13th Hmar Martyrs Trophy tan
CCPUR: Hmar Martyrs Trophy Organising Board (HMARTOB) huoihawtnain zani zantieng 1:00PM khan Saikawt playground­ah 13th Hmar Martyrs’ Trophy Football Tournament 2016 opening ceremony hmang a nih. Hi huna hin Pu Joseph Lalrothang, President Hmar Inpui GHQ chu khuollienin a thang a, Functional President in Pu Laldawnlien Varte, President, HYA GHQ le Guest of Honour in SK Ngurte, Social worker a thang. Khuollien Pu Joseph Lalrothang chun flag keipharna le tournament kick­off a nei. Hi huna hin Nk. Christina Shakum, Lalsanglien Zote, Laldinpui Hrangchal han hla mawi takin mipui an inrawi bakah HSA Saikawt Branch han hnam lam inentirna an nei bawk.


Bus le Autorickshaw an inbaw; mi 3 an hliem
CCPUR: Zani zantieng 2:40PM vel khan Tiddim Road, Molnom hmunah Imphal le CCPur inkara tlan passenger Bus Lucky Star MN.03­0529 Imphal pana tlan le, Tollen a inthawk D. Phailian pana hung tlan Diesel Auto (MN 02A­6546) an inbaw a, Diesel Auto hi a se nasa hle bakah Bus khawm a se met. Diesel Auto­a chuong mi 3 an hliem a, student 2 hai chu Doctor han an discharge. Auto neitu le driver Sana Tomba (50) h/o Nengneikim @ Kikim of New Bazar chu a kawng na a ti bakah a luah hliemna a tuok a, hospital­a admit a nih. Hi eksiden­a hliem hai chu ­Kingston Public School, Koite a Class VII inchuklai ve ve Nemhoihchong (14) d/o Thangjangam of Bijang le Margrate KImsonngaih (14) d/o Ginminthang of DHQ, Tuibuong hai an nih.Bus neitu chu Irengbam Budhi of Irebam Irengbam, Bishnupur a nih. Bus hi a steering fail a ni a, hi thil tlung huna hin a hratnaw thei ang taka bus hi an khal nia hril a nih.


Activa 2 inruk hmang
CCPUR: April 10, 2016 zan khan New Bazar­ah Activa MN02­6985 (black) le Activa MN1V­5553 (White) hai chu rukru han an inruk hmang. Hi thua hin a neitu han Police­ah report an pek a an suizui mek.

MDR  training
CCPUR: April 14, 2016, 11:00AM khin CMO Conference Hall­ah Maternal Death Review (MDR) Training um a tih. Dr Sylvia Devi, State Nodal Officer, MDR, Imphal chu resource person in thang an ta, training­ah CHC le PHC haia Medical Officer hai, Block Program Management Unit staff hai bakah District Hospital­a Gynoecologist, Anaesthetist le Blood Bank a Medical Officer hai thang an tih.

Cabinet ministers 3 ban le Cabinet minister 3 laklut a, Manipur ministry sawidanglam a nih
IMPHAL: Zani chawhnung dar 2 pel het khan O .Ibobi Singh Chief Minister nina hnuoia Congress Ministry chu Senior Cabinet ministers 3 ban le Cabinet minister thar 3 lakluta sawidanglam a nih. Minister tharhai portfolio ding sukfel nghal le minsiter tam lem hai portfolio khawm thlengkuol a nih. Ban­a um senior minister hai chu, Th. Debendra Singh (Minister of Revenue, Law & Legislative Affairs and Forest); Phungzathang Tonsing (Minister of  Health& Family Welfare, GAD and CADA) le Francis Ngajokpa (Minister of Rural Development & Panchayati Raj, Economics and Statistics) hai an nih. Cabinet minister thara laklut hai chu, Ksh Biren, T. Manga Vaiphei le D. Korungthang hai an nih.

Minister thara laklut hai hin Darbar Hall, Raj Bhawan, Imphal hmuna Governor V. Shanmuganathan hmaah sesamna an nei. Hi hunsera hin CM O.Ibobi Singh, Dy. CM Gaikhangam; Ministers I. Hemochandra, Govindas Konthoujam, M. Okendro, Ngamthang Haokip, Dr Kh. Ratan Kumar, Md. Abdul Nasir, Dy. Speaker M.K. Preshaw, MPCC President T.N.Haokip; N. Biren, MLA;  T. Ranjit, MLA; O. Nabakishore, Chief  Secretary; L.M. Khaute, DGP; Advocate General Th. Ibohal; Civil le Police tienga Officer lien dan dang hai an thang.

