Numbers 11:21-22
Sierkawp hi subject popo a ka hnenaw tak a ni hlak a. Kum 1970 in pawl sawm kan exam dingin famtah Rev L Thanzam kha thlakhat ah Rs. 30/- in tuition kan lak a. Class X examna ah Maths ah marks 23 chau ka la hmu tho tho! Ka sum sengzat khawm ka hmu zo nawh! Mathematics subject umlo na ram ka hang chuongkai chu kan thuok huoi el! Hun iemani chen hnungah, upat deu hnungin MBA America ah kan inchukna ah subject pakhat ‘Finance’ alo um nawk a. Ka lel taluo a an takzie khawm ka paw phak nawh! Charter Accountant pakhat thlakhat sung tution in ka lak nawk tawp! Naupang laia tution lakhman tinaklai, upat hnungin ka office room ngei ah sierkawp kan chawk nawk char char el a nih! Chuong ang bawkin Pathien ramah khawm “Sierkawp” alo um ve a. Pathien sierkawp hi man fuk naw vek chun ringtu nun khal hi a harsa emem hlak a nih. Pathien sierkawp chu formula pahni chau a um a- (i) A Thupek zawm le (ii) Ringna nei- chau an nih. A tlawm hle a chu ei nitin nun ah ei fail inzawm zut hlak in ka hriet! Pathien ram ah tlin le tlin lovin rawngbawl dinga ko dawka ka um hnung khawma ‘Mihriem sierkop’ in “Pathien Sierkawp” chawk dawk ka tum hlaka ka fail inzawm zut hlak! Ringtu nun hi ‘Pathien Sierkawp’ a chawk ding ana, ‘Mihriem Sierkawp’ a ei chawk pha ei chauin ei fail let der hlak a nih.
Tiena tlanga inthawka ringtuhai lo sukbuoi rawp hlaktu chu ‘Mihriem Sierkawp’(ei remruotna) hi anih. Ei ngaituona mawltak le tawitak hin thil ei suongtuo a, ei hmatieng ding ei hisaap a, mihriem sierkawp chawkin ei chawk dawk tuma, ei buoi hlak. Mani insung khawsakna ding dam, nau le tehai khawsak danding dam, Pathien ram kohran kalchawi dan ding dam ei suongtuo nasa hle hlak a. Kei khawm inngaituo chet chet mi ka ni leiin ‘lungngaina sierkawp’ tamtak ka chawk dawk rawp hlak! Sawl lona ding ah ka sawl a, lungngai lo nading ah ka lungngai rawp hlak. Kum 1983 khan kan naupa upatak lung tieng (heart) natna khirtakin a hung man a. Guwahati doctor thiem haiin an rang tieng CMC Vellore ah Rs. 250,000/ chawia panpui vat dingin an mi hril a. Thlakhat ah Rs. 1000/- khawm ka la hlaw naw leiin ka sierkawp chawk chu ka sawl emem! Ka khawvel sierkawp chawk popoah lai a harsa pawltak a nih! Ka sunghai le ka ruol le pai sawrkar tienga thawkhai sum le an hlaw chenin an hriet lovin ka hang chawk pek a! Kan mamaw zat ka chawk dawk thei chuong nawh! Ka beidawngna le lungngaina in zuol tieng apan deu deu lem! Tawngtai dan ding awma ka hriet popo kan zawt kim vawng khawm a, ‘sierkawp formula’ a suok chuong nawh. Kum khat a hung inher a, ka naupa pang vawitieng a hung zawi hnung khawmin Pathienin ama ‘sierkop le varna’ ami hung tir pek nawh. Sikul kan inchawltir tawp hnung khawmin ‘Pathien varna sierkop’ alan lang der nawh! Ringtu ka nina a ‘Pathien sierkawp’ ka hriet phak naw zie ka chieng pha hle el!
Evi Sierkawp: Bible a mihriem sierkawp hmasatak chu ‘Evi Sierkawp’ kha a nih. Satan in a hung thlem khan Pathien thupek a hrietzing kha a zawm pei tanaw nghal a nih. Pathien thu nekin rul thu a hung ngai ta lem leiin Thingra chu a hisaap a, mit latak in a hmu a, fak mi tak le mit sukvar thei dinga ngaiin a hisaap zawm pei a (Gen 3:6). Pathien anga uma nina ropui lem kha a hung beisei leiin ‘Suolna le tlukna rapthlak” tak sierkawp a hung chawkdawk tah a nih. A ‘duamna sierkawp’ lei khan khawvel tawngsie phurin a um a, ei inrim emem el ani hi. Pathien sierkawpakhatna ‘A thupek zawm’ kha a thawsuol leiin Isu kross ah a hung thi pha tah a nih.
