Responsive Ad Slot

Hmasawnna Thar | 29 April, 2016

Friday, April 29, 2016

/ Published by VIRTHLI
7­ Assam Rifles han Solar Lamp an pek
CCPur: 7th Assam Rifles chun Military Civic Action program hnuoiah zanikhan B. Ebenezer khuo hmang dingin Solar Lamps 7 an pek. Solar Lamps hai hi Aditya Verma, CO 7­ Assam Rifles in an hlan a, “Assam Rifles Friends of the Hills’ an ni anga Solar lamps hai hi sem a nih tiin a hril. Tuta hma ang bawka mipui han khawlaiah guiter chawia hringnun zalen le ralmuong taka an hmang Assam Rifles chun a nuom a, hi lei hin Assam Rifles hmalakna mipui hai thlawp dingin a ngen.
     
September, 2016 –a Army Recruitment um ding le inzawmin 7­AR, HQ veng chun army a lut nuom hai ta dingin short term basic course/training buotsai a tum a, inhnikna nei thalai hai chun 7­Assam Rifles contact dingin an hriettir.
     
Hmatieng peiah khawsung mi han tui hnienghnar tak an nei theina dingin Assam Rifles chun hma a lak pui ding thu Aditya Verma chun a hril a, khawsung mipui han lawmthu hrilnain puon an insiltir.

PHED/CCPur in Public Notice an suo
CCPur: Public Health Engineering Department (PHED), CCPur Division chun, khawpui sunga Water Supply Scheme sinthawna an fepui mek le inzawma agents thenkhatin PHED pipe  sumdawngnaa hmangin bazar­ah an zawr hmu a ni le inzawmin April 26, 2016 khan Public Notice an suo. Hiengang thaw ding hin Department chun tukhawm thuneina a peknaw thu hrilin hiengang thila mipui hai chu inthier fihlim dingin a ngen a; Water supply­a hmang dinga sawrkarin a hung pek ‘GOI PHED’ inziekna Pipe tuta hnung bazar­a zawr hmu a ni chun, an chawtu le zawrtu hai chunga sawrkarin angkhatin action lang a tih tiin Th. Baite, EE, CCPur PHE Division, PHED, Manipur in Public Notice an suoa chun an ziek.

Medical team in  Saichang an pan
CCPur: Tulai hnaia thli, ruo le riel in In tam tak a suksietnaSaichang area­a Free Medical camp buotsai dingin zanikhan Medical Team iemanizat chun CCPur suoksanin Saichang an pan a, zani 7 AM khan CMO/CCPur in a vailiem. Medical team hin Santing (Santing, Chiangpi, Chongkhojou) le Chongkhojou khuo haia medical camp buotsai an tih. Medical camp haia hin Dr. C. Tombing, Child Specialist; Dr. Robinson Lalnunpuia, MO; Dr. Immanuel Pulamte, MO; Dr. Samuel Singson, MO le  Dr. A. Ibotombi, MO han mipui hai hriselna enfel an ta, Solomon, BPMU, Henglep, Sobita Devi, Nurse, Kholalnei, ANM, Meher Sahni, ANM le Seitinpao, Gr­IV  han thangpui an tih.

Church member hai kuoma Blanket an sem
CCPur: Believer Church Dioceses, Imphal chun Community Development Project hnuoiah zani zantieng 1:30PM khan Believer Church, Khengjang  hmunah  CCPur District sunga  Believer Church member hai kuomah Blanket an sem a, Blanket hai hi  Rev. Fr. Gena Vaiphei, Secy. Dioceses, Imphal, Manipur in a sem.
     
Churachandpur district­ah Believer Church 12 an um a, hienghai kuoma hin Blanket sem vawng an tum niin ei thu dawngna chun a hril. Zanita la chang lo hai kuoma khawm sem pei a la ni ding a nih.  Bishnupur, Moirang le Wangoo area hnuoia Believer Church member hai kuoma khawm sem a nih.

