Responsive Ad Slot

Hmasawnna Thar | 01 May, 2016

Sunday, May 1, 2016

/ Published by VIRTHLI
Saidan­a khawm In 9 vel a suksiet
CCPUR: April 28, 2016 zana thlipui, riel le ruo inthuoa a hrang, tlak le sur lei khan CCPur town­a inthawk km. 3 vela hla Saidan, CCPur, Manipur a khawm In 9 vel a suksiet a, In pakhat lem chu a mut dar vawng a nih.

Saidan khuoa thli in In a suksiet In neitu hai chu­ Ezra s/o Thansang; John Lalthasang s/o (L) Malsawmthang; Lalduoilo s/o J. Saitho; Rema Keivom s/o (L) Fimthankhum; Lalrohlun s/o Songthangsei; Lalzarmawi w/o (L:) Thahlun; Lalnghakmawi w/o Lalramfang; Solomon s/o (L) L.T. Khuma hai chengna in le Methodist Church Children sunday School hai an nih.



Thlipui hrang hin Mr Ezra chengna in chu a mut dar vawng a nih. Hi baka hin Rema Keivom, Lalrohlun, Lalzarmawi le Methodist Church Naupang Sunday School in hai khawm a mutsiet vawng (totally damaged) a nih. Hi le inzawm hin HYA Saidan Unit hmalaknain April 29, 2016 khan hnatlang neiin Thlihrangin In a mut siet hai siemthatna sin an thaw a, Saidan HYA chun Rangva inchawin Thli in a mut dar vawng Mr Ezra chengna in ding hi a thar hlawkin an bawl tha pek.

Bieltu MDC Pu Hrila khawmin Saidan khuoa thli in In a suksiet hai hi a hmuna va kanin, Saidan HYA Unit fethlengin siet tuok hai thangpuina dingin Rs. 5,000/­ a pek niin zanikhan Saidan V/A haia inthawk thu ei dawng.

North East Foodbanking Network hawng
CCPUR: Ms Mannuamching, IAS, CEO, ADCC chun zani 8:30AM khan SEDO Office, Sumkong Kaimun, Tuibuong –ah North East Food Banking Network a hawng.N. Sukajit, Project Manager, NERCORMP/CCPur chun, NERCORMP chun project hi a thei ang anga a thangpui ding thu hrilin Volunteer T­Shirt a tlangzar.



Ms Mannuamchng chun hiengang project hawnga um chu lawmum a ti thu hrilin mimal le organisation tin hai chu thlawp dingin a ngen. Sabine Neidermajer, Project Co­ordinator, MSF chun phingtam le hriselna hi inzawm tlat an ni leiin project hi theitawpa an thlawp ding thu a hril. Rev. Hangminthang, Bishop MELC chun thawktu hai le volunteers 25 hai ta dinga tawngtaipekna a nei.

Self Attestation hmang thei ta ding
CCPUR: Dr Suhel Akhtar, Addl. Chief Secretary, Administrative Reforms, thusuok dungzuiin, Govt. of Manipur hmingin Affidavit­ah Law (lawryer) han signature an thaw la tul sien khawm Manipur Gazette Order No. 1202, dated March 9, 2016 dugnzuiin Self Attestation hmang thei a ni ta ding a nih. Self Certificate/Self  Attestation indiklo taka thaw an um ruok chun Indian Penal Code dungzuiin action lak ning a ta, student han Educational Institution, recruitment, Scheme/Benefits etc thil haiah Original document kim taka an chawi tul a tih. Hi thil hi District Administration tinin zui le zawm seng dingin Dr Suhel Akhtar chun an hriettir.

Hmar Area Congress Comm. an indin
CCPUR: April 24, 2016 khan Saikawt Assembly Constituency sunga Hmar khuo haia Congress President le Secretary han joint meeting an nei a, lungruol takin Hmar Area Congress Committee an indin a, President dingin Darsanghlei; Vice president ­L. Dinlien; Secretary­ James Hmar; Asst. Secretary  Tv. Lienvon Neitham; Finance secretary­ Pu. Lalzaulien Joute le Treasurer­ Pu. Kunjo Pudaite hai thlang an nih.

Free Health Camp an buotsai
CCPUR: 7­Assam Rifles, HQ veng hai huoihawtnain zanikhan Lajangphai­ah Widow Welfare Assocation, Asia le thangruolin Free Health Camp nei a nih. Civil doctor 3: Dr. Rohini (Pediatricians), Dr. Vungngaihching (Gynecologist) le  Dr. Alex Touthang (Ortho) hai bakah Assam Rifles doctor 2: Dr. Syam S. Gurjar (General illness) le Dr. V. Vaiphei, CMO han mi 200 vel hai hriselna an enfel a, damdawi khawm Rs. 1 lakh chuong manhu ding a thlawnin an sem.


