MGNREGS ni 7 sin thawna ding 
CCPUR: State sawrkar chun March 31, 2016, 10PM vel khn MGNREGS 2015­16, 4th Phase hnuoia ni 7 sin thawna ding sum a hung sanctioned. Hi le inzawm hin zani hmasa zan ma khan DRDA staff han SDO/BDO hai Account­ah an thunlut nghal. Churachandpur District­a Block 10 haia Job Card sin thawna ding sum sanction­a um hai chu­ Tipaimukh Block­ah khuo 18; Singngat Block­ah khuo 96; Saikawt Block­ah khuo 42;  Tuibuong Block­ah khuo 183; Vangai Block­ah khuo 35; Thanlon Block­ah khuio 64; Lamka Block­ah khuo 60; Sangaikot Block­ah khuo 104; Samulamlan Blockah khuo 111 le Henglep Block­ah khuo 169 an nih.

MGNREGS 2015­16 sung khan Job Card holder han ni 20 sin an thaw a, an nikhat hlaw Rs. 190 a nih. Kum 2016­17 a chun Job Card nikhat hlaw Rs. 197/­ a nita ding a nih.

Bomb dengpuokna thuah FIR registered
CCPUR: March 31, 2016 zan dar 7 vela tu ti hrietlo han Khumujamba­a H. Momocha Singh s/o H. Hoidong Singh chengna inah Hand Grenade dengpuok a nina le inzawm khan CCPur Police han FIR No.18 (3) 2016 CCP­PS U/S 307/427/34 IPC & 3 of explosive Substance Act an registered bakah hi zan ma dar 7:10 vela N. Abung Singh s/o (L) H. Khelemla Singh of Khumujamba chengnain compound sunga China siem Hand Grenade denglut (puok lo) le inzawmin FIR No. 19 (3) 2016 CCP­PS U/S 307/34 IPC & 4 Explosive Substance Act an registered bawk. Khumujamba­a bomb dengpuok le grenade denglut na thua hin tu pawl khawma anni thaw a ni thu an la puong nawh.

A hun taka zofel dingin an hrietir
CCPUR: Manipur sawrkarin April 10, 2016 a inthawk National Food Security Act. (NFSA) hawng hman a tum a. Hi huntlung hma ngeiin Rationing Agent hai chu NSFA thawna ding le inzawma thil tul hai Office­a sukfel le zo dingin DSO, CCPur chun an hriettir. Hi hun tlung hmaa thil tul hai zo fel lo Rationing Agent an lo um a, quota rice pekdawk an ninaw chun Office in mawphur naw nih tiin  thusuok chun a hril.

TCS 14th Convocation service
CCPUR: Trinity College and Seminary (TCS), Sielmat, CCPur chun April 2, 2016, 11:00AM hin Rev Chawnga Memorial Chapel, Sielmat, CCPur hmuna 14th Convocation Service hmang an tih. Hi huna hin Rev. John L. Pudaite, PResident, TCS in Degrees inhlanna nei a ta, Rev. Dr J. Huoplien Neitham, Moderator, EFCI in awards semna nei a ta, Mr Thanglura Darlong, IFS, Officer on Special Duty, South Asian University, New Delhi in Convocation address nei a ta, Dr Mawii Pudaite, Co­Founder, BFTW in graduates hai ta dinga tawngtaipekna nei a tih. Diploma in Theology graduates 8, Bachelor of theology 16, Master of Divinity (M.Div) 19 hai degrees inhlan ning an tih.

Oral test la thaw nawk ding
CCPUR: March 22, 2016 nia Entrepreneurship Trainees hai ta dinga Oral test nei huna bandh leia thang thei lo hai ta dingin April 5, 2016, 11AM­2:00PM inkar sung khin District Industries (DIC), Tuibuong, CCPur­ah Oral test buotsai nawk ning a tih. Hi huna hin Oral test­a thanglo hai chu kim taka thang seng dingin Supervisoer, DIC, CCPur chun inhriettirna a siem. Chun, Trainees le Master Trainers hai chu April 7, 2016 nia MFCL huoihawtnaa Lambui Khongnangkhong, Uripok, Kangchup Road, Imphal hmuna Skill Fair (Kausal Mela) um dinga thang seng dinga fiel le ngen an ni bawk.

