Facilitate Group on Local nutrients
CCPur: Zani zingkar 10:30AM a inthawk khan YPA GHQ Hall, Hiangtam Lamka hmunah World Vision India, Imphal Bal Swasthya Project huoihawtnain “Facilitate Group on eating local nutritious Food program” hmang a nih. Hi huna hin Special Guest in Dr Phirthanglien Buhril, District AIDS Control Officer, CCPur a \hang. Loli, Program Manager, World Vision in keynote address a hril a, Happiness Home han special no. an inhlan.
Dr Phirthanglien Buhrril chun Nutrition pawimawna ti thupui hmangin thuhrilna hun a h mang a, fak le dawn kawngah hmu hmu fak le dawn el lo ding a ni thu hrilin ei taksa ta dinga \ha le hrisel ding hai chau fak le dawn ding a nih tiin a hril. Moreh a inthawka hung fakthei chi tum tum hai hi a thei china fa lo dingin student hai an fui. Hi huna hin Dr Buhril le Loli chun students hai kuomah Horlicks kg. 5 seng an semdawk.
Post Office a hung enfel ding
CCPur: Post Office, Tuibuonga Core Banking thawna ding le inzawmin Milan, System Manager, Imphal chu April 18, 2016 khin CCPura hungin Post Office enfel a ta, core banking thawna dingin system tum tum upgrade thawng a tih. Core banking hmang a ni huna tuta account tum tum hai Number khawm thleng vawng ni dingin ei thu dawngna chun a hril.
MGNREGA thuah training nei
CCPur: State Institute of Rural Development, Manipur huoihawtnain Tipaimukh Block a mi hai ta dingin zanikhan District Training Centre, Tuibuongah “Participatory Planning under MGNREGA” ti thupui hmangin training nei a nih. Hi huna hin State Institute of Rural Development/Anchors a inthawk Dr A. Somorendro Singh, C.Kamei le Kh. Ibochoba Singh hai resource person in an \hang. Training hi April 18 le 19, 2016 haia sunzawm nawk ning a tih.
Camping hlawtling takin an zo
CCPur: Grace Evangelical Ministry chun kar khat sung Thenmuol a camping an buotsai chu hlawtling takin an lo zo tah. A thawkhnina chu April 1823, 2016 inkar sung khin Thenmuol Community Halla bawk nei nawk an tih. Campa hin chanchin\ha a dangcharna nei taphawt \hang dingin camp buotsaitu hai chun an fiel. Lut hun chu April 18, 2016 zantieng bufak khawp ning a tih.
HYA in ralna sum an dawl mek
CCPur: HYA GHQ hmalaknain Parvachawm Village, Tipaimukh SubDiv huomsunga Mr. Benjoy a nuhmei le a nau hai 3 in Pa an hme leia hringna an lo channa thuah ralna sum dawl mek a nih. Chun, Pa fak leia thina tlung thua sawrkar tiengpangah HYA GHQ inrawinain hma lak mek a ni bawk. HYa JHQ, CCPur hnuoia Branch tu m tu m le Facebook Hmar Group (FHG) hai khawmin ralna sum hi an khawn mek.
Banquet an buotsai
CCPur: HSA JHQ, CCPur chun zani zantieng 28PM inkar sung khan HSA Hostel, HSA Campus, Rengkai, CCPUrah Fund raisingna dingin Banquet an buotsai.Hi huna hin DC CCPur, MDCs, Dist. Level Officer, hnam tum tuma hnam pum huop pawl le khawtlang, inchuklai \huoitu han ruoi va kilin thei ang angin \hangpuina an pek tawl. HSA JHQ CCPur chun an fielna ngai pawimaw pek a, hi huna \hangpuina petu hai kuomah lawmthu an hril.
Mariam street lampui siem\hat
CCPur: Phailien le New Lamka infepawna lampui Mariam street chu ruosur hunah hi laia biela cheng le student han harsatna nasa tak an tuok hlak leiin P. Tongthang Zou, Special Contractor chun mipui hmakhuo ngainain tulai hin lung vur in siem\hatna sin a thaw mek. Lampui bakah JCB hmangin Nullah huot a ni bawk.
