MTMRCC in lampui siemna report an pek
CCPUR: Bills 3 hai dodalna le inzawma JAC indina um hnuoia lampui siemthatna sin thawtu dinga indin Manipur Tribal Movement Road Construction Committee (MTMRCC) chun zani zantieng khan ZOLLs Office, N. Lamka hmunah Sinzawl le Tuivai inkar lampui siemthatna sin thawna fe mek report an pek a, machine hmang man inhlanna an nei nghal bawk.


MTMRCC Chairman, G. Nengdouthang chun, mimal, kohran, pawl le mi inphal hai sum thawlawm hai hmangin Sinzawl –Tuivai  leilak inkar lampui siemthatna sin ni 30 chuong thaw a nita thu a hril a. Lampui siemthatna sin fe mek hi a laklaw hle leiin mimal le pawl tin hai chu MTMRCC hmalakna thlawp pei dingin a ngen. Work in­charge Thathang Langel chun, ruosur leiin lampuia lung sungna sin la sukchawl phawt a ni leiin Tripper le Truck hai  leh in hung inlawi phawt a ni a, sienkhawm JCB hmanga  side drain chona sin chu sunzawm zing a nih tiin a hril.

Fin. Secy.  Thangkhanlun Samte chun, mimal le pawl tum tuma inthawk sum Rs. 12,04,529/­ hmu a ni a, hi laia Rs. 11, 82, 395/­ hmang a nita a, tuhin kutah Rs. 22,134/­ a la um tiin report a pekna huna a hril.

An thawktu chanpui pension hai an inthla
CCPUR: Horticulture and Soil Conservation dept. chun Francis Zou, AH/HQ le Samjai Singh, AO hai irnawinain February 29, 2016­a an sina inthawka pension an thawktu chanpui 6 hai inthlana zanikhan an nei. Pension an inthla hai chu­ H.Singkhum ,AO (Sc); S. Khamdonang, UDC; Lalhmangai,Soil Surveyor;H Paukhanmang Guite, Peon; T.Chingouthang, Chainman le Ch. Narendra Singh, Jr.SMS hai an ni a, ngaihlutna le inthlanain Belpui pakhat seng an pek.


Tribe leaders han inpawlpuina an nei ding
CCPUR: Thadou Cultural Festival, hmangpui dinga hung inzin ding MNF Vice President Pu R. Tlanghmingthanga; General Secretary Pu James D. Ralte le Secretary Pu David R. Malsawmthanga hai chu April 8, 2016, 2:00PM khin Tribe Leaders han MPC Hqrts Office, Hmuia Veng­ah inpawlpuina nei an tih.

BJP in foundation day an hmang
CCPUR: BJP 58­CCPur (ST) Mandal, Manipur huoihawtnain zani zantieng 1:00PM khan V. Hangkhanlian Campus, Zenhang Lamka­ah 37th BJP Founding Day hmang a nih. Hi huna hin   K. Vungzalian, President, CCpur District, BJP in Candle sitvarna a nei a, V. Hangkhanlian, Ex. Minister & BJP State Executive Member,District­in­charge, CCPur bakah H. Khaisei, Member BJP State Exe Member le K. Vungzalian, Ex Miniser & President, BJP CCpur District han thuhrilna hun an hmang. Thangneikhum, President, BJP 58 CCPur (ST) Mandal in vote of thanks hrilin Niangdeiching, CCPur Mandal Mahilla Committee in tawngtainain hun a khar.

BJP 36th Foundation Day hmang; Prahlad Patel khuollienin a thang
IMPHAL: Zanikhan Manipur hmun tum tum haiah BJP 36th Foundation Day hmang a nih. Manipur State a dinga hi day hmangna pui tak chu BJP Manipur Pradesh Head Office, Nityaipat Chuthek, Keisampat, Imphal hmuna hmang a ni a, BJP Manipur State in­charge Prahlad Patel khuollienin a thang a, BJP hung piengsuok dan le indin hun hai a hril. Kum 1952 khan Janna Sangha indin a ni a, sienkhawm kum 1977 khan Janna Sangha chu Janata Party­ah an let (merged) a, sienkhawm ngaidan le ditdan a hung inang theinaw leiin April 6, 1980 khan BJP hi indin tana hung um a nih tiin a hril. Congress Party rorel dan an diknaw leiin mipuiin an ditnaw a, inthlakthlengna an hung dit a, Congress party ni lo, party dang ringzo le innghatnatlak umin an hriet bawk si naw leiin mi tam lemin BJP an hung zawm ta a nih tiin Prahlad Patel chun a hril.

