Quality maintain zing dingin an fui
CCPUR: Dr Bamin Tada, Director, Regional Resource Centre, NE chu zani 8:30AM khan CCPur District­ah hung inzin in District Hospital, CCPur a enfel. Dr. Thangchinkhup Guite, CMO/CCPur; Dr. J. Son Goukham Samte, MS/DH hai thangin Doctors le Nurses han Medical Supdt. Conference Hall­ah lawmlutna neiin hnam puon insiltirna an nei. Dr. Paul Ginthang (Retd) Medical Superintendent, District Hospital khawmin a uop ve.


Hi huna Dr Tada in thu a hrilnaah, District Hospital, CCPur in thienghlimna tiengpanga Kayakalp Award a dawng lawmpui ding le mit ngeia a hmuna hung hmu dinga CCPur district­a hung a ni thu a hril a. Kayakalp Award dawng theina dinga District hospital in thienghlim le faina tiengpanga a hmalakna tawpsan loa sunzawm pei dingin a ngen a. Quality ei ti hi nikhat­nihni ela hmu thei a ninaw leiin sunzawm pei a tul. Hi lei hin District Hospital, CCPUr in thienghlimna le faina kawngah district dang le state sung chau ni lo, state puotieng (state dang) hai entawn ni thei dinga quality maintain zing dingin an fui. Dr Tada hi Dr Joydeep Das, Sr. Consultant, RRC­NE; Mr Bhaswant, Consultant, HMIS, RRC­NE; Mrs Rita Tamang,Consultant,RRC­NE (HR& Training)p; Mrs Arpana, Consultant,RRC­NE (Community Mobilization); Dr Usha Kh., RCH Consultant, NHM, Manipur; Ng. Monota, State Facilitator, Manipur,  RRC­NE le Mr W. Imo, Community mobilization, Consultant, RRC­NE han an hung zui. Lawmlutna hun hmangpui a ni zovin Dr Tada hin District Hospital­a Ward tum tum hai sirkuolin a enfel.

DC, CCPur in Chanchinbumihai rawtna siemhai a bawzui ding thu a hril
CCPUR:  Zani zantieng dar 5 a inthawk khan Pu Lunminthang Haokip, IAS, DC, CCPUr  in sauliim Restaurant, New Lamka­ah Dinner­cum­Consultation on “How to check Cyber Crime and Whatsapp Abuse and  National Food  Security Act” ti  a huoihawt. Hi taka hin tuolsung nitin Chanchinbu Editors & Publisher­hai, Imphal nitin chanchinbu haia Correspondent­hai, Pu  C.T. Lian, MDC, Pu Kammuanlal Simte, MCS, AC to DC, CCPUr le Pu M. Ginzasuan, DSO, CCPUr hai an thang a, programme zovin zanbu DC, CCPur rawiin an kil tlang.

Cyber Crime le Whatsapp hmang suolna chungchang bakah National Food Security act chungchang an hriltlang huna Chanchinbumi han rawtna an siem hai chu Pu Lunminthang Haokip chun a bawzui ding thu hu hina hin a hril. National Food Security Act chu Manipur­ah April 24 or 25, 2016 a inthawk hawng/hmang ni el theiin Ksh. Biren Singh, Minister, CAF & PD le Works in an meeting huna a hril tiin DC, CCPur chun a hril.

Churachandpur District sunga Rationing Agents 315 an um thu, NFSA hnuoia hamthatna dawng thei ding mi 60315 hai kuomah Ration Cards sem a ni ta thu, CCPur in thla khatah NFSA hnuoia bufai quintals 13,488.25 ei mamaw ding thu, Rationing Agent­hai chu bufai man ding deposit thei dinga inpeisa an ni thu, CCPur Sub­Divsion­ah Bufai le a dang dang dawng dingin 33,529; Mihriem 1,40,842; AAY dawng dingin In 3,515 le mihriem 4217; Henglep Sub­Division­ah In 5,747, mihriem 24,313; AAY dawng ding In 754 le mi 905; Singngat Sub­Division ah In 4,867, mihriem 20,514, AAY dawng ding In 579 le mihriem 693; Tipaimukh Sub­Division ah In 5,703, mihriem 23,857, AAY dawng ding In 541 le mihriem 649 le Thanlon Sub  Division­ah In 4,634, mihriem 19,394,  AAY dawng ding In 446 le mihriem 535 an um thu hai Pu M. Ginzasuan, DSO, CCPur chun a hril.

