CCPur Dist. a thil a suksiet hai report pek
CCPUR: Mr Lunminthang Haokip, IAS, DC, CCPur chun zani  sun dar 11:30 khan a office chamber­ah District Disaster Response team an hmupui. Hi huna hin SDOs han anni biel sung chita tulai hnaia thli, ruo le riel leia in le lo a suksiet hai report an pek a, zani ma khan Manipur Chief Secretary kuomah WT Message in DC/CCPur Office in report an pek.

Report dungzui hin, CCPur Sub­Division­a khuo 5 haia inthawk In 86 a suksiet a, Henglep Sub­Division­ah school building 2 thangin khuo 19 a inthawk In 354 a suksiet. Chun, Singngat Sub­Division­a khuo 5 haiah In 30; Thanlon Sub­Division­ah khuo 7 a In 47 a suksiet a; Tipaimukh Sub­Division­ah Community Hall 2, PHC building 1 thangin In 138 a suksiet a; Tuibuong Block­a khuo 2 haiah In 4 a suksiet bawk.

Retaining Wall a sukchim
CCPUR: April 24, 2016, zing dar 4 vela ruosur khan Pu Lalhuopvel of Khawmawi retaining Wall, Khawmawi leilak thlang, Tuibuong vadung kap a um chu a sukchim bakah In khawm a suksiet met. Retaining wall a sukchim hi ft. 17 a sei a nih a, an sang zawng ft. 10 a nih.


National Panchayat Day hmang a nih
CCPUR: Zani 11:00AM khan District Training Centre (DTC) Hall, Tuibuong, CCPur­ah  PHED/CCPur; Good Samaritan Foundation le DLOs hai thangruola huoihawtnain Special Gram Sabhas “National Panchayat Day” hmang a nih. National Panchayat Day hi Mr Lunminthang Haokip, IAS, DC/CCPur in a hawng.
 
DC CCPur chun, National Paychayat pawimawna le mipui ta dinga development tum tum um hai a hrillang. John, AE Sub.Divn. No. IV (PHED) chun ‘Sanitation’ ti thupui hmangin le RK Surendra, AE, Sub. Divn. No. V (PHED) chun ‘National Rural Drinking Water Program’ ti thupui hmangin thu hrilna hun an hmang.

Primary School building thar hawng ding
CCPUR:  Mr T. Goukhomang, ZEO, CCPur chun April 26, 2016, 8:30AM hin Lailampat Primary School building bawl thar hawng a tih. Hi huna hin Special Invitees in N.Pakasana, DI of schools, Samulamlan block; Ashong Kom, AI of schools, Samulamlan block, Lalnghaklien Khobung, Co­ordinator Civil Work, ZEO/CCPur; Mahindra Singh, AE, ZEO/CCPur; Sarat Singh, SO, ZEO/CCPur; Tongkhopau Haokip, Social Worker le Zamkholet Haokip, Chief of Lailampat hai thang an tih.

CCPur tieng a ruong hung phur ding
CCPUR/MUMBAI: Mumbai hmuna Liver fail leia thina tuok (L) Nk.Lalramsiem Khawbung of  Taithu/Rengkai, CCPur ruong chu Churachandpur tieng hung phur tum a ni a, vawituk 6:10AM hin Mumbai Hmar Welfare (MHWA) member 2 han hung zuiin veng tieng hung panpui ni dingin ei thu dawngna chun a hril. Zani zan khan a ruong sunna hunser Mumbaia a chengnainah hmangpui a nih.

DLCC review meeting
CCPUR: May 6, 2016, 12:00Noon khin Mr Lunminthang Haokip, IAS, DC, CCPur inrawinain Singngat Sub­Divisional Hq. ah District Level Co­Ordination Committee (DLCC) meeting –cum­review meeting um a ta, Dist. Level Officers hai thang an tih.

