Shillong | May 28,2016 (VIRTHLI): Pu Ngurneithang Infimate, Happy Valley, Shillong chu May 28, 2016, 12:00 AM khan lungphuchawl leiin ei lo the tah. Pu Ngurneithang hi Assam Regiment indintu laia thang a ni a, May 1941 khan 4th Assam Rifles, Manipur a inthawk mi 5 thlangdawkin Assam Regiment indin dingin Shillong tieng tir an ni a, anni hai baka hin Assam Rifles, Aizawl a inthawk mi 7, Sodia a inthawk 2, Kohima a inthawk 3 le Lokra a inthawk mi 2 fekhawm hai chun 15th June, 1941 khan tuta Assam Regiment hi an lo indin a nih.

Pu Ngurneithang hi kum 1968 khan Subedar a pension in, Shillonga Hmar mi lo um hmasa pawl tak khawm a ni nghe nghe a, kum tin Assam Regiment Founding Day ah hun pawimaw le Chawimawina an la pek zie hlak a nih. Indopui pahnina (World War-II) hun lai khan Signal Havaldar niin W/T & Exchange Operation sin chelin, Japanese ral lien lai tak Digboi, Tapang, Senam (Manipur), Jesami, Kohima, Rangoon (Burma) haia khawm indonaa lo thang phak a nih.


March 28, 1916 khan a pienga March 28, 2016 khan kum 100-na a nih. Shillong a EFCI kohran indintu laia khawm lo thangin kohran le khawtlang, hnam tadinga mi pawimaw tak a lo ni hlak. Chun, ama hi Shillong a cheng Hmar nau hai pa, Hnam khawma chawmawina dang dang a lo inhlan ta hlak a nih.

Virthli chun hiengang mi hmasa, ram le hnam, kohran le khawtlang tadinga mi thangkai tak thina hi Hmar nau hai chau nilovin India ram le mipuihai tadinga channa nasatak a ni leiin an pamin a sun tak zet a. Lusun suongkuo hai a tuorpui a, Pathien-in thlamuon dingin a tawngtai pek a nih.

Post a Comment

Powered by Blogger.