Importance of Media   Seminar nei a nih
CCPUR: Manmasi Digest magazine huoihawtnain zani 11:30AM a inthawk khan Douglas Memorial High School, Rengkai­ah “Importance of Media” ti thupui hmangin seminar nei a nih. Seminar hi Pu Lalhossan, Vice Chairman, ADCC in khuollien ni pumin a hawng a, Rev & Dr Lalnghakthang, Executive Secretary, RPC­NEI in tawngtainain an hlan.

Pu Lal Hossan chun, facebook, whatsapp annawleh electronic media tiengpang a hrietna tlawm sienkhawm chanchinbu/newspaper hai a ngainat thu le hnam tina chanchinbu hai a lak kim vawng thu, seminar Manmasi Digest in a buotsai chu lawmum a ti thu hrilin Seminar buotsaituhai thangpuina dingin Rs. 5,000/­ a pek.


Pu Joseph Joute in keynote address a hril hunah, tulai electronic media Facebook, Whatsapp, Twitter etc. nasa takin hmang lar sienkhawm Print Media pawimawna le hlutna chu a kiem chuong nawh. Power um nawna hmuna khawm print media chu hmang thei a ni a; Print media hai chu fimkhur taka endik le a kakhawk ding ngaituo hnunga insuo hlak a ni leiin electronic media hai neka mipui innghatna le ring a la ni zing a ni a; electronic media hai nekin sawisel ding a tlawm deu thu; electronic media hai chu a kakhawk ding ngaituo lova mitinin an nuom nuom an ziek hlak leiin hmangsuol a awlsam em em a nih tiin a hril. Facebook , Whatsapp le a dang dang hai hi insawisel le indemna ni lova, society hmasawnna ding le Pathien thu puongdarnain hmang thei inla a nuom thu a hril.

Resource person Pu Robert L. Sungte, Senior Journalist, Deccan Herald, Bangalore chun, ei society siemthatna ding le hmasawnna dinga Chanchinbu tangkai taka hmang thei a nizie, print media chau ni lova electronic media hai tangkai taka hmang thei a ni zie; Inremna intlun theitu le indona suksuok theitu an ni leiin  thu insuo le thedar fimkhur a tul zie; New Media/ electronic media hmang tangkai a pawimazaw zie, thalai le inchuklai talent dang dang neihai ta ding khawma sum lam theina a ni zie;  thlalak thalo le thiemnaw inchangtir la ni lo, intum (accused) hai lim whatsapp, facebook le social networking site haia thedar mei mei hai hi dan kal an ni zie, dan ang taka case insiemkhum ding ni inla Jail intang ding tam tak ei um dan hai  hrilin  media hmang fimkhur a tul thu uor takin a hril.

Gilgal Chilren Home in 6th Graduation an hmang
CCPUR: Riengvai le chanhai naupang tam tak, mihriema lo sersuok hlaktu Gilgal Children Home, Muolvaiphei chun zanikhan an school campus­ah 6th Graduation puithu takin an hmang. Tukum hi home­a inthawk graduate chu mi 12 an nih a, Home enkawltu Rev. James Lalrobul, Administrator chun graduates hai infuina thucha tha tak tak hrilin malsawm tawngtaipekna a nei a; Certificates inhlanna a nei nghal bawk.



Hieng naupang hai hi nu le pa nei ta lo, an chintea inthawk hi Home in a lo enkawl an ni a, hiengang ngirhmun tlung theia an um naah lawmpui an um hle. Hmatieng peiah Lalpa thuoina le malsawmna dawnga, riengvai le chanhai hai ta dinga rawng an bawl pei theina ding bakah Graduates hai le Home­a la um naupang 300 vel hai ta dinga Kohran han nasa taka tawngtainaa ei lo san nuom a um. Chun, hiengang naupang chanhai enkawlna Home hai ta dinga harsatna intluntu ni lova, thangpuitu ni seng dingin ei infiel bawk.

13th Martyrs Trophy opening ceremony
CCPUR: 13th Hmar Matyrs’ Trophy Football Tournament Opening Ceremony, 2016 chu April 12, 2016, 12:00noon khin Saikawt khelmuol, CCPur­ah nei ning a tih. Hi huna hin Pu Joseph Lalrothang, President, Hmar Inpui khuollienin thang a ta, Functional President in Pu Laldawnlien Varte, President, HYA GHQ le Guest of Honour in H. Samson, President, HYA Rengkai Branch thang a tih.