Medical camp an buotsai
CCPUR: April 19, 2016 khan Saikawt Child Development Centre: EI­801­ hmalakna le Saikawt Primary Health Centre leh thangruolin Saikawt Children Home compound­ah Medical Check­up/camp nei a nih. Hi huna hin RPC NEI & EI­801 hnuoia Project thara naupang enkawl 132 hai medical checkup nei a ni a, damdawi khawm sem a nih. Hi hna hin Saikawt PHC enkawltu Dr Kungi le Hospital hminga hung Dr Jire L. PUdaite bakah Parbung doctor, Dr M Baby (le MO i/c Dr Joy Mary) han naupang hai hriselna an enfel. Saikot Child Development Centre (RPCNEI) chun hieng a chunga doctor hai chunga hin lawmthu a hril.
­(Lalnunthang Songate)

Emergency relief Comm. an indin
CCPUR:  April 23, 2016 zingkar inhmataka thli, ruo le riel­in Saichang area­a In 200 vel a suksiet le inzawmin zani hmasa khan YMA Chiengkon Branch chun Emergency Relief Committee an indin a, Chairman­ S.Thienlaljoy Gangte, Secy­Ginzawmsang, Asst. Secy.­P.Kaizamang, Finance Secy­ Tingzahat, Treasurer­ Mayjoy, Secy. Inf. & Pub. Lala P.Gangte hai bakah President/ Secy YMA Chiengkawn Branch, YMA Santing Branch le YMA Saichang Branch hai member a ruot an nih. Relief Committee chun zani hmasa inthawk khan Chiengkawn Bazar –ah donation box an daw a, April 26, 2016 hin thil an dawlkhawm hai po chawiin Saichang area pan an ta, riel le thli in thil a suksiet nasat na deu Saichang, Kawnpi le Maumual haiah relief camp hawng an tih.

Mizoram an inzinna report an pek
CCPUR: L. Pumlianpau, President, PTC, GHQ inrawinaa PTC HQ thuoitu Mizoram inzin hai chun zani zantieng 3PM khan Hiangtam Lamka PTC GHQ office­ah an inzinna report an pek.

Mizoram CM Lalthanhawla an inhmupui hunah, Manipur­a tlangmi hai a tul le pawimaw anga thangpui pei dingin an ngen bakah Sialkal Range Development Council peka lo um ta chu Assembly­ah pass ding le experts han tha taka written demarcation inthawtir ding le Mimbung le Sinzawl inkar leilak dawpek dinga an ngen thu an hril.


MNF President Zoramthanga an inhmupui hunah MNF le GoI agreement umsa sukpuitling a, Zohnathlak hai bubitna CCPur district chu Mizoram State­a inkawptir a ni thei dan ding an hriltlangpui a, MNF hun laia suksuolna hai inngaidamtuo a tul thu hai an hriltlangpui bawk niin an hril.

Training certificate lak thei
CCPUR:  DIC, CCPur hnuoia Entrepreneurship Training­a thang hai  chun April 26, 2016 a inthawk hin General Manager, DIC, CCPur Office­ah 11AM­2PM inkar sunginTraining  Certificate lak thei ning a tih tiin  Manager, DIC, CCPur chun inhriettirna a siem. Certificate hi mani ngeia lak ding a ni a, midang kuta pekdawk ni naw nih tiin thusuok chun a hril.

Sawiselna um lo dingin sin thawng ei tiu: O.Ibobi Singh
IMPHAL: Zanikhan Directorate of Consumer Affairs Food and Public Distribution (CAF&PD), Sangaiprou, Imphal­ah Manipur CM O.Ibobi Singh in National Food Security Act (NFSA) chu Manipur­a khawm hmang tan dingin a hawng a, hi dungzui hin hmun hran hran haiah  bufai semsuok tan a nih. NFSA hawngna hunsera hin Dy. CM Gaikhangam, CAF & PD minister Ksh Biren Singh, Commerce & Industries minister Govindas Konthoujam; Education & Transport minister, Dr Kh. Ratan Kumar; Health & Family Welfare Minister D. Korungthang; MLA thenkhaat le Chief Secretary, O. Nabakishore hai an thang.

NFSA hi ka sawrkar chun remchangin hmng naw ni a, mi rethei han hlawk taka an hmang tangkai seng theina dinga hmang le thaw ning a tih. A tannain Imphal West le Imphal East District haiah thaw ning a ta, District dang dang haia khawm a bat batin thaw pei ning a tih tiin O.Ibobi Singh in hi huna thu a hril huna a hril. Chun, NFSA tluong taka a fe pei theina dingin Fair Price Shop neituhai, Transporters le NFSA le inzawma sin thawtuhai chu indik, ringum le fel taka sin thaw ding le sawiselna um lo dingin sin thaw seng ei tiu tiin ngenna a siem.