Hmar Martyrs’ Day a ding inbuotsaina a fe mek:HMARTOB in lawmthu an hril
CCPUR: Hmar Inpui Gen. Hqrs hrietpuia indin HMARTOB inrawinaa Saikawt fiel­a 13th State Level Hmar Martyrs’ Trophy Football Tournament a fe mek bakah football final le May 16, 2016 a Saikawt khelmuola Martyrs Day hmangna dinga inbuotsaina a fe mek a, HYA branch tum tum hai khawm nasa takin an insingsa mek a, Rengkai HYA Branch khawm Mr Immanuel Lalneisang, Secy. Art & Culture le H. Samson, President hai inrawinain nasa takin an insingsa a, pasal 26 han silai le uniform leh Hmar pasalthahai inzana  an pek ding a nih. Hi taka thang ding hai zanikhan Mr H. Samson chun an inchukna h muna fein Rs. 100/­ seng Mr Alan Famhoite, Asst. Gen. Secy. HYA GHQ fethlengin an hlan tawl.

Hienglaizing hin Hmar Martyrs’ Trophy Football Tournament 2016 fe meka Score Board cheng sang tel manhu HMARTOB hmang dinga Sponsored le Presented tu DOWNTOWN GRAFIX Sielmat, CCPur chungah lawmthu an hril. Score Board hi April 28, 2016 zan khan Organiser hai kutah inhlanna Pu Johnson Hrangchal Proprietor, DOWNTOWN GRAFIX in a nei a, Upa Hrangkhuplien in Pathien kuoma tawngtaina’n an hlan.. Hiengang Score Board hi a la vang hle a hril a nih. Organiser le mipui mit a tlung hle. (from:LRS Puruolte)

Office­ah an insawn
CCPUR: Tipaimukh Road­a Town office building bawl thar ding leiin zanikhan EO Town le staff hai chu Tuibuong­a District Council Office­ah an insawn; building bawlzo hma po hi hmuna hin um an tih.

Career guidance
CCPUR: Lutheran Youth Fellowship (LYF) Lamka Division huoihawtnain zani 10AM  khan HQ Church, MELC, Zomi Colony ah One Day Career Guidance Program nei a ni a, Class X le XII result nghak mek student tam tak an thang.

Reservation norms hmang vat dingin
IMPHAL: Central Educational Institutions (Reservation in Admission) Amendment Act, 2012 dungzuiin Manipur University­ah ST student hai ta dingin admission reservation norms (31 percent) hmang vat ta dingin Manipur University Tribal Students Union (MUTSU) chun Manipur University thuneituhai kuoma ngenna an siem. An thil ngen le inawmin zanikhan MU’s Coffee Corner bulah  tribal students 300 velin thungbuma nuorna an nei.

May Day le inzawmin Gift
IMPHAL: Vawisun hin khawvel rambung tum tum haia hmang a ni ang bawkin Manipur a khawm May Day hmang ning a tih. May DAy le inzawmin zanikhan Indigenous People’s  Assocation Kangleipak (IPAK) chun AMWJU, IMC Workers, Traffic Police, Rickshaw Puller, Construction Workers, furniture siemtuhai, Teklei siemtuhai, lung hernawituhai, CAF & PD workers hai kuomah gift  an sem. Gift­a an sem hi Medical Kits a nih.

World Veterinary Day, 2016 hmang
IMPHAL: Zanikhan Directorate of Vety & AH, Govt. of Manipur huoihatnain Manipur Film Development Corporation (MFDC) Hall, Konung Mamang, Imphal­ah World Veterinary Day, 2016 hmang a nih. Manipur a Advance Paultry Farm indinna dingin NEC in Rs. 10 crore a hung sanctioned tiin hi Day hmangnaa khuollien K. Govindas, Minister (Vety. &  AH), Govt. of Manipur chun a h ril. Hi Day hmangnaa hin Health & Family Welfare Minister D. Korungthang khawm a thang.

Naute thisa hmu a nih
IMPHAL: Zani hmasa zing dar 7 vel khan Awang Potsangbam Khullen a Imphal vadungah naute thisa tui chunga inlanga hmu a nih. Naute hi saruok, thla khat­thla hni mi vel ni dingin an lang tiin mita hmutu hai chun an hril. RIMS Morgue ah sie a ni a, a lamtu an umnaw chun May 2, 2016 khin hrehmang ni dingin thuneitu hai chun thusuok an siem.