Gun license Data Entry khar
CCPUR: Ministry of Home Affairs, Govt. of India hnuoia National Database of Arms License (NDAL) thupek dungzuia DC Office­a CCPur district sunga License silai hai data entry thaw theina hun chu March 31, 2016 khan a tawp ta a, hi le inzawm hin DC Office chun data entry hi zani hmasa zan dar 12:00 chen khan thawin an zo hman a, NDAL thawna khawm khar nghal a nih. Hi hun sung hin DC Office Staff hai chun CCPur District­a Gun License  5000 chuong data  an thunlut hman.

Khuo tum tum sir dingin HI le HYA thuoituhai Hmarbiel­ah an cham mek
CCPUR:  Hmar Youth Association  GHQ inrawinaa  HPO Seminar le Consultative meeting Parbung hmuna thang dinga inzinsuok Hmar Inpui GHQ le HYA GHQ thuoituhai chu Hmarbiel­ah an cham mek.Hmarbiel­a inzinhai lai hin Hmar Inpui­a inthawk Pu Francis  Songate, Gen. Secy., Tv. LRS Puruolte, Jt. Secy.­cum­Secy. Inf. Le James Fimate (driver); HYA GHQ a inthawk Upa Laldawnlien Varte, Gen. President; Tv. Alan Famhoite, Info. Dept. Tv. Zawla Khawzal, Social Worker hai an thang.

An programme dungzui hin March 29, 2016 khan Damdiei, March 30, 2016 in Damdiei­ Parbung, March 30­31 sung Parbung­ah Seminar le Discussion; April 1, 2016 in Senvawn­Sipuikawn; April 2, 2016 in Lungthulien­Taithu; April 3 in Taithu­ Patpuihmun, Phulpui, Ngampabunga hun hmang an ta, Taithu­a inthawk Hmar Inpui thuoitu hai chu Tuithaphai hung kir an ta, HYA thuoitu hai ruok chun Vangai tieng panin April 5, 2016 in Thingkal­ah HYA Vangai Jt. Hqrts election neipui an ta, April 6 in Ankhasuo­Jiribam le April 7, 2016 in  HYA Imphal Jt. Hqrts sport an hung uop ding ti a nih.

Hmarbiel­a khaw tum tum hai sira program hmangpui dinga inzinsuok an ni a, khaw thenkhat an sir zo ta a, hlawtling taka hun an hmang theina dingin mipui hai tawngtainaa lo san dingin an ngen.

Parbung­a consultative meeting huna hin HYA President chun ‘Civil Rights’ ti thupui hmangin seminar paper a present.

Dy. CM in ministry sawidanglam ni lo dingin a hril;  
CM le MPCC President han New Delhi an pan ding
IMPHAL:  Manipur­a Congress sawrkar sunga buoina a um naw bakah Congress party sungah pawl hrana inthena a um nawh tiin Deputy Chief Minister Gaikhangam in zanita Imphal­a Chanchinbumihai an hmupui huna a hril. Chanchinbumi han zingah MPCC President T.N. Haokip New Delhi­a an zin dign hi ieng le inzawm am a na? tia indawnna an siemna dawnin, party fe dan pangngaia inzin ding an nih tiin a dawn. Manipur­a Congress sawrkar chun sin a thaw tha leiin mipui han an la ringzo a, Maipur Assembly Election hung um nawk dinga sawrkarna hung siem nawk an tih tiin Gaikhangam chun a hril.

Hieng laizing hin Manipur Chief Minister O.Ibobi Singh le MPCC President thar T.N. Haokip hai chun vawisun hin Imphal suoksanin New Delhi an pan ding niin ei thu dawngna chun a hril. Congress party sunga dissident MLAs han ministry sawidanglam dinga ngenna an siem chawlsan lova an la nawr zawm pei leia CM le MPCC President hai hi New Delhi inzin tum niin ei thu dawngna chun a hril bawk. Imphal Chanchinbu thenkhat chun April 10, 2016 vel chenah Manipur Ministry sawidanglam a ni ding le ding naw hriet theiin a hung um ding niin an zieklang. Manipur­a Congress MLA­hai lai a lungawinaw pawl (dissident group) an um el bakah MPCC President thar dinga T.N. Haokip ruot a nina thuah MPCC Vice President Dr Chaltonlien Amo khawm a lungawinaw a, CM kuomah MPCC Vice Preident a ninaa inthawka an banna lekha a pek nia hril a nih.