India’s got talent –ah Hmar tlangval an lang ve ding
CCPur: India rama talent nei tha hai chosuokna dinga buotsai ‘India’s  Got Talent’ a chun lam tiengpanga talent nei tha Hmar tlangval Raymond Rochanhlu s/o Pu Lalnuntluong le Pi Ngullienkim of Valpakawt, CCPur, Manipur khawm an lang ve ding a nih. Tv. Rochanhlu hi ama khata inlang ding ni lovin Delhi­a Hiphop Band inlar SWAG GANG a dancer chanpui hai leh an inlang ding a nih. TV Show India’s Got Talent­a an inlang ding hun hi April 30, 2016 hnungtieng  ning a ta, Inrinni le Pathienni  haiah zan dar 8PM­9PM sungin hi TV show hi ‘Colours’ channel­ah en thei a ni ding a nih. Tuta vel hi 2nd round a ni a, 4th round chen an paltlang phak chun semi­final round lut an ta, hi taka inthawk hin online voting  hun khawm hawng a hung ni ding a  nih.
     
Tv. Rochanhlu hi lekha inchuk sang naw sienkhawm mania intodel tlum tlat mi niin  kum 2011 khan Delhi a lut a. An hnikna a ni leiin kum 2013 khan Dance Academy­ah kum 1 sung lam an chuk a, a thiem thei leiin an chuk zo hnung hin kum 2 sung instructor in a thang zui nghal a; hi taka intahwk hin American Embassy ah Instructor dinga fiel a ni angin Embassy­a thawktu nauhai lam inchuktirtu in iemanichen a thang a; March 2016 khan SWAG GANG band hi a zawm a nih.

Thuvuongva thedar lo dingin an ngen
Imphal: Muslim Council Manipur (MCM) Manipur state sunga cheng hnam tum tum hai chu, inremna le muongna a  um theina dinga, hnam intheidana intlun thei thil thuvuongva thedar lo dingin an ngen a; Manipur sawrkar chu Lilong hmuna pasal pakhat thina thua hnam pahni hai inkara inhrietthiemnawna um sukre a ni theina dinga tuolthattu zawngsuok le man dingin MCM Gen. Secy. Haji Arafat chun zanikhan sawrkar a ngen bakah hnam pahni hai chu tharum thaw lo dingin an ngen.

Kum 2015­16 sungin kangmei vawi 230
Imphal:  Kum 2015­16 sung khan Manipur­ah Kangmei vawi 230 a suk a, hienghai laia 85 hai chu kangmei suok lientham (major incidents), Rs. 1 lakh manhu chen kangsietna a ni a, 18 hai chu medium incident, Rs. 50,000 ­Rs. 1 lakh manhu chen kangsietna an ni a, 127 hai chu small incident, thil Rs.50,000 le a hnuoitieng manhu kangsietna an nih tiin Manipur Fire Service Department thusuok chun a hril.

Mithiruong pakhat hmu a nih
Imphal:  Zani sun dar 12 vel khan Thoudam Ritendrajit Singh (42), s/o Th. Biren Singh of Palace Compound Heijinngang Konung Leikai, Imphal East chu Singjamei leilak hnuoiah a thisaa hmu a nih. Ritendrajit hi April 24, 2016 khan a sunghai leh an inselbuoi a, sun dar 11 velin an in a suoksan a, chu taka inthawk inlawi ta lo nia hril a nih.


Naupang kum 8 mi inkhaihlum saa hmu
Imphal:  Zani zingkar khan Imphal East Districta hmun pakhatah nuhmei naupang kum 8 mi chu inkhaihlum saa hmu a nih. Hi naupang hi a ruolhai leh an inhnel a, an inhlennaa hin inkhaihlum tehlem (hang game) an thaw a, chu huna inkhai hlum pal nia hril a nih.

VVIP Chopper Scam chungthu Supreme Court in rel a remtih
New Delhi: VVIP Chopper Sam chungthua hekna le case um chu zanikhan Supreme Court in rel a temti a, haptakar thara tan ni dingin Supreme Court chun a hril. Hi chungthu a hin CBI chun kum 2013 khan case a lo registered ta a nih. VVIP Chopper Samp thua hin sawrkarna cheltu le Selkaltu pawla member­hai chun Rajya Sabha­ah inselna nasa tak an lo nei ta a, zani chen khan Rajya Sabha a chun hi thua hin inselna a la  tlung a nih.
     
VVIP Chopper scam hi Italy rama Agusta Westland Company­a inthawk VVIP­hai hmang ding Helicopter 12 inchawk tumnaa thamna a um ti leia suok tan a ni a, hi thua hin Sonia Gandhi, Manmohan Singh, Sonia Gandhi political Secretary Ahmad Patel le Congress thuoitu hlun thenkhatin inrawlna an neia intum a ni a, sienkhawm an intumna hi thudiklo le belchiengdawl lo a nih tiin  intuma um hai chun an hniel.
       
