MNF thuoitu 3 hai inpawlpuina an nei
CCPUR: Sadar Hills­a Thadou Cultural Festival sim dinga hung inzin Mizoram­a inthawk Mizo National Front thuoitu 3­ R. Tlanghmingthanga,Vice President; David R. Malsawmtluanga, Secretary le James B. Ralte, Gen. Secretary hai chu zani zantieng 2:30PM khan MPC Office, Hmuia Veng­ah Tribe leaders han inpawlpuina an nei a, Zohnathlak hnam tum tum hai kara inlaichinna thalem a um thei dan ding thu an hrilpui.


R. Tlangmhmingthanga chun, Festival an thangna report tawite a pek bakah August 31, 2015 nia Manipur Assembly in Bill 3 an passed hai leia buoina le thina tlung chungthu Mizoram in a hrietpui le a tuorpui thu a hril a. Zohnathlak hai chu beidawng el ding ei ninaw thu; geographical boundary leia hmun hran hrana cheng ni inla khawm ei ram Mizoram­ah inphalam der lova cheng thei a nih tiin a hril.

Tribe leaders hai chun, NSCN(IM) le MNF in boundary thuah verbal agreement/understanding (within Manipur)a an nei chu Naga Peace Accord in iengchen am a tawk/ a tawk naw ti  indawnna an siem a, hi thu hi complicate tak a ni leiin hi thua hin MNF thuoitu han crucial meeting an la ngei phawt a ngai ding thu an hril. MNF thuoitu hai hin vawisun Mizoram pan nawk tang an tih.

Dinner­ cum­ Confabulation 
CCPUR: April 11, 2016, 6PM khin Shri Lunminthang Haokip, IAS, DC, CCPur chun Life Cafe, Rengkai  Road, CCPUr­ah Dinner­cum­Confabulation on “How to check Cyber Crime and Whatsapp Abuse” huoihawt a tih. Hi huna hin fiel bika um hai thang tawl an tih.

Solar Street Light 174 inbuk zo a nitah
CCPUR: MANIREDA in DC, CCPur official residence/bungalow­a inthawk Tuibung Peace Ground chen  khawpui sung Tiddim Road zula Solar Street Light inbukna March 5, 2016 a inthawka an tan chu ni iemanizat an chawl hnungin an sunzawm pei a, zani khan Hmarveng chen an tlung ta a, tuchena Solar Street Light an inbuk zo ta chu 174 a nih. Vawisun hin sunzawm nawk an tih. Solar Street Light inbukna dinga a ban (post) inthutna ding foundation plate le nut 40 vel solar ban phun hmain rukru han an inrukhmang hman a, hi thua hin MANIREDA chun Police le DC, CCPur kuomah report an pek.


Solar street light hi metre 25 dan peia inbun anih. Post pakhat peia inbuka um hai hi 100x2 solar panel le 43Watt Lamp an nih.

Pipe leak an siemtha
CCPUR: PHE Division, CCPur thawktu hai chun machine hmangin Sielmat leilak bula pipe leak hlak siemthat tumin zanikhan sin an thaw. Hi Pipe hi Khuga Dam­a inthawk Bijang Water Reservior­a tui laklutna ding a ni a, 45 degree neka inhnuoia pipe hi phum/inzawm an tum a nih.

Hmun 5­ah security  
CCPUR: Meitei han kum tina an thaw hlak “Ibudhou Thangjing Ching Kaba” le inzawmin April 9, 2016 zantienga inthawk hi thil le inzawma buoina  a umnawna dingin SDPO/CCPur inrawinain Security duty ruot an nih. Security duty na ding hai chu Zone­I tlangsip (worship place); Zone­II (Bijang Tuikhur hmun); Zone­III Koangphamjang hmun; Zone­IV Old  Gothol playground le  Zone­V  Elijah Prayer mountain junction hai ning an tih. Buoina um pal thila dingin Anti­Riot team le Old Gothol Playground ah bawk an tih. Tlangkai hi April 10, 2016 chen aw ding a nih.

Notebook le Cycle sem
CCPUR: World Vision India, Manipur Bal Swasthya Project chun zani 11:00AM khan Hiangtam Lamka YPA GHQ Hall­ah naupang an thangpui hai kuomah Special Guest in T. Goukhomang, ZEO/CCPur le Loli, Prog. Manager, World vision han Notebook le cycle inhlanna an nei.  T. Goukhomang chun, Pathienin mitin angkhatin a mi siem a, thluok hmang thiem thiem an varin an thiem el a nih tiin a hril a, student hai chu taima le tumru taka lekha inchuk dingin an fui.


