Hmasawnna Thar | 19 April, 2016

Hi Dist. Hospital OT in hmangruo thar  

CCPur:  District Hospital, CCPur  Operation Theater (OT) chun LED mobile focus light 2 an nei thar a, tuhin fit zo le hmang a nitah. LED mobile focus light 2 hai hi adjustable light (gright & dim) niin pakhtah Rs. 1.5 lakh manhu a nih. OT - a light fit na dinga pawisa sum hi District hospital thienghlimna kawnga hospital in  Rs. 50 lakh award (lawmman) a dawng hmanga inchawk niin Dr  Son  Goukham Samte, Medical Superintendent, Dist. Hospital chun a hril.

SSC CGL Exam, 2016 postponed

CCPur/New Delhi: Staff Selection Commission (SSC) huoihawtna hnuoia Combined Graduate Level Examination (CGLE), 2016 May 8th le 22nd May, 2016 haia nei dinga ti chu August, 2016 thla sunga nei dinga thul (postponed) a nih. SSC CGL Exam Tier­I exam hun ding (date) chu SSC website fethlenga puonglang vat  ni tang a tih. Hi thil hi exam a thang ding Candidates tamlem hai hmakhuo ngainaa thaw a nih tiin A.K. Dadhich, Under Secretary (P&P­1) in April 13, 2016 nia inhriettirna an suoa chun a zieklang.

Zu laklut le zawr khap

CCPur: Saikawt Defence Party (SDP) chun thusuok siemin, Saikawt khaw sungah Zu laklut le zawr khap tlat a ni thu an puong a. Hi khapna thupek inza lova thawlui tuhai chunga a tul angin action lak ning a ta, Rs. 500/­ fine inchawitir ni bawk an tih tiin thusuok chun a hril.

Graduation ­cum­ Thanksgivin Ceremony

CCPur: Vawisun 10:30AM­12:30PM inkar sung hin Priscilla Home, New Lamka, College Veng, CCPur, Manipur chun an Home campust­ah 14th Graduation­cum­Thanksgiving Ceremony hmag an tih. Hi huna thang dingin Managing Committee, Priscilla Home chun mitin a fiel.

Khuga Dam­ah a tla hlum

CCPur: Ms Jenny Niangbiakching (23) d/o Thuamzalian, Mission Veng, Hiangtam Lamka chu zani zantieng khan Khuga/Mata Dam­ah changsuolin a tla a, damzo lovin a thi.

            
Ms Niangbiakching hi tlawmngai pawl han iemanichen an zawng hnungin hmu le tuia inthawk lakdawk a ni a, inrang takin District Hospital, CCPur panpui a ni a, sienkhawm doctor han an san thei ta naw niin ei thu dawngna chun a hril.

Bomb sukpuok; thi le hliem um lo

CCPur: Zani hmasa zan dar 8:40 vel khan Zion  Street, Central Lamka­a PK Sharma Store tuol lai tu ti hrietlo han bomb an sukpuok a, sienkhawm thi le hliemna tuok an um naw a, P.K.Sharma store lutna bul laia foundation  bang plaster a suk khawk met. Hi bomb puok le inzawm hin CCPur Police chun FIR No. 23 (4) 2016 CCP­PS U/S 427/34 ipc & 3 of Explosive Substance Act an registered.   Sukpuoka um bomb hi iengang bomb am ti hriet a ninaw a, Gelatin a ni el thei tiin ei thu dawngna thenkhat chun a hril.

Sangaikot PS  OC

CCPur: Inspector T.T. Zuola chun zanikhan Sangaikot Police station­ah Officer in­charge (OC) sin chel dingin SP, CCPur Office­ah a hung zawm. Pu T.T. Zuola hi Imphal­a CID (Speial Branch) a inthawka hung sawn a nih.

Post Office  core banking

CCPur: Tuibuong Post Office­a core banking system thaw tumna le inzawmin Imphal­a inthawk System Manager inrawinain Karnaaljit le Ishwarchandra hai chun zanikhan Post office an hung sir a, zanikhan post office thawktu hai leh ATM booth cable light ding an fit tan a, tuta kar sung hin core banking hmangtan thei a nina dingin thil tul hai sukfel an tih.