Entrepreneurship Training for PwDs nei
CCPUR: Zani 10:30AM khan Dorcas Jubilee Guest House Auditorium, New Lamka hmuna CCPur District Disabled Union (CDDU) le Mercy Home/FCC chun Jan Vikas Samiti/Liliane Foundation sponsored­nain Entrepreneurship Training for Persons with Disabilities (PwDs) an buotsai. Hi huna hin Pauneihthang Valte, Chief Manager, SBI CCPur CT. Lian, MDC le  Sister Merin, FCC hai resource person in an thang.



Disabled persons han sum le pai an hmu theina dingin annia talent inphumruk hai phawrsuok a ni theina dinga Training hi buotsai a nih tiin T. Sianmuanthang, President CDDU chun a hril.

One Day Lok Adalat nei
CCPUR: National Legal Services Authority, New Delhi le Manipur State Legal Services Authority hnuoiah CCPur District Legal Services Authority chun zani 10AM a inthawk khan Chief Judicial Magistrate (CJM) Court Complex, Tuibuong­ah nikhat sung aw “Lok Adalat”nei a nih. Hi huna hin family matters cases 16 hai ngaituo a ni a, cases 3 sukfel a nih.

2 months training zo
CCPUR: NYK,Churachandpur sponsored­nain Feb. 9, 2016 a inthawkGangngam Development Society, Chiengkonpang Training Centre­a “2  Months Training on Detergent & Dish Wash making’ tan chu zanikhan zo a ni a, training a thang mi 20 hai kuoma Certificate inhlanna an nih.

Essay Writing 2nd phase 
CCPUR: All Tribal Movment Lamka (ATML) chun zani zantieng 1:00PM khan CCPur College Room No. 5­ah Class VII­X student hai ta dingin 2nd phase Essay Writing Competition an buotsai. Hi huna hin School tum tuma inthawk student 15 an thang.

MPS training zo le Colonel­a kaisang
CCPUR/SHILLONG:Manipur Public Service Commission (MPSC) huoihawtnaa Manipur Civil Services Combine Competitive Examination, 2014­a Manipur Police Service (MPS) hmu tlangmi mi 4­ Mr E. Lalringum Pulamte s/o Siekzapau Pulamte of Apollo Veng, CCPur Mr Sony Siemgousang Gangte s/o (L) Kaisang Gangte of Chiengkon, CCPur le Ms Priscilla  Tuboi, New Lambulane, Imphal hai chu Ranjit Singh Punjab Police Academy, Phillaur a inthawk training an lo zo tah. MPS training zo Manipur­a inthawk 19 an ni a, Naga tlangmi 3 an thang ve. Zani hmasa khan Passing Out parade nei a ni a, hi huna hin Mr. Suresh Arora, IPS, DGP Punjab khuollienin a thang.

Chun, Assam Rifles Medical Officer hai laia India President Police Gallantry Medal dawngtu la um sun, Assam Rifles a Lieutenant Colonel, AR Hqrts., Shillong­a Staff Officer sin thaw lai mek Dr Mary Hranngul d/o (L) Rev. Challienkung Hranngul of Shillong chu zani hmasa khan Colonel rank (Commandant rank) in a kaisang. A sinthaw that leia Gallantry Medal hi kum 2012 Republic Day huna inhlan a nih. January 2003 khan Assam Rifles­ah lut tanin Assam, Mizoram, Manipur le Nagaland haiah lo posting ta a nih.

Happiness Home thangpuina an pek
CCPUR: 32Bn. CRPF Loktak chun Valour Day le inzawmin zanikhan Hapiness Home, Pangzol, CCPur an hang kan a,  32nd Bn. Assam Rifles Officers le Jawans han donation an lakkhawm haia inthawk thangpuinain Bufai bag 4, Chini bag 2 le Masoor Dal an  inhlan. Hi huna hin  R.V. Philip, Dy. Commandant chun Home enkawltu hai inpekzona lawmum a ti thu a hril a,  J.S. Ahlawat, Commandant, 32Bn. CRPF chun society ngirhmun dawmsangna dinga hiengang home dang dang haia khawm thangpuina pek pei a nuom thu a hril. Thangpuina thil an pek hai hi Gyanendra Singh, Dy.CO le Daniel Shakum, Asst. Commandant han inhlanna an nei.