Loli chun, Class X zo hnunga professional line/degree inchuk nuom an um chun World Vision in thangpuina pek dan a ngaituo ding thu a hril. World Vision Manipur Bal Swasthya Project hin students 270 kuomah notebook 25 seng le student 9 hai kuomah Cycle 1 seng an pek a nih.

Sungkuo inthlasawng Politics in Assam a suksiet: Narendra Modi
GUWAHATI: Prime Minister Narendra Modi chu Assam State a BJP candidate­hai ta dinga vote zawngin Assam­ah an zin a, April 7, 2016 zan khan Guwahati­ah a riek a, zanikhan Rangia le Raha hmun haiah vote a campaign a, hi zo hin Assam suoksanin Neew Delhi a pan nawk tah. Zani zingkar khan Kamakhya Temple­ah fein a va tawngtai a, hi zo hin Rangia panin vote campaign a tan.

Rangia hmuna vantlang inkhawm a thu a hrilnaa chun, Assam a hin BJP le an thlawppui han majority Government siem an nuom a, chuleiin lo vote seng ro tiin mipui hai a ngen. Hung Assembly um a tha naw a, Hung Assembly um nawna dingin thang lak a tul. Hung Assembly chun Assam state le a mipuihai  ta dingin sietna an tlun ding a nih tiin a hril.

Assam mipuiin Congress an lo thlawp leiin kum 15 zet ro an rel ta a, sienkhawm Bangladesh vote bank bak an tlungpui zo naw a, Assam mipui le a state an suksiet a nih. Bangladesh mi a ruka Assam­a hung lut hai chu dang lovin BJP sawrkar chun dan kala Bangladesh mi Assam­a hung lut hai po po thawnkir vawng a tih tiin Modi chun a hril.

Raho hmuna vantlang inkhawmna a thu a hrilnaa chun, sungkuo inthlasawng Politics in Assam ram a suksiet a nih tiin a hril. India rama state dang  haia chun BPL population percent chu 20 or 30 percent chau a ni laiin Assam a ruok chun a mihriem cheng po po deuthaw BPL sungkuo, mi pasie an nih. Hi thil hi Congress sawrkar that naw lei a nih. Hi lei h in Assam ah inthlakthlengna a um a tul a, Congress sawrkar ni lo sawrkar thar a um a tul a nih. BJP sawrkarin tuta inthawk kum 3 sungin BPL sungkuo vaibelsie 5 hai kuoma LPG Connection a pek ding a nih tiin a hril bawk.

AICC Vice President Rahul Gandhi khawm zanikhan Assam­ah Congress candidate hai ta dingin vote a campaign nawk. BJP thuoina hnuoia NDA sawrkar le an PM chu an thutiem sukpuitling lo, mi hlem hmang an nih tiin mipui pungkhawmhai hmaa a hril. Assam ah sawrkar siem thei dinga thlang lal an ni nawk chun Assam rama sin neilo thalai mi nuoi 10 hai kuomah Congress sawrkarin sin peng a tih tiin Rahul Gandhi chu an tiem.

Pa fak suol leiin sungkhata mi 3 an thi 
AIZAWL: Mizoram­a Mamit a chun Pa (Mushroom) faksuol/ngeinaw (food poisoning) leiin sungkhata mi 3 in thina an tuok ta niin ei thu dawngna chun a hril.

Ei thu dawngnain a hril danin Mamit Bazar veng­a um Pu Saikhuma chun  Thawtanni khan a ram suok naa  hme dinga a hung lak Pa (mushroom) chu zeu in an hme a, bu an fak khawp hungin phingna sawiselin  an sung a khaw bakah nasa takin an inluok a, a zing April 5, 2012 khan District  Hospital, Mamit panpui an ni  a, a naupa kum 10 mi  Biakrinawma chu zani hmasa (April 7, 2016) zan dar 10 vel khan a thi a, a sangpa Malsawmtluanga (8) chu zani zingkar dar 7 vel khan a thi nawk a. Hi hnung zani zing dar 9 vel khan Pu Saikhuma khawm a thi nawk niin ei thu dawngna chun a hril. Saikhuma chun an Pa fak hi Papar nia a hriet thu a hril.