 Pu Kammuanlal Simte, AC to DC, CCPur in  Cyber Crime le Whatsqpp Abuse thu hung hril tanin fekhawm han hi chungthu an thil hriet le ngaivan hai an hril tawl.

HMARTOB OB meeting thurel thenkhat
CCPUR: April 19, 2016, sun dar 12 khan HYA Office, Saikawt, CCPur hmuna Hmar Martyrs Trophy Organising Board (HMARTOB) OBs le programme making Committee meeting nei a nih. Hi huna hin May 16, 2016 nia Hmar Martyrs Day hmangna huna  Marathon race, Fuhrel inher, Lungdeng inelna (short­put), Individual items  haia inruolsiekna nei dingin an rel. Chun, Martyrs trophy play zatin (nitin) Vehicle parking Fee lak ta hlak dingin an rel bawk. Martyrs Day le Martyrs Trophy le inzawma Advertisement thaw nuom hai ta ding khawmin thaw thei ni dingin Info. & Publ. Dept., HMARTOB chun a hril.

Games & Sports i/c dingin Laldawnlien Varte, Vehicle parking  i/c in Ramsanlien Hmar le  Advertising & Event Coordinator i/c in  LRS Puruolte hai ruot an ni bawk.

Dawkan le thung­na semdawk
CCPUR:  Autonomous District Council (ADC), CCPur hnuoia School tum tum haia ding Thungna le Dawkan (desk & table) zanikhan Tuibuong­a Council Office­ah semdawk a nih. Student tam leia  Thungna le dawkan indainaw leia ngenna pelut schools hai kuoma thungna le dawkan hai hi sem a ni a. Tukum sung hin thungna le dawkan  kawp (pairs) 200 vel sem tum niin ei thu dawngna chun a hril.

JCB le Tripper hmangin Nulla an huot
CCPUR: Hmarveng Village Authority chun Job Card  hnuoiah zanikhan an khaw huop sunga Nulla hai JCB le Tripper motor 1 hmangin an huot fai. Hi thil hi Job Card holder hai ni khat sinthawna aia thaw niin sum JCB le tripper ruoi man bak po VA han an tum niin ei thu dawngna chun a hril.

NFSA a dingin CCPur district zofel
CCPUR: Manipur sawrkarin April, 2016 thlaa inthawk National Food Security Act (NFSA) hmang tan a tumna le inzawmin CCPur district­a chun thil tul le pawimaw hai sukfel zo ta a, sienkhawm Imphal tiengpang duthusamin an lan zofel naw niin ei thu dawngna chun a hril. NFSA hmang a ni huna priority household­a mi pakhatin thla tin bufai kg. 1­ah Rs. 3/­ rate in kg. 5 hmu thei a ta, AAY Card nei han thla khatah Rs. 3 rate in bufai kg. 35 an inchawk thei ding a nih.

Training on Group building
CCPUR: Zani 10:30AM khan Synod Hall, IB Road­ah DSSS/CBIRDAT huoihawtnain One day Workshop on Training on Group Building, Leadership and  Record Maintenance nei a nih. T. Lalboi, District Coordinator, DSS/CBIRDAT, CCPur in Welcome and Keynote address a hril a, Technical session­ah Kaikhohao Gangte, MSW in khuo 21 haia inthawk SAG (Social Action Group) member hai formation of Group, Leadership qualities and record maintenance thu inchuktirna a nei.

Sina kaisang
CCPUR/KOLKATA/GUWAHATI: Pu Christopher Lalrothang Tusing, s/o H.T. Neisanghlei,  Thenmuol, Office of the Principal General, Kolkata hmuna Auditor sinthaw mek chu  April 1, 2016 a inthawk khan Senior Auditor in a kaisang.