Quiz, Debate le Science Exhibition nei
CCPUR: Mr T. Goukhomang, ZEO, CCPur chun zani 11:00AM khan Phungkhothang Govt. H/S ah   Rashtriya Madhyamik Shiksha Abhiyan (RMSA), CCPur huoihawt Class IX le X inchuklai hai ta dinga buotsai Quiz, Debate le Science Exhibtion a hawng.


Zanita Competition­a hin school 20 haia inthawk Debate­ah team 18, Quiz ah team 19 le Science Exhibition ah team 12 an thang. Quiz a team 5 thlangsuok han April 11, 2016, 10:30AM hin Synod Hall­ah final round nei an ta, zantieng lawmman semna um nghal a tih. Chun, Debate, Quiz le Science Exhibition a 1st le 2nd hai April 23, 2016 nia Imphal­a State Level Competition­ah district aiawin va thang an tih.

District level­a lawmman chu 1st Rs. 4,000/­ ; 2nd Rs. 3,000/­ le 3rd  Rs. 2,600/­ bakah consolation prize Rs. 2,000/­ a nih. Debate a 1st in Rs. 2,000/­, 2nd in Rs.1,500/­; 3rd in Rs.1,300 le consolation Rs.1,000/­ ning a tih. Science exhibition­ah 1st Rs.2,000/­,2nd in Rs.1,500/­ le 3rd  Rs.1,300/­ ning a tih.

Make in Manipur hlawtlingna chu Make in India hlawtlingna dinga thangpuitu hung ning a tih: Kalraj Mishra
IMPHAL: Zanikhan Union Minister of Micro, Small and Medium Enterprises (MSME), Kalraj Mishra in Expo Hall, Lambuikhongnangkhong hmuna Churachandur, Ukhrul le Chandel District haia Industrial Estate indinna ding hai bakah Maipur­a District 9 haia Livelihood  Business Incubation Counters indinna ding lungphum a phum. Hi huna hin Union Minister of state for MSME, Giriraj Singh; O.Ibobi Singh, CM, Manipur; Govindas Konthoujam, Minsiter, Commerce & Industries, Manipur; O. Nabakishore, Chief Secretary, Manipur;  L. Lakher, Principal  Secy. (Sericulture/Vety &  AH), Manipur; H. Nagesh Prabhu, Member Secretary & CEO, Central Ministry of Textiles, New Delhi, B. John Tlangtinkhuma, Director, (Sericulture, Commerce & Industries), Manipur le high officials tam tak an thang.

Make in Manipur hlawtlingna chu Make in India hlawtlingna dinga thang­puitu a hung ning a tih. Hi lei hin Make in Manipur hi sukhlawtling a tul a, sukhlawtlingtu ni tum seng ei tiu. Thalai lekha thiem sin nei lo han an ni le an ni fak hmuna an hung hmu theina dingin Manipurah Industry indin tam le sukpuitling a tul. Thalai sin nei lo han mania fak hmuna an hung nei theina dingin MSME chun project tum tum a siem a, chu hai lai chun project  ASPIRE, PMEGP le  SFURTI hai a thang tiin hi huna Kalraj  Mishra in thu a hrilna huna a hrillang.

Manipur­ah thalai lekha thiem sin nei lo tam tak an um a, an rengin sawrkar sin pekseng ninaw nihai. Manipur sawrkar hnuoia Department tum tum haiah sin ruok 30,000 lai zet a um, sienkhawm a pawimaw bik zuolhai chau lak ning a tih. Hi lei hin Entrepreneur tha indin a pawimaw a, Entrepreneur tha le hlawtling indintu ni tum seng ei tiu. Chuonga thil ei thaw chunEntrepreneur pakhat khawmin mi 400­500 chen dam sin pe thei a ta,ei rama unemployent problem hlipkieng theiin a hung um ding a nih tiin CM O.Ibobi Singh in hi huna thu a hrilna huna a hril.