Hi Pa fatu hai chu Saikhuma (35) le a nuhmei Ramdinmawii (34), an nauhai Saihmingthangi (12), Biakrinawma (10), Malsawmtluanga (8) le Miriami (3) bakah an mikhuol VL. Hriata (20) of Tuikual, Aizawl hai an nih.

Hi Pa fa leia damnaw dang hai Saikhuma nuhmei Ramdinmawii (34), an nau nuhmeihai  Saihmingthangi (12) le Miriami (3) le an mikhuoal VL Hriata (20) hai chu zanikhan Helicopter in   Azawl panpui an ni a, an ngirhmun a thanaw hle niin a Police chun an hril.
 
Hi thil tlung le inzawm hin Health Department hnuoia Integrated Diseases Surveillance Programme (IDSP) a Nodal Officer Dr. Pachuau Lalmalsawma chun zanikhan thusuok siemin Pa hmesuol thei chi hrang hrang 100 vel a um a, hieng laia 14 hai chu thipui thei an ni thu  hrilin, Pa hme suol leia leia thina tlung a um nawk tanawna ding mitin fimkhur ding le, Pa hriet chieng lo chu hme lo dingin mipui hai thurawn pein, Pa hme suol leia damnawna a lo um chun an rang thei anga hospital panpui dingin an hriettir. An Pa fak ang hi official han enfel dingin sample an va lak.

Ni 3 sungin migrant workers 250 chuong
IMPHAL:  Ni 3 liemta sung khan Imphal khawpui le a sevel haia building bawlna hmun haia inthawk dan kala sinthaw migrant workers 250 chuong dapdawk le man an ni a, hieng migrant workers hai hi Police kutah inhlan an nih tiin JCILPS Convenor, Khomdram Ratan chun a hril. Inter State Migrant Workmen (Regulation of Employment and Condition of  Services) Act, 1979 dungzui chun Migrant worker­hai chu Labour Department a inthawk Work permits an nei ding a ni a, sienkhawm migrant workers mana um hai hin work permit an nei nawh tiin Khomdram Ratan chun a hril.

Manipur in Myanmar electric a pek tan
IMPHAL: India le Myanmar sawrkar han inremna an lo ziek ta angin zani zingkar dar 9:30 a inthawk khan Manipur chun Tamu town, Myanmar electric a pek tan. Inremna an siem dungzui chun Manipur in Myanmar kuomah electric a pek ding hi MW 3 a ni a, zanita a pek tan hi MW 1 a nih tiin Manipur State Power Distribution Company Limited (MSPDCL) thusuok chun a hril.

Union MSME minister a hung inzin
IMPHAL: Union Minister of Micro, Small and Medium Enterprises (MSME), Sri Kalraj Mishra chu zanikhan Imphal­ah a hung inzin a, City Convention Centre, Imphal­a 1st Manipur Industrial Expo,  2016 Valedictory  Session­ah a thang a, vawisun hin hi Centre a programme tum tum hmangna haiah khuollienin thang a tih. Valedictory session a hin Manipur Governor, V. Shanmuganathan khawm a thang.

CM Imphal a hungtlung
IMPHAL: New Delhi inzin Manipur CM O.Ibobi Singh le Dy. CM  Gaikhangam hai chu zanikhan New Delhi a inthawk Imphal a hungtlung nawk tah. Ministry chungchangah thuthar an hng hawn le hawn naw thu ruok chu hrietna ei nei nawh.

Manipur­a cham mek Bangladesh Commerce Minister Md. Tofail Ahmed chun zanikhan Manipur CM O.Ibobi Singh chu CMs Secretariat­ah an hmupui.

NIA Officer thina thuah tuolthattu an puong
SAHASPUR/SEOHARA: April 3, 2016 nia Bijnor hmuna National Investigation Agency (NIA) Officer Tanjil Ahmed kap hlum le a nuhmei Farzana nataka kap hliem a nina le inzawma ringhla leiin Tanzil laina hnai Rehan Mohammad chu zani hmasa khan Polcie han an man a, Tanzil Ahmed khan an insung hnuoisie bakah a sunghai a suknawma hlak leia lungsena a that a ni thu police kuomah an puong. Tanzil Ahmed an that huna motorcycle khaltu khawm ama ngei a ni thu hrilin a hnunga chuong a thangruolpui Munir in silaia a kap hrut niin an puong bawk. Tanzil taksaa khan 9mm Pistol le  point 32 Pistol mu lutna be 24 hmu a ni a, a nuhmei Farzana taksaah silaimu lutna hmun 3 hmu a ni bawk a nih. Munir hi Aligarh Muslim University a lo kai hlak, tuolthatna case 2 nei mek a nih.