Tripura MLA Parimal Saha thattua intum mi 12 damsung lungin intang dinga thiemnaw inchangtir
AGARTALA: Additional District and Session Court, West Tripura chun Tripura Congress MLA Parimal Saha le a u naupa Jiten Saha thattua intum mi 12 hai chu zanikhan damsung lungin intang dingin thiemnaw an changtir. Parimal Saha le Jiten Saha hai hi Agartala a inthawka km. 33 vela hla  Bishalgarh an ti hmuna April 7, 1983 a that an nih.  Kum 33 zet a liem hnungin tuolthattuhai  chungthu hi rel felin a hung um chau a nih. Tuolthattuhai hi CPI(M) workers nia hril an nih.

Court in damsung lungin intang dinga thiemnaw an changtir mi 12 hai chu­ Sasthi Chakraborty (56), Uttam Saha (57) Mrinal Sengupta (59), Pradul Sengupta (58), Bijay Kumar Das (58), Kajal Roy (50), Abhaykanti Bhusan (61), Chinmay Ghosh (57), Hiranmoy Ghosh (53), Shukhendu Bikash Das (58), Babul Das (56) le Sajal Kumar Sarkar (56) hai an nih.  Chinmoy Ghosh w hi UCO Bank­a Senior Manager a ni a, Sajal Kumar Sarkar hi Zirtirtu sinthaw a nih.

Hieng mi 12 hai chunga hin IPC Section 302, 307, 326, 147, 148, 149 le 120(B) cases siem khum an nih. Tuolthatnaa thang vea intum mi 5 hai chu an thang ve ngei ti fiena a umnaw leiin Court chun thiem inchangtirin an suo.

Congress party in Parliament khekhum
NEW DELHI: Uttarakhand President Rule hnuoia sie a nina thu le khuo inthal chungthu haiah Congres party chun hungtlung ding May 6, 2016 khin Jantar Mandar a inthawk Parliament House chen lampui hraw le Parliament Session nei lai an khek khum ding niin  AICC Spokesperson Randeep Surjewala chun a hril. Congress mi le sahai hi an thuoitu lu Sonia Gandhi le Rahul Gandhi han an inrawi ding niin AICC thusuok chun a hril.

AAP in PM a BA le MA degree thuah sukfiena
NEW DELHI: PM Narendra Modi chu a B.A. le M.A Degree chungthuah thu chieng lem le sukfiena pe dingin Aam Aadmi party (AAP) chun an phut. Narendra Modi in affidavit a pekluta chun B.A chu kum 1978 a Delhi University­a inthawka zo le MA chu kum 1983 a Gujarat University hnuoia  Distance Education Learning fethelnga zo niin a hril.

Methamphetamine mum 15,000 leh mi 3 man
AIZAWL: Mizoram Excise and Narcotics department officials le BSF thangruol han zanikhan Lunglei­ah pasal pathum hai chu inruithei Methamphetamine mum 15,000 leh an man. Mana um mi 3 hai chu ­Lalmuanpuia (38), Lalchhuanpuia (28) le Vanlalrengpuia (28) hai an ni a, ND&PS Act 1985 hnuoia case siem khum an nih. Methamphetamine hi Myanmar­a inthawka an hung phur niin tuolsung rate­ah Rs. 52. 50 lakh manhu a hisap a nih.

Thli leiin mi 2 thi, Tekin mi 6 a deng hlum
CHANGLANG/BERHAMPUR: Arunachal Pradesh­a chun zani hmasa zantienga thlipui hrang lei khan Changlang district­a Diyun Circle­ah naupang kum tlinglo 2 in thina an tuok bakah thingkung tam tak a mut thluk a, ruosur leia tuilien leiin sungkuo tam tak hai chu chengna ding In nei lovin an um pha. Arunachal Pradesh Chief Minister Kalikho Pul chun, thina tuok sungkuo hai kuomah zangnadawmna Rs. 4 lakh seng pek dingin a puong.

Chun, zanikhan Odisha­a Ganjam district sunga hmun tum tum haiah Tek tlain mi 6 a deng hlum bakah midang 2 in hliemna an tuok. Tekin a denghlum hai hi lo­a sinthaw zo dil­a tui an insil laia Tekin a deng an ni a, a hmuna an thi vawng a nih.

In 73,205 bawlna dingin Rs. 9005
NEW DELHI: Sawrkar thlungpui chun Maharashtra, Punjab le Jammu and Kashmir haia mirethei Economically Weaker Sections (EWS) hai ta dinga chengna in 73,205 bawlnaa hmang dingin Rs. 9,005 crores pek a remtih. Ministry of Housing and Urban Poverty Alleviation (HUPA) Secretary Nandita Chatterjee inrawinaa inter­ministerial Central Screening and Monitoring Committee meeting nei huna hi thil hi remti a nih.