URF Camp hlukhum, motor 11 raw
IMPHAL: Zani hmasa zantieng khan Imphal East District sunga Napet le a se vela khaw mipui 1000 velin Napet hmuna URF Designated Camp an hlukhum a, mipui lungsen han hi camp a um motor 11 an raw bakah thil tam tak an suksiet pek. Motor rawa um hai lai hin DI Tata Truck 1, Gypsy 1, Van 1, Bike 1 le Activa 7 a thang. Tuolsung Club members le URF cadres thenkhat Thabal Chongba neina hmun ding thuah an insukbuoi a, tuolsung mi 3 URF cadres han an vuok leia khaw mipui lungsena URF camp hi an va hlukhum niin ei thu dawngna chun a hril.

Hand Grenade hmu a nih
IMPHAL: Zani zing dar 5:30 vel khan Imphal West District a Wangoi Police station huop sungaMayai Lambi Service Station (Petrol Pump), Hiyangthong­ah China siem Hand Grenade pakhat h mu a ni a, zing dar 7:30 velin Police a bomb Squad han an va lak a, pawitawk nawna ding hmuna an sukpuok.

Ramdang palaihai Moreh le Tamu­ah
IMPHAL: NE ASEAN Business Summit a hung thang ramdang palaihai chu zanikhan Moreh ah an hang inzin a, Integrated Check Post (ICP), Moreh an en bakah Tamu, Myanmar an va sir. Moreh le Tamu inkara insumdawngtuona hai khawm a hmun ngeiah fein an en.

Governor in Flower Festival a hawng
IMPHAL: Zanikhan Mao, Senapati District­ah Manipur Governor V. Shanmuganathan in 2nd Flower Show a hawng a, Flower Festival huna lawmman lahai kuomah lawmman a sem. Tamenglong a khawm Flower Festival hi nei a nih. Flower Festival hi Commerce & Industries Department le  HGOrticulture Dept. hai thangruola an huoihawt a nih.

Sawrkar condition siem an pawm leh
AIZAWL: Mizoram State sawrkar in condition chi tum tum a siem an pawm a, an zawm thei ding leh HPC(D) leh inbiekna nei ning a tih tiin Mizoram Home Minsiter R. Lalzirliana chun a hril. Mizoram sawrkarin condition zui le zawm dinga a siem hai chu, HPC(D) hai an ralthuomhai leh an inpe ding, tuta hnung h elpawl indin ta lo dinga thu intiemkamna an nei ding, Police a inthawka tlan hmangin a chawi silai hai le inlambunnaa Police silai an lak hai po po an pekkir nawk ding ti hai a nih tiin Lalzirliana chun a hril.

Central thawktu hai DA 6% a sukpung
NEW DELHI: Sawrkar thlungpui hnuoia thawktu hai Dearness Allowance (DA) chu an basic pay a inthawk 6 percent a sukpung a ni a, hi dungzuia Central Govt. hnuoia thawktu hai DA chu 125 percent a tling ta a, DA sukpungna hi January 1, 2016 a inthawk hmang tan ning a tih. Thawktu hai DA le pensioners hai Dearness Relief (DR) sukpung ding hi March 23, 2016­a Union Cabinet meeting a sukthluk a nih. DA sukpunga um hi Central Govt. thawktu 50 lakh le pensioners 58 lakh han an thathnempui ding a nih.

Vote zawngnain a vawrtawp a tlung
GUWAHATI/KOLKATA: Assam le West Bengal haia chun vote zawngnain a vawrtawp a tlung. Assam a chun BJP candidate hai ta dingin Union Home Minister Rajnath Singh le Union Human Resource Development Minister Smriti Irani han vote an campaign nawk. Vote zawng theina hun hi zani zantieng khan hieng state pahni haia hin khar a ni tah. April  11, 2016 khin Assam­a Assembly constituencies 61 le West Bengal­a Assembly constituencies 31 haiah inthlangna (second phase) a um ding a nih.