Ram inchu buoinaah mi 17 an hliem
IMPHAL: Zani zingkar dar 7 vel khan Chandel District sunga Mantri Pantha khawsungah khaw pahni, Lambung village le Mantri Pantha village mihai inkarah ram inchuna le inzawmin buoina a suok a, hi huna khaw pahnihai inkara inbeituona suokah mi 17 an hliem a, hliem hai laia 4 hai chu an hliem inrik hle nia hril a nih. Lambung Pantha khaw mi 150 vel chu Manti Pantha khu oah an va fe a, chu huna inbeituona hi tlung nia hril a nih. Lambung Pantha khaw mihai lai hin silai chawi khawm an um niin ei thu dawngna chun a hril. Hliem hai hi Shija Hospital panpui an nih.

Lambung Village le Pantha Village mipui hai inkara buoina suok le inzawm hin Chandel  District Administration, Robert Singh Khetrimayum chun hieng village pahni huop sung haia hin CrPC 144 a puong. CrPC puongna biel huop sunga hin mi 5 neka tam umbum phal a ninaw bakah hriemhrei le mi sukna thei thil hai chawi khap a nih.

KYKL cadre pakhat man
IMPHAL: 12­ Bihar of 9 Sector Assam Rifles chun March 31, 2016 khan Nambol Thongkhao, Bishnupur district­ah motor inlawn vel hai an dapnaah KYKL overground worker M. Victoriya Devi (45) w/o M. Loken Singh of Top Khongnangkhong Top Naoria, Imphal East an man a. a kuta intahwk China siem Hand Grenade 1, Mobile handset 2 le SIM Card le document thenkhat dapdawkin an man. Grenade hi Lemon Mobile phone handset bawm sunga a thupruk a nih. Nambol Police Station­ah an peklut. (PRO Assam Rifles)

RIMS MS quarter­ah bomb dengpuok
IMPHAL: Zani zan dar 7:10 vel khan RIMS Campus, Lamphelpat, Imphal West­a RIMS Medical Superintendent M. Amuba chengna quarter compuound sungah tu ti hrietlo han bomb an dengpuok. M. Amuba hospital duty in an lawi minutes 20­30 vela bomb hi dengpuok nia hril. Bomb puok leia thi le hliemna tuok an um thu hi thu ei sut chena hin hriet a ni naw a, Police han an enfel mek.

Mehbooba in April 4­ah CM dinga intiemkamna a nei ding
JAMMU: Jammu and Kashmir­a PDP President Ms Mehbooba Mufti (56) chun April 4, 2016 khin Raj Bhawan­ah an Governor N.N. Vohra hmaah Jammu and Kashmir Chief Minister 13­na dingin intiemkamna (oathtaking) a nei ding a nih. Ama le inruol hin a council of ministers ding hai khawmin intiemkamna an nei ding niin ei thu dawngna chun a hril. Ms Mehbooba Mufti hi Jammu and Kashmir nuhmei Chief Minister hmasa tak a ni ding a nih.

An thangruolpui BJP party leaders hai le Council of ministers ding hai an sukfel hnunga oathtaking nei hun ding hi sukfel a nih tiin ei thu dawngna chun a hril. Oathtaking huna hin Union Home Minister Rajnath Singh khawm thang ngei dinga beisei a nih.

January 7, 2016 nia PDP le BJP thangruol J&K sawrkar a CM ni lai Mufti Mohammad Sayeed thi leia sawrkar thar siemna ding kawnga hin inlungruolna a um el naw hnungah Governor Rule hnuoia sie a hung ni a; sienkhawm March 22, 2016 nia Ms Mehbooba in PM Narendra Modi New Delhi­a an hmupui zo hnunga inlungruolna hung um thei le sawrkar siem thei ding ngirhmuna hung um nawk an nih.

Vote campaign in a vawrtawp a tlung
GUWAHATI: April 4, 2016 a Assam State a 1st Phase Asembly election hung um dinga chun vote campaign in a vawrtawp a tlung tah. Assam CM ni lai mek Tarun Gogoi le Union Minister of Youth Affairs & Sports, Sarbananda Sonowal hai chu an inkhing a, zanikhan Jorhat district­a Majuli ah vote an campaign ve ve. Election hi April 4 & 11, 2016 haia nei ding a nih. Candidates 1064 an um a, hienghai lai hin nuhmei candidates 87 an um. Candidates tamna tak chu Karimganj South a ni a, candidates 25 an um.

