AIZAWL, 28 APRIL, 2016 (VIRTHLI): Manipur sawrkarin a ram mi –tlang mi hai hai ta dinga thilpawi thei Bill pathum a pass le inzawma Joint Action Committee (JAC) thuoituhai chun an chairman Pu Mangchinkhup inrawina hnuoiah zani (27 April) khan Mizo National Front (MNF) president Pu Zoramthanga le Zoram Nationalist Party (ZNP) president Pu Lalduhoma hai chu an office ah inpawlpuina an neia, Bill pathum dona kawngah Manipur-a tlangmihai thangpui dingin an ngen nghal bawk a nih.
JAC thuoituhai chun tlang mi hai ta dinga him lo bill pathum ‘The Protection of Manipur Peoples Bill 2015’, The Manipur Land Revenue & Land Reforms 7th Amendment Bill 2015 le Manipur Shops and Establishment 2nd Amendment Bill 2015 hai dit lo a, Sawrkar an nawrna fe peiah a tira an thangrual angin an thangrual thei chie ta naw thu an hrila, an dit dan ang taka bill siem that rawtna chu January ni 11, 2016 khan Manipur sorkarah an intlun thu le hi hnunga hin Manipur sorkar chu a re zui ta vang vang el a ni thu an hril bawk.

Pu Mangchinkhup chun Bill pathum dit nawzie inentirna-a buoina suokah pawitawklo mi pakuo (9) hai roung chu Churachandpur hospital mortuary-ah sie an la ni zing thu le an thil phuthai an hlawtling hmakhat chu phum an tum naw thu MNF thuoituhai a hril.


 MNF president Zoramthanga chun Manipura tlang mi hai buoina chu central ministry-a a ruolthahai kuomah nasa taka a hril hlak thu le an harsatna chu a taka hmu tu a ni thu a hrila. Bill dona kawngah tlangmi hai chu inthuruol a tul thu hrilin Pu Zorama chun “Underground le Overground hai inhlawm khawm that a pawimaw hmasa a nih,” a ti bawk.
Naga hai anthawka thil inchuk ding an nei thu hrilin, MNF President chun “Anni chun Nagaland State tieng kawp el kan tih an ti chun an fel deu nghala. Nangni khawmin in dit dan suk chieng thei unla, chuzo a chun inhawina tieng le dit dan chu Mizorama Political Party hran hran hai hin kan thlawp zui ngei cheu ka ring,” tiin JAC thuoituhai hi a lo hril a nih.

JAC thuoituhai hin zani vek khan ZNP president Pu Lalduhoma hmuin,
Manipur buoina leia Zohnahthlakhai thlamuong dinga ZNP President le thuoitu danghai a hmun ngeiah an inlang thei chu lawmum an ti thu le vawisun chen bill an dona chu an la sunzawm zing thu an hril.


Hi inpawlkhawmna a hin ZNP President chun Manipur le Mizoram Zohnathlakhai in unuana suk zuoltu chu Bill pathum hi a nih a tia, Manipur buoina leia inpumkhatna thalem a pieng chu lawmum a ti thu le Manipur-a Zohnathlak unau buoina namen lo tuok mek hai thangpui dingin Mizoram-a mi inphal tak tak hai an che suok a tul tah tak meu a nih a ti bakah, ka ngen nghal bawk a nih a tih.

JAC thuoitu hai hi an chairman tiemasa in mi 9 an nia, Aizawl inchuklai pawl thuoitu thenkhatin an tawiawm bawk a nih.

Post a Comment

Powered by Blogger.