Richter scale 7.3 a hratin Japan-ah Simkhalei an hning nawk; Mi 32 an thi, mi 1500 vel an hliem
Mashiki: Zani zingkar inhma tak khan Japan rama Kumamoto Regionah ricter scale 7.3 a hratin simkhawlei an hning nawk a, mi 32 an thi bakah midang 1500 vel an hliem a, hliem hai laia 184 hai chu an hliem inrik hle. Mi 40,000 vel electricty le tui nei lovin an um pha a, mi 91,000 vel hmun himna tieng insawntir an nih. Simkhawlei inhning hin building le In 200 vel a suksiet a, building le in a chim hnuoia intang le mithiruong iemanizat zet an la um ring a nih. Hi lei hin simkhawlei inhning leia mithi le hliem hi tuta nek hin an la tam lem ring a nih tiin Yoshihide Saga, Chief Cabinet Secretary chun a hril.
Army le Police han simkhawlei inhningna hmuna hin sansuokna le sawmdawlna sin an thaw zing a, sansuokna le sawmdawlna sin thaw dingin sipai tamlem tirlut an ni a, army ringawt khawm 20,000 zet simkhawlei inhningna hmun an tlung tah. Police le Firefighters khawm tirlut belsa an nih. Police chun building chim hnuoia intang mi 97lai an um niin report an dawng. Mithiemhai chun simkhawlei inhning hin Tsunami a hung inumtir el thei niin an hril.
Kumamoto Region hi Kyushu Islang sunga um a ni a, April 14, 2016 zan khawm khan Kumamoto region hi simkhawlei richter scale 6.5 a hratin a lo sawi ta bawk a nih. Kha huna khan mi 10 lai zetin thina an tuok pha a, mi 800 laiin hliemna an tuok pha niin Kyado News Agency reort chun a hril.
JAC President thar dingin Khaidem Mani
Imphal: All Manipur Trade Union Congress (AMTUC) le All Manipur Government Employees’ Organisation (AMGEO) hnuoia Joint Administrative Council (JAC) chun April 15, 2016 khan Executive Council Meeting an nei a, JAC of AMTUC&AMGEO Presient thar dingin Advovate Khaidem Mani an ruot. Hi sin hi kum 4 sunga ding a nih. Khaidem Mani hi All Manipur Bar Association (AMBA) a President sin lo chel ta hlak le MP election a khawm vawikhat lo ngir ve ta a nih.
IMC election June 2 a nei dingin
Imphal: April 15, 2016 a State Cabinet meeting chun Imphal Municipal Corporation (IMC) Election chu June 2, 2016 a nei dingin a rel. Hi Election ding le inzawma election notification chu May 12, 2016 khin State Election Commission in insuo a ta, in candidate nuomhai ta dinga nomination paper file theina hun tawpna tak chu May 17, 2016 ning a ta, scrutiny May 18, 2016ah nei ning a ta, candidate inhnukdawk nuomhai ta dinga inhnukdawk theina hun tawpna tak chu May 20, 2016 ning a tih. Chun, Cabinet meeting chun JNIMS hnuoia thawk ding technicians le Clinical staff post 37 lak dingin a rel.
Film Forum Manipur an banna an hlip
Imphal: Film Forum Manipur an banna an hlip ta thu National Revolutionary Front (MNRF) chun zanikhan an puong. Hi thua hin Sanajaoba Meitei, Secretary, Information and Publicity, MNRF chun thusuok a siem. Chun, Manipuri Film, Sumang Leela, Drama le ISTV, Impact TV le DDK, Imphal haia Film insuona haiah Saree full le half a hak chu chatuona dinga khap a nih tiin MNRF thusuok chun a hril bawk.
Pa hme leia thi mi 6 an tling tah
Aizawl: Mamit Bazar venga Pa hme leia damnaw, Civil Hospital, Aizawla enkawla um V.L. Hriata chu zani zingkar khan a thi nawk leiin Mamit Bazar Venga Pa hme leia mihriem thina tuok chu 6 an tling tah. A hma khan sungkuo pakhata mi 5 zet an lo thi ta a nih. Pa hme hai laia pakhat chau a damsuok a, tuta la dam umsun chu nuhmeite kum 3 mi Miriam a nih.