IFCD minister Ngamthang Haokip chun Kangpokpi­ah NFSA hi a hawng tan a, Senapati­ah Jacintha Laxzarus, DC, Senapati; Tengnoupal­ah Health & Family Welfare Minister le Bishnupur­ah T. Mangibabu MLA haiin NFSA hi hmang tan dingin an hawng tawl bawk. NFSA hnuoia hamthatna dawng dinga thlang hai chun hi Act dungzui hin sungkuo a member pakhatin kg. 1 ah Rs. 3 rate peiin bufai kg. 5 pei le Rs. 2 rate in beiphit kg. 5 pei an inchawk thei ding a nih.

RIMS morgue­ah inselbuoina
IMPHAL: April 23, 2016 a inkhai hlum saa hmu Ningthoujam Ningol Mutum Ongbi Angali Devi (21) of Yumrembam Awang Leikai ruong chu zanikhan RIMS Morgue­ah postmortem thaw a ni a. Thina tuok nuhmei tieng sung han, kei ni um lovin postmortem thaw a nih tia sawiselna an siem leiin thina tuok nuhmei sung le a pasal sung tiengpang hai inkarah inselbuoina nasa tak a suok leiin mithiruong hi lak lovin a la um niin ei thu dawngna chun a hril.

Cabinet meeting nei a nih
IMPHAL: Zanikhan CM O.Ibobi Singh inrawinain Cabinet meeting nei a nih. Cabinet meeting­a hin khuorel sietna tlung (natural Disaster) chungthu hriltlang a ni a, Districts 9 um hai laia District 5 haia inthawk report hmu a ni ta thu hrillang a nih. Chun, Cabinet meeting chun hnuoithatna metric tonnes 15,000 laklut dingin an rel niin ei thu dawngna chun a hril.

Makru bulah mimkei hmun pahniah
IMPHAL: Tulaia ruosur nasat leiin Imphal­Jiribam Road a Makru leilak bula hmun pahniah mimkei rapthlak tak a tlung leiin motor­hai fe thleng thei lova an um leiin motor tam tak an intang mek niin ei thu dawngna chun a hril. Chun, Tamenglong­ Khongsang Road a khawm mimei a tlung leiin motor thahnemtawk tak fetlang thei lovin lamlakah an intang mek niin a hril.

Sawrkarin Relief camp a hawng tan
IMPHAL: Manipur phairam biela ruopui, thlipui le riel inthuo a a sur le a h rang leia mihriem chengna In tam tak a suksiet leia chengna ding nei lo hai ta dingin state sawrkarin hmun hran hranah relief camp a hawng tan. Tuchena report hmu danin thlipui, ruopui, riel le tek tlain Oinam Assembly Constituency­ah In 3,307 a suksiet a, Nambol Assembly Constituency sungah In 2,000 a suksiet a, Imphal West district sungah In 220 a suksiet niin ei thu dawngna chun a hril.

Tuolsung mi ni lo 24 man
IMPHAL: Zanikhan Imphal West District Police Commando han Thangal Bazar, Imphal­ah lekha pawimaw nei lo tuolsungmi ni lo (non­local) 24 an man. Hieng mi 24 hai hi Manish (24) s/o Madan Lal Jain, tuta Thangal Bazar a u min inneina thil le inzawma sin thaw dinga a hung thuoi nia hriet suok a nih.

Muolhoi­a 4th Martyrs memorial trophy
MUOLHOI: Zanikhan Muolhoi playground, Assam­ah 4th Hmar Martyrs Memorial  Trophy football tuornament 2016 opening ceremony hmang a nih. Hi huna  hin  Chief Guest in Pu H. L. Sanga Neingaite, President, Muolhoi Village a thang a, Guest of Honour in Tv. David Keivom, President, NCHISF, Functional President in Pu Elvis L. Hmar Chairman, HPC (D) Assam Region  hai an thang a, Special invitees in Hmar Inpui, President, Assam Region le President, HSA NCH&KA hai an thang bawk. Opening ceremony a hin hnam pasaltha fam lo chang ta hai inzana le sunna hun hmang a ni bawk.

May 16 hin Mizoram­a demand area le demand area puotieng haia khawm ursun taka Martyrs Day inser dinga hmalak a ni bakah Hmar mi hai chengna hmun le region tin haia khawm ursun taka hmang dinga inbuotsai mek a nih.