Pu Lalzarlien Zate s/o (L) Liensang Zate, r/o Hmarkhawlien le Pi Ramchullo, w/o Pu James Neingaite hai chu ACIO­II a inthawk ACIO­I in an kaisang. Anni pahni hi Intelligence Bureau, Ministry of Home affairs, Govt. of India hnuoia thawk an ni a, Guwahati a posing an nih. Chun, Pu Lalthanglui, Pilangkata, Income Tax, Govt. of India hnuoia thaw lai zing chu Office  Superintendent in a kaisang.

Tamenglong Dist­ah thli a hrat hle
IMPHAL: Zani zingkar khan Tamenglong District chu thlipui, ruo le riel hrat takin a nui a, Samparam khuoah In tam tak a mut siet a, Tamenglong ah PED IB chung a mut hawk a, mihriem thi le hliem ruok chu an um nawh.

Dr P. Inakhunbi In an kal pek
IMPHAL: DISHA FINCROP (FIN) Consultancy India Pvt. Ltd, Delhi hnuoia Loan pek ding tiin Dr P. Inakhunbi, w/o Ch. Shantikumar of Thangmeiband Senapati Kolup, Imphal West  District chun kum 13 liemta sung khan mi hran hran 2000 vel kuomah Rs. 2.5 crore a lakkhawm a, Loan hi a pek thei sinaw leia lungsenin Loan beiseia sum pe han zanikhan Inakkhunbi In an va kal pek.

Dy. CM in Tarun Festival a hawng
IMPHAL: Dy. CM Gaikhangam chun zanikhan khuolliena thangin Langol Tarung Village­ah Foundation day cum Cultural Festival a hawng. Hi huna hin Revenue, Law & Legislative Affairs, Forest & Environment Minister I Hemochandra, PHED, Science & Technology, Labour & Employment Minister Manga Vaiphei, Health and Family Welfare, GAD and CADA Minister DK Korungthang le Tamenglong A/C MLA Janghemlung Panmei hai presient le Guest of honours in an thang tawl.

NHRC Spl. Reporter a hung inzin ding
IMPHAL: National Human Rights Commission (NHRC) a Special Reporter Anil Pradhan chu April 27­30, 2016 inkar khin Tipaimukh Dam le inzawmin Manipur­ah a hung inzin ding a nih. Mr Anil Pradhan hi Tipaimukh Dam le inzawma dodalna, sawiselna le records um hai lakhawm dinga Manipur (Imphal) a hung inzin ding niin ei thu dawngna chun a hril. Manipur a cham sungin Peoples Action for Development Against Construction of Tipaimukh Hydroelectric Project han tuta hmaa representation an lo peklut inquiry thawin state govt. officials hai inhmupui bawk a tih.

Chhattisgarh­ah Biekin suosamin Bible an raw bakah Pastor an sawisak
RAIPUR: Chhattisgarh a Baster district sunga Karanji Matagudi Para hmuna Biekin pakhata chun pasal 10­12 vel hriemhrei chawi hai va lutin Biekin sunga Bible le thil dang dang hai an raw bakah hi Biekin­a Pastor le a nuhmei naupai lai chu an sawisak niin zanita Police thu suok chun a hril. Hi thil hi April 17, 2016 nia kha tlung niin ei thu dawngna chun a hril.

Hi thil tlung le inzawm hin Pastor Deenbandhu Sameli chun Police­ah report pein FIR registered a ni a, Biekin suosamtu hai man tuma zawng mek an ni a, man vat ning an tih tiin Baster Superintendent of Police RN Dash chun a hril.


Pastor Deenbandhu in report a pek dungzuiin, hmelhriet ngailo puona hmai intuom hai chu Kristien sakhuo zuitu, kohran danga mi nia inhrilin, Biekin­a tawngtai an nuom thu an hril a. Biekin sung an lut charin Pastor le a nuhmei chu an thu le hla lovin ‘Jai Sri Ram’ in titir tumin an bei nghal a, Biekin sunga Holy Bible le furniture hai bakah sakhuona le inzawm lekhabu hai chu Petrol (inflamable liquid) buok khumin an raw nghal el nia hril a nih.