Minister thar han Sesamna hunser an neizo hnunga CM O.Ibobi Singh in Chanchinbunihai an hmupuinaa chun, nawrna a um lei le High Command a intahwka nawrna a um leia ministry hi reshuffle a ninaw a, party sunga arrangement leia thaw a nih. Senior ministers han an junior lem hai chance pein Voluntary a inban an nih tiin a hril. Chanchinbumi han ministry reshuffle­a a umna hin MLA hai laia nuor­na a sukre zo ding am? tia indawnna an siem dawnin, Member­hai po po suklawm le suklungawi chu thil thei an nawh. Amiruokchu, a senior lem hai leh thangtlang an ta, a junior lem hai thurawn pein party sungah sin tha taka an thaw tlang ka beisei tiin a dawn.

Manipur Ministry sawidanglam a ni hnunga Minister­hai portfolio chel dinga ruothai chu a hnuoia ang hi a nih.

1.  O.IBOBI SINGH, CHIEF MINISTER: DP, Finance, Power, Minor Irrigation, Tourism and all other departments which are not allotted to any other ministers.

CABINET MINISTERS
2. Gaikhangam (Dy.CM):  Home, Horticulture & Soil   Conservation and Tribal Affairs & Hills.
3. I. Hemochandra Singh:  Revenue, Law & Legislative Affairs and Forest & Environment.
4. Govindas Konthoujam: Commerce & Industries, Sericulture and Veterinary & Animal Husbandary.
5. M. Okendro Singh:  Rural Development and Panchayati Raj and Economic & Statistics.
6. Ngamthang Haokip: IFCD and Printing & Stationery.
7. Ksh. Biren: Works and CAF & PD.
8. T. Manga Vaiphei:  PHED, Science & Technology and Labour
9. D. Korungthang: Health & Family Welfare, GAD & CADA.
10. D Kh. Ratan Kumar: Education and Transport.
11. A.K. Mirabai Devi:  Social Welfare & Cooperation
12. Md. Abdul Nasir: Agriculture & Fisheries.

Manipur tleirawl an hmang
IMPHAL:  April 11, 2016 a inthawk khan Manipur mi, nuhmei tleirawl kum 14 mi chu New Delhi­ah a umna chin hriet lovin an hmang. Mi inhmang hming hi Deepa (14) of  Lairouching niin April 7, 2016 a Class X exam zo chau niin IGP, Robin Hibu, Nodal officer for North East Region, Delhi chun a hril. Deepa hin Facebook ruoltha pasal pahat a nei a, a hming chu Sharma nia hril a nih. A facebook ruoltha hi an vetchil ni dinga ring a nih.

MOBC Office AMSU in an khar 
IMPHAL: AMSU chun zanita inthawk khan Minority and Other Backward Classes (MOBC) office an khar tan. Warning an pek hnung le a san mumal nei lova kum 2013­14 le 2014­15 haia Pre­Matric Scholarship an pek thei naw leia MOBC Office h i an khar niin Manjit Sarangthem, General Secretary, AMSU chun a hril. Pre­matric Scholarship ngen hi students 1557 le post­matric scholarship ngen hi mi 20,000 an um a, Rs. 500&600 an pek seng niin a hril bawk.

Mithiruong pakhat hmu
IMPHAL:  Zani 11:30AM vel khan Irilbung vadung chunga leilak indaw hnuoiah Thokchom Naoba Singh (28) s/o Th. Chaoba Singh of Kalika Makha Leikai chu a thisaa hmu a nih. Naoba hi April 10, 2016 zana a ruolhai le an in suoksan, hi taka inthawk In inlawi ta lo niin a sunghai chun an hril. Mithiruong hi tui chunga a hung inlang hnunga hmu a nih. Mithiruong hi Police han an va lak a, JNIMS morgue­ah an va sie.

Kani kg. 2 leh pasal 1 man 
IMPHAL: April 9, 2016 khan Narcotic Affairs of Border (NAB) team han Khailet Haokip (35) s/o Hemjangam Kipgen of Pangjang Village, Saikul Sub­Division chu NH­2 a Sekmai Pal Hotel bulah Kani kg. 2 leh an man niin PRO, Police Department thusuok chun a hril.