LPO sin a hmuh
PUNE:  Nk. Vanlalrengpui Neitham of Diphu chun India rama technology company lien pawl le inlar, Multinational Company (MNC) ni phak INFOSYS company­a Infosys LPO (Legal Process Outsourcing) Pune hmunah sin hmuin a zawm tah. Infosy LPO hi The Wall Street Journal Asia’s ‘Most Admired Company’ list a thang phak a nih. Nk. Vanlalrengpui Neitham hi B.A. LLB (honours),NEHU, Shillong­a zo niin Diphu hmuna District Commissioner Office­a khawm Advocate sin iemanichen lo thaw ta a nih.

Uttarakhand chungthuah RS sukchawl
NEW DELHI: Zanikhan selkaltu pawl members han Rajya Sabha ah rorel hlei thei lo khawpin Uttarakhand a President Rule chungthua sawiselna an siem leiin Prof. P.J Kurrien chun zanita dingin Rajya SAbha inthung a sukchawl. Hi hma hin Uttarakhand chungchang bawk leiin Rajya Sabha inthung sukchawllailawk a ni bawk. Congress members le selkaltu members dang dang han BJP thuoina hnuoia NDA sawrkar state danga BJP sawrkar ni lo hai suksie tumtua an intumna thuah Home Minister Rajnath Singh chun thudiklo a nih tiin a hnawl.

RS MP thar 9 han oathtaking an nei
NEW DELHI: Zanikhan states 5 haia inthawka MPs 9 hai chun Rajya Sabha member dingin intiemkamna (oathtaking) an nei. Rajya Sabha MP dinga oathtaking nei hai laia 5 chu Congress an ni a, 2 CPIM  an ni a, BJP le Shiromani Akali Dal 1 ve ve an nih. MP thar 9 hai laia 6 hai chu mithar an ni a, 3 hai chu Rajya Sabha MP ni tah, thlangtling nawk (re­elected) an nih.

Congress a inthawk Rajya Sabha MP thar dinga intiemkamna nei hai chu ­ Ripun Bora, Ranee Narah, Anand Sharma, Pratap Singh Bajwa le Shamsher Singh Dullo hai an nih. CPIM  K. Somaprasad le Jharna Das Baidya; BJP a inthawk Shwait Malik le Shiromani Akali Dal a inthawk Naresh Gujral hai an ni a, Rajya  Sabha Chairman, Mohammed Hamid Ansari in intiemkamna an neitir.

India­Pak. Foreign Secy Meet
NEW DELHI: India le Pakistan Foreign Secretaries hai chun vawisun hin New Delhi hmuna inbiekna nei an tih. Hi meeting­a thang ding hin Pakistan Foreign secretary Aizaz Ahmad Chaudhry chu New Delhi a hungtlung ta a, vawisun hin India Foreign secretary S. Jaishankar leh inbiekna an nei ding a nih. January 2, 2016­a Pathankot hmuna Indian Air Force (IAF) hmunpui terrorist han an bei le inzawma a thawtu hai kha Pakistan­a inthawka hung in­tan an nih tia intumna le inzawma Pakistan le India ram hai inkara inbiekna fe lai mek sukchawla lo  um ta a nih.

Well sukfainaah mi 2 an thi
GUWAHATI: Assam­a Beltola hmuna chun zani hmasa zingkar khan pasal 2 hai chu Well sukfai dingin feet 25­a inthuk Well sungah an lut a, boruok thalo ni dinga ring an hiplut leiin khaw hre lovin an um a, inrang takin Hospital panpui an ni a, sienkhawm damzo lovin an thi. Boruok thalo hiplut leia thi hai chu Nayan Jyoti Medhi (35) le Sunil Lagasu (25) hai an nih. Anni baka hin midang pakhat Sirajuddin Mullah (29) chu private hospital pakhatah enkawl mek a nih.

7th Pay Commission Sept-­Oct. velah
NEW DELHI: 7th Pay Commission dungzuia hlaw chu sawrkar thlungpui hnuoia thawktu han hungtlung ding September ­ October, 2016 vel khin an hmu hman chau el thei a hril a nih. 7th Pay Commission dungzuia hlaw pek ding thu hi Durga Puja le Dewali Kut ding tawm velah sawrkar thlungpuiin a puong el thei niin Financial Express chun a zieklang.  Thawktuhai chun arrear January, 2016 a inthawk hmung an ta, allowances arrear ruok chu pek an ninaw ding nia hril a nih.