Sarah Sierkawp: Sarah sierkawp kha ‘Mihriem Sierkawp’ indiktak, Pathien lampui hluotu dinga tha fahran el ani kha! Anni hunlai khawm khan mihriem kum 90 chuong veve tading chun ‘Nau’ la nei nawk dinga inring kha an tak hle ding a nih. Pathienin thu a tiem le tiemnaw thu an nawh, ‘Mihriem Sierkawp’ (ngaituona) khan a phak ta naw hrim hrim a nih (Gen 16:2). Sarah sierkawp kha (1) “Inhmaw taluo Sierkawp” ana, (2) ah chun “Mihriem hipsaapna formula” ana, a (3) a chun “Pathien thutiem ringzonawna formula” a nih. Chuleiin, a result kha hang tha thei ding ziezang an nawh. Chun, Pathien thutiem a nghak pei naw leiin a pasal ‘Uire’ dingin an fui a. Abraham khawm a nuhmei thu zawmin inhawk sur niawm takin Hagar a puon in tieng a pan vung vung el ani kha! Abraham khan Pathien thutiem umsa nekin a nuhmei ‘Sierkawp’ kha a zawm lem a nih. Sarah ‘Mihriem Sierkawp’ kha an insung sietna chau ni lovin vawisun ni chena, ‘Human bomb’, le inthatna rapthlak hai popo hi a rasuok a nih. A pawisei tawp! Mihriem Sierkawp hi hmang naw hram ding a nih!
Mosie Sierkawp: March 7, 2016 kha kan innei kum 39 champha a nih a. Pathien kuomah lawmthu hrilna hun dam kan hmanga. God TV channel a sermon record dingin ami del rik lai le ka insung tadinga ‘Khawvel Sierkop’ iemanizat chawk ding ka nei lai ana. Ka buoi ve em em! Chuonglai tak chun Mosie, Israelhai ‘sierkawp’ ah a buoi thu Numbers 11:21-22 ka hang hmu chun ka thlarau mit a hung hawng tlat el a. Pathienin Israelhai Sa ngen kha “Ni khat chau nilo, karkhat chau khawm ni lovin Thla khat pumhlum nghawk rak khawp le inhnar kuoa suok rak khawpin (sa) fang in tih”. a tih a. “Mosie chun, ka umpui kea fe thei thieu khawm mipui 600,000 an nih, thlakhat pumhlum sa peng ka tih I ti el chu” tiin a dawn a. Mosie sierkawp chun patling ngat 600,000 le nuhmei le naupang thangsa in mipui popo 1,500, 000 vel fak ding kha an Beram ruol in adai naw zie kha abei a dawngpui a nih. Hril dawk laklaw lo ding khan Pathien kha adit hiel a nih. ‘Mosie sierkawp’ hi khawvel hisap dan chun a formula hi an dik hle in ka hriet. Ka nitin nun a ka ‘sierkawp’ lo chawk ve dan a nih! Ka buoi rawp reng a nih. Nangni khawm in ni ve tho ka ring! Mosie sierkawp khan Israel laia ranruol umsa kha a hang hisaap a, a buoi emem el a nih! “Tuifinrieta nga popo khawmin a dai ding am a ni?” tiin Pathien a dawn hiel a nih. Ei ni Kohran ah thuoitu chakin ei invir nasa tawl vei le maw?! Upa thlang tawma invir buoi! Local committee mei mei thlang tawm a temperature insang, faitham committee thlang tawm a BP insang ti vel! Ei pui naw rep rep de aw! Mihriem sierkawp hmanga Pathien kohran thuoi tum chu ei ni bawk si! Pathienin mihriem varna a ditnaw chau ni lovin a peihawn hnung ani kha (1Cor 1:19; Isaiah 29:14). Pathien peihawn hnung hmangin sierkawp ei chawka, formula ei zawnga, kawng na rak khawpin ei hisaap in ei insel hlak an naw? Ei ram pawl kohranhai hin “Mihriem sierkawp” hi ei va hmang nasa de aw! Mosie chu a sierkawp kha lo indik naw sienkhawm, Pathien biek nachang bek ala hriet a. Ei ni rawi chu mani sierkawp in ei tan a, mani sierkawp in ei zo hlak! Pathien thu in “I ngaituona hai chu ka ngaituona an ni nawha, I lampuihai chu ka lampui hai ani bawk nawh” (Isai55:8-9) ati sasa khawmin ‘ei sierkawp’ bawkin final ei khel hlak. A pawi sei hla ding a nih. Pawl kohran thenkhat lem chun tulai chen hin “Ngaituo hril zan” an la nei hlak!! Ngainuom um rem rem hleng a tih!
Ei remruotna le varna khel ah Pathien iengkim thawthei (Omnipotent) in lampui ami buotsai pek hlak hai kha hang sut nawn inla chu ei varzang deu ka ring. Unau, nang te, ‘Mihriem Sierkawp’ I la hmang zing am ie? Mihriem sierkawp hmanga Pathien hnungzuituhai nun hi a khau a, a sel thur bawka, thawlo ding le tuoklo ding tuokna le sietna a ni pei bawk. Chuleiin, “Pathien Sierkawp” -chungtieng formula kha nghak fan fan dingin insie hnuoi ei tiu khai! Amen.
HT-Sunday
Sermon, April 03, 2016