Sonia Gandhi chun, hi thua hin titna le zamna a neinaw thu hrilin, “Character assessination” tumna a nih tiin a hril. Manmohan Singh chun, case a um naw a, hi thua hin ka party in hma lang a tih tiin a hril. Ahmed Patel chun, hi thua intuma ka umna hi thudiklo le belchiengdawllo a nih. Hi thilah inrawlna ka nei ti a finfiena a um chun mi khaihlum ro tiin a hril.
           
UPA sawrkar huna hi thil hi tlung ta a ni a, khang hun lai khan India sawrkar le Italy rama Agusta Westland hai chun inremna an siem a, chu dungzui chun hi company a inthawk hin Indiachun Rs. 3272 crore in Helicopters 12 an chawk ding ti a nih. Amiruokchu, hi indawrtuonaa hin thamna Rs. 375 crore pek/lak a nih ti hrietsuok a hung ni leia inremna hi kansel a nih.

NEET nei SC in a remtipui
New Delhi: Kum 2016­17 academic session a MBBS le BDS Courses admision thawna ding le inzawma National Eligibility Entrance Test (NEET) nei chu zanikhan Supreme Court in a remtipui. Central Board of Secondary Education (CBSE) le Medical Council of India (MCI) hai chun NEET­I chu May 1, 2016 le NEET­II chu July 24, 2016 haiah nei a ta, Combined result chu August 17, 2016 a puonglang ding le Admissin proces chu September 30, 2016 chena zo dingin a lo bituk tasa a nih. State tum tu m han NEET nei an dodalna chu Supreme Court in a hnawl pek.

Mizoram HSLCpass percentage 71.17
Aizawl: Mizoram Board of School Education (MBSE) chun zanikhan HSLC Exam, 2016 result a puong. A pumpuia pass percentage 71.17 a ni a, nikum nekin pass percentage hi 2.87 in an sang lem. Exam dinga in zieklut 18091 an ni a, hi lai hin 17462 an exam a, 12,427an passed a nih. Hi lai hin  pasal  6,187 le nuhmei 6,240 an um a; Distinction­ah 629 an pass a, 1­Division­ah 2,025; II Division­ah 3,510 le III division­ah 6,263 an passed a, candidates 4,440 an failed a, compartment hmu 595 an um. Compartmental exam hi June 16, 2016 a nei ning a tih.
     
Candidates passed vawng school 72 an um a, pass um der lo School 4 a um bawk. Topper chu C. Vanlalnghaka s/o C. Chhuanthangpuia, Aizawl Chhinga Veng niin Home Mission School a kai a nih.  pahnina chu Vanlalruatdiki of St. Pauls Hr. Sec. School le pathumna Konthoujam Sinthoibi of St. John’s Hr. Sec. School, Kolasib a nih.


Bihar DA 6% in a sukpung
Patna:  Bihar state sawrkar chun a hnuoia sawrkar thawktuhai le pensioner­hai Dearness Allowance (DA) chu 6% in a sukpung. DA sukpunga um hi Jan. 1, 2016 a inthawka hmang tan dinga ti a nih.  Thawktu le pensioners han DA an hmu ding 125% a tling phak ta a, DA pung leia sawrkar in sum a seng belsa ding hi Rs. 842 crore niin ei thu dawngna chun a hril.

Navigation satellite 7­na hlawtling taka kapsuok
Sriharikota: India chun zani 12:50PM khan Polar Satellite Launch Vehicle (PSLV) rocket hmangin India navigation satellite 7­na le a tawpna tak, IRNSS­1G chu hlawtling takin a lo kapsuok tah. Indian Regional Navigation Satellite System (IRNSS) hin satellites 7 a nei a, hi laia 6­ IRNSS­1A, IRNSS­1B, IRNSS­1C, IRNSS­1D, IRNSS­1E le IRNSS­1F hai chu tuta hma khan hlawtling takin Orbit­ah a lo kaplut ta a nih. Zanita kapsuok IRNSS­1G hi kg. 1,425 a rik a ni a, satellite hi kum 12 sung dai ding a nih. PM Narendra Modi chun navigation satellite 7­na hlawtling taka kapsuok a nina thuah ISRO scientist hai chu a lawmpui thu a hril.