Cheiraoba Kut leiin chawl
IMPHAL: Vawisun hin Manipur a chun Meitei hai kum thar Cheiraoba Kut hmang nawk ning a tih.  Hi Kut hi state sawrkar chun chawla a puong a nih.

Meghalaya­ah Pa hmesuol leiin mi 4 an thi
SHILLONG: Meghalaya­a East Khasi Hills district a chun sungkuo pakhata mi 11 han ramhnuoia Pa (mushroom) an lak an fak leiin mi 4 damzo lovin an thi a, midang 7 hai chu hospital­a admit le enkawl mek an nih tiin zanita official thusuok chun a hril.

Pa an fak hnung hin an sungkuo hin an inluok leiin inrang takin hospital panpui an ni a, sienkhawm 4 hai chu damzo lovin an thi a nih. Pa hme leia thi 4 hai chu an insung nu tak Drisda Rapthap, a naute kum 1 mi le kum 7 mi Lainehshkem Rapthap le an makpa Loki Dewkhaid (29) hai niin ei thu dawngna chun a hril. An pa tak Synsharlang Dewkhaid, an pi ( an pa nu) le midang 5 hai chu Shillong Civil Hospital le Ganesh Das hospital haiah enkawl an nih.

Security hai silai kap leiin mi 2 an thi
SRINAGAR: Zanikhan Jammu and Kashmir­a Handwara town­ah army personnel han nuhmeite student pakhat an sawisak tia intumna le inzawma mipuiin protest an nei huna security forces han silai an hmetpuok leiin mi 2 in thina an tuok. Protestors hai hin army post lungin an deng a, chu huna security forces han silai an hmetpuok leia mi 2 in thina an tuok niin ei thu dawngna chun a hril. Hi thil tlunga thina tuok hai chu Iqbal Ahmad le Nayeem Bhat hai an nih. Intumna hi suizui mek a ni a, suksuoltu hrietsuok an ni chun dan angin an chungah action lak ning a tih tiin army official thusuok chun a hril.

Mizoram VCs 31 a inthlangna May 19­ah 
AIZAWL: Mizoram­a Aizawl le Kolasib district haia Village Councils 31 haia inthlangna chu May 19, 2016 a nei dingin Mizoram Election Commission in zanikhan a puong. Hi le inzawm hin Returning officers han April 26, 2016 khin election notification insuong an tih. Council election­a ngir nuom hai ta dingin April 27, 2016 chenin nomination file thei an ta, election vote thlak zo in vote tla hai tiem nghal ning an tih.

Village Councils 31 haia hin members 123 an um a, hi laia 33 hai chu nuhmei hai ta dinga huol pek an nih. Hmar People’s Convention - Democrats (HPC­D) in hieng Villages Councils 31 haia tukhawm ngir lo le nomination file lo dinga vauna an lo siem leia nikum April thlaa election nei dinga ti chu thula lo um ta a ni a, election sukbuoi talo dinga an intiem leia election office in election nei hun ding hi a hung puong niin ei thu dawngna chun a hril. (AIR).

Assam CM Gogoi FIR file khum
NEW DELHI: Assam Assembly election fe lai zinga April 11, 2016 nia press conference a ko leiin Election Commission chun under Section 126 of the Representation of the People’s Act hnuoiah Assam Chief Minister Tarun Gogoi chunga FIR file dingin Order an suo. Mr Gogoi hin Assam Assembly election second phase April 11, 2016 nia nei a ni lai meka press conference hi a buotsai nia intum a nih. Intuma a umna thua thiemnaw inchangtir a ni chun kum 2 sung jail intang le fine chawi theina a nih. Deputy Commissioner Sandeep Saxena chun, election thuneitu han Gogoi hi election fe lai zinga press conference ko lo dingin thurawn an lo peklawk a, sienkhawm a neilui ta tho a nih tiin reporter hai kuoma a hril.

Mizoram Governor in emergency Assembly a ko
AIZAWL: Mizoram Governor Lt. General (retd) Nirbhay Sharma chun April 21, 2016 nia Mizoram Assembly emergency session nei dingin zanikhan a ko. Emergency session hi nikhat sung nei ning a ta, hi huna hin “the Mizoram (Land Acquisition, Rehabilitation and Resettlement) Bill, 2016” hriltlang ning a tih tiin Mizoram Assembly a Additional Secretary S.R. Zokhuma chun a hril. Hi Bill hi Mizoram Assembly budget session tawpni tak March 31, 2016 a kha state land revenue and settlement minister R. Romawia in a phar, lakkir le  select committee kuoma referred a ni a, a pawimaw leia passed a ni theina dinga emergency assembly hi ko a nih.

