Muolhoi, May 14, 2016 (VIRTHLI): Vawisun Muolhoi a Hmar Martyrs' Trophy Organising Committee (HMARTOC) in a huoihawt Hmar Martyrs' Memorial Trophy a tum li na vawisun Final inkhel a chun Hmar Khangzep FC, Muolhoi chun an khingpui ALDIKA FC chu 8-1 a hnein a hrattak nina Trophy chu sumfai cheng 25,000 le an dawng a nih.
Closing ceremony a hin Pu Thianga Nampui, EX EM, NCHAC chu khuollien ani a, hnam thu bul hai le hriet ding pawimaw hai hriilin hun a hmang. Pu Thianga Nampui hi NCHAC a term thum Executive Member lo niin Hmar National Congress Founder Secretary ani a, Delhi a 1959 Republic Day a Hmar Cultural Troupe inrawitu laia pakhat ani a hnam ta dinga mi tangkai tak le thuoitu tha tak el anih.
Khuol inzaum Pu Dinga Tuolor, Range Officer, Soil Conservation, Pu Darrova Darngawn, Block Primary Education Officer, Pu P Chetia, JE, Agriculture Dept. hai niin hnam hmangaina thu hai le martyr hai inzana le ngaihlut ding anni zie thu hai mipui hmaa an hril.
Khawsung le Organisation thuoitu haiin hi programme hi an uop a ropui tak le hlawtling taka hmang zo a nih.
Lawmman dang hieng ang hin inhlan ani
Runners up - Trophy le Rs. 12000
Fair team - Rs. 1500 a nih.
Fair Team Award hi Eliza & Rorelsang Khawzawl FC hai inhlan an nih.
Final inkhel zat hin Bible Society of India (BSI) ta dinga thawlawm dawl ani hlaka vawisun Rs. 2350/- dawl dawk a nih.
