AIZAWL, 9 MARCH (VIRTHLI NEWS): March ni 6 tuka a sinthawna hmun Sikkim- a, a room-a thisa a hmu Tv. Zoramthang Sungte, Pi Lalsiemkim,  Sailutar, Mizoram, a nau nei sun chu Thawlezan dar 10:14 bawr vel khan a ruong Aizawl hung tlung pui a ni a. Mizoram Hmar Welfare Committee (MHWC) huoihawtna in hnam sunga pawl le Kohran hran hran, ama lainatu sung le kuo le ruol le pai thahnem takin ropuitakin an lo tuok a nih.


A ruong hi MHWC Executive member Upa Robert L. Hmar, Zemabawk a in ah laklut a nia, hi taka hin inthlana le sunna hunser tawite hmang niin MHWC le HSA, General Headquarters hai baka HSA, Aizawl Jt. Hqrs; EFCI KTP, Zemabawk; EFCI Nuhmei Pawl, Zemabawk; SMS School, Zemabawk; Ahmednagar College-a a ruolthahai le mi dang dang ha'n puon inkhumna an nei bawk a nih.

Virthli a ei lo tarlang tah angin Tv Zoramthang hi Kids Foundation School, Sikkim- ah Competitive exam inbuotsai malama sinthawa um a ni a. March ni 6 tuk khan vangduoi tlak takin a room-ah thisa a hmu a nih.
Postmortem result dungzuiin lungphuchawl a thi nia hriet a nih.

Ama hi tlangval feltak, mi tumru le taimatak a ni bakah lekhathiem thei tak el, thaw rin khawm nei ngailo mi a nih.

A ruong hi Thawlezan dar 10: 40 khan Aizawl anthawkin Sailutar panpui a nia, Nilaini hin Sailutar thlanmuolah vuiliem ning a tih.

Ama hi Ahmednagar hmunah HSA thuoitu khawm lo ni ta hlak a nih.

Post a Comment

Powered by Blogger.