Hi huna BJP Manipur Pradesh President Th. Chaoba in thu a hrilnaa chun, fakrukna le hlepruknaa sip Congress sawrkar a zung puma pei theitu ding chu BJP hi a ni leiin mipui han BJP a lut chu lampui indik niin an hriet a, BJP an zawm sup sup a, tuhin member vaibelsie 10 lai zet a nei ta a nih. BJP policy le programme hai a tha a, mihai a hip a nih. Mirethei le nuhmeihai ta dinga um party a ni bawk tiin a hril. Manipur­a Assembly Election hung  um dinga khawm hrat tak nina changin Manipur­a khawm BJP in sawrkarna siemin an rorelna khawl an hung chel ding a nih tiin Th. Chaoba chun a hril bawk.

Ruo le thlipui nasa tak
IMPHAL: Mizoram, Manipur, Nagaland le Tripura haiah ruo le thlipui nasa takin a hung sur le hrang ding niin ICAR Complex, Lamphelpat thusuok chun a hril. Thlise (Cyclone) khawm a um el thei a, ruo le thlipui nasat zuolna ding hi Imphal area, Senapati le Ukhrul District hai niin an hril. Hi lei hin tuta inthawk ni 2 vel sung chu mipuihai fimkhura lo inveng a, insung le hmun himna haia um dingin ICAR Compex, Lamphelpat chun thurawn a siem.

Manipur nunghak suollui nia hril
IMPHAL/NEW DELHI: March 30, 2016 zan khan Manipur nunghak, kum 22 mi chu Panchsheel Vihar ah Nigeria mi pasal pakhatin a suollui nia hril a nih. Hi thu le inzawm hin Malviya Nagar Police Station­ah complaint siem le peklut a nih. Suolluia um nunghak hi a ruolhai Mizoram mi 3 hai le birthday party­a an fenaa hi thil hi a tuok niin ei thu dawngna chun a hril. March 31, 2016, 10:30AM­11PM inkar sung khan Zurui pakhat, an in hluotu naupa nia inhril chun Vasant Kunj, South Delhi­a an In hluo hai (Manipur mi tho) insungah a va lut a, tawngbau tha lo le Chinky, Manipuri etc. tihai hmangin a va tawng khum niin ei thu dawngna dang pakhat chun a hril bawk.

IMC ina bomb dengtu MPA team
IMPHAL: April 5, 2016 zan dar 9 vela Imphal Municipal Council (IMC) Chairperson Aribam Nimai Sharma chengna ina bomb dengpuoktu chu United National Liberation Front (UNLF) hnuoia armed wing Manipur People’s Army (MPA) team an ni a, bomb dengpuoktu hai chu dam le him takin hmun himna hmun an tlung ta a, bomb dengpuoktu nia intuma mi 2 mipuiin an man hai kha UNLF/MPA leh inlaichinna iengkhawm an neinaw thu zanita director M Sak­hen department of Publicity thusuok chun a hril. IMC hmingin sum tam tak a khawndawk a, a khawndawk zat puonglang dinga ti a ni hnung khawma a puong naw leia vaunaa bomb kha sukpuok a nih tiin UNLF thu suok chun a hril.

JCILPS in an hmalakna an sunzawm pei
IMPHAL: Joint Committee on Inner Line Permit System (JCILPS) chun dan lova Manipur a um hai zawngsuokna sin an sunzawm pei a, zanikhan NIT, Langol construction site­ah Women Wing le Students’ Wing han migrant workers  zawngsuokna sin an thaw. Sinthawtu tam tak hai chun document nei de hai sienkhawm Manipur Labour department in a pek document nei tukhawm an um naw niin JCILPS a Asst. Convenor (Org) Hayatur Rehman Yengkhaibam chun a hril.

