chu pa chu Dawood Ibrahim in Rs. 10 crore peka thlem lungawi a tum a, sienkhawm a hnielin a hnawl hulhuol a nih.Hi mihriem hi mi ngaisang um takel, mi entawntlak G. R.Khairnar a nih. Kha hun laia Bombay Deputy Minicipal Commissioner a nih. Ama hin Gang tum tum le Dawood Ibrahim ngei in thangsain pawisa thienghlim lo hmanga bawlhai, In, building tha le ropui tak tak hai chu a suksiet pek ngam a nih. Vauna an pek khawmin a ti der naw a, a thaw tum hai chu a thaw miel miel el a nih.

Hiengang inthuoihmangna ditum lo le tha lo tak el hi Manipur a khawm a la hluor zing el hi a pawi bek bek el a nih. Inthuoihmangna hi ei dit nawa chu ei do let ngam naw leiin a la hung um pei ding niin an lang. Inthuoihmangna hi Manipur tlangram le phairam biel sung haiah a la hluor em em a, hiengang thaw hlakhai chun awlsam taka pawisa hmuna, hausak thutna le sumdawngna tha takin an hmang a nih ti inla ei hril suol taluo ring a um nawh. Manipur­a inthuoihmang tlung hlak nasan hi san dang dang um hlak sienkhawm a bulpui tak chu pawisa ditna lei a nih. Sawrkar tha le hrat ei nei hmakhat chu inthuoihmangna hi a la fe pei ding niin an lang.

Inthuoihmangna hi Churachandpur District a khawm a bang bik nawh. Kum 1990 lai bawr vel khan CCPur town le a se vel haiah pawisa ditna leia inthuoihmangna a hluor hle a, khang hun kha ei tawng nawk el ding am a ni maw? Intuoihmangna leiin pawisa tam tak el ei seng el bakah mihriem hringna hlu em em el thahnemtawk tak ei chan ta a, khangang kha chu tuok tanaw hram inla nuom a va um lawm lawm ngei de! Inthuoihmangna hi ei do tlang ngam a hun ta takzet a nih. Tulai hnai el khan CCPur district a khawm in­thuoihmangna a tlung nawk a, thuoihmanga um hai hi dam le hima insuo nawk an ni hi mipui dit dan a nih ti a thuoihmangtuhan hung hriein, an hmatiengin hung insuo ta dingin ei ngen a nih. Tuta hma met khan Special Contractor Mangbeldam sinthawtuhai thuoihmang an ni a, tuhin T. Lala Vaiphei, Contractor sinthawtu le Singngat MLA Ginsuanhau PRO hai thuoihmang an ni nawk a, a thuoihmangtuhai kuta an lan tang zing a nih. Pawisa ditna leia inthuoihmangna hi tawp ta sienla nuom a um ta bek bek el a nih.

Don't Miss
© all rights reserved
made with by Simon L Infimate