29 March 2016, Shillong (VIRTHLI): HSA General Headquarters, Education Department le Pu JL Sinate, Inspector (Excise & Customs) hai hmalaknain Shillong khawpuiah 21 March 2016 anthawk khan Free Competitive Exams Coaching (2016 edition) nei tan a nih.
Hi Coaching a hin sin zawng mek le inchuklai mi 50 laiin registration an thaw tah a; Pu JL Sinate chu main instructor a thang in, class hi ICI Sub-Hqrs, Shillong NSSU Hall ah nitin 6:30 AM - 8:00 AM a nei hlak a nih. Class lak hma zat tawngtaina nei hlak a ni bawk.
Hi Competitive Exams Coaching a hin SSC CGL Tier 1 syllabus thlur bik phawt a nih a, a tul angin syllabus dang hai khawm bawzui pei tum a tih.
HSA Gen. Hqrs. President Tv. Rothanglien Khawbung le HSA Assembly Speaker Pu Lalthlamuana Hmar hai chun 29 March 2016 khan coaching class hi hung kan in, President anthawk infuina thucha tha tak tak ngaithlak a nih. Chu el khelah, HSA hmalaknaa coaching hmun dang danga nei mek, hieng New Delhi, CCPur, Aizawl le Shillong hai hi co-ordination tha tak neia, mock test hai khawm a ruola neia, competitive spirit suktho nuom a um thu a hril sa bawk.
HSA Gen. Hqrs., Education Secretary, Tv. Joyful Thiek chun sum tienga tulna hai hung phuhruktu, a chunga thangpuina hung petu hai, Pu JL Sinate, main instructor le Hall thawveng tak a thlawna inhmangtirtu ICI Sub-Hqrs, Shillong thuoitu hai kuomah lawmthu a hril a, sin zawng mek hai le inchuklai haiin hieng ang coaching hi ngaipawimawa thang seng dingin fielna a siem bawk. Kum dang ang bawkin Hmar mi iemani zat tuta tum khawm sin hmu thar ei um nawk a beisei thu hai a hril.
Hi Coaching hih a nuom taphawt thang thei a nih a, registration fee meu khawm lak a ni nawh. Coaching neina ding a hin sum tieng thangpuina a hnuoia ang hin hmu le intiem a nih:
1. Josef V Tuolor, General Secretary, HSA Gen. Hqrs. - Rs. 1000;
2. Simon L Infimate, Vice-President, HSA Gen. Hqrs. - Rs. 1500;
3. Anonymous - Rs. 500;
4. Joyful Z Khawzawl, Assistant, UPSC & former OB, HSA Shillong JHQ - Rs. 1000;
5. Dr. John Pulamte, former President, HSA Gen. Hqrs & Hmar Inpui Gen. Hqrs. - Rs. 1000;
6. Margareth Tryte, Finance Secy., HSA Gen. Hqrs. - 1000
7. Dr. Immanuel Zarzosang Varte, Executive Director, CORE & former President, HSA JHQ Shillong - Rs. 1000
8. Rothanglien Khawbung, President, HSA Gen. Hqrs. - Rs. 1000