Report an dawng le inzawm hin Police chu hi thil tlungna hmuna hin fe nghalin zan khawvarin Biekin hi an veng. Hi thua hin under sections 295 (injuring or defiling place of worship), 392 (robbery), 452 (house­trespass after preparation for hurt), 435 (mischief by fire or explosive substance), 323 (punishment for voluntarily causing hurt) and 34 (common intention) of the IPC hnuoia case registered a nih.

Hieng laizing hin Chhattisgarh’s  Christian Forum a President, Arun  Pannalal chun, Biekin suosam le Pastor sawisaktu hai hi Bajrang Dal workers hai an nih tiin an tum . Hi lai biela dingin tuta tum hi Christian sakhuo zuitu hai hmun beia a um vawithumna a ni a, a thawtu hai hi Bajrang Dal workers hai an nih tiin a hril bawk.

Biekin suosamtuhai hi chem, tubo, kawlhnam le Petrol le inthawk an nih a, Bible le furniture hai chau Petrol buok khum lovin Pastor Deenanath le a nuhmei naupai lai Meena khawm Petrol buok khumin raw an tum a, sienkhawm a vangneia siemin damin an tlansuok hman a nih tiin Pannalal chun a hril.

Mizoram Civil Secretariat a kang
AIZAWL: Zani hmasa zan khan Mizoram Civil secretariat building, Aizawl­ah kangmei a suok a, Department 3, Information & Communication Technology, Revenue and Land Settlement le HIgher & Technical Education Office hai a kang a, thil Rs. 100 lakh manhu a kangsiet vawng tiin Lalhuliana Fanai, SP, Aizawl District chun a hril.

GPRN/NSCN le GoI in CF kum 1 dang
DIMAPUR:Governor of India (GoI) le National Socialist Council of Nagaland (GPRN/NSCN) chun  April 18, 2016 khan Cease Fire (CF) kum 1 dang suksei nawk dingin an remtih. Cease Fire pawtseina hi April 28, 2016 a inthawk tiemtanin kum 1 sung, April 27, 2017 chen ding a nih. Cease Fire agreement hi Delhi hmuna ziek a ni a, GoI a inthawk MHA Joint Secrtary Satyendra Gard le GPRN/NSCN tienga inthawk Jack Zhimomi le Chen Konyak hai an thang.

Sawrkar thlungpui chun NSCN­IM hai chu ‘framework agreement’ bawsiet zawnga sum ngenna le thil dang dang Nagaland le Manipur state haiah thaw talo dingin zanikhan an hriettir. Hi thu hi zanita Ceasefire Monitoring Group (CFMG) meeting huna sawrkar thlungpuiin a hril a nih. NSCN­IM a senior leader VS Atem chun, mipui hai kuoma tax an khawn ngainaw thu a hrilin a hniel thung. Hi meeting­a hin India sawrkar tiengpang chu Special Secretary (Internal Security) MK Singla in an rawi.

PM in Super Speciality hospital a hawng
JAMMU: PM Narendra Modi chun zanikhan Jammu and Kashmir­a Reasi district­a Kakryal, Katra hmuna kum 230 umna Shri Mata Vaishno Devi Narayana super speciality hospital a hawng. Hi Hospital hi Rs 300 crore senga bawl a nih.

Zu thalo dona dingin hologram
MUMBAI: Maharashtra sawrkar chun a state sunga zu thalo le thienghlim lo sukbo le dangna dingin a state sunga Zu siema um bottle hai hrim hrima hologram hmang/bel ngei dingin dan thar a siem. Revenue minister Eknath Khadse chun, “polyester base track and trace” hologram hmang hin Zu siemfawm/a lem le a tak awlsam taka hriet thei a hung ni ding a nih tiin a hril. Zu a inthawk state sawrkarin sum a lamsuok khawm hi thil hin nasa takin a sukpung pha ding a nih tiin minister chun a hril bawk. Hi thil hi July 1 annawleh August 1, 2016 a inthawk hmang tan dinga ti a nih. Tuchena hin India rama states 21 hai chun hologram technology hi an hmang ta niin Eknath Khadse chun a hril.