Tukum sung lum leia thi 87 an  tling tah
New Delhi: Tukum (2016) January­March inkar sung khan India rama chun khaw lum tuorzo loa thi mi 87 an um tah. Khaw lum leia mihriem thi tamna tak chu Telangana niin tuchena hin mi 56 an thi tah. Tukuma khaw lum leia thi mi 87 hai tiemsa in kum 2013 a inthawk tuchena India ram pumpuia boruok lum leiin mihriem 4,204 in thina an tuok tah niin Ministry of Earth  Science in Lok Sabha­a data a peklut­a chun zieklang a nih.
     
Telangana le Andhra Pradesh state hai chu tukum sunga khawlum leia mi thi tamna tak an ni a, Odisha chu pahnina niin tukum sung mi 19 an thi tah. Ministry data dungzui hin kum 2013­a boruok lum leia thi 1422 hai laia 1393 chu Andhra Pradesh (undivided) state­a inthawk an ni a, kum 2014 –a lum leia thi 549 laia 447 hai chu  Andhra Pradesh state­a tlung an nih.

RPF DG dingin SK Bhagat ruot
New Delhi: Senior IPS Officer S.K. Bhagat chu Director General of Railways Protection Force (RPF) dinga ruot a nih. S.K. Bhagat hi 1982 batch IPS Officer, Uttarakhand cadre a ni a, tuta Special Director General, Central Reserve Police Force (CRPF) sin chel lai mek a nih. A sin hi a pension hma po June 30, 2017 chen chel a tih.

Rs. 4.5 lakh zet a neitu kuoma a pekkir
New Delhi: Mi ringum le indik Taxi Driver Sunil Kumar chun a passenger pakhatin a taxi sunga a theinghil Rs. 4.5 lakh umna bag  kim thlapin a pekkir nawk. Mr Sunil Kumar hin a passenger hi Saket hmuna a va thak zo IGI airport­a taxi stand a hung tlung hnungin bag hi a hmusuok chau a nih. Taxi stand­a thuneitu hai an hriettir hnungin bag neitu indik tak hi zawngsuok le pekkir a nih. Hi pawisa neitu chu kum 33 a upa sumdawngtu Utraksh Katta a ni a, a sumdawngna le inzawma Saket hmuna hung inzin a nih. Hieng zat sum umna bag a sukhmang thu hi a umna ding Hotel a tlung hnungin a hrietsuok ve chau a, hotel thawktu hai CCTV footage in enkir tira nasa taka a zawng laiin driver­a inthawk hin phone call a dawng a, chu taka a pawisa hi a hmukir nawk a nih. Lawmthu hrilnain Sunil Kumar hi Rs. 5,000/­ a pek. Delhi Airport Taxi Union (DATU) chun union sunga um drivers hai chu hiengang thila ringum dingin nasa takin an inchuktir hlak thu DATU president Rajesh Kumar chun a hril. 

A bomb siem a puok leiin a thi pha
Baharampur: West Bengal­a Murshidabad district sunga Dharampur –a chun zani hmas zan khan pasal pakhat chun bomb a siem laiin a bomb siem a hung puok leiin a thi pha. Bomb puok leia thi hi Ibrahim Sheikh (32) a nih.

GNLA helpawl 5 an inpe
Shillong: Zanikhan Meghalaya a chun GNLA cadre 5 hai chu ralthuom leh Meghalaya Police DG Rajiv Mehta hmaah an inpe. Ralthuom an inpeklutpui hai lai AK 56 Rifle 3, Carbine 1, G­3 Rifle 1, Grenade 1, HK magazine 1, AK magazines 6, Beretta Pistol magazine 1, G­3 magazine 1, Carbine magazine 1 le AK mu 519 a thangsa.

Mani hnam thuoma inbel thei
New Delhi: Central Board of Secondary Education (CBSE) chun, tukum­a All India Pre­Medical Test (AIPMT) a thang ding candidates han mani hnam thuom (religious or customary dress including burqas) inbel thei an tih tiin a hril. CBSE in zani hmasaa dress code an suo dungzuiin candidates han thuomhnaw inphan/zâng,zakuo ban tluon, brooches bakah pheikawk aiah sandals or slippers bun thei an tih tiin a hril bawk.
     