Maoist cadres 122 an inpe
RAIPUR: Chhattisgarh­a tribal Baster region­a chun nuhmei thangin Maoist cadres 122 zet zanikhan a ruolin IGP (Baster Region) SRP Kulluri le Sukma District collector Neeraj Bansod le SP, D. Sharavan hai hmaah an inpe. Inpe hai laia 15 hai chu luman Rs. 10 lakh neia puong ta an nitawl a, an rengin immediate compensation in Rs. 10,000 cheque inhlan an nih.

NE state tinah indin a ni ding
AGARTALA:Zani hmasa khan Union Textiles Minister Santosh Gangwar chun Agartala khawpui sunga Bodhjungnagar Industrial Growth Centre­ah Apparel and Garment Making Unit a hawng. Hiengang Unit hi NE biel sunga States 8 haia indin vawng ning a tih. Hi thil hi Make In India hnuoia thaw tum a nih tiin Gangwar chun a hril. April 6, 2016 khan hiengang Unit hi Minister of state for Home Affairs Kiren Rijiju in Dimapur, Nagaland­ah a lo hawng ta bawk.

Manipur Civil Services (Prelims) Exam 2016 
IMPHAL: Manipur Public Service Commission (MPSC) chun  MCS, MPS, SDC, MSS le Election Officer hai lakna dingin Manipur Civil Servives combined Competititive  (Preliminary) Examination, 2016 huoihawt a tum.
Post lak ding hai chu-
1. Manipur civil services -Grade II Post 13 (Gen-7, ST-4, OBC(M)-1, OBC (MP)- 1.
Pay scale : Rs 9,300- 34,800 /- + Grade pay Rs 5,400/-
2. Manipur police services. Grade II Post 16 (Gen- 8, ST-6, OBC (M)-2
Pay scale : Rs 9,300-34,800/- + Grade pay Rs 5400/-
3. Sub-Deputy collector. Grade –II Post 48 (Gen-25, SC-2, ST-12, OBC (M) - 6, OBC (MP)-3.
Pay scale: Rs 9, 300-34,800/- + Grade pay Rs 5400/-.
4. Manipur secretariate service/section officer Post 4 (Gen.-4)
Pay scale : 9, 300-34,800/- + Grade pay Rs 4,400/-.
5. Election officer Post 1 (OBC-M) -1 a nih.

Inhnikna nei han thu chieng lem MPSC website: www.mpscmanipur.gov.in ah thu chieng lem hriet thei ning a ta, Online Application  April 9, 2016 a inthawk April 30, 2016 inkar sungin peklut thei ning a tih. Exam chu May 15, 2016 (Sunday) a nei ding a nih.

****  Chun, Central  Board of Secondary Education (CBSE) chun  July 10, 2016 khin  Junior Research Fellowship le Asst. Professor ni theina dinga University Grants Commission­National Eligibility  Test (UGC­NET) buotsai a tum.  Hi Test a thang thei ding hai chun  April 12, 2016­ May 12, 2016 inkar sungin  online application peklut thei ning a tih.  Thu chieng lem cbsenet.nic.in ah hmu thei ning a tih.

VAWISUN THUPUI
Mani sum ring a, Mani hausakna nasatak suongtuhai chun, Tukhawmin an unau khawm intlan thei tawp naw nih a, Pathien kuomah intlanna pe pek thei bawk naw ni hai:
­ Sam 49:6­7

Editorial: Ministry sawidanglamna

O.Ibobi Singh Chief Minister nina hnuoia Congress sawrkar chu kum 15 a pumhlum vang vang taa, Manipur a ding chun O.Ibobi Singh hi a zawna Chief Minister chel sawt tak a ni tah. Hi taka inthawk hin O.Ibobi Singh hi pa var, pa remhrie, pa thluok nei tha, rorel thiem le harsatna chi tum tum chingfel thiem mi a nih ti inla ei hril suol taluo ring a um nawh. Chief Minister a chel sunga harsatna le buoina chi tum tum tlung hai po po kha chingfel thei naw sienla chu a ministry tluse a ta, tuchen chen hin CM hi chel thei tanaw nih. Manipur a Congress thuoituhai laia chun Congress High Command dawr thiem pawl tak khawm a ni ngei ring a um. Tuta tuma ministry buoina khawm iengtin am a chingfel ding ti zing laiin thiem takin a hung chingfel nawk el thei ding niin an lang.