Ganja­a sumdawngtu kum 10 intang dingin
VISAKHAPATNAM:  First Additional District and Session Judge N. Narasinga Rao chun kum 2015­a  Ganja a sumdawngna leia man  Appa Rao (38) of Devaralle chu kum 10 sung jail intang dingin a chungthu a rel. Rao hi Thingpui hotel neitu a ni a, kum 2015­a kha Ganja kg. 40 le man a nih.

Maoist han student pakhat an that
BHOPAL:  Maoist helpawl hai chun tulai hnai el khan Balaghat district­ah student kum 20 mi Rati alias Sundar chu Police kuoma thu pesawngtu nia intumin an kap hlum. Maoist helpawl hai hin Malajkhand Dalam hmuna inthawk khawsung mi 2 an thuoihmang a, ramhnuoia an thuoilut hnungin Rati hi an kap hlum niin Police thusuok chun a hril a, ama ruola an thuoihmang Rajkumar of Dabrutola ruok chu dam le himin a hung tlansuok a nih. Hi thil thawnaa inrawlna nei hai man an ni theina dinga information pe theitu hai kuoma lawmman Rs. 30,000 pek dingin Balaghat IGP DC Sagar chun a puong.

Operation ‘Hillstrom 3” thla 6 sung la sunzawm ding
SHILLONG: Garo Hills le West Khasi Hills haia helpawl hai tukdawlna dinga Operation ‘Hillstrom 3” thawa um chu thla 6 dang la sunzawm dingin Meghalaya Police in an rel. Operation thawna hi a hlawtling hle a ngai a ni a. Central govt. a inthawk Commando tamlem  an hung belsa ding a nih.

Meghalaya­ah Pa fak leiin mi 2 an thi nawk
TURA: Meghalaya­a Garo Hills a chun zani hmasa khan Pa hme leiin mi 2 an thi nawk. Pa hme leia thi hai chu Jumila S. Marak (65) le a tunu Dikkandi S. Marak (4) hai an ni a, Tura Hospital panpui an ni mek lai damzo lova thi an nih. Ei thu dawngnain a hril danin, zani hmasa zan khan Garo Hills­a Siju huomsung Rongdong village­a sungkuo pakhata mi 6 hai chun rama an lak Pa (mushroom) an fak a, chu hnunga tuta a thi hai pahni hi an hung buoisie le damzo lova thi niin a hril. Midang 4 hai chu Tura le Goalpara, Assam haia hospital haia enkawl an ni a, an ngirhmun a tha tiin ei thu dawngna chun a hril.

Tuta hma khan East Khasi Hills­ah rama Pa an hme leiin sungkuo pakhata mi 5 zetin thina an lo tuok ta bawk a nih.

Bore Wells ft. 200 neka inthuk cho a khap
MUMBAI: Maharashtra sawrkar chun, hnuoi chunga tui nasa taka kiem tieng a pan leiin a state sungah feets 200 neka inthuka borewells cho a khap. Hi thu hi Maharashtra Water Supply and Sanitation minister Babanrao Lonikar in Mumbai­a state secretariat­a press conference huna a hril le puong a nih. Tui thuah state pumpuiin harsatna a tuok mek leia hi thil hi thaw a nih tiin a hril. Khapna bawse­a Feet. 200 neka inthuka borewell cho an um chun dan angin an chunga action lak ning a ta, a tul chun jail­a khum ning an tih tiin a hril. Hi thil hi borewells a inthawk hmang ding bak bak tui pump dawk a ni hlak leia tui thua harsatna tlung mek sukbona dinga thaw tum a nih.

Netaji driver lo ni hlak kum 116 a tling tah
NEW DELHI: Netaji Subhash Chandra Bose driver lo ni hlak, Colonel Nizammuddin of Mubarakpur, Azamgarh district, Uttar Pradesh chu a la dam a, tuhin kum 116 mi a ni tah. Tulai hnai el khan SBI­ah a nuhmei le ama hmingin bank account a hawng a, hi account hawngna dinga Voter Identity Card a pekluta chun Nizamuddin @ Saifuddin ti le a pieng kum hi 1900 niin a ziek. Nizamuddin hi April 17, 2016 khan kum 116, thla 3 le ni 14 a tlingna a nih.  Khawvela mihriem hring dama la um hai laia upa tak a nih. A nuhmei Ajbunisha khawm a la dam a, kum 107 mi a ni tah. Khawvela upa taka hril Japan mi chu kum 114 mi niin February, 2016 khan a lo thi tah.