First phase MBBS, BDS enetrance test vawisun
NEW DELHI: Supreme Court chun NEET hnuoia MBBS/BDS exam fe dan chungthua sawrkar thlungpui ngenna zanikhan a hnawl a, hi lei hin NEET hnuoiah vawisun hin India ram pumpuia centre tum tum haia chun MBBS/BDS entrance test a thawk khatna (first phase) nei ning a tih. Sawrkar thlungpui chun state sawrkar le private college han kum 2016­17 a dinga MBBS/BDS entrance exam anni remchang ang peia an huoihawt phal pek dingin a ngen a, sienkhawm hi ngenna hi Supreme Court chun a hnawl a nih.

Kangmei suokin naupang 6 a kang hlum
BAREILLY: Zani hmasa zingkar khan Bareilly­a Quila Chavani hmuna Kali Dham temple bul laia In pakhata inthawk kangmei nasa tak a suok a, naupang 6 a kang hlum. District administration chun thina tuok sungkuo hai zangnadawmna Rs. 2 lakh seng pek dingin a puong. Naupang 6 hai hin meikhu an hiplut rawn leia khawhre lova an um leia tlansuok thei ta lova meiin a kang hlum el ni dinga an ring chu Police chun an hril.

CBI in Dy. Air Chief hlui thu an indawn
NEW DELHI: Agusta Westland VVIP choppers scam le inawmin CBI chun zanikhan Air Marshal (Retd.) J.S. Gujral chu New Delhi­a an headquarters­ah thu indawnna an nei. J.S. Gujral hi Agusta Westland choppers inchawknaa incharge niin deputy Chief of Air Staff­a pension a nih. CBI chun Air Chief hlui SP Tyagi khawm May 2, 2016 khin thu indawnna nei ve dingin an ko bawk.

Modi Varanasi­ah
VARANASI: Prime Minister Narendra Modi chu vawisun hin a tlingna Varanasi Lok Sabha Constituency­ah inzin a ta, Ganga vadunga Solar hmanga intawl Lawng a hawng ding bakah e­rickshaws 1,000 sem a tih. PM hi special aircraft in New Delhi­a inthawk Babatpur pan a ta, hi taka inthawk Helicopter in Ballia, Uttar Pradesh pan a tih.

US in F­16 subsidised rate in a pek naw ding
WASHINGTON: United States chun, Pakistan kuoma F­16 Fighter vuongna zawr a tum chu subsidised rate (a man pangngai neka inhnuoi) in a peknaw ding thu a hril. F­16 indo vuongna hi India helpawl hai dona ni lova India ram beinaa Pakistan in a hmang inlau a um tia sawiselna um bakah US Congress in Pakistan le indawrtuona dinga sum hmang ding a pawmpui nuomnaw leia hieng thil hi hung um a nih. Hi lei hin Pakistan chun F­16 fighter jet 8 inchawkna dingin US dollars 700 million a pek a tul ta ding a nih; hi hih F­16 indo vuongna inchawk dinga indawrtuona um hlima inbiekna neka a let hni le a chanve in a tamlem a nih.

VAWISUN THUPUI
Lalpa chun Zion khuo chu an ngir nawk ta sih a, A ropuinaa inthuomin an lang tah. Pasiehai tawngtaina chu a ngaisak a, An tawngtaina chu a hmusit nawh. ­ Sam 102:16­17

Editorial: Fur hungtlung hi

Fur hun a hungtlung nawk ta a. Fur ei ti hin thil sawm a hung nei a, chuonghai chu, ruo, thlipui, riel le tek hai an nih. Ruo, thlipui, riel le tek hai hin sietna chi tu m tum an tlun ta a, a la hung intlun pei ding a nih. Hienghai hi ei dit le nuom leia hungtlung a ninaw a, siemtu Pathienin a siem a ni leiin sawisel le hnawl ngawt thei chi a ninaw a, khawvela ei cheng sunga ei tuok ding hrim an nih.

Lungawinawpui le lungsenpui chi a ni bawk nawh. Siemtu Pathien thil thaw theizie le ropuizie tarlangtuah ngai seng inla hadam tak a tih. Hi neka nasa lem furpui a la hungtlung ding a ni a, chu huna sietna chi tum tum hai laka ei him theina lampui lo dap le zawng hi ei thaw ding le ei mawphurna seng a nih. Kawng khat ngaituo chun fur hun tawng theia ei um hi ei vangnei a, malsawmna chikhat a nih. Fur hun tawng lo tam tak el an um a, tui harsatna le boruok lum taluo leiin beidawng tak tak le harsatna nasa tak tuokin an inrum mek a nih.