Official­a thusuok la um naw sienkhawm Manipur ministry sawidanglam (Ministry reshuffle) chu tuta inthawk ni 1/2 hnungah a hung um thut el thei nia hril a nih. Ministry sawidanglam huna hin dissident Congress MLA­hai ngen ang charin thil a fe  naw ding ruok chu niin an lang. Dissident MLAs han ministers 10 ban le a thar 10 laklut dingin an ngen a. Nisienlakhawm minister thar hi 4 chau laklut ni dinga  hril a nih. Minister ban ding hai lai hin senior deu tah, Manipur sawrkara ngirhmun pawimaw tak chel bakah mipuiin an hrietlar em em hai an thang el theia hril rik a nih. Chun, minister thara laklut dinghai lai minister chanvo la chel ngai der lo hai an thang ring a um a hril rik a ni bawk.

Pu O.Ibobi Singh in Chief Minister a chel tanna kha March 7, 2002 dai a ni ta a, tuchen hin CM a la chel a, hi hun sung hin ministry sawidanglam dinga ngenna vawi tam tak a um a, dissident group khawm an um hlak a, sienkhawm thiem takin dissident MLA­hai chu a thlem lungawi thei nawk pei hlak. Amiruokchu, tuta tum hin chu India rama politics fe dan le Centre­a sawrkar cheltuhai thil thaw nuom dan hi Congress High Command or AICC thuoitu lu han an hriet kar a, hi lei hin tuta tum h in chu ministry sawidanglam an hung remtipui ding niin an lang. Sienkhawm chu hi thil hin ministry buoina le dissident MLA­hai lungawinawna a hung sukre dim ti ruok chu hriet a ni nawh.

Kum 2005 khan Manipur ministry sawidanglamna (minor reshuffle) a um a,  kha h una khan  Assembly Speaker T.N. Haokip Cabinet minister­a ruot le khalai huna minister of state chanvo chel (L) Allauddin Khan Cabinet minister a hlangkai a nih. Hi thil hi One man One post chungchanga Gaikhangam Cabinet minister a ninaa inthawka an ban leia minor reshuffle hung um a nih. Kum 2007 a inthawk January, 2012 inkar sung khan chu ministry sawidanglamna a um der nawh. Hi thil hi ei en vang vang chun Pu O.Ibobi Singh hi a var a, rem a hriet a, thil a rel fel thiem bakah pa vangnei a nih tinaw ruol a ni nawh. Vang (luck) ei ti hin mihriemhai hi hlawtlingnaah a mi thuoi thei a nih. Kum 2012 a Assembly election zova kha Gaikhangam hi Cabiner minister/Dy. CM hung chel nawk chau a nih.

Minister­hai chanvo sem, minister­hai chanvo thlakthleng le ministry reshuffle tihai hi Chief Minister mimal thuneina (prerogative) a ni a. A nuom chun a thaw thei a, a nuom naw tlat chun a thaw naw el thei a nih. Tuta tum ruok hin chu Assembly election a hnai ta bakah Arunachal Pradesh le Uttarakhand state haia politics fe dan hai en a, CM hin ministry minor reshuffle thaw hi Congress High Command kuoma rawtna a zu siem khawm thil ni thei a nih. Hi thil hi thil awm tak hrim niin an lang. Amiruokchu, an sawrkar buoina le dissident MLA­hai lungawinawna hai a hung chingfel dim ti ruok chu hunin a la hung rel ding a nih.

Dissident MLA­hai um dan le lungawi thei dan tawk an thiem a tul. An thil ngen po po sukpuitling vawng la ninaw sienkhawm an thil ngen laia pakhat, MPCC President thlakthleng a ni ta a, hi thil ringawt khawm hi an thil ngen hlawtlingna ropui tak a nih. Hi hnungah ministry sawidanglam a hung  ni nawk lem chun an thil ngenah lungawinawna ding bek bek a  um tanaw niin an lang. Dissident MLA po po ta ding hlak chun minister chanvo chang vawng thei a ni si nawh. An thil ngenah an hlawsam naw a, hnena changah an inngai a tul. O.Ibobi Singh CM hun sunga ding chun dissident group hlawtling tak an nih.

Post a Comment

Powered by Blogger.