Union minister Harsh Vardhan Nagaland­ah
DIMAPUR: Union Minister for Science & Technology and Earth Science Dr Harsh Vardhan chu ni 2 sung cham dingin zani hmasa khan Nagaland­ah a hung inzin a, zanikhan Kohima hmuna Nagaland Science and Technology (NASTEC)­ah Twinning Network Project on Chemical Ecology of North Eastern Region a hawng bakah  Kohima­a Naga Hospital Authority hmuna DBT Healthcare Laboratory a va sir bawk.

Dr Vardhan hin zani hmasa khan Dimapur ­a Jharnapani hmuna Indian Council of Agricultural Research (ICAR) Complex for North East Hills (NEH)­ah DBT hnuoia Production Facility a va sir bakah Jharpani­a ICAR National Research Centre­a ‘Mithun Firm” hmun khawm a va sir a, Jharnapani hmuna DBT in an din Biotech Infrastructure Facility a hawng bawk.

IAS officer lungina khum
GHAZIABAD: IAS Officer, Rajiv Kumar chu CBI Court in Dasna Jail, Uttar Pradesh ah April 18, 2016 khan a sielut. Rajiv Kumar hi Deputy Chief Executive Officer (DCEO), Noida laia  Noida plot allotment scam le inzawma thuneina (power) hmang suola intum, CBI Court in kum 2012 a kum 3 lungin intang ding le Rs. 1,00,000 chawi dinga thiemnaw a lo inchangtir ta, April 17, 2016 nia CBI Court a inpe a nih. Kha hun laia CEO Noida sin lo chel Neera Yadav, kum 3 lungin intang dinga thiemnaw inchangtir ve tho chu Rajiv Kumar chu a hmain CBI Court hmaah a lo inpe ta a, lunginah hun a hmang mek.

VAWISUN THUPUI
Aw ka hringna, iengdinga i kun zing am? Iengdinga ka sunga hin i buoi am a na? Pathien beisei rawh, a hmela damna lei chun, Ama chu ka lân pâk ding a ni sih a.  ~Sam 42:5

Editorial: Mani hlutna seng hriet chieng ding

Siemtu Pathienin thil a siem po po hai laia a ngaihlu tak chu mihriemhai ei nih. Hi ei hin thil siem hai lai po poah a chunghnung takin a mi sie bakah thil siem danghai chunga thuneitu ding, roreltu ding le enkawltu dingin a mi sie bawk a nih. Mihriemhai hi siemtu mit hmuah chun hlu le tha tak el ei ni seng a nih. Hmelsie, hmeltha, piengsuol, pasie le hausa hai khawm ei Pathien mit hmua chun ei tha seng a, thlier bik a mi nei naw a, angkhat vawngin a mi ngai a nih. Hi lei hin Pathien thil siemhai lai poah a vangnei tak chu mihriemhai hi ei nih. Siemtu Pathien ngaihlut hai ei ni leiin ei hlutna hi hrie seng inla nuom a um hle. Mihriem han ei hlutna le ropuizie ei hrietthiem ngainaw leiin harsatna le rinum tina hai hi ei nei hlak. A chang lem chun siemtu Pathien chungah ei nuor hlak. Amiruokchu, siemtu Pathien chunga hin nuor thei ding le lungawinaw thei ding ei ni am ti ruok hi chu chik taka ei ngaituo chet chet a tul a nih.