Aadhar Card laminate le Plastic card siem kher a tul nawh: UIDAI 
NEW DELHI: Unique Identification Authority of India (UIDAI) chun, mipui hai chu agencies registered ni lo/hrietpui lo hai kuomah mani Aadhar number le personal details pe lo ding le lamination thaw ding annawleh plastic card­a print dinga pe le dande lo dingin an hriettir. Pawisa senga SMART Aadhar siem kher a tul naw a, internet hmanga Aadhar card download le paper naran­a print suok chu hmang thei vawng a ni thu UIDAI Director General & Mission Director Dr Ajay Bhushan Pandey chun a hril. Aadhar card sukhmang a ni chun  https://eaadhaar.uidai.gov.in/ ah a thlawna download thei a ni a, black & white a print khawm hmang thei vawng a ni a; lamination annawleh plastic card a siem kher a tulna a um nawh tiin a hril. Lamination thaw nuom annawleh plastic Card lo thaw nuom a ni chun Agency hrietpui Common Service Centre annawleh Aadhar Permanent Enrolment Centres haiah Rs. 30 neka tam lo senga thaw thei a nih tiin a hril bawk.


President in mi 56 Padma Award an hlan
NEW DELHI: President Pranab Mukherjee chun zanikhan Rashtrapati Bhawan hmuna mi 56 hai kuomah Padma awards an hlan. Padma Vibhushan award inhlana um hai lai Superstar Rajnikant, classical singer Dr Girija Devi, journalist Ramoji Rao hai bakah Padma Bhushan dawngtu hai lai singer Udit Narayan le tennis player Sania Mirza hai khawm an thang. Chun, Padmashree inhlana um hai lai actorPriyanka Chopra,writer Dhirendra Nath Bezbaruah hai khawm an thang. India Republic Day huna khan Padma awards dawngtu ding mi 112 hai hming puong a ni a, March thla khan mi 56 hai kuomah Padma award hi inhlan an lo nita a nih.

Padma award semna huna hin Vice President Hamid Ansari, PM Narendra Modi, Home Minister Rajnath Singh le Union Ministers hai an thang tawl.

NIA Officer kap hlumna thuah mi 2 man
LUCKNOW: Uttar Pradesh Police chun NIA Officer Tanzil Ahmed thina le inzawmin zani hmasa zan khan Bijnore hmunah pasal pahni an man. Mana um hai chu Reyan le Junail hai an nih. Reyan hi Tanzil a tupa a nih. Hi tuolthatnaa mawphurtu taka intum Munir chu a tlan hmang leiin man a la ni naw a, Police chun man a ni theina dinga a umna hril theitu annawleh man theitu hai kuomah lawmman Rs. 50,000 pek dingin a puong. Munir hi Goa annawleh Mumbai hmuna an biruk ring a ni leiin Police team tir an nih.

Mumbai­ah in sawng 4 a insangah kangmei a suok
BHIWANDI: Zani zingkar khan Mumbai­a inthawka km. 55 a hla Thane district sung Bhiwandi town­ah In sawng 4 a inthawk kangmei nasa tak a suok. Kangmei suokna building hi puon siemna factory umna, warehouse le thawktu hai chengna hmun a nih. Kangmei hi a sawng khatna a inthawka intan nia hril a nih. Police officials hai chun hi building sunga intang hai chu zani 11AM khan an sansuok vawng bakah kangmei suok khawm hi thatmit a nitah. Electric short circuit leia kangmei hi suok ni dinga ring a ni a, sienkhawm sukchiengna a la um nawh. Nikum May thlaa Mumbai hmuna kangmei suoka khan Mumbai fire brigade a Chief Fire officer chun kangmei thelnaah thina a lo tuok pha ta a nih.