NIA team Pakistan­ah an inzin ve ding
NEW DELHI: Pathankot airbase terrorist han an beina le inzawma Pakistan Joint Investigation   Team (JIT) India ramah hunga thil umdan an enfel hnungin zanikhan an kir nawk tah. National Investigation Agency (NIA) eam khawm Pathankot thil tlung zuizuinain Pakistan an inzin ve ding thu DG, NIA Sharat Kumar chun a hril a, an ni le hun ding ruok chu sukfel a la ni nawh tiin a hril.

EC in April 4 a inthawk Exit Poll a khap
NEW DELHI: Election Commission chun Assembly Election neina ding states haiah April 4, 2016, 7AM a inthawk May 16, 2016, 6:30PM chenah Exit Poll thaw a khap (ban). Hi hun sung hin Chanchinbu le electronic media haiah election le inzawm opinion poll/poll survey result hrim hrim insuo a khap a nih. April 4, 2016 a inthawk May 16, 2016 chen khin Assam, Kerala, Tamil Nadu, West Bengal le Puducherry haia chun phase hran hranin Assembly election an nei ding a nih.

Dual Citizenship thuah Rahul in dawnna a pek
NEW DELHI: Congress Vice President Rahul Gandhi chun Dual citizenship neia intumna thuah zanikhan Lok Sabha Ethics Committe kuomah dawnletna a pek. November, 2015 khan BJP leader Subramanian Swamy chun Rahul Gandhi hin US­a company indinna dingin British mi (citizenship) nina nei niin an sal tiin an tum a, hi thu hi Parliament Winter Session nuhnung taka khan BJP leader L.K. Advani inrawi panel chun dawnna pe dingin an ngen a, BJP MP Mahesh Giri in Lok Sabha Speaker Sumitra Mahajan kuomah hi chungthu hi Ethics Committee kuta pe dinga rawtna a siem anga Ethics Committee hrilfiena pe dinga Rahul hi an inhriettir a nih.

Rahul in dawnletna a peknaa chun, hi thil hi a hming suksiet tumna a ni thu, British mi nina a neinaw thu le a ngen bawknaw thu a zieklang niin ei thu dawngna chun a hril.

85% pictorial warning hmang tan
NEW DELHI: Sawrkar thlungpui chun Cigarettes and Other Tobacco Products (Packaging and Labelling) Amendment Rules, 2014 hnuoiah duma siem thil hriselna ta dinga a thatnawzie le Cancer intlun thei a nizie hrilhrietna Duma siem thil packets hnung le hma haia pictorial warning 85% a liena inchuon dingin inhriettirna an suo a. Hi thil hi April 1, 2016 a inthawk khan hmang tan a nih.

HC in hearing April 11 a nei dingin a sawn
NAINITAL:Uttarakhand­a Congress MLA hel 9 hai laia 6 han MLA a inthawk Speaker in anti­defection law hnuoia a disqualify na thua appeal an thaw le inzawma hearing chu April 11, 2016 a nei dingin Uttarakhand High Court in a sawn hla. MLA hel 9 hai laia 6 han appeal hi an pek lut a ni a, a hma chun zani (April1, 2016) a hearing nei dinga ti a ni a, hi thua hearing nei hun ding sawn hlata a um vawihnina a ni tah. A hmasa takin March 30, 2016 a nei ding ti a ni a, sienkhawm April 1, 2016 a nei dinga sawn hlat a ni hnungin tuhin a vawihnina dinga sawn hlat nawk a nih. Sawrkar thlungpuiin March 27, 2016 a Uttarakhand President Rule hnuoia a sie le inzawma Chief Minister Harish Rawat in sawrkar thlungpui a khinglet leiin Uttarakhand High Court chun Mr Rawat chu Assembly­ah majority a command zo le zonaw April 31, 2016 a inentir dingin an hriettir a, sienkhawm Supreme Court chun April 7, 2016 chena dingin a cheltang nawk a, hi thua hearing chu April 6, 2016 in nei a ni ding a nih.