Mamitah In 352 a mutsiet
MAMIT: Zani zingkar inhma tak khan ruo, riel le thlipui hrat takin Mamit khawpui, Mizoram a nuoi a, In 352 vel a mut siet a, hienghai lai hin sawrkar in iemanizat le Biekin a \hangsa. In 16 hai chu hluo tlak talo hiela a suksiet an ni a, 65 hai chu siem\haat thei ding an la nih. Thlipui hin sawrkar in 6 a suksiet vawng a, 15 hai chu siem\hat \ul an nih. Thlipui hangin Biekin a suksiet hi Mamit Hmar Venga Church of God (Seventh Day) Biekin a nih. Thli hin Electric ban 10 vel a mut tluk leiin hun iemanichen chu electric meivar hmu lovin an la um ding a nih.
Chun, zani zingkar ma khan Mamit districta West Serzawl khuoah In 2 thli in a mustiest vawng bakah In 5 siem\hat ngaiin a mut siet a, Ailawng ah In 1 a mustiest bakah 5 siem\hat ngaiin a mutsiet a, Dapchhuah ah In 2 a suksiet vawng a, West Phailengah In 2 a suksiet bawk. Zani hmasaa thli hrang khan West Phailengah In 170 vel a lo suksiet ta bawk a nih.
J&Kah venghimtu 3,600 tirlut sa ding
New Delhi: Jammu & Kashmir a buoina suok le inzawma venghimna sin thawtu dingin sawrkar thlungpui chun Paramilitary personnel 3,600 tirlut belsa dingin zanikhan a rel. Ni 4 liemta sung khan J&K ah police le security forces han mipui pungkhawm le nuorna neihai hnawtdarna dinga silai an hmetpuok leiin civil mi 5 laiin thina an tuok pha a nih. Army han nuhmei tleirawl pakhat an suollui tum tia intumna leia dodalnaa mipui han nuorna le lampui hrana an nei a nih. Buoina boruok chu a la sosang hle a hril a nih.
Mithi phum ta hnung chodawk nawk
Aizawl: April 5, 2016 nia thi Ms Lalhmingsangi (26) w/o Hrangrotluanga of Khawzawl Vengthar ruong chu a thi danah ringhlanaum leiin zani hmasa khan a ruong hi chodawk nawk a ni a, Khawzawl hospitalah doctor han a ruong hi an enfel. Lalhmingsangi kha a pasal chun inkhaihlum niin a hril a, a thi hma hin an \henum han an insel ri an hriet bakah a, thi dana hin inawkhlum chie a hawinaw leia a sung han a ruong enfel dinga thuneitu hai an ngen leia a ruong hi chodawk nawk a nih. A ruong enfel a ni zo hin phum nawk nghal a nih.
North Eastah tharum insuona kiem tieng a pan: Report
Shillong: India hmarsak biela chun kum iemanichena inthawk khan tharum insuona kiem tieng a pan niin Union Ministry of Home Affairs Annual chun a hril.
Ministry annual report 2015-16 dungzui hin kum 2007 a inthawk 2015 sung khan North east bielah tharum insuona 1,489 a inthawk 574 in a tlahnuoi niin a hril.
Amiruokchu, Assam, Manipur, Nagaland le Meghalya haia tharum insuona a la kiem hran naw a, Tripura, Mizoram le Sikkim haia ruok chu a ralmuong. Arunachal Pradesh a buoina tlawmte tlung tinaw chu a tlangpui thuin a ralmuong tiin report chun a hril.
Kum 2007 khan helpawl hai chetna leiin security forces 79 in thina an tuok a, kum 2015 khan chu security force thina tuok 49 chau hung niin; hliemna tuok civil mi 498 an um a, kum 2015 khan chu 46 chau an um.
Kum 2015 sung khan Assamah tharum insuona vawi 81 a tlung a, helpawl 645 man le helpawl 49 that an ni a, security force thina tuok an umnaw a, civil mi 9 an thi a, mi 27 \huoihmang an nih.