AR motor a eksiden, 1 a thi

CCPUR: April 17, 2016 zing dar 9 vel khan Headquarters Veng, CCPur­a 7­ Assam Rifles Outpost motor (407 motor) ML05­7884 a break fail leiin a eksiden a, a sunga chuong Assam Rifles sipai 8 hai laia 3 an hliem a, hliem hai laia an rik zuol pahni Imphal panpui an ni a, sienkhawm pakhat chu Imphal an tlung sawtnawte hnungin a hliemna tuorzo lovin a thi. Thina tuok hi Havildar H.S. Panda (Driver) of Himachal Pradesh a nih. Hliem danghai chu, Budin Thingnok of Arunachal Pradesh le  Dipesh Narjary of Assam hai an nih. Dipesh Narjary hi a vawitieng malru a tliek a, District Hospital panpui a ni a, Budin Thingnok chu a lu a hliem leiin Imphal panpui a nih. Hi eksiden le inzawmin CCPur Police chun FIR No. 22 (4) 2016 CCP­PS U/S 279/427/338/304­A IPC an registered. Havildar H.S. Panda ruong hi RIMS Morgue­a post­mortem thaw zo a ni hnungin officer hai kutah a ruong hi pekdawk a nih.

NE students hai ta dingin Delhi­ah Hostel pahni;

Hill states 12 haiah highways km. 2,000 vela sei siem tum a nih

New Delhi: Zani hmasa khan Delhi University a kai NE students han Union Minister of State (Independent Charge) for Development of North Eastern Region (DoNER), PMO, Personnel, Public Grievances, Pensions, Atomic Energy and Space Dr Jitendra Singh an inhmupui a,an mamaw le harsatna chi tum tum an tuok hai an intlun a. Dr Jitendra hmalak dan le a sin thaw danah lawmum le tha an ti thu NE students han hi huna hin lawmthu an hril.

      

PM Narendra Modi in India ram state hran hrana student­hai NE bielah inzin a, NE mihai khawsak dan hai hang en le hrie chieng dinga thurawn a pek chu tha le ngaisang um an ti thu NE students han Dr Jitendra Singh kuomah an intlun.

      
DrJitendra Singh chun NE student­hai thu hrilhai chu tha taka lo ngaitlain, Jawaharlal Nehru University (JNU) le Delhi University (DU) campus sung haiah NE students hai ta dingin Hostel pahni bawl vat a ni ta ding thu; JNU Campus sunga hostel bawlna ding ram hmu le sukfel  a ni ta thu, DU campus a hostel bawlna ding thuah hmun pe dinga Vice Chancellor kuoma ziek ngeia hnina a pek ta thu, NE biela states 8 um haia inthawk damnaw doctor pana hunghai tlungna ding, NE mi Delhi­a exam chi hran hran pe dina hunghai le students rethei  tak tak hai tlungna ding Delhi­a Guest Houses bawl a ni theina dinga thuneituhai le Delhi­a um Resident Commissioners (RCs) of North Eastern States hai a lo inrawnpui ding thu hai Dr Jitendra Singh hin NE student palaihai kuoma a lo hril.

            
Sawrkar thlungpui thusuok dang chun, India rama Hill states 12 haiah National Highways km. 2,000 vela sei siem tum a ni thu a hril. Hi sin thawna dinga sum seng le hmang dinga riruong chu Rs. 25,000 crore a nih tiin official thusuok chun a hril. Hi National Highways in a huop rawn tak ding chu Arunachal Pradesh ning a ta, chu dawtah Jammu & Kashmir ning a ta, chuongang peiin Mizoram, Himachal Pradesh le Manipur hai hung ning a tih. Arunachal Pradesh ah km. 300, Mizoramah km . 256, J&K  le Himachal Pradesh ah km. 250 ve ve, Manipur ah Km. 100 huom sa a ta, a dang po chu Uttarakhand, Assam, Sikkkim, Nagaland le West Bengal haiah siem ning a tih tiin official thusuok chun a hril.