Candidates hai lai Crorepatis 21%
NEW DELHI: Assam state chu India rama state pasie hai laia thang ve nisienkhawm Assembly Election hung um dinga candidates hai lai crorepati 122 (21) percent an um. First phase election­a candidates hai lai crorepati 56 an um a, chu hai laia a hausa tak chu Jyoti Subba w/o lottery barron Mani Kumar Subba niin Rs 288 crore anghu sum le rothil a nei a, Independent­a Sootea biela ngir a nih. A tlangpuiin candidates hai hausakna chu Rs. 2­5 crore an ni tawl a, candidates 119 hai hausakna chu Rs. 50 lakh­ 2 crore inkar a nih tiin Assam Election Watch  le Association for Democratic Reforms (ADR) report chun a hril. Chun, Rs.10 lakh le a hnuoitieng nei candidates 230 an um bawk.

India le Sri Lanka han MoU an ziek
COLOMBO: Sri Lanka rama development Assistance program hnuoia India sawrkarin Mullaithivu, North Sri Lanka hmuna Tamil Ngamantu hai kuoma Ngamanna lawng 150 le Ngamanna hmangruo 300 a pekna ding Sri Lanka le India sawrkar chun zani hmasa khan Colombo khawpuiah Memorandum of Understanding (MoU) an ziek. MoU a hin Indian High Commissioner Mr Y.K. Sinha le Ms Adikari, Secretary, Ministry of  Fisheries and Aquatic Resource Development han hming an ziek a, MoU ziekna hi Fisheries minister Mahinda Amaraweera khawmin a uop ve. Hi thila sum seng ding chu Rs. 5 crore a ni a, India chun tuta hma khan Mannar region­a Tamil Ngamantu hai kuomah Lawng 150 le Ngamanna hmangruo a lo pek ta a nih.

Suu Kyi in thuneina tamlem a nei theina ding Bill an passed
NAY PYI TAW: Zanikhan Myanmar Parliament (Upper) House chun NLD thuoitu Aung San Suu Kyi in parliament le sawrkarna kawnga thuneina tamlem a nei theina ding bill an passed. Opposition USDP chun hi bill hi nasa taka dodalin an sawisel a, sienkhawm NLD chu majority a ni mieu si leiin passed a ni a, Lower House­ah passed dinga thawn a ni ding a nih. Hi Bill dungzui hin Suu Kyi chu Special State Advisor a ruot a hung ni ding a ni a, Parliament­ah March 31, 2016 a kha putlut a nih. Special Advisor hi Prime Minister rank a nih. Suu Kyi  chun tuhin Foreign minister thangin chanvo (portfolio) 4 a chel mek a nih.

Chun, Myanmar sawrkarin Regions le States 13 haia dingin Regional Ministers for Ethnic Affairs 29 a ruot thar. Regions/States 13 lai hin Kachin, Kayah, Kayin, Saigaing, Taninthanyi, Babo, Magway, Mandalay, Mon, Rakhine, Yangon, Shan le Aayeywaddy hai an thangsa.

VAWISUN THUPUI
Mihriem ring nek chun Lalpaa ringna innghat hi a tha lem a nih. Lalhai ring nek chun Lalpaa ringna innghat hi a thalem a nih.  Sâm 118:8­9

Editorial: President Rule hnuoia sie rin naw nih

O.Ibobi Singh Chief Minister nina hnuoia Manipur a Congress Ministry buoina chun re nekin zuol tieng a pan pei niin an lang. Congress dissident MLA­hai chau ni ta lovin minister ni lai mek le chanvo dang chel MLA­hai khawm an lungawinaw tan ve ta ti chanchinbu tiemtuhai chun ei hriet seng ring a um. MPCC President thara T.N. Haokip ruot a nina thuah MPCC Vice Presideent Dr Chaltonlien chu lungawi lovin MPCC Vice President a ninaa inthawk an banna lekha CM kuomah a pek bakah tuta ministry a minister 12 um hai laia minister 10 hai chun an ruolhai pakhat ban a ni khawma lungawi lovin a ruola an inban seng ding thu an hung hril haia inthawk hin Manipur­a Congress ministry buoina chun zuol tieng a pan pei a nih ti chieng takin a suklang. CM O.Ibobi Singh ta ding chun luhai um takel a hung ni tah. CM ta ding chun hieng pawl pahnihai thil ngen hi ngaitha thei lo ding ve ve a ni leiin hi harsatna chingfel hi CM ta ding chun thil harsa takel a ni a,Congress High Command thurawn a lak a hung tul nawk ngei ding niin an lang.