Meghalaya a chun kum 2015 khan tharum insuona vawi 123 a tlung a, helpawl 121 man le 25 that an ni a, hieng thil tlung haia hin security personnel 7 le civil mi 12 in thina an tuok bakah mi 87 \huoihmang an nih.
Manipur a chun tharum insuona a la tam hle a, kum 2015 khan tharum insuona vawi 229 a tlung a, helpawl 805 man an ni a, helpawl 41 kap hlum an ni a, security forces 21 kap hlum le civil mi 15 in thina an tuok.
Nagaland a chun tharum insuona tlung hai laia tamlem helpawl le helpawl dang kara inbeituona a ni a, kum 2015 khan tharum insuona vawi 102 a tlung a, helpawl 268 man an ni a, 29 kap hlum an nih. Security force le civil mi 9 ve vein thina an tuok a, mi \huoihmangna case 78 a um.
Sawrkar thlungpuiin a ngaimaw
New Delhi: Sawrkar thlungpui chun tulai hnai ela Kaziranga National Park –a Samak kap hlum a nina thu chu a ngaimaw hle a, Samak kap tu hai chunga action na tak lak a ni ding thu a hril. Hi baka hin Dan lova Samak kapna dangchat a ni theina dinga state sawrkar chu an rang thei anga Rhino task Force la dingin an hriettir. Environment minister Prakash Javadekar chun, tulai hnai khan Union Cabinet chun South Asia Wildlife Enforcement Network (SAWEN) zawm ve dingin remtina a nei ta a, hi thil hin ramsa humhalna kawngah South Asian rambung hai le thawtlangna \halem a hung intlun ding thu a hril.
Britian Prince William le a nuhmei Princess Kate Middleton han KNP an hung sir hma el khan Samak pakhat kap hlum a ni bakah an hung sir zo zan khan Samak pakhat kap hlum nawk a ni a, Samak kaptu hai hin AK47 rifle an hmang a nih. Hi thil hi sawrkar thlungpui chun a ngaimaw hle a nih.
NE rail budget 151% a sukpung a nih
New Delhi: Union Minister of State for Development of North Eastern Region (DoNER) Dr Jitendra Singh chun,sawrkar thlungpuiin India hmarsak biela Rel le motor lampui siem\hatna tiengpang a ngaipawimaw a, hi lei hin kum 2 liemta sunga Central sawrkar chun rail budget khawm 151 percent zetin a sukpung a nih tiin PHD Chamber of Commerce huoihawtnaa zani hmasaa New Delhi hmuna ‘Global Rail Convention’ a thu a hrilna huna a hril. Tuta central sawrkar in 201617 budgetah Rs. 5,340 crore a sie a, UPA sawrkar hmasa nekin nasa takin a tam lem a nih. UPA sawrkar hmasa khan Rs. 2,121 crore sie a nih tiin a hril.
Meghalayaah simkhawlei vawi 16 an hning
Shillong: Tukum sunga khawvel pumpuia simkhawlei richter scale 5 le a chungtienga hrat vawi 44 an hning ta a, hienghai lai hin Meghalayaah vawi 16 an hning a nih tiin Upper Shillong Seismological Observatory official thusuok chun a hril. January April, 2016 chena hin Shillong khawpui le state sung hmun hran hran hai chu simkhawlei inhning in vawi 16 zet a sawi ta a nih tiin thusuok chun a hril. Kum 2015 sung khan simkhawlei inhning vawi 19 hriet a ni a, sienkhawm tukum thla 4 khawm tling lo sung khan vawi 16 an hning ta a, kum 2014 khan vawi 24 an hning tiin a hril bawk.
PP Pandey Gujarat DGP incharge dinga ruot
Ahmedabad: Ishrat Jahan fake encounter casea baila insuo Senior IPS Officer P.P. Pandey chu Director General of Police (DGP) Gujarat incharge chel dinga ruot a nih. Gujarat DGP PC Thakur Delhi tienga sawn a ni leia PP Pandey hi inchargea DGP Gujarat dinga ruot a nih tiin senior police official thusuok chun a hril. Permanent DGP thar ding ruo a ni hmapo incharge in DGP sin hi a lo chelsa ding a nih. Pandey hi DGP rank, State Anti Corruption Bureau Director ni lai mek a nih. Ishrat Jahan caseah baila insuo a ni leia nikuma kha servicea laklut nawk a nih.