Bike­a India ram fangsuok tum eksiden in a thi
BHOPAL: India rama women biker inlar Veenu Paliwal (44) chu Madhya Pradesh­ah a chuongna Harley Davidson Bike­a a eksiden leiin damzo lovin a thi. Ms Veenu Paliwal hi Bhopal­a inthawk km. 100 vela hla Gyarapur bul lai changsuolin lam thlangah a tlanliem a, na taka a hliem leiin hospital panpui a ni a, sienkhawm damzo lovin zani hmasa zantieng khan a thi a nih.

Ms Paliwal hi Rajasthan­a seilien, Bike manto, India rama chun a man tlawm tak khawm Rs. 7 lakh chuong man ding Harley Davidson bike hrat tak taka a khal hlak leia mi hriet lar niin a Bike­a India ram pumpui fangsuok a documentary siem tum a nih.

Gurgaon hming ‘Gurugram’ a thlakthleng
GURGAON: Khawvel pumpuia BPO hup a hrietlar le Gurgaon chu tuta inthawk ‘Gurugram’ tia ko a nita ding a nih. Manohar Lal Khattar CM nina hnuoia Haryana sawrkarin Gurugram tia thlakthleng dinga an rel a nih. Hi lai biela cheng mipui hai chun hun iemanichen liemtaa inthawka kha Gurgaon hming hi thlakthleng dinga an lo ngen ta hrim a nih. Hi baka hin Haryana sawrkar chun Mewat district chu ‘Nuh’ tia thlakthleng dingin an remti bawk.

Samak pakhat kap hlum nawk
GUWAHATI: Assam­a Kaziranga National Park a chun zani hmasa khan park officials han Samak pakhat kap hliem sain an hmu a, enkawl dam tuma an buoipui hnungin damzo lovin a thi. Samak hi a Ki an lakhmang hnunga a kaptu han an tlansan a nih. Tukum sunga Kaziranga National Park­a dan lova sapeltu han Samak an kap hlum a 6­na a nita a, kum 2015 khan Samak 20 kap hlum an nih. Kaziranga National Park­a hin kum 1905 khan Samak 75 chau an um a, nikum chena khan Samak 2,200 vel an um ta a nih.

A suollui tum tupa tilte bawng vangin a se pek
AIZAWL: Zani hmasa zantieng khan Mr K. Lalramnunngaia (21) s/o K. Beirakhai Tuipang V­I chun nunghak Thlopadi (26) chu a nuhmei ram fe damnaw enkawlpui dinga hlemin a thuoisuok a, Tuipang thlanmuolah suollui a tum a; Ms Thlopadi hin a tlawm el ding nia a hriet hnungin pasal pa suklungawina dingin a tilte fawp pek dingin an tiem a, chu huna a tilte hi bawng vangin a se pek. Mr K Lalramnunngaia lungsen chun Thlopadi hi a ringah na takin a reka, khawhre lova a um hnungin a maksan a; nuhmeinu hi zantieng dar 3 vel in a har suok a, thlanmuola inthawk In hnai taka a tlanlut hnungin hospital panpui a nih. A suollui tumtu Lalramnunngaia khawm hi a hliemna leiin Saiha hospital­a admit a nih. Hi thil tlung hi HCHP le MHIP chun nasa takin an dem a, mi suollui tumtu hi hremna natak pe dingin sawrkar an ngen.

VAWISUN THUPUI
Aw Lalpa, zainemna hi i ta bawk a nih. Mi tin an thilthaw ang  sengin i thung hlak sih a.  ­ Sam 62:12

Editorial: Mob Rule hi ei tuorhla

Mob rule hi India ram hmun tum tum haiah a tlung rawp hlak a. Manipur state hi mob rule tlung tamna tak a ni el dim ti hi ngaituo tham a tling. Mob rule ei ti hi thaw dan tha le indik a ninaw leiin bansan thei inla nuom a um. Mob rule hin thiltha a rasuok ngai meu naw a, a rasuokhai chu thina, hliemna, tuorna, harsatna, buoina, sietna le inhmangna a ni hlak. Hienghai bakah hin a chang chun hnam le hnam kara buoina an tlun hlak bawk. Mob rule or mob culture hin ei society sunga inthuoi dan le inrelbawl dan hai siem that nekin nasa takin a suksiet lem leiin thaw zawngsak lova bansan hi ei society ta dinga thatna a ni lem ngei ring a um. Mob rule hi ei sakhaw ring dan leh khawm an rem naw a, ei society khawmin a tuorhla em em a, nasa takin a siet pha ta a nih.

