SHILLONG, 21 APR, 2016 (VIRTHLI): Ni hni sung aw 'Indo-Myanmar Media Dialogue' chu April ni 20 le 21 khan Shillong ah nei a nia, hi huna hin Mizorama chanchinbumi tlawmte ei nei laia pakhat Tv. Henry Lalhlimum @ Henry L Khojol, The Mizoram Post (English Daily) reporter le Virthli Admin (Mizoram Region) ni bawk chu resource person pakhat-a hmang a nih.


'Act East Policy and People to People Relation: A critical analysis in the context of Mizoram' ti thupui hmangin Act East Policy fe thlenga India rama zohnathlak hai le Myanmar-a Zohnathlakhai inkarah inunauna țha um thei dan ding le trans-ethnic solidarity/ border trade connectivity in India- Myanmar le South Asian States hai inkarah inlaichina țha bakah insumdawng tawna țha khawm an tlung tir thei ding zie hai a hril chun mipui ngaisak a hlaw hle.

Indo-Myanmar Media Dialogue hi Institute of Social Sciences, New Delhi,  Heinrich Böll Foundation (India/ Germany), Burma Centre, Delhi le Asian Confluence hai huoihawt niin Myanmar anthawkin journalist inlar tak tak international award chen dawng phak Ms. Esther Htu San le mi dang dang hai an țhanga, Myanmar sawrkar hnuoia mi pawimaw le an MP hai khawm an țhang a nih. Anni hai baka hin Delhi le India hmarsak state- a chanchinbumi inlar tak tak hieng Deepak Dewan, (Northeast Sun), C.K Nayak ( Member, Press Council of India), Bano Haralu (NDTV-NE bulțantu), Aroonim Bhuyan (Senior Editor, IANS), Rajeev Bhatacharya ( Naga helpawl hai hang hluo suoktu), India Ambassador to Myanmar hlui Rajiv Bhatia le mi dang dang han thuhrilna an nei.

Hi huna hin Act East Policy (AEP) chungchang dam, India le Myanmar hai inkara inlaichinna țha pawimaw zie le AEP hlawtlingna dinga Hmarsak state hai an pawizie thu dam hriltlang a nih.

Virthli'n hieng ang, International level media dialogue ah resource person a țhang thei ei nei hi ropui ei ti hle a nih.

Tv Henry hi HSA, Aizawl Jt. Hqrs ah General Secretary ni lai mek khawm a nih.

Post a Comment

Powered by Blogger.