President in MP Raj Bhawan a hawng
Bhopal: President Pranab Mukherjee chun zanikhan Madhya Pradesh (MP) Raj Bhawan building bawlzo thar a hawng. Hi huna hin Ajay Tirkey, Principal Secretary to Governor Ram Naresh Yadav (89) le milien milal tam tak an \hang. Governor Ram Naresh Yadav chu a damnaw leia ni 2 liemtaa inthawk hospitala admit a ni leiin hi huna hin a \hang theinaw a nih. Madhya Pradesh Raj Bhavan hlui meiin a kang leia building thar hi bawl a nih.
President Pranab Mukherjee hin zani zantieng khan National Judicial Academyah fourth retreat of Supreme Court Judges a hawng bawk.
NLFT hai an lan surrender pei ding
Agartala: National Liberation Front of Tripura (NLFT) cadre tamlem ( lower level ranks) hai chu nundan pangngai hmang dingin sawrkar kutah an lan surrender pei ding niin official thusuok chun a hril. Tulai hnai el khan cadres 12 zet Police kutah an ralthuom hai leh an lo inpe ta a nih. Security forces han nasa taka an hnawchep ta leiin NLFT helpawl hai chun harsatna an tuok mek a, an hotu Biswamohan Debbarma le Utpal Debbarma hai ruok chu sawrkar kuta inpek tumna an la nei hri nawh. Tuta hmaa cadres 87 lai ni hlak kha sawrkar kuta an inpeklut pei leiin tuhin cadres 35 vel chau an nei taa hril a nih.
Mi 4 an in karin meiin a kang hlum
Dhar: Madhya Pradesha Shakeerpura village a chun zanikhan In pakhata inthawk kangmei a suok a, Ter Singh (48) \hangin mi 4 hai chu imu inhnik taka an in laiin meiin a kang hlum. Ter Singh nuhmei Tevkunwar chu room danga riek a ni leiin a kanghlum ve naw a, sienkhawm meikhu a hiplut nasa leiin khaw hre lovin a um. Kangmei suok nasan hriet a ni nawh.
VAWISUN THUPUI
I lei chu suola inthawkin veng\ha la, I hmur chu hlemna thu hril lo dingin. Suol chu fe san la, thil \ha thaw rawh; Inremna awngla, a hnawtin hnawt rawh. Sam 34:13
Editorial
Party tum tum hai ta dinga aitecheuna
April 15, 2016 a State Cabinet meeting chun Imphal Municipal Corporation (IMC) Election June 2, 2016 a nei dingin a rel a. IMC Election hi Manipur a Political party hran hran hai ta ding chun kum 2017 a Manipur Assembly Election hung um dinga aitecheuna (1st rehearsal/preliminary test) a hung ni ngei ring a um. Hi lei hin IMC election hung um ding hi political party tum tum hai ta dingin a pawimaw hle a, ngaitha thei chi ninaw nih. A bikin Manipur a sawrkarna chel mektu Congress le BJP hai ta ding chun IMC election hung um ding hi a pawimaw zuol bik. IMC election result hin kum 2017 a Manipur Assembly election hung um ding hlimthla a hung inlang ding a nih. Tu hri hin chu Manipur state sunga party lien le hrat, sarwkar thar siem thei ding ngirhmuna inlang chu Congress le BJP hai an ni a, hi lei hin IMC election a khawm hin hieng party pahnihai hi an inbei nasa hle ring a um.
Tuta Manipur Assembly fe mek hun (term) hi March 11, 2017 a tawp ta ding a ni leiin Manipur Assembly election hi an hnu tieng takah January/February, 2017 velah a hung um ring a nih. Election hun ding thua thuneitu chu Election Commission of India (ECI) a ni a, kum 2017 a Assembly Election nei ding hi state iemanizat an um a, hieng state hai le inruola ECI in election nei \ha a ti chun Manipur Assembly Election hun ding hi tuta ei hril nek khawm hin an hma lem el thei bawk. Hieng a ni lei hin Assembly electiona inhnikna neihai chu election ding boruokah an um \an ta a, \henkhat lem chun vote an campaign \an ta a nih. Manipur Asembly election hi an hnu tieng nekin an hma tienga ECI in a hung ruot ringna a um leiin Election a ngir tum hai ta ding chun \ang lak mawl mawl a hun ta hrim a nih.