Tripura CLP leader an ban
AGARTALA: West Bengal­a Congress le CPM an thangruol dit lovin Tripura Congress Legislative Party (CLP) leader Sudip Roy Barman chun zani hmasa khan CLP leader­a inthawk an banna lekha a pek. An banna hi Congress President Sonia Gandhi kuoma a thawn a nih. Tuta hma khan CPM leaders 25 zet hai chun West Bengal­a Congress le CPM an thangruol dodalnain inbanna an lo pek ta bawk.

Khawlum leia thi mi 110 chuong
HYDERABAD: Telangana le Andhra Pradesh haia chun khawlum tuorzo  naw leia thi mi 110 an chuong tah. Khawlum tuor lova thi hi Telangana­ah 66 le Andhra Pradesh­ah 45 an nih. Thi hai laia zatve deuthaw hi Mahabbnagar district a thi an ni a, a lum dan chu celcius degree 40 chuong a nih. AP­a YSR district Kadapa ah 16 an thi a, Prakasam dist. ah mi 11 an thi bawk.

Modi in William le Kate sunbu a fakpui ding
NEW DELHI: Britain Prince William le Kate Middleton (Duke le Duchess of  Cambridge) hai chu India ram an hung inzinna hmasatak dingin April 10, 2016 khin India ram an hung tlung ding a ni a, April 12, 2016 khin Prime Minister Narendra Modi chun anni puolin sunbu a buotsai ding niin External Affairs Ministry spokesperson Vikas Swarup chun a hril. William le Kate hai hi April 10, 2016 khin Mumbai khawpui hung vuonglut an tih. Mumbai hmuna hin lawmlutna hun hmang ning a ta, Shah Rukh Khan, Aamir Khan, Aishwarya Rai, Rishi Kapoor, Hrithik Roshan le Farhan Akhtar hai thangin bollywood stars tam takin uop an tih tiin British High Commission thusuok chun a hril.

LS Session April 25 a inthawk
NEW DELHI:  Lok Sabha session chu April 25, 2016 a inthawk  khin sunzawm nawk ning a ta, hi  Session hi May 13, 2016 chena nei ning a tih. Parliament Budget Session hi chawllailawk mek a nih.

JEE  Entrance­ah Class  XII marks bel ding
NEW DELHI: Human Resource Development (HRD) Ministry chun Engineering undergraduate courses –a dinga Joint Entrance Examination buotsai hlak le inzawmin pattern a sukdanglam. Hi dungzui hin JEE 2017 exam a inthawk chun Class XII marks chu JEE ranking­ah bel/en a nitanaw ding a nih. Tuta JEE exam pattern hmang meka chun JEE Main exam rangking­ah Class XII marks in marks 40 percent zet a phur a nih.

MP­ah Judges thar dingin 11  
JABALPUR: Madhya Pradesh High Court Judges thar dingin zanikhan mi 11 han Chief Justice AM Khanwilkar hmaah intiemkamna an nei. Hieng Judges thar 11 hai le hin MP High Court a chun Judges 40 an um tah.

Chun, zani hmasa khan Madras High Court­ah Judges dingin mi 6 in intiemkamna an nei. Madras High Court­a judges sanctioned post chu 75 a ni a, tuhin Judges 40 an um tah.

Military­a sum seng rawnah India 6­na
NEW DELHI: India ram chu khawvel rambung tum tum hai lai military tiengpanga sum hmang rawn tak 6­na a ni a, kum 2015 khan military­ah dollar 51.3 billion a hmang niin Stockholm International Peace Research Institute (SIPRI) report thar tak chun a hril. United States chun kum 2015 khan military­a a sum hmang 2.4 in sukhnuoi sienkhawm khawvel rambung tum tum hai laia military­a sum hmang rawn tak a la nizing a, kum 2015 khan military­ah dollar 596 billion a seng a, China, Saudi Arabia, Russia le UK han an dawt a, India 6­nain a thang a nih. China chun military­a a sum hmang 7.4 zetin a sukpung.