Mob rule hi Manipur phairam biel sungah inzing utin a tlung hlak a. Tulai hnai el khawm hin hmun tam takah mob rule a tlung ti chanchinbu tiem hlak hai chun ei hriet seng ring a um.  April 8, 2016 zantieng khan Imphal East district sunga Nepatpali an ti hmuna mob rule a tlung a, motor chi tum tum 11 lai zet raw sietin a um. Hi hnung el, April 11, 2016 khan Imphal West district sunga Mayang Imphal Bengoon ah mob rule a tlung nawk a, Police thangsain mi 35 an hliem a, mihriem chengna in 7 le dawr 2 raw siet a ni bawk. Mob rule ra suok hi a thanaw hle ti hieng hmun pahni haia thil tlung haia inthawk khawm hin hmu le hriet thei a nih.

Mob rule tlung lei hin Wangoi Sub ­Division huop sung po poah hun tiemchin um lovin curfew zam a ni a, a biel mipui chu tuolsuok thei lo, an sin thaw lai hai sunzawm thei lovin an um a, a tuortu chu mipui tho an nih. Curfew leia hi lai biel mipuiin an chan le inhmang pha hi cheng nuoitel manhu a hung tling phak ngei ring a um. Mob Rule hi inhmangna le channa a ni el bakah harsatna chi tum tum intluntu a nizie a chieng hle. Hienghai baka hin hi lai biela cheng unau laina hai inkarah inremnawna an tlun a, inrem taka khawsa tlang hlakhai kha pawl hniin an hung inthe a, bandh thlawp pawl le bandh dodal pawl an hung um a, inngei diel diela umkhawm hlak hai kha hmelma ang elin an hung um a, an sung thu le an kar thu hi ieng chen am a la suksiet ding ti hi ngaituo um takel a nih.

Inthuruol, thangruol le inpumkhatna hai hi hratna le hlawtlingna a ni a, a that em em vei leh mob rule in  a hung suksiet vawng a. Inremna le inngaidamtuona an nei thei naw lem chun an kumkhuo hri a la hung ni ding a nih. Mayang Imphal area sunga mob rule hung suokna san hi motor inrua intum pasal pahni vuok hlum le pasal pakhat dang na taka vuok hliem a ni lei a nih. Motor inrua intum hai hi an tha naw a, an suol a lo ni thei. Amiruokchu, mimal annawleh mipui han mihai vuok hlum theina ding thuneina ei neinaw a, tuolthat chu dan kal a ni leiin motor inrua intum hai leh angkhat tho nina lai a hung um thei a nih. Hi lei hin dan hi mani kutah sie loa dan hmanga roreltuhai kuta sie chu a tha a, thil indik le a lampui ding a nih. Ienganga  suolna  le thil ditum lo takel a lo tlung khawma Police a report pek hi ei thil thaw dan ding lampui indik tak a nih.

Manipur phairam biel a mob rule tlung hlak hi Manipur tlangram biela chenghai khawma ei entawn ve mani ding ti thei khawpin tlangram biel sung haia khawm mob rule hi an khattawkin a tlung rawp el ta a, thil pawi takel a nih. Ei entawn a lo ni chun entawn lo ding chi tak ei entawn ning a tih. Kristien sakhuo zuituhai ta ding chun mob rule hmanga chet hi a tha naw el chau ni lovin ei ringna leh an kal tlat a, thaw lo hrim hrim ding a nih. Hnam dang thaw dan tha lo hai chu entawn lo hrim hrim ding a nih. Chu chu ei thil fepui dinga tha le ditum a nih.

Mob rule hin ei ram dan a kal el bakah ei sakhaw ring le khawm an kal tlat leiin ei society sungah annawleh ei ramah laklut lo hrim hrim ding a nih. Chuong a ninaw chun ringnawtuhai le ringkawl bat hmunkhat ei hung ni ding a nih. Ei  society sunga pawl tum tum le kohran pawl hran hran hai khawmin mob rule that nawzie, dan kal a nizie, ei ram le hnamin a sietpui ding a nizie hai hi inhril uor thei ngei inla nuom a um khawp el. A thei lem chun mob rule that nawna le inzawmin workshop le Seminar hai chen huoihawt inla nuom a um. Thiltha thaw hi nghawk lovin sunzawm pei ei tiu. Ei ram le hnam damna lampui ding a ni si a.

Post a Comment

Powered by Blogger.