Vaibelsie 1in LPG subsidy an surrender tah
NEW DELHI: India ramah tuchen hin sungkuo vaibelsie khatin LPG subsidy hmang ta lo dingin an surrendered ta a, hienganga LPG subsidy hmang talo dinga tawpsan tahai po po chungah lawmthu ka h ril, tiin April 24, 2016 a All India Radio (AIR) fe thlenga ‘Maan Ki Baat” programe­ah PM Nadrendra Modi chun a hril. Narendra Modi chun mipuihai chu Liquefied Petroleum Gas (LPG) subsidy hmang hi la tawpsan pei dingin ngenna a siem. LPG subsidy hi mi retheihai ta dinga thil hlu a ni a, an nihai chan ding a nih tiin a hril bawk.

Putar kum 97 mi in MA a exam
PATNA: Bihar State khawpui Patna huop sunga Rajendra Nagar Colony­a cheng, putar kum 97 mi zet, kum 1938 a graduate ta Raj Kumar Vaishya chu Nalanda Open University M.A. Economics Part­I exam­ah a thang a, student danghai ang thoin a exam a, Answer sheets 23 a hmang. MA Economics Part­I exam hi April 23, 2016 a kha nei a nih. Vaishya hi April 1, 1920 khan Bareily Town, Uttar Pradesh ah a pieng a, Koderma, Uttar Pradesh ni hlak, tuta Jharkhand state ni ta hmuna Private Farm pakhata General Manager sin thaw, kum 1980 a pension ta, kum 1938 a Agra University hnuoia graduate le kum 1940 a Law degree zo a ni bawk. Master Degree nei hrim hrim a nuomna lei le, retheina hi iengleia India in a sukbo thei naw am ti hai a hriet nuom leia MA Economics hi la zo tal tal a tum niin Vaishya chun a hril.

Lifetime Achievement Award inhlan
DIMAPUR: Nagaland Chief Minister TR Zeliang chu April 23, 2016 khan Pullman Bali Legian Nirwana Hotel, Indonesia hmunah 6th Global Leadearship Award, 2016 semna huna ‘Lifetime Achievement Award in Transformation’ inhlan a nih. Award hi business magazine Leaders International le US based NGO American Leadership Development Association (ALDA) hai thangruola an buotsai le sem a nih.

Tripura CLP dingin Gopal Roy
AGARTALA: Senior MLA Gopal Roy chu zanikhan Tripura Assembly­a Congress Legislative Party (CLP) leader dinga ruot a nih. Roy hi Bhanamalipur Assembly constituency­a inthawk MLA dinga term 4 tlangtling tah a nih. Thla hmasa laia CLP leader Birajit Sinha an ban leia Tripura CLP leader post hi hung ruok a nih.

VAWISUN THUPUI
Lalpa ina phunhai chu, Ei Pathien biekin inhuonna tuol sunga chun inno hlut hlut an tih.  Tar hnung khawma la ra rawp an ta, Tuihnang pai teuin hring hlut hlut an tih.   ­ Sam 92:13­14

Editorial: Khuorel sietna
Tulaia ei rama chanchin ei hriet inlar tak chu khuorel sietna (natural disaster) a nih. Khuorel sietna hi chi tu m tum a um a, chuonghai chu thlise, tuilien, khawthal, simkhawlei inhning, vur intawl, riel tla, tek tla, tlangkang, mimkei, boruok lum taluo, mihriem le khawl thil thaw  lei ni lova sietna rapthlak takel hung um thu tthu thlakhaai hi an ni tlangpui awm ie. Hiengang thil hai hi Pathien thil siem le thaw, nuomin nuomnaw inlakhawm ei pumpel thei lo, mihriem le thilsiem dang dang han lo thei lova ei tuok le ei tuor hlak an nih. Hieng thilhai lakah inveng dan le dang dan ding hranpa a um chuong nawh. A hungtlung pha chun ei thu le hla lova ei tuok le tuor el hlak a nih. Hieng thil hai hin siemtu Pathien ropuizie, thil thaw theizie le hratzie hai tarlangtu an nih. Ei Pathien hi inza le tinaw ruol an nawzie, do le tlan hmang san chi a ninawzie hai suklangtu an ni bawk.