HP MLA­hai hlaw sukpung
SHIMLA: Himachal Pradesh state­a ministers le MLA hai hlaw chu 61­100 percent a sukpung a nih. Hi dungzui hi thla khatah Rs. 90,000 hlaw hak MLA han Rs. 1,45,000; Cabinet ministers 80,000 hlaw han Rs. 1,45,000; Speaker Rs.80,000 hlaw ni hlak chu Rs. 1,75,000; Dy. Speaker in Rs. 75,000 a hlaw hlak chu Rs. 1,70,000 le Chief Minister in Rs. 95,000 a hlaw hlak chu Rs. 1,90,000 an hung hlaw ta ding a nih. MLA hai hlaw sukgpungna ding Bill hi April 7, 2016 khan Himachal Pradesh Assembly­ah pasi a nih. MLA hai hlaw pung lei hin state sawrkar chun kum khatah Rs. 16 crore a seng belsa ding a nih. CM le Cabinet minister­hai travelling Advance allowance chu thla khatah Rs. 10,000 a inthawk Rs.25,000 a sukpung a ni a, MLA daily allowances Rs. 1,500 ni hlak chu Rs. 1,800; thla khta constituency allowance Rs. 60,000 ni hlak chu Rs. 90,000 le Office allowane Rs. 10,000 ni hlak chu Rs. 30,000 a sukpung a ni bawk.

Union Minister YS Chowdary manna ding warrant
HYDERABAD: Minister of state for Science and Technology le Telegu Desam Party leader, Rajya Sabha member nibawk YS Chowdary chu bank­a loan lak a rul naw leia Mauritius based Bank in complaint a siem leiin manna ding non­bailable warrant insuo khum a nih. Mr Chowdary hi zani hmasa khan a vawithumna dinga Court­a inlang dinga ko a ni a, sienkhawm Court hmaa a lan lang chuongnaw leia arrest warrant hi insuo khum a nih. Mauritius­based Hestia Holdings ah loans Rs. 100 crore a lak a, a thungkir naw leia complaint hi peklut a nih.

Dawry leia thina thuah MP man
GHAZIABAD: Mo thilsawm (dowry) leia an monu thi leiin BSP Rajya Sabha MP Narendra Kashyap, a nuhmei Devendri Devi le a naupa Sagar hai chu April 7, 2016 khan Police han an man. Sagar nuhmei Himani (29) chu dowry le inzawmin April 6, 2016 khan an ina insilna pidan sungah kap hlumsain hmu a nih. Sagar le a sunghai chun dowry in Fortuner SUV motor an ngen niin Himani pate Om Prakash chun Police ah hekna a siem a, chu le inzawma Police han case an registered hnunga an man an nih. Sagar le Himani hai hi kum 3 vel chau lan nei an n i a, naupasal kum khat mi an nei tah.

VAWISUN THUPUI
Kei chun an kuomah, “Sin  ropuitak ka thawh a, ka  hung thla thei nawh, ieng dingin am in kuoma ka hung thlak karin sin chu chawl el a ta?” tiin  mi ka tir a. Nehemia 6:3

Editorial: Inner Line Permit (ILP)

Manipur phairam bielah Inner Line Permit (ILP) chungchang hun iemanichen a re vang vang hnungin tulai hin  a hung inri thar nawk a. Manipur phairam biela ILP chungthua hma lo la hlaktu Joint Committee on Inner Line Permit System (JCILPS)  chun tuta hma meta inthawk khan hma an hung lak thar nawk a. JCILPS hmalak tharna lei hin Central le State sawrkar hnuoia project le scheme thenkhat hnuoia sin thawa um mek hai chu sukchawl pha a hung ni ta a nih. JCILPS hmalakna lei hin ei state a development sin thawna chun a thawhla tan a, a la thawhla pei ding niin an lang. Ei state sawrkar hlak chun tulai tak hin JCILPS hmalakna hi a ngaitha deu niin an lang. Hi thil hi ei state sawrkar (ministry) buoi lei a ni el thei.

