AIZAWL, 18 MARCH (VIRTHLI NEWS): Tulaia 7th Mizoram Legislative Assembly inthung (Session) vawi 8- na nei mekah Mizoram Finance Minister Pu Lalsawta chun March ni 17 khan Financial Year 2016-17 sunga dingin Mizoram budget puitling Rs 8038.39 crore (vaibelsie) house ah a phar. Hi lai zing hin Sinlung Hills Development Council (SHDC) budget dingin kum danghai khan nuoi 300 chuong a ni lai tuta Financial Year a hin Rs 146.47 lakh chau ruohmang a nia, hi taka hin minor works a di'n Rs 66.59 lakh ruohmang a nih.


Financial Year (2015-16) hmasa khan budget puitling phar thei lo a hun sawttak 'Vote on Account' ah a fe hnungin Mizoram chun Autumn Session, October, 2015 a nei a khan Budget puitling pharin SHDC budget di'n Rs 187.10 lakh a lo ruohmang a nih.

Virthli palai leh an inbiekna ah SHDC Chairman Pu Hmingchungnunga chun tuta Financial Year a Council budget chu a tlawm taluo leia mak a ti thu a hrila, "inzak a um letling a nih," a tih. "Tlawm sienkhawm kum danghai khan chu nuoi 300 chuong a ni hlaka, tuta Rs 146.47 lakh chau an hung sie el hi a ngaina a um naw a nih. Sienkhawm ei thil tum tak chu Council sukpuitling a ni leiin tu pa- tu nu mani lo dema lo chier inthluok kha a thatak pa an nawa, elected council ei nei vat theina dingin ei renga hma ei lak tlang a tul ta takzet a nih," ti'n Virthli palai a hril.

Pu Hmingchungnunga chun budget phar hma khan state planning commission thuoituhai an hmupui thu hrilin proposal hai hung siema sum chu revise estimate ah hmu belsa thei a ni thu an lo hril niin a hrila, sienkhawm budget pass ta sa khawm hni dawk an tak laiah, propsal siema a thar la nawr dawk ding chu thil harsa a ring thu a hril.

A hril peina ah HPC le Mizoram sawrkar inremna sign tu (signatory) le Council Chairman vawi 3 na chel mektu Pu Hmingchungnunga chun Council election neina ding le inzawma file chu fepui mek a ni thu a hrila, tuhin General Administration Department (GAD) ah a lan tang mek thu hrilin bawzui mek a nih a ti a. Hi chung thu a hin Chief Secretary Lalmalsawma le Chief Minister Lal Thanhawla a khawm tulai hnai khan an inhmu pui thu le CM ngei khawmin file a kuomah a tlung pha hma a lo lak vat ding thu a hrila, sawrkar thuneituhai khawma file hi CM kuomah pek lut vat dingin hma an lak mek thu a hril.

Pu Hming chun inkhik-inkhal el chau thaw lo a, hnam anga hma lak tlang a tul tah thu hrilin, hnam sunga pawl thenkhat hai khawmin council puitlingna dingin rawl an nei pawi a ti naw thu le hnam ta dinga thataka hmalakna reng reng chu a thlawp tlat thu a hrila, mipui inthuruol a hun ta takzet a tih.

SHDC BUDGET TLANGPUI
1. 2010-2011 ah Rs 250.00 lakh
2. 2013-2014 ah Rs 300.00 lakh
3. 2014-2015 ah Rs 320.00 lakh
4. 2015-2016 ah Rs 187.10 lakh
5. 2016-2017 ah Rs 146.47 lakh

Post a Comment

Powered by Blogger.