Amiruokchu, customary or religious thuom a inbel candidates hai chu tha taka dap (frishking) an ni theina dingin an exam centres haiah zingkar 8:30AM in an in report hman ngei ding a nih tiin CBSE thusuok chun a hril. Organisation tum tum han dress code inthlazal dinga ngenna an siem leia CBSE in hienganga dan a hung siem danglam a nih.

NE­ah Cancer enkawlna machine a tlawm
Guwahati: India hmarsakbiel (NE) chu India rama Cancer natna tamna hmun nisienkhawm tuchena hin Cancer enkawlna a tha tawknawin a la tam tawknaw hle. Sikkim le Arunachal Pradesh haia lem chun cancer treatment facility a um naw niin WHO assessment report chun a hril.
     
India hmarsak state 8 haia hin  mihriem 4,57,72,188 (2011 census)  an um a , tuchena hin NE bielah tele­theraphy machines 15 a um a, hi laia 9 hai chu Assam State­a um an ni a, sienkhawm Assam­a mihriem 3.1 crores vel umnaa chun hiengang machines hi 30 vel bek um dinga ngai a nih tiin Dr B Borooah Cancer Institute (BBCI) a Director Dr AC Kataki chun a hril. BBCI a hin kum 2014­15 sung khan Cancer a damnaw 10,566 enkawl an nih. 

PriyankaChopra khawm fiel ve a nih
Los Angeles: White House Correspondents’Asociation buotsainaa White House (US President official residence) –a annual Dinner with US President Barack Obama and First Lady Michelle Obama  nei dinga chun Bollywood actress Priyanka Chopra khawm fiel ve a nih. Annual dinner hi April 30, 2016 (Inrinni) a nei ding a ni a,  Priyanka Chopra chun thang ngei a tum thu chanchinbumi hai indawnna dawnin a hril. American TV series “Quantico’ tia an chang leia Priyanka hi khawvel hriet hung ni pha a nih. Priyanka chun tulai hin Hollywood debut “Baywatch” shooting a nei mek a nih. Annual dinner a hin hollywood stars Will Smith, a nuhmei Jada Pinkett Smith, Kerry Washington, Shonda Rhimes hai khawm an thang ding a nih.

VAWISUN THUPUI
Ama tituhai kuoma chun fak ding a pek a, A thuthlung chu kumkhuoin hre zing a tih. A thilthawhai thilthawtheizie chu a mihai kuomah an langtir a, Hnam tin rochan chu an kuoma pein.  ­ Sam 111:5­6

Editorial
Lampui tha mi kawkhmutu le ei mithai sukvartu hung nisienla

Ei Prime Minister Narendra Modi chun ei rama  mi rethei zuol hmakhuo ngaina leiin mi hausa, mi khawsa thei deuhai, ram thuoituhai, sawrkar officer lienhai le mi rethei chunga leng le um hai chu LPG man tlawm (subsidised rate a mi ni lo) hmang dingin ngenna a siem a, subsidised rate a mi an lo hmang a ni khawma pekir (surrender) dingin a ngen a. A ngenna hi mi tam takin awm le tha an tipui a, a hlawtling thawkkhat hle. Ngenna a siema inthawk tuchena hiengang pekir ta chu India ram pumpuiah mi vaibelsie khat an chuong ta niin Narendra Modi chun a hril. Modi chun hi chungchanga ngenna a siem hi hmun hran hrana an zinna le a thu hrilna haiah a la sunzawm pei a, LPG subsidised rate a mi pekir nuom hi an la hung pung pei beisei a nih. Hiengang thil thaw thei ding ngirhmuna um hai ta ding chun entawn a, thaw ve dinga tha em em el a nih.
     
Prime Minister hmalakna hi a hnuoia thawk Union Minister dang danghai khawma tha an tipui a, an thlawp tawl. Union Oil and Gas minister Dharmendra Pradhan khawmin April 25, 2016 khan kum khatah Rs. 10 lakh le a chungtieng lamsuokhai kuomah LPG hi subsidy a pek ni tanaw nihai tiin Parliament­ah a hrillang. Hi thil thawna ding hin Income Tax Data hmang a ninaw a. Hiengang ngirhmuna um hai chu hmatieng hung pensuok a, affidavit zieka an subsidised LPG hmang pekir dinga ngen an ni lem a nih. Hi thua hin thawluina a um nawh. Mi retheihai hmakhuo ngaina leia thaw a ni a, mi indik le ringum hai chun mani sie le tha hrietna hmang el ding a nih tiin Dharmendra Pradhan chun a hril.
     