Mani hlutna ei hriet naw chun thil tha thaw inhawk le nuomna chang nei nawng ei ta, hmasawn dinga taimak khawm harsat pha hlak ei tih. Mihai laia hawihawm taka um le chet vel lem chu a tum tak ngiel khawm ei tum sin ngai naw el thei. Mani seng hi hang inen inla, khawvela mihriem hieng zozai hai lai hin ei inangpui hrim hrim an um nawh. Hi thil hi ei hlut em em elna pakhat a nih. Mihriem hieng zozai lai hin ei inangpui tukhawm an um nawh, inphirhai khawm inang an um nawh an tih. Hi thil hi research an thawnaa inthawka an hmusuok a nih. Chuong a ni chun khawvela umsun ei ni leiin hlu takel ei nih.

Chapona le uongna ni lovin mani seng hi inngaihlu ding ei nih. Chu umzie chu mitinin ei hlutna hietchieng ding tina a nih. Mi han hlu le tha an mi tinaw khawmin mitinin mani seng hlutna hi hriet a, inngaihlu ding ei nih. Ei hril ta angin inngaihlu ti hin chapona tieng a kawk der naw a nih. Mihriem hai hlutna kha a kawk lem a nih. Mani inngaihlutna chang hre lo hai chun thiltha an thaw pei ngainaw a, lungawinawna ding, nuorna ding le lungsenna ding an zawng lem hlak. Ngaihlut ding tha le indik hriet ding chun mihriemhai hin ei hlutna hi ei hriet chieng hmasak a tul. Chu taka khawm chun mani seng inngaihlut hi a bul tanna ding niawm tak a nih. Mitin hi mani seng inngaihlu thiem inla chu ei thil ching tha naw em em el, hawp le hmuom, fak le dawn chi hran hran hai hi ei thaw ring a um nawh.

Ei ni Zohnathlak Kristien hai lem hi chu Pathien angpuia siem ei ni a, ei hlu hle a nih. Kuva fak sen temtuom, mi laia ziel hawp khu lui lui, Sada/khaini hmuom mei mei dam, tuibur hmuom puma tawng pur pur dam; mihai thangpuina beiseia invir phet phet dam, indik le mawi khawm dawn chuong lova hmel hriet, thil thaw thei hai zar zo tum tlat dam; sunghai thawsuok sa ring tum tlat dam hi  chu thil inzakum a ni a, thaw chi a ni nawh. Hlutna nei ve si ta ding chun changkang san dai ding a nih. Mani ei inngaihlu naw  a,  hlu ei nih ti khawm ei inhriet naw chun thil tuollo le thil tha lovah ei insukbuoi zing ding a nih.

Mitin hin ei hlu a nih ti hi inhrie zing ei tiu. A thi ta hai hi an um naw sawng pei a, an inangpui amani an tlukpui amani an hung um nawk ngai der nawh. Ei hlutna ei hriet thiemnaw leia fak le dawn tha lo tak tak fak, dawn le thaw leia insukse le thi hi ei va tam ta ngei de!  Ei hringna hai hi a hlutzie ei hriet chieng tawk naw leia mani inthat el dam hi ei va tam ta ngei el! Har ei tiu a, mani hlutna hi hriet chieng tum ei tiu. Ei hlutna ei hriet chieng phawt chun mani le mani inthat dam, thil tha naw, ei sietpui ding le ei thipui ding thil hai hi tawk der lova ei um thei ngei ring a um.

Sunghai thawsuok sa fa tlak chaua inngai chun chamhlawm a nina inzakpui naw ni a, sunghai thawsuok sa ringin um zing el a tih. Midang ta dingin iem ka thaw ve thei ti nachang hre lova mihai thangpuina dawng tlak chaua inngai chun Zu a dawnin Drugs a thaw el hlak. Sunghai thawsuok sa le siem sa fa tawk chauva inngai le insukdere pawi tilo thalai chun zingkara khawsak rel dinga tho hi tum ngai naw nih. Mani thawsuok sa khawm ni lo, sunghai thawsuok saa thil thar nei pawiti lo chun, a mak khawp el, an nei nawk nge nge hlak. A chunga hrillanga um hai anga um hlak mihai hi, mani hlutna hrie chieng lo an ni hlak. Hi lei hin mani hlutna hi mihriem han ei hriet chieng nuom a um hle.

Post a Comment

Powered by Blogger.