NE Asian Business Summit
IMPHAL: Ni 3 sung aw ding North East Asia Business Summit chu vawisun hin City Convention Centre, Imphal­ah tan ning a tih. Hi inkhawmpui hi Union Minister of State for Development of North Eastern Region (Independent Charge) in khuollien ni pumin hawng a tih. Hi inkhawmpuia hin Thailand, Vietnam, Philippines, Laos, Brunei etc haia intahwk khawmin palai an hung thang tawl ding nia hril a nih.

Rajasthan­ah Zu thalo dawn leiin mi 7 an thi
JAIPUR: Rajasthan­a chun BSF jawan 2 thangin Zu thalo dawn leiin mi 7 in thina an tuok bakah midang 22 hai chu an damnaw leiin Jodhpur le Barmer Hospital haia enkawl mek an nih. State sawrkar chun Zu thalo dawn leia thi sungkuo hai kuomah Rs. 75,000/­ seng pek dingin a puong a.  Hi thil tlung lei hin Police officials le excise officials 7 hai chu sawrkarin an sina inthawk a suspended. Excise Dept. chun Jaiselmer district­a Jhinjhinyali village­ah Zu thalo drums 7 sip zet an man bawk a, tuchena hin mi 1 man a ni ta bawk.

Assam­ah election campaign ngawr taka thaw mek
GUWAHATI: April 11, 2016 nia Assam­a Assembly Constituencies 61 haia second phase election hung um ding le inzawmin Political party tum tum hai chun vote zawngna sin ngawr takin an thaw mek a. AGP President Atul Bora le BJP leader Himanta Biswa Sarma hai chun zanikhan Batodrowa hmuna election campaign an nei. Congress leader le Assam CM Tarun Goboi, Union Ministers Nitin Gadkari, Mukhtar Abbas Naqvi le Smriti Irani hai khawmin Lower Assam hmun tum tumah campaign an nei a;State BJP Chief Sarbanand Sonowal le AIUDF President Badruddin Ajmal hai khawmin campaign nasa takin an nei mek. PM hlui le Congress leader Dr Manmohan Singh khawmin zani zantieng khan Congress candidate hai ta dingin vote campaign a nei.

POTA Court in mi 3 damsung intang dingin
MUMBAI: December 2002 le March 2003 haia Mumbai Central Railway station, Vile Parle le Mulund hmun haia bomb pathum suokpuok a ni le inzawma inrawlna neia intum mi 10 hai laia 3 hai chu Special Prevention of Terrorism Act (POTA) Judge PR Deshmukh chun zanikhan damsung lungin intang dingin an chungthu a rel a, 4 hai chu kum 10 intang ding le 3 hai chu kum 2 sung jail intang dinga rel an nih. Bomb puok haia khan mi 12 an thi bakah pawitawklo mi 130 velin hliemna an tuok a, thenkhat ruolban loin a siem pha a nih.

MHA in Bihar le Jharkhand officials hai
GAYA: Ministry of Home Affairs chun Left Wing Extremist hai chetna le tukdawl dan ding thuah zanikhan Bihar le Jharkhand state haia senior civil le police officials hai meeting a neipui.  Meeting hi Union Home Ministry­a Additional Secretary Jaideep Govin inrawinaa nei a ni a, Bihar le Jharkhand IG (Operations) Sushil M. Khopde, MHA Director Dipak Kumar Kedia, Bihar Spl Secretary, Home Dept., Jharkhand ADG (Operations) S. Pradhan, Magadh Division Commission hai khawm an thang.

Terrorist hai India khawpui haia chet an tum
NEW  DELHI: Intelligence report dungzuiin India ram khawpui tum tum haia chet dingin terrorist 4 India rama an hung lut niin a hril a, a bik takin Delhi, Mumbai le Goa hmun haia  chet an tum el thei niin report chun a hril. Hi le inzawm hin sawrkar thlungpui chun security tiengpang sukkhau dingin an hriettir. Intelligence report in a hril danin tulai hnai khan ralthuom tha tak tak chawi terrorist 4 hai chu Jammu and Kashmir­a inthawk India ram an hung lut niin a hril.