Mithiemhai, khawvela sik le sa um dan ding le boruok inlumlet dan ding lo hrielawk theihai chun tuta kum fe mek hun sung hin kum dang neka van ruotui ei hmu rawn lem ding thu dam, khuorel sietna nasa tak a tlung ding thu dam, a bikin India hmarsak biel sungah khuorel sietna chi tum tum a tlung nasa bik ding thu dam an lo hrillawk a. Hieng thu hai hi Chanchinbu tiem hlak le TV en hlakhai chun ei hriet seng ring a um. A hungtlung ding a nih ti hriein awi inlakhawm hiengang thil hungtlung ding hai laka lo invenglawk dan le lo dang dan a u m nawh. Dang tum inlakhawm dang zo chuong nawng ei tih. Mihriem hratna a chauzie, Pathien thang lo chun mihriemhai hi iengmalo ei nizie hieng sietrupna a hungtlung chang hin a hung inlang chieng em em el hlak a nih.

Mihriemhai hi chapo thei ding, intithei ding le uong thei ding hrim hrim ei ni der nawh. Pathien chun ieng lai huna khawm a thil thaw theina hai hmangin a mi that, a mi suknain a mi sukhliem thei zing a nih. Chabo le uong neka a ropuizie le a thil thaw theizie hi hriezinga inpak le chawimawi hi a phu hlie hlie el a nih. Hieng laizing hin mihriemhai hi inthunun zo lovin, Pathien ropuizie le thil thaw theizie theinghilin ei lo tlansan nawk hlak. Amiruokchu, ei suolna hai anga mi thungrul lovin ei chungah a zangaina ropui tak an langtir a. Khuorel sietna chi tum tum hai lakah dam le himin ei um nawk el hlak. Pathien thatzie hi chu theinghil ruol ding a ni nawh. Hi khawvelah ei um sung hin chu ei renga ta dingin Pathien hnaizing hi a tha a nih.

Mithiem bikhai lo hrillawk ang ngeiin India hmarsak biela chenghai chun tu kum hin khuorel sietna chi tum tum rapthlak tak tak tuokin ei tuor mek a. Boruok inlumlet dan enin hi neka nasa lem khawm la tuok ding le tuor thei ding ngirhmuna ei um niin an lang. a. Hi lei hin khuorel sietna laka hin invenglawk thei le lo dang thei ding ninaw inlakhawm, hiengang thil a tlung chang le ei tuok changa ei taksa him dan ding lampui ei hriet hi a pawimaw em em a nih. Hieng a ni lei hin, khuorel sietna chi tum tum a tlung changa ei taksa himna dinga thang ei lak dan hi, khuorel sietna a tlung changa thil thaw dan dinga hrietna tha nei le training zo tasa han khawtinah awareness campaign tulai hin hung huoihawt ngei hai sienla nuom a um khawp el. A bikin tlangram biel huop sung khaw tum tum haia makmawa nei ni ngei sienla nuom a um zuol.

Manipur a chun tuchen hin thlipui, ruopui, riel le tek leia mihriem thina em a la tlung naw leiin lawm a um. Mihriem chengnain, Biekin le ranin hai hluozuitlak lovin sukse sienkhawm thina em ei la tuok nawna san hi ei Pathien zar lieu lieu a ni leiin Pathien kuoma lawmthu hril sup sup ei tiu. In a vai ransa, ramhnuoia ramsa le vate tam tak chun thina an tuok pha ti ei hriet. Hieng laizinga mihriem han thina tuokpui der lova ei um hi chu ei vangnei a, ei ham a tha a, ei Pathien hi chu a tha bek bek el a nih.

Manipur tlangram le phairam biela mihriem chengna In thlipui, ruopui, Tek le riel h an an suksiet hi a sangtel a tling ta ngei ring a um. Hieng In a suksiet neihai po po kuomah ei state sawrkar le sawrkar thlungpui chun an dit dan ang le an duthusam ang chu a pek thei ring a um nawh. A san chu state dang haia khawm khuorel sietna dang, khuo inthal le khawlum taluo leiin tui dawn ding nei lo, bu le thlai ching thei lovin an u m el bakah mihriem zakhat chuongin thina an tuok ta a, sawrkar ta dingin sawmdawlna le zangnadawmnaa sum seng ding hi a tam hle a nih. Bihar state a lem chun boruok lum taluo leiin Ngaidi le Pawl in 200 vel zet a kang fairit ta a nih. Khuorel sietna tuok leia harsatna tuor han thangpui an ngai a, sawrkarin thangpuina a pek hi a huntawk naw ding a ni leiin sietna tuok ve lo hai ei phal zat zat, ei thil neihai pe veng ei tiu. Hi thil hi ei thaw ve ding hrim le ei mawphurna a nih. Hi thila ding hin tlawmngai pawl han hma hung la sup sup hai sienla nuom a um.

Post a Comment

Powered by Blogger.