IMC election hung um dinga hin August 31, 2015 a Manipur Assembly in Bills 3 a pasi hai chungthu hi political party tum tum han vote campaign hla takah an hmang seng ring a um. Hieng a ni lei hin hieng bills 3 pasitu Congress party in Bills 3 hai hi iem an chang pha ding, an siet pha am a, \hat pha am ti a hung inlang thei bawk ding a nih. Bills 3 hai pasina a hin Congress party ni lo, political party dang danghai khawm an \hang leiin intumtuo thei bik ding chu an um nawh. Phairam mihai ta ding chun hieng bills 3 hai hin ngaipawimaw a hlaw hle leiin election huna chun mipui tiengpang khawmin Bills chungthu hai hi hril taka an nei ngei ring a um. A ahma a ei hril ta angin IMC election hi ei hmaa Manipur Assembly election hung um ding hlimthla inlangna ding a ni leiin politial parties, candidates le IMC huop sunga henghai chun an ngaipawimaw hle seng ring a um. Ieng party tak am an hung hrat ding ti hi hriet kar nghakhla um takel a nih.
IMC Election hung um dinga hin Congress party le BJP hai chun hrat lem ni ngei an tum ve ve a, an thei ang tawka hma lain an inhril siet tawn ve ve a, hi lei hin an karah boruok a hung sosang hle ding niin an lang. Indemtuo le inhril sietna hai hin ram, hnam le mipui ta dingin hmasawnna ding le \angkaipui ding a um naw leiin thil\ha thaw tiengpangah hung inel lem hai sienla mihai ngaizawng an hlaw lem ring a um. BJP le an thlawptuhai chun IMC le Assembly election hung um dinga hin Congress party chu hnebanin sawrkarna chang ngei an inbeisei a, iem an hung ang ding ti ruok chu hunin a la hung rel ding a nih. Manipur Assembly byelection nuhnung taka khan seat hniah BJP pawlin hratna an chang ve ve a, khangang boruok kha IMC election a hin a la fe pei chun BJP ta ding chun a hrt tak ni chu beisei um ve takel niin an lang.
Congress in Manipurah O.Ibobi Singh inrawinain term 3 zet a zawnin rorelna khawl an chel ta a; hi hun sung hin hmingsietna, buoina le harsatna chi tum tum, tam takel an tuok a, sienkhawm tu chen hin an la fe thleng pei a nih.Amiruokchu, thil fe dan enin Manipur mipui tamlemin Congress sawrkarna an nghawk ta mani ding aw ti theiin a um. Hi thil hi BJP in an hmang thiem chun an ta ding chun beiseina lien takel a um thei hrim a nih. Chun, inthlakthlengna (change) dit pawl mi iemanizat an um bawk a, hi khawm hi BJP ta ding chun hrat tak nina chang theina dinga hmang thei ni bawk a tih.
Congress sawrkarah tulai hnai el khan ministry reshuffle le MPCC President thlakthlengna a um a. Hi thil hin an party sung le an MLAhai lai kakhawk, a \ha zawng le a \hanaw zawngin a nei thei a, chu kakhawk hung inlang theina hmasa tak ding chu IMC election hi a hung ni thei ring a um. A \ha zawng le a sie zawnga kakhawk a nei le neinaw chu IMC election result a inthawk hriet thei ning a tih. BJP party sunga khawm hril neu neu a um a, chu h ai laia a langsar tak chu President post chungchang a nih. |henkhatin BJP MLA pahnihai laia pakhat Th. Joykishan in BJP Manipur Pradesh sin a hung chel el thei tiin an hril a. |henkhatin tuta President Th. Chaoba in a la chel zawm pei ding a nih tiin an hril bawk. Party sunga neu neu um hi election a hrat naw pha theina a nih. Hi thilin kakhawk a nei le neinaw chu IMC election hung um ding result a hin a hung inlang ve ding a nih.