ST a puong dingin an ngen

Imphal:  Scheduled Tribe Demand Committee (STDC) chun Meitei­hai chu Scheduled Tribe (ST) a puong vat dingin Manipur State sawrkar an ngen. An thil ngen nawrnain May 22, 2016 khin Mass  Demonstration an nei ding niin S. Robindro, Coordinator, STDC chun a hril.

MNRF cadres 3 ralthuom leh man

Imphal:  April 16&17, 2016 hai khan 28­Assam Rifles han Aibol Joupi Village, Chandel district­ah MNRF SS Sgt Maj Athoi@ Wangshumi (26) S/o Huormi Hungyo of Leihaoram Ukhrul, SSSgt Wasingam (30) S/o David, of Chakhama, Ukhrul le SS SgtReinsing (20) S/o Yewung of Kalhang Ukhrul hai chu AK­56 Assault Rifles 1 le magazine 2, AK­81  (5.56mm) 1 le magazines 2, HK 33 assault Rifle (5.56mm) le magazine 2, 5.56 silaimu 120; 7.62mm silaimu 60; China siem Hand  Grenade 1 le lekhapawimaw thenkhat leh an man a, Kakching Police Station­ah an peklut niin PRO, IGAR(S) thusuok chun a hril.

CM in helpawlhai inbiekpui dingin

Imphal: Zanita ManiBOAT, Imphal­a Music and Mediation Programme of The Art of Living le inzawma inkhawmna nei a ni huna CM, O.Ibobi Singh in thu a hril huna Manipur tlangram le phairam biela helpawlhai chu inbiekpui dingin a fiel nawn nawk. Hi inkhawmnaa hin Art of Living Founder Ravi Shankar, Dy. CM, Gaikhangam le Manipur CM hlui Radhabinot Koijom le Speaker  Th. Lokeshwar hai khawm an thang hai khawm an thang. Meditation program hmang ding le ni 3 sung cham dingin  Spiritual leader le Philanthropist Sri Sri Ravi Shankar Imphal­ah a cham mek a nih.

Gogoi in kum 2 hnungah thutlukna

Guwahati:  Assam Chief Minister Tarun Gogoi chun,  tuta tum Assembly election hi electiona a ngirna nuhnung tak a ni ta ding thu hrilin, thlangtling nawk a ni chun tuta inthawk kum 2 hnungah party­a tutangirhmun (CM post) kum 5 dang a chelzawm pei ding le dingnaw thutlukna a siem ding thu a hril. Gogoi hi kum 80­a upa a nita a, a zawnin term 4 zet Assam CM sin a chel ta a nih. Tuta tum khawm hin thlangtling nawk a ni ngei an ring thu a hril. Ama thlakthlengtu ding tak hming hrillang naw sienkhawm party leader tha tak tak, Anjan Dutta, Paban Singh Ghatowar, Bhubaneswar Kalita, Ripun Bora, Pradyut Bordoloi le Rakibul Hussain hai an um a, hienghai laia pakhat takin an mi thlakthleng ding a nih tiin a hril. Mr Gogoi chun, West Bengal CM hlui Jyoti Basu in term lailung taka a mi ringzo Budhadeb Bhattarjee kuoma West Bengal CM ngirhmun  a lo inhlan dan kha tha tiin hienganga thaw ve a tum niin ei thu dawngna chun a hril.

Mizoram­ah Vawk natna hri an leng

Aizawl: Mizoram­a  North East Khawdungsei a chun tulai hin Vawk natna  mak takel an leng a, hi natna hi hrileng ni lovin vun natna chikhat a nih tiin AH &  Vety Department a mithiem hai chun an hril.