PM Modi ngenna siem hi thil awm, thiltha le lampui indik a nih. A zuitu ei tam po leh sawrkar  thlungpui sum seng le inhmangna hung tla hnuoi a ta, mi rethei tam tak in an hung hmang tangkai ting el ding a nih. Thiltha dit le lampui indik zui nuomhai ta ding chun PM Narendra Modi ngenna siem hi pawm a, zui ve a awm hlie hlie a nih. Thawluina a ninaw a, ngenna a ni a, a hmalak dan hi a puitling a, inza um takel a nih. Mi rethei le mi naran chunga lenghai ta ding chun chona tha tak a nih. Modi ngenna hi thil tha le awm a ni leiin mi vaibelsie khat chuong hai chun pawmin an zui ta a nih. Thil tha lo nisienla chu mi hieng zozai hin pawm nawng an ta, zui khawm zui naw bawk an tih. Ei Pathien khawma thiltha thaw hi nghawk lova thaw pei dinga a min chuktir a ni leiin kristien sakhuo zuitu hai ta ding lem chun Modi ngenna hi pawm a, sukpuitling chu a awm hlie hlie a nih.
     
PM Narendra Modi ngenna siem  hin Churachandpur District­a khawm ra a hung insuo tan a, lawm aum a, zui ve sup sup thei inla nuom a um khawp el. LPG chungthu khera tlung ninaw sienkhawm NFSA chungchanga thil hungtlung a nih. Sawrkarin NFSA chungthu le inzawma guidelines  a siem  dungzuiin  NFSA hnuoia hamthatna hmu ding le dawng ding hai laia thangsa niah an ngai naw leiin Mr Kaikhanlian  Guite, Deputy Inspector of Schools, Churachandpur Block chun NFSA hnuoia bufai lakna ding Ration Card a dawng hi DC Offie, CCPur­a um District Supply Officer (DSO), Churachandpur kuomah a va pekkir. Churachandpur district sunga chau ni lovin Manipur state pumpuia Ration Card pekir hmasa tak a ni ngei ring a um. Mr Kaikhanlian Guite of Bungmual hi pa ngaisang um tak le entawntlak a tling takzet a nih. Ama anga mi indik, mi ringum le Ration card sawrkara pekir ngam hi ei ramin a mamaw em em  el a nih. Ama hnung zui ngam hi ei la hung  um pei dim maw?
     
Bungmual Village Authority chun Mr Kaikhanlian Guite hin tuta hma khawm khan MGNREGS hnuoia Job Card khawm pawm lova hnawl ngam ta a nih tiin an la hril nawk deu deu! Indikna lampui dit le hraw nuom mihriem, pa fel tak chu a lo ni hrim hrim a nih. Churachandpur District chau ni lovin Manipur state pumpuia dinga indikna le ringumna lampui mi kawkhmutu le ei mithai mi sukfar pektu hung ni ngei sienla nuom a um ngei el. NFSA hnuoia Ration Card le MGNREGS hnuoia Job  Card hnawl ngam le pekir ngam hmasa tak a nina hin District Administration le pawl tum tum han Mr Kaikhanlian Guite hi  chawimawina le Appreciation  Certificate a pek a phu hle.
           
Ei ram le hnamin thiltha thaw ngam, indiknawna le suol do ngam a mamaw a. Chu ding chun tuta inthawk hin thangruola ke ei pen ngam nuom a um. Ei unaupa ang hin Job Card le Ration Card chau ni lova dan pel thil hai hrim hrim ei hnawl ngam nuom a um. Mi rethei, mi riengvai le chanhai, naufahra le hmeithaihai bakah piengphunga ruolbanlohai ta dinga sawrkara inthawka hunghai hrim hrim mi tuelkhawma inhawitirna, hausakna le fakrukna dingin hmanga ngai nawng ei tiu. Chuong a ninaw chun a pap ei tuor ding hi titam a um taluo ding a nih.



Don't Miss
© all rights reserved
made with by Simon L Infimate