Fur hun lai hi tuhai ta ding khawmin khawsak a buoithlakna chin a um. Nitina fakzawng, mani kutsuok ngeia indin In le Lo nei phak lohai le ruosur ni khuoa hang inkhum hulna ding inlirhtei ke palinei neizo lo mi tam lem hai ta ding chun hun ngainatum lo takhai laia mi a ni thei awm ie. Chuongang bawkin inchuknaina fe le kai student­hai ngei khawmin an hun tawng laiah chun inhawi an tinaw hun tak khawm a ni thei ring a um. A dik dik chun, Fur hun hi malsawmna ruotui tlakna hun khawm nisienla mihriemhai ta ding chun hun thlakhlaum lo tak pakhat a nina lai a um.

Fur hun sung hin mitinin ei khawsakna kawngah ei fimkhur hle nuom a um. Mi thenkhat chu hieng huna hin an bula um le chenghai ta dingin nghawkum le theidaum deuin an khawsain an che hlak. Hieng a ni lei hin fur huna hin mihai nghawk le pawi tawk lo dinga ei chang le chet seng nuom a um. Midanghai ta dinga tangkai theina ei neinaw a lo ni khawmin an ta dinga hnawksak le nghawkum chu ni tum lo hram hram ding a nih. Fur hun ahin fimkhurna ding chi tum tum a um a, chuhai laia thenkhat hang tarlang ei tih. A thei china hiengang thil hai hi zuiin zawm thei seng inla chu thiltha ning a ta, ei renga ei that tlangna ding a hung ni thei ngei ring a um.

Fur le ruosur hun lai hin chu fena taphawtah Nihliep theinghil lova chawi ding a nih. Ruosur lei hin chu sungkuo tinin Nihliep an mamaw hun a ni a, hieng huna  hin Nihliep haw ching lo hram hram ding a nih. Nihliep haw hi an hawi a, sienkhawm a thakkir nawk hi theinghil a awl a, mi han Nihliep ei haw kha mi phal pek hai sienkhawm an lungril ruk takah an mi lawm ngai nawh ti hriet kar ding a nih. Thil hote niin inlang sienkhawm mihai theida le mi ringum lo hlaw theina a nih. Chun, ruosur hun laia mihai In a va leng hi ching tam lo chi a nih. In a bal nuom leiin ruosur hun laia leng hi chu mi han an mi lawm ngai bek nawh. Fur siet lai hin chu a tul hle naw chun leng lo hi a tha tak.

Fur huna ruo ching lai hin inlirthei khaltuhai an fimkhur le an hawihawm hle nuom a um. An ni hi an sin a pawimaw em a, sienkhawm an sin an thaw laiin an fimkhur hle a tul; Chuong naw chun hming hlieuna an nei nuom a nih ti hi inlirthei khaltu han an hrietzing a tha. Inlirthei an khal  laia Zu rui dam, dumziel hawp dam, mobile phone hmanga mihai inbekpui dam hi thaw lo hram hram ding a nih. Hi chau hi a la ninaw a, khaw ngha lek lova motor hrat taka khal a, tuihawk chilper uoi uoi khawpa tlan lo ding a nih. Lamlien sira kelawnga fe le lawn, hu le bal inlau em em hai, a bik takin, student, full uniform fai taka  inbel hai kha an chilper chun an lungril a na hle hlak bakah an ta dingin inthlakthlengna ding a um naw leiin harsatna an tuok pha hlak.

Chun, ruosur hma le zoa ekin (septic tank) inthe hi ching tam lo ding a nih. Ekin inthe ding a lo ni khawma ruosur vanglai le tuihawk tam laia inthe chau ding a nih. Chuong naw chun mani in bul vela um hai ta dingin a rim a se taluo a, khawtlang boruok a sukthu vawng hlak leiin a rinum hle hlak. Hi lei hin Septic tank inthe hun hi hriet tlat ding a nih. Hienganga thaw ching hi ei town sungah an um hlak a, thaw ta ngainawhai sienla nuom a um. Ruosur, tek tla le thlipui hranghai hi electric current in a ngam naw hle ti mitin hriet a ni ngei ring a um. Nisienlakhawm ruosur, thli hrang le tek tla suonlama ruosur zo, thli hrang zo, tek tlak zo, hun sawt tak hnung khawma electric la sukfar lo ti hi chu a tha naw a, thuneitu le a enkaitu han ching rawp tanaw hai sienla nuom a um hle.

Don't Miss
© all rights reserved
made with by Simon L Infimate