Central le state project le scheme tum tum hnuoia sin thawtu (contractor) hai hi a tlangpuiin Vai ram tienga company lien hai an ni deu fur a. Project sin thawnaa sin thawtu le inhlawfahai (labours) hi Manipur state puotieng mi contractors han an ruoiin an hmang deu seng leiin migrant workers tia hril hai hi ei state sungah an tam pha a nih. Project chi tum tum haia contractor­hai hin state dang mi ruoi ngainaw hai sienla chu migrant workers chungchanga hin harsatna um naw nih. Hieng a ni lei hin state dang mi inhlawfa a hmang lo dinga contractor­hai thunun thei an ni hun huna migrant worker­hai hnawksak um a ngaina hi a hung re thei chau ring a um.

Manipur­ah inhlawfa (labour) ding hi tam tak an umin ei ngai a, sienkhawm contractors han iengleia state dang mihai kher kher labour dinga an ruoi nuom am ti hi ngaituo ve a ngaiin an lang. Tuolsung mi labour dinga contractors han an ruoi nuom nawna san hi chi tum tum um ngei a tih. Chu hai laia thenkhat chu, hlaw ei phut sang lem lei, ei taima tawknaw lei, sin ei thiem tawknaw lei, ei kut them a mam naw lei, ei kutsuok a nghet naw lei, ei sin thawna haiah ei ringum tawknaw lei. Contractor­hai mittlung zawnga ei um ngainaw lei, ei sin thawna haiah discipline ei nei tha naw lei, thuawi harsa ei ti lei, mi hnuoia intuklut ei pei naw lei le thiem tawk naw lei dam an ni el thei. Hieng a ni lei hin tuolsung mi, inhlawfahai khawm ei um dan le ei sin thaw dan haiah ei inennawn a, contractor hai mit la thei khawpa ei um a tul ve a nih. Thabo si, inhlem thiem le mi ringum nawhai ta ding chun inhlawna ding hi  a umnaw ding a nih.

Inner Line Permit (ILP) or Inner Line Regulation (ILR) ei ti el, The Bengal Eastern Frontier (Regulation 5 of 1873) hi British awpna hnuoia ei um lai November 1, 1873 a inthawka hmang tan a ni a. A tir chun Bengal khawsak ramri hrul hieng Kamrup, Darrang, Nowgong, Sibsagar, Cachar le Chittagong Hills haia cheng hnam chimral el thei dinga an ngaihai venghimna ding dam, British sawrkar sumdawngna sukbuoi  thei ding dangna ding dam, Zamindars han NE biela cheng hnam tlawm le mawl lem hai, a bikin tlangmi hnam hai chim rala an  um el nawna dinga siem le hmanga lo um hlak a nih. British­hai kha an suol, an tha nawh ti de hlak inlakhawm ei ta dinga an thatna tam tak a lo  um ve tho a nih. Hnam tlawm lem le hnam hnufuol, tlangmi (tribal) hai hmakhuo ding kha lo ngaituo sei ve takel, tuchena NE biela tribal state thenkhatin an dan siem hi an la hmang tangkai em em el a nih.

Manipur a ngei khawm hi dan hi hmang a lo ni hlak. Amiruokchu, ei rama sawrkar lo chel hmasatuhai le ei ram thuoitu hmasahai hmathlir a lo sei naw lei le an lo ngaituo chieng chet chet naw leia hi dan hi ei state a inthawka hlipa lo um a nih. Sienkhawm a khawhnung le an hnuk hnungah hi dan that zie thangthar han ei hung hriet thar nawk a, ei state a ngei khawm ILP hi hmang sunzawm nawk dinga ei ngen tlut tlut el a hung ni nawk ta a nih.

India hmarsak biel sunga Arunachal Pradesh, Mizoram le Nagaland state haia chun hi dan hi hmang a la ni a, an hmang tangkai hle. Hieng s tate haia hin Inner Line Regulation/Permit hi khau takin an la hmang zing a, a ram leilung mi ni lo, state dang mihai hi state haia inhlawfaa va um ding annawleh va sumdawng dinghai chun um theina permit an nei ngei ngei a la tul. India mi khawm nisienla tlangmi (tirbal) an ninaw chun an suizui a, permit nei lo hai chu an state a inthawk an thawndawk el a nih. Hi dan hi Arunachal Pradesh state a lem chu a la khau zuol a, an ram an humhim hne hle ring a um. Manipur le Meghalaya chun ILP hi hmang sunzawm nawk dingin an ngen a, iem an la hung ang ding chu?

Post a Comment

Powered by Blogger.