IPS Officer kum 2 sung leave la loin
AHMEDABAD: Kum 2011 batch IPS Officer Abhishek Kumar Singh, Jugagarh hmuna posting chu leave (chawl) la loin kum 2 sung zet a sin thaw loin a um. Singh hi Engineering­a Master degree nei niin kum 2014, Junagarh hmuna ASP sin thaw dinga ruot a ni a, sienkhawm ASP dinga ruot a ni a inthawk hin an hmang dai a. Enfel dinga Police team tir han Patna­a a chengnainah an va hmu a nih. Iengleia sin thaw lova hieng chen chen um am ti hriet a ninaw a, hrilfiena ienkhawm a la siem naw bawk. Police team hi a chengna in khawm an luttir naw a; a sin a zawm naw chun a sin a chan sawng el ding a ni thu hril a ni 15 zet an um chil hnungin a sin zawm dingin an thlemthluk hram.

NIT campus­ah student hai lai buoina a suok
SRINAGAR: Kar hmasaa T20 Cricket World Cup­a India cricket team hneban an nina thuah NIT Srinagar a chun student hai inkara buoina le inbeituona a tlung a, thil umdan enfel dingin member 2 umna Central team chu zanikhan Srinagar an tlung. NIT, Srinagar­a non­local student thenkhat chun India cricket team hneban an nina le inzawm khan tuolsung mi student thenkhat an sawisak a, chu taka inthawka buoina hi hung suok nia hril a nih.

A nauhai 3 a that hnungin ama le ama an that
NARBARANGPUR: Odisha­a Narbarangpur district­a chun Dalit nupui Kumari chun a nauhai 3 Tûr­a a vaihlum hnungin an chengna in meia rawin ama khawm tur dawnin an that. Hi thil hi zani hmasa zana kha tlung a ni a, insung khawsakna harsat leia hi thil hi a thaw ni dinga ring a nih. Tûra a vai hlum a nau hai chu Parvati (7), Reena (4) le kum 1 le a chanve mi Nilu hai an nih. An thenum khawveng han an ina inthawk meikhu suok hmua an enfel huna hi thil hi hrietsuoka um a nih. Hi thil tlung huna hin a pasal Dhaniram Harijan chu Baster district, Chhattisgarh­a inhlawfa sin thawa um a nih.

L.K. Advani nuhmei lungphu chawlin a thi
NEW DELHI: Veteran BJP leader L.K. Advani nuhmei Kamla Advani chu kum 83 mi niin zanikhan All India Institute of Medical Sciences (AIIMS), New Delhi­ah lungphu chawl in a thi. Ms Kamla Advani hi taksa chau leia hun iemanichena inthawka kha wheelchair­a inthung ta a ni a, thuok harsa a ti leiin AIIMS panpui a ni a, sienkhawm Doctor han san thei ta lovin a thi a nih.


VAWISUN THUPUI
Pathien chu khel inhlip mihriem el a ni nawh, Inkir hmang mihriem naupa a ni bawk nawh a, A hril ta chu a thaw naw ding am a nih? A lo hril ta chu a sukpuitling naw ding am a nih?  Nambar 23:19

EDITORIAL: Campaign hlain Bills 3 hai

O.Ibobi Singh Chief Minister nina hnuoia Manipur Congress Ministry buoi leiin CM, Dy. CM, MPCC President le Dissident MLA thenkhat New Delhi ah um hai sienkhawm Joint Action Committee on Inner Line Permit System (JCILPS) pawl chun an hmalakna chawlsan lovin hma an lak zing a. Migrant workers tia an ko hai chu mi zakhat chuong zet manin Police kutah an inhlan ta a. Ministry buoina chingfelin hung re sienkhawm sawrkar ta ding chun JCILPS hmalakna hi buoipui tham a hung ni ngei ring a um. Manipur a pawl tum tum um hai laia chun JCILPS hi a hrat pawl tak a ni leiin state sawrkar ta ding chun buoipui tham a hung tling ding niin an lang. Tu khawm hin JCILPS hmalakna leiin Imphal khawpui le a se vela Central Projects thenkhat chu sin thaw thei lova khar an hung ni tah. JCILPS hmalakna hi a tawp el cnaw ding niin an lang.

JCILPS hmalakna le inzawma Manipur Assembly in Bills pathum a passed hai hlak chu President in pawmpui annawleh suoi thaw lovin a kutah a la sie hri a. Hieng Bills pathum hai hi a kaltu um naw ni inla chu President hin pawmin suoi a thaw ta ngei ring a um. JCILPS chun hieng bill­hai hi pawm le President in suoi a thaw a, dan (Act) a hung ni ngei theina dingin state sawrkar le sawrkar thlungpui an ngen le nuorna chu an hung bei nawk nasa ngei ding niin an lang. Hieng a ni lei hin hieng Bills 3 kaltuhai ta ding khawmin tosan el ding chi niin an lang nawh. Tosan a ni vai chun JCILPS hmalakna hi hlawtling naw nih ti thei ding chi niin an lang nawh.

Manipur Assembly Election hun nawk ding hlak chu a hnai deu deu. Assembly Election nawka chun Manipur Assembly in Bills 3 a pasi tahai hi Political party tum tum hai chun Election campaign hla tak pakhata an hung hmang ring a um. Party thenkhat lem chun hi chungthu hi an election manifesto ah an inthangsatir el thei. Manipur phairama vote hmu tamna ding chun JCILPS hmalakna hi thlawp a hung tul ding an leiin ngaipawimaw a hung hlaw ngei ring a um. JCILPS khawmin Election hi an thil ngen nawrna hmangruo pawimaw taka an hung hmang ngei ring a um. Hieng laizing hin Manipur tlangram biel haia chun JCILPS hmalakna hin thlawp a hlaw ring a um nawh. Hieng a ni lei hin Assembly Election huna hin Bills 3 hai hi political party tum tum hai ta ding chun harsatna a hung intlun pha ring a um.

Tuta hma a election hun haia khan chu Armed Forces Special Power Act (AFSPA) chungthu dam, Water Supply, Electricity, lampui le leilak siem that ding thu hai dam Political party tum tum han an election manifesto ah an inchuon sa  hlak a. Ei hmaa Assembly election hung  um dinga ruok hin chu Bills 3 chungchang, JCILPS le JAC Against Anti­Tribal Bills chungchang han vote hmu  theina dingin ngaisak an hung hlaw ngei ring a um. Hieng a ni lei hin a tu pawl ta ding khawma ei hmaa Assembly Election hung um ding hi chu kum danga Assembly Election hai nek chun a hung pawimaw hle ding a nih. Hi hun tha hung inhawng ding hi Bills 3 dit lo le dodal pawl hai ta ding khawma nasa taka hmalak hun ning a tih. Hi thila ding hin inthuruolna ei pawimaw hle ding a nih.

Mizorama chun Congress party in New Land Use Policy (NLUP) an hmang tangkai a, Assembly Election nuhnung taka khawm khan hrat phanain an  hmang a nih ti inla ei hril suol  taluo ring a um nawh. Hiengang bawk hin Bills pathum chungthu, JCILPS le JAC Against Anti­Tribal Bills hai hi politicians le political party tum tum han hmang tangkai an hung tum ngei ring a um. Hi lei hin Bills 3 kaltu pawl le Tribal mipuihai ei fimkhur a, thiem taka election huna hin hma ei laktlang nuom a um. A var le a thiem thiem han election hung um ding hi an hmang tangkai el ding niin ana lang.

Manipur Assembly election nawk ding hun hi a hnai ta a, inthlang huna ngir dinghai, political party tum tum le a ram mipuihai khawm inthlang boruokah ei um mek ta niin an lang. Candidate le political party tum tum hai chun an election tactic chi hran hran hai hmangin hma an hung lak ngei ding a ni a. Hi kawnga hin mipui han hmalak dan ding tha tak ei lo induonglawk ve thil tha a ni ring a um. Tu party am annawleh tu candidate am sawrkarna siem dinga tha ning a ta tiah hin mipui han ei sie le tha hrietna thienghlim le tha tak senga ei ngaituo a pawimaw hle a nih. Tuhai amani hril lei ni lova, mani sengin ngaituoin thlir chieng ve a, huoisen taka mani thutlukna hi ei fepui ngam a hun ta a nih.

Post a Comment

Powered by Blogger.