SAIPUM, 13 APRIL, 2016 (VIRTHLI): Kum 22 mi, nunghak Darlianpuii, Zachungnunga naunu, Saipum (Mizoram) khuo chu zani chawhnung dar 1:30 bawr vel khan Saipum le Mauchar inkara Tuirial vadungah chengkawl ruta fe chu ‘kâi’ paltan an tumlai vangduoitlak takin a che suola, suorin la zui nghalin hlam ruk vela inthuk lipui ah a tla hluma, a ruong hi vawizan dar 10:47 khan hmu a nih.

Saipum YMA president Pu Saihlunthanga kuoma inthawka thu ei dawng danin Darlianpui hi a pa Pu Zachungnunga le a sangpa Aron hai leh Saiphai Mission vengah Ṭhalai inkantuonaa fena ding tiin zani khan Saipum khuoa inthawka hla rak lo Tuirial vadungah (tuta Turial Hydel Project siem mekna hmun) chengkawl rûtin an fe a, thawk khat an inzo hnung, ral khingtieng kai tuma vadung (kâi) dawngna/inthuklona laitak an pal lai chu vangduoitlak takin an tawl tlua, a pa hin a kutah chelin man hman sienkhawm sour hratin a lak hman leiin chelzo loin an thla a, li-virin hip lut peiin hlam ruk vela inthukah a tla hlum a nih.th


Hienga siet antuok phing hin Pu Zachungnunga chun Tuiriala IR Camp-ah siet antuok thu hrillin, Saipum YMA ṭhuoituhai hril nghal an nia, nunghak le tlangval mi 70 bawr vel chu Tuirial tieng fe suk nghalin a ruong hi zawng a nia, sienkhawm a tlakna li an thûk em leiin hmu el thei a ninaw a, Saipum ânthawk bawkin mi 70 bawr vel Tuirial panin an fe suk nawka, lawngleng, khâr le hling hai hmanga sawt rei an zawng hnungin vawizan dar 10:47 bawr vel khan Darlianpui a ruong hi hmu a nih.

Darlianpui hi nunghak feltak le KṬP a inhmang em em a ni a, an sungkuo hi lo sinthawa nitina fak zawng hlak an nih. KṬP inkantuona a kalman le hmang (pocket money) ding tiin sumtuokah an fena ah hieng hin vangduoitlak takin an che suol tah a nih. A ruong hi vawisun sun dar 12 khan Saipum thlanmuolah vuiliem a ni a, an ni hi EFCI kohran an nih.

Pu Zachungnunga in a hril danin khanga a naunu tuiin a len hmang khan san tumin theitawp an suoa, sienkhawm tui a hrat em leiin a chel zo tanaw niin a hril.

Post a Comment

Powered by Blogger.