March 30, 2016 zantieng dar 3 khan Revenue Minister Th. Devendra Singh office­ah minister ruol an meeting a, hi meeting a hin Phungzathang Tonsing, M.Okendro, Govindas Konthoujam, Ngamthang Haokip, Francis Ngajokpa le Dr Kh. Ratankumar hai an thang a, A.K. Mirabhai Devi, I. Hemochandra le Md. Abdul Nasir hai ruok chu Impahl­ah an um naw leiin an thang thei naw a. Amiruokchu, hi huna minister tam lem um hai thutlukna chu an thlawp ve ngei ding thu phone hmangin an hril. Hi meeting a thng hai chun dissident MLA­hai ngenna anga an minister chanpui pakhat ban a ni khawma an rengin minister an nina haia intahwk inban dingin lungruol takin thutlukna an siem ti a nih. A khaw hnung deuvah Dy. CM le Home Minister  Gaikhangam khawm hi meeting a hin a va thang ve nia hril a ni bawk.

Hieng laizing hin March 30, 2016 zantieng dar 4 khan disident MLA han CM O.Ibobi Singh an van hmupui a. MPCC President thar dinga T.N. Haokip ruota a umna chu lawmum le lungawi thlak an ti thu le ministry sawidanglam ngei dingin an ngen nawn nawk. Ministry sawisanglam huna hin CM le Dy. CM thang lovin tuta minister ni lai mek 10 le  Speaker hai chu ban  a, minister ni lo 10 hai chu minister a ruot ding le minister chanvo chang ding hai  chu party in a ruot ruot chu lawm taka an pawm thei ding thu an hril. Congress dissident pawl hi an rengin MLAs 23 an ni a, hienghai lai hin minister chanvo la chel ngai der lo 6 an um a hril a nih. Dissident MLA­hai thu hril le ngenna siem hai hi CM chun tha takin a lo ngai a, thiem takin a lo indawrpui nia hril a nih.

Minister le dissent MLA­hai hmalak dan hi ei en le ngaituo chet chen chun ram le mipui hmakhuo ngaina chu niin an lang nawh. An mimal hmakhuo ding chau ngai tuo an nina lai a um. Manipur Asembly Election hun nawk ding a hnai ta a, chu huna an hmakhuo ding, thlangtlinga an um nawk thei dan ding lampui, thuneina, sum le pai zawng le ditna lei bakah hamthatna ding beiseia hma la tawl an nih ti inla ei hril suol taluo ring a um nawh. An thil thaw hi mipui tiengpang thatpui bek bek ding umin ana lang naw bakah an umna party ta ding khawma hratna nekin an sietpui lem ding niin an lang. Ram le hnam, an party le mipui hmangai tak tak nihai sienla chu a zangai thei an um ngei ring a um. Zangai thei bik an um naw chun an sawrkar sunga buoina, dit dan le ngaidan inangnawna hi an la hung siet pha el thei ding niin an lang.

Dissident pawl thil ngen khawm hi state danga mihai leh an inang nawh. State danga Congress MLA hai chun leadership thlakthlenga sawrkar thar le thuoitu thar an ngen a, Manipur a mihai ruok chun leadership thlakthleng ding thu, CM le minister ni lai mek hai tlingnawna le that nawna, ban an ni theina ding san awm an hrillang naw hi a mak khawp el. Party hratna ding le sawrkar siemthatna ding tiengpang nekin an mimal hamthatna ding tiengpang a kawk lem niin an lang. Hi leia Congress High Command khawma an thil ngen hi a ngaitha deu khawm a ni el thei. Assembly election tawm tawma insekhek hi a hun chu niin an lang naw bawk. An party sukhrat dan ding ngaituo hun lai a nih.

Manipur a Congress ministry buoina le Congress dissident MLA­hai thil ngen hi chingfel vat a ninaw a, a zuol pei chun ei hmabak chu President Rule a hung ni el naw ding maw? Arunachal Pradesh le Uttarakhand hai thil tuoka inthawk khawm hin thil um dan ding hmu le hriet thei a nih. Sawrkar thlungpui lungril chu ‘Rul in ka mei sir sienla’ a ti ang deu hi a ni a, Manipur sawrkar a buoi sawt chun, Manipur State chu President Rule hnuoia sie rin der naw nih. Hieng a ni lei hin Congress party in Manipur ministry buoi le dissident MLA­hai thil ngen hi an hmatienga a chingfel an party le an sawrkar ta dinga thiltha a hung ni ngei ring a um.


Post a Comment

Powered by Blogger.