            
Hi vun natna invawi Vawk hai hi hang en chun meikang amni ti dingin a um a, North East Khawdungsei a chun hiengang vun natna invawi Vawk 3 an um a, Vety. Officer  Dr Lalramdintluanga chun a hmuna fein a hang enfel a, hrileng naran ni lovin vun natna chikhat nia a hriet thu a hril. Sample lain Aizawl tieng thawn thlak a nita a, Dept. Disease Investigation Wing le Selesih a College of Veterinary Sciences hai le thangruolin enfel ning a ta, result hriet vat ta beisei a nih.

Zangnadawmna  Rs. 2 lakh seng pek dingin

Bhubaneswar:  Odisha sawrkar chun zani hmasa zantienga Deogarh district­a Gailo Ghat hmuna Bus eksiden leia thi sunghai kuomah zangnadawmna Rs. 2 lakh seng pek dingin a puong. Zangnadawmna hi an rang thei anga pe ding le hliem 11 hai a thlawna medical treatment pe dingin Chief Minister Naveen Patnaik chun administration an hriettir. Bus a hin Opera troupe mi 38 an chuong a, hi lai hin nuhmei le naupang thangin mi 27 zet an thi a nih. Bus hi lamthlang feet 200 vela insanga tlan liem a nih.

Nagaland in NFSA June 1­ah

New Delhi: Nagaland sawrkar chun June 1, 2016 a inthawk khin district pahni Kohima le Dimapur haiah National Food Security Act (NFSA)  hmang tan a tum. Tuchena hin India rama states 33 le UTS han NFSA hi an hmang tan ta a, state dang pahni Kerala le Tamil Nadu hai chun election zoah an  hmang tan ve beisei a nih. Nagaland in a hmang hunah NFSA hmang India rama states 34 an hung ni ta ding a nih. NFSA hi parliament in kum 2013­a a passed, hi scheme kum khat sunga  sukpuitling dinga sawrkar thlungpuiin state tin hai  hun a pek a ni a, sienkhawm tuchena hin deadline vawi 3 lai suksei a ni tah.

Ecuador simkhawlei inhning leia thi 270 an chuong tah

Portoviejo:  April 17, 2016 zan sawt hnunga South America ram, Ecuador hmuna simkhawlei richter scale 7.8 a hrat an hning leia mihriem thina tuok chu 272 an tling ta bakah mi 2,500 chuongin hliemna an tuok niin Vice Interior Minister Diego Fuentes chun a hril. Simkhawlei inhning tanna hi tuipui kama khawpui Muisne simsak tieng km. 27 vela hla, hnuoisung km. 19.2 a inthuk a inthawka hung intan a ni a, simkhawlei inhning lei hin province 6 haia chun emergency puong nghal a ni a, sansuokna le sawmdawlna sin ngawr taka thaw zing a nih.Tuta tuma simkhawlei inhning hi  Ecuador­a dinga a la hrat taka record a ni a, mithi hi tuta nek hin an la hung tamlem ring a nih.  Hi simkhawlei inhning in a nawt nasat natak chu Pedernales a ni a, hotels chim hnuoia mi tam tak an intang a,  tuchena Pedrnales hmuna ringawt khawm mihriem thina tuok chu 400  an tling taa hril a nih. Sipai 10,000 le Police 3,500 vel han sansuokna sin an thaw mek. Simkhawlei inhning lei hin Ecuador President Rafael Correa khawmin Italy ram an zin hun a suktawi pha.

Kum 2 sung mi  113 in an suollui niin a hril

Pune: West Bengal­a nuhmei tleirawl um 16 mi chun kum 2 liemta sung khan sin pek dinga intiemin a thu le hla lova nawchi inzawrtirin  Policemen thangin mi hran hran 113 han an suollui niin a hril. Nuhmei tleirawl hi thla hmasa laia kha a thu le hla lova hrentang a nina hmuna inthawk Delhi­a tlan lut niin hi hmuna complaint a peklut a nih. A case hi Pune tieng transfered niin Vimantal Police station­a nuhmei kum 26 mi man a ni ta bakah  mi 113 hai chungah  FIR registered a nih.

LAEF cadres 6 ralthuom leh an inpe

Tura: April 17, 2016 khan Meghalaya­a North Garo Hills district a Dainadubi Police outpost­ah   Liberation of Achik Elite Force (LAEF) Commander­in­Chief Mathew G. Momin thangin cadres 6 hai chu ralthuom leh an inpe. Ralthuom an inpeklutpui hai lai AK Rifle 1, Shotgun 1, Pistol 2, silaimu iemanizat le demand letters hai a thangsa. LAEF inpe midang hai chu Dy. Military Chief Ravan Basumatary (28), Tenik Sangma (30); Negrus Sangma (25); Lepjin Shira (25) le Heswar Areng (31) ai an nih.

Samak ki leh mi 3 man

Jorhat:  April 17, 2016 khan Jorhat district, Assam state sunga Titabor town­ah Assam Police han mi 3 Samak Ki kg. 1.5 leh an man. Mana um hai chu­ Aminur Rahman, Sanjay Kumar le Surjya Thakuria, hai an ni a, Surjya Thakura of Dibrugarh hi Railway Protection Force­a constable sinthaw lai a nih. April 14, 2016 khan Kaziranga National Park ah Samak pui pakhat sapeltu han an kap hlum. Chun, April 11, 2016 khawm khan sapeltu han Kaziranga National park­a hin Samak pui pakhat an kap hlum. Samak hi a ki (horn) sum tam taka zawr dinga dit leia kap hlum hlak a nih.

PM in Super­Speciality hospital a hawng ding

New Delhi: Prime Minister Narendra Modi chu April 19, 2016 hin Jammu and Kashmir inzin a ta,  Mata Vaisno Devi a Katra base camp­a Kakryal Katra hmuna Shri Mata Vaishno Devi Narayana Super  Speciality Hospital hawng a tih. Hi Hospital hi Rs. 300 crores senga bawl le indin niin Shrine Board’s Sports Complex kuta pekdawk ning a tih. PM hin Shri Mata Vaishno Devi University 5th convocation­ah thuhrilna hun hmang bawk a tih. Hi hospital hawng zo pha hospital le a sevela cheng mipui, hospital bawlna dinga ram petu hai kuomah free medical treatment card sem ning a tih. PM inzin ding lei hin Jammu region, a bikin Katra town a chun venghimna nasa taka sukkhau a nih.

VAWISUN THUPUI

Ngai ta, ka dam chen hi kutpha bawk chen chauin i siem a, Ka kum hi i mithmua chun ieng khawp khawm a ni nawh a; Mi  tin an that lai tak khawmin an pumin iengkhawm an ni nawh.  ­ Sam 39:5

Editorial

Kum 5 a liem ta ding!

Manipur Assembly election ei neina kha hun sawt  rak lo la niin ei hriet a. Amiruokchu, ei thaw nek nek a, hun a liem pei a, kum 5 a liem nawk el ding an tah. Tuta ei state a ministry fe mek hun chu March, 2017 ah a tawp ta ding a ni leiin hun an nei tlawm ta khawp el. Tuta inthawka thla 9 or thla 10 vel hnungah  Assembly Election ei hung nei nawk el ding a nih. Assembly election hung um dinga hin kum 5 sung dang ro mi relpek dingin ei aiaw dinghai thlangna ei nei ding a nih. Hi lei hin mipui han thutlukna fel tak siem thei dinga hma ei lak a hun ta a nih. Mipui han thutlukna fel tak ei siem naw chun kum 5 dang ei tuor nawk ding a nih. Mipui han thutlukna tha ei siem chun mipuihai hmaah  hmasawnna tha beisei ding a hung  um ding a nih. Chuongang ditthlangna indik le thutlukna fel tak neia  aiawtu ding mi thar, mi tha ei nei thei chun a saptawng takin “Change” a hungtlung thei ding a nih.

      
Manipur chun kum 1972 khan state puitling a hmu a, hi taka inthawk hin Chief Minister 19 lai zet ei nei tah. Thenkhat kum sawt tak tak an Chief minister a, mi thenkhat ruok chu hun tawite, thla 3/4 Chief Minister khawm  an um tho. Hi hun sung hin Political party tum tumin sawrkarna an chel a, a chang leh Coalition Government a um a, National Party­hai laia sawrkarna siem rawn tak le rorel sawt tak chu Congress party a nih. Tulai  taka ei state sawrkarna chel mektu khawm Congress party a nih. National party lien pahnihai laia BJP chun an party khatin Manipur­ah sawrkarna chel hun (BJP government) an la nei nawh.

      
Central­a sawrkar chel mektu hi  BJP thuoina hnuoia National Democratic Alliance (NDA) an ni a,  Manipur thangsain NE biela state tum tum hai chu Central Government khuong ben dungzuia lam el hlak an nih. Hi lei hin ei hmaa Assembly election hung um dinga hin BJP hrat ngei dinga ring le beisei pawl an um a. An beiseina hi a hung indik le a hung hlawtling chun ei state ah Congress sawrkar ni lo, sawrkar thar a hung pieng ding tina ning a tih. BJP an hrat ringna lei hin Congress party a mi hlun tak tak le minister lo ni ta hlakhai khawmin an party suoksanin BJP an zawm tawl a nih. Congress chau ni loin Manipur a tuolto party hlun MPP thuoitu le Minister lo nita hlakhai khawmin BJP an zawm tawl a nih.

      
Tuta hma kum 44 vel liemta a inthawk khan MPP, Congres le party dang dang inkawp han ro an lo rel ta hlak a, thil tam tak an thaw a, mipui khawmin ei sawr hle. Nisienlakhawm beisei ang le duthusam an sawrkar haia inthawk ei hmu nawh ti thu tlang hriet a nih. Chuleiin, ei hmaa Assembly election hung um dinga hin tu party am vote lal nawk ei ta ti hi fimkhur taka ei ngaituo chet chet a, thutlukna ei siem a pawimaw bek bek el a nih. Mipui hai chun thaw dan pangngai annawleh palai pangngaihai ringawta hin chu ei lung a awi tawk ta naw a, ei nghawk  thawkkhat ta niin an lang a, inthlang khawm ei phur bek naw niin an lang. Nisienlakhawm, thaw dan thar, ngaituona thar, roreltu thar, party thar ei beiseina tienga inthawk ruok chun inthlang hi ei nuom hle niin an lang.

      
Sawrkar thar a hung pieng hin mipui chun thil thar, hmasawnna thar, riruongna le thaw dan thar beisei ngei ei tih. Hi thil hi thil fe dan ding a nih. Sungkuoa hausak thut thutna dam,Concrete building, hmun le hmang, ro thil le hausak thutna politics hi chu ei nghawk ta a, huopzo sawrkara ei dit ta a nih. Ruling party mihai chauin sawrkar budget zar an zo hi chu dit a um ta naw a, ei nghawk  hle ta a nih. Hi lei hin sawrkar thar hung um ding hi chu  mipui le ram hmangai sawrkar hung ni ta ngei sienla  nuom a um.

      
Sawrkar thar chu ieng party khawm ni raw seh, a pawimaw tak chu Manipur mipuihai hmasawnna hlensuok a nih. State dangah chun, mipuiin sawrkar thar a hung um chun beiseina thar an nei a, chu beiseina ang chun sawrkar thar le palai thar han hma an hung lak hlak. A pangngai, inthlakthlengna um naw hi chu mipuiin ei dit ta naw a nih. Tu party khawmin sawrkar hung siem hai sienla, a pawimaw tak chu mipui ngaidak, mipui le ram hmasawnna thar hmu theia a hung um hi a nih. Sawrkar thar a hung um chun mipui han thil thar ei beisei ding hrim a nih. Iem thil thar ei ti chun hmasawnna thar a ni ding a nih. Hmasawnna thar chu iem ei ti chun tuta hmaa la um ngai lo hmasawnna thar  a hung ni ding a nih. Sawrkar thar chun ram le hnam hmangaina lungril put a, thlier bik nei lova thil a thaw le hma